គ្រូបង្រៀនអនុវិទ្យាល័យនៅខេត្តព្រៃវែង មួយចំនួន រិះគន់មន្ត្រីមន្ទីរអប់រំ យុវជន និងកីឡាខេត្ត ថាបានយកប្រាក់ថ្លៃធ្វើលិខិតបញ្ជាក់ពីអង្គភាពរបស់គ្រូបង្រៀនម្នាក់ ៥ពាន់រៀល ដោយពុំមានវិក្កយបត្រ។
គ្រូបង្រៀនស្នើឲ្យក្រសួងអប់រំ កំណត់ពីតម្លៃនៃការធ្វើលិខិតបញ្ជាក់ឲ្យបានច្បាស់លាស់ ជៀសវាងកុំឲ្យកើតមានអំពើពុករលួយពីការធ្វើលិខិតស្នាម។ ប៉ុន្តែ មន្ត្រីអប់រំខេត្ត បដិសេធចំពោះការចោទប្រកាន់នេះ។
គ្រូបង្រៀនអនុវិទ្យាល័យដែលបង់ថ្លៃធ្វើលិខិតស្នាមនោះ លើកឡើងថា មន្ទីរអប់រំខេត្តមិនគួរយកប្រាក់ធ្វើលិខិតបញ្ជាក់ពីគ្រូបង្រៀនឡើយ ពីព្រោះថា ពួកគាត់មានប្រាក់ខែតិច ហើយម្យ៉ាងទៀត ការបញ្ជាក់ធ្វើលិខិតស្នាមនោះ ក្នុងគោលបំណងទៅប្រឡងតជំនាញគ្រូ ដើម្បីលើកកម្ពស់ចំណេះដឹងបន្ថែមមួយកម្រិតទៀត។
គ្រូបង្រៀននៅស្រុកបាភ្នំ ខេត្តព្រៃវែង ម្នាក់ ថ្លែងក្នុងលក្ខខណ្ឌមិនឲ្យបញ្ចេញឈ្មោះ នៅថ្ងៃទី៨ សីហា ថា មន្ត្រីនៃមន្ទីរអប់រំ យុវជន និងកីឡា ខេត្តព្រៃវែង យកថ្លៃធ្វើលិខិតបញ្ជាក់ពីអង្គភាពគ្រូ ដែលយកទៅប្រឡងតជំនាញក្នុងតម្លៃក្រដាស ៣សន្លឹក ៥ពាន់រៀលពីគ្រូបង្រៀនម្នាក់ ដោយពុំបានបញ្ជាក់ហេតុផល ដែលយកប្រាក់នោះទៅប្រើប្រាស់ថាយ៉ាងណាច្បាស់លាស់ឡើយ។ គ្រូបង្រៀនរូបនេះចាត់ទុកការយកប្រាក់ធ្វើលិខិតស្នាមក្នុងអង្គភាព ថាជាទង្វើមួយផ្ដេសផ្ដាស យកប្រាក់ខ្ពស់ហួសហេតុ មិនសមស្របទៅនឹងប្រាក់ខែរបស់គ្រូបង្រៀនដែលតិចតួចស្រាប់នោះទេ៖ «ដូចថា ដើរខ្សែលើ ខ្ញុំមិនពេញចិត្តនឹងការយកអ៊ីចឹងៗ បើសិនមានច្បាប់ទម្លាប់ចេញមានអ៊ីចឹងមក វាស្រួល ខ្ញុំប្រតិបត្តិតាមទៅ។ ហើយបើសិនជាអត់មាន ខ្ញុំគិតថា នេះជាការដើរខ្សែលើ ហើយមាក់ងាយគ្រូបង្រៀន ដូចជាពួកខ្ញុំហ្នឹង យកអត់ប្រាប់គ្នាយកទៅធ្វើអីៗ ចេះតែយកតែផ្ដេសផ្ដាស។ គ្រូបង្រៀនប្រាក់ខែ ៥០ម៉ឺន ចាយវាមិនគ្រាន់ផង ហើយទៅធ្វើអ៊ីចឹងទៀត បើសិនជារិះថាំបានសាំងមួយលីត្រ ៥ពាន់ហ្នឹង»។
ឆ្លើយតបនឹងការចោទប្រកាន់នេះ ប្រធានការិយាល័យបុគ្គលិកនៃមន្ទីរអប់រំ យុវជន និងកីឡាខេត្តព្រៃវែង លោក លី ហឿង បដិសេធចំពោះការចោទប្រកាន់របស់គ្រូបង្រៀននោះ ដោយលើកឡើងថា ខាងមន្ទីរពុំបានកំណត់ ឬតម្រូវឲ្យគ្រូបង្រៀនណាម្នាក់បង់ប្រាក់ថ្លៃធ្វើលិខិតបញ្ជាក់ណាមួយនោះទេ៖ «បើសិនជាលោកគ្រូអ្នកគ្រូសរសេរហ្វមតាមរបស់ក្រសួង អ៊ីចឹងលោកគ្រូអ្នកគ្រូសរសេរទៅហើយ មកដាក់មក គឺអត់មានប៉ះពាល់លុយម៉ារៀលមួយរយអីទេ។ ប៉ុន្តែបើសិនជាអស់លោកថាហេ! ខ្ជិលណាស់ សុខចិត្តទិញជំនួសពាក្យអីទៅ អាហ្នឹងមានគេចែកជូន បាទ! អាហ្នឹងសុំតែថ្លៃក្រដាសវិញទេ ថ្លៃក្រដាសប៉ុន្មានដែរ? ថ្លៃក្រដាសឧទាហរណ៍មួយចំហៀង យើងយក ៥០ យកទៅថតគេ ឬកាន់ទៅខ្លួនឯងក៏បានដែរ អត់បញ្ហាទេ ម៉ាចំហៀងហ្នឹង ៥០រៀលបាទ!»។
ចំណែកឯមន្ត្រីសង្គមស៊ីវិលវិញ ចាត់ទុកការលើកឡើងរបស់មន្ត្រីអប់រំខេត្តនេះថា ជាលេសមួយដើម្បីដោះបន្ទុកពីការទទួលខុសត្រូវរបស់ខ្លួនប៉ុណ្ណោះ។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន កត់សម្គាល់ថា រាល់ការធ្វើលិខិតស្នាមផ្សេងៗពីមន្ត្រីអប់រំ មិនថាជាគ្រូបង្រៀន ឬជាលិខិតបញ្ជាក់របស់សិស្សសាលានោះទេ គឺជៀសមិនផុតពីការបង់ប្រាក់ឡើយ។ លោកចាត់ទុកបញ្ហានេះថា ជាអំពើពុករលួយដដែលៗ ដោះស្រាយមិនចេញ ដោយសារប្រាក់ខែរបស់គ្រូបង្រៀនមិនគ្រប់គ្រាន់សម្រាប់ដោះស្រាយជីវភាពគ្រួសារ៖ «ក្រសួងត្រូវតែពិនិត្យមើលរឿងហ្នឹង កុំឲ្យចេះតែជំរិតយកលុយពីគ្រូបង្រៀន ឬមួយបើមានការណែនាំណាមួយ ត្រូវប្រកាសជាសាធារណៈ ឬមួយឲ្យមន្ទីរ ឬការិយាល័យនីមួយៗ សរសេរបម្លែងដាក់នៅក្ដារខៀនតែម្ដងទៅ ដើម្បីឲ្យមានតម្លាភាពបាទ!»។
លោកបន្តថា ក្រសួងអប់រំ ពុំបានតម្រូវឲ្យគ្រូបង្រៀនបង់ប្រាក់ថ្លៃបញ្ជាក់ធ្វើលិខិតស្នាម ដើម្បីយកទៅប្រឡងបន្តជំនាញគ្រូឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។