ក្រុមគ្រូបង្រៀននៅតាមសាលាដាច់ស្រយាលមួយចំនួន នៃស្រុកភ្នំក្រវាញ ខេត្តពោធិ៍សាត់ ចោទមន្ត្រីការិយាល័យអប់រំស្រុកនេះ ថាបានកិបកេងប្រាក់តំបន់របស់គ្រូបង្រៀន។ ពួកគាត់អះអាងថា ក្រៅពីបញ្ហាកិបកេងនេះ មានគ្រូបង្រៀនខ្លះកំពុងប៉ះពាល់បញ្ហាជីវភាព ដោយសារប្រាក់តំបន់ និងប្រាក់បង្រៀនសិស្សថ្ងៃព្រហស្បតិ៍ អាក់ខានបើកជាច្រើនខែមកហើយ។
គ្រូបង្រៀនកម្រិតបឋមសិក្សាជាច្រើននាក់ក្នុងស្រុកភ្នំក្រវាញ នៅថ្ងៃទី១៥ ខែឧសភា សម្ដែងការខកចិត្តចំពោះថ្នាក់ដឹកនាំស្ថាប័នអប់រំ ដោយពួកគាត់មិនទាន់បើកប្រាក់បេសកកម្មបង្រៀនសិស្សតំបន់ដាច់ស្រយាលប្រចាំខែចំនួន ៤ម៉ឺនរៀល តាំងពីខែតុលា ឆ្នាំ២០១៤។ ចំណែកប្រាក់បង្រៀនសិស្សថ្ងៃព្រហស្បតិ៍ សរុបក្នុងមួយខែជាង ៤ម៉ឺនរៀលទៀត ក៏មិនទាន់បានបើកតាំងពីខែមករា ឆ្នាំ២០១៥ មកដែរ។
គ្រូម្នាក់បង្រៀននៅសាលាបឋមសិក្សាសំរោង អ្នកស្រី ប្រាង្គ ចំណាន មានប្រសាសន៍ថា នៅរៀងរាល់ថ្ងៃបើកប្រាក់តំបន់ ឬប្រាក់បង្រៀនថ្ងៃព្រហស្បតិ៍ មានមន្ត្រីការិយាល័យអប់រំស្រុកភ្នំក្រវាញ ចំនួនបីនាក់ បានដាក់ហិបសុំលុយពីគ្រូបង្រៀនក្នុងម្នាក់ចន្លោះពី ១.៥០០រៀល ទៅ ២ពាន់រៀល។ អ្នកស្រីយល់ថា ការសុំប្រាក់ដោយមិនប្រាប់ពីគោលបំណងច្បាស់លាស់នេះ គឺជារឿងមិនត្រឹមត្រូវ៖ «មន្ត្រីការិយាល័យអប់រំយក (ប្រាក់តំបន់) ម្ដងមួយខែ ឬពីរខែអ៊ីចឹង គាត់ប្រើវប្បធម៌មួយ គឺពួកគាត់នាំគ្នាអង្គុយតម្រៀបគ្នាចាំសុំលុយពីលោកគ្រូអ្នកគ្រូម្នាក់ ១.៥០០រៀល ទៅ ២ពាន់រៀល មានដូចជាលោកគ្រូ (ជាមន្ត្រីការិយាល័យអប់រំស្រុក) លោក តូ ជីវណ្ឌី លោក គៀត សាន និងលោកគ្រូ អ៊ុន ណូ»។
ចំណែកគ្រូម្នាក់ទៀតបង្រៀននៅសាលាបឋមសិក្សាលាជ លោក សំ ឈឿន បញ្ជាក់ថា គ្រូបង្រៀនភាគច្រើនពឹងផ្អែកលើប្រាក់បង្រៀនបន្ថែមម៉ោង ឬប្រាក់តំបន់ គួបផ្សំនឹងប្រាក់ខែ ដើម្បីទ្រទ្រង់ជីវភាពប្រចាំថ្ងៃ។ បច្ចុប្បន្ន ក្រៅពីបង្រៀនសិស្ស រូបលោកបានឆ្លៀតដើរថតរូបតាមពិធីផ្សេងៗ ដើម្បីរកកម្រៃបន្ថែម ប៉ុន្តែវាជាការលំបាកសម្រាប់គ្រូដែលមានមុខរបរគ្រូបង្រៀនតែមួយមុខនោះ៖ «ខ្ញុំសូមឲ្យតំណាងខាងក្រសួងអប់រំ មេត្តាជួយសម្រួលនូវប្រាក់បៀវត្សរ៍ទៀងពេល ប្រាក់តំបន់ និងប្រាក់បង្រៀនថ្ងៃព្រហស្បតិ៍ គឺសុំឲ្យមួយខែបើកឲ្យមួយខែតែម្ដងមក កុំឲ្យពន្យារពេលយូរៗពេក»។
ឆ្លើយតបបញ្ហានេះ ប្រធានការិយាល័យអប់រំស្រុកភ្នំក្រវាញ លោក អ៊ុំ គឹមហ៊ន ថ្លែងទទួលស្គាល់ថា បុគ្គលិកការិយាល័យ និងលោកគ្រូអ្នកគ្រូសរុបជាង ៥០០នាក់ ពិតជាអាក់ខានបើកប្រាក់តំបន់ និងគ្រូខ្លះមិនទាន់ទទួលប្រាក់បង្រៀនថ្ងៃព្រហស្បតិ៍ ជាច្រើនខែមកហើយមែន។ ប៉ុន្តែរយៈពេលជាង ២០ថ្ងៃមកហើយដែលលោកបញ្ជូនឯកសារបើកប្រាក់នេះទៅមន្ទីរ ដើម្បីដោះស្រាយ តែមិនទាន់ឆ្លើយតប។
ចំពោះការចោទរបស់ក្រុមគ្រូបង្រៀនរឿងកិបកេងប្រាក់វិញ លោក អ៊ុំ គឹមហ៊ន បដិសេធថា មន្ត្រីរបស់លោកមិនបានប្រព្រឹត្តអំពើពុករលួយអ្វីនោះទេ ហើយប្រាក់ដែលសុំពីគ្រូបង្រៀននោះ គឺក្នុងម្នាក់តែ ៥០០រៀលប៉ុណ្ណោះ មិនបានសុំច្រើនដូចការចោទប្រកាន់នោះទេ ហើយប្រាក់នេះត្រូវចំណាយទៅលើការជួលឡានដឹកប្រាក់ និងថ្លៃកម្លាំងសមត្ថកិច្ចតាមការពារ៖ «បើមិនសុំគេ យើងអត់មានសោហ៊ុយទៅដឹកទេ ព្រោះយើងត្រូវយកឡាន យកនគរបាលទៅបើក។ បើករហូតទើបរយៈពេលមួយពីរខែនេះទេ ដែលយើងកែទម្រង់ (របៀបបើកប្រាក់តាមធនាគារ) យើងអត់បានបើក ប៉ុន្តែការឈ្មោះ ឬបញ្ជីអីហ្នឹងបានឲ្យទៅថ្នាក់លើអស់ហើយ ប៉ុន្តែថ្នាក់មន្ទីរ និងថ្នាក់មុខងារសាធារណៈ មិនទាន់ទម្លាក់»។
ទាក់ទងបញ្ហានេះដែរ ប្រធានមន្ទីរអប់រំ យុវជន និងកីឡា ខេត្តពោធិ៍សាត់ លោក សួង សុភី ថ្លែងបែបគំរោះគំរើយថា ការងារនេះលោកបានចាត់ចែង និងបញ្ជូនឯកសារទៅថ្នាក់លើអស់ហើយ រួចក៏ចុចផ្ដាច់ទូរស័ព្ទតែម្ដង។ ការឆ្លើយតបរបស់ប្រធានមន្ទីរនេះ ត្រូវប្រធានសមាគមគ្រូបង្រៀនកម្ពុជាឯករាជ្យ ប្រចាំខេត្តពោធិ៍សាត់ អ្នកស្រី គឹម តារានី រិះគន់ថា ជាសម្ដីអសុរោះមិនទទួលខុសត្រូវ និងធ្វើឲ្យប៉ះពាល់ដល់វិស័យអប់រំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។