ជាញឹកញាប់ គេតែងតែឮគ្រូបង្រៀនខ្លះនៅថ្នាក់វិទ្យាល័យតាមបណ្ដាខេត្តនៃប្រទេសកម្ពុជា បាននាំគ្នាតវ៉ា និងទាមទារបើកប្រាក់បង្រៀនបន្ថែមម៉ោង ដោយសារការបើកប្រាក់នេះយឺតយ៉ាវជាច្រើនខែ ជាដើម។ បញ្ហាដូចគ្នានេះ គឺកំពុងតែកើតមាននៅវិទ្យាល័យវ៉ារិន នៃស្រុកវ៉ារិន ដែលជាតំបន់ដាច់ស្រយាលចម្ងាយជាង ៨០គីឡូម៉ែត្រ នៅភាគខាងត្បូងឆៀងខាងលិចពីទីរួមខេត្តសៀមរាប។
ក្រុមគ្រូបង្រៀនមួយចំនួននៅវិទ្យាល័យវ៉ារិន បានរអ៊ូរទាំថា ពួកគេកំពុងពិបាកនឹងការរស់នៅប្រចាំថ្ងៃ ដោយសារមិនមានប្រាក់គ្រប់គ្រាន់សម្រាប់ទិញម្ហូបអាហារ និងចាក់សាំងម៉ូតូ ដើម្បីជាមធ្យោបាយធ្វើដំណើរទៅបង្រៀនសិស្សទេ។
ការត្អូញត្អែរបែបនេះ កើតឡើងបន្ទាប់ពីគេអះអាងថា រដ្ឋាភិបាលបានធ្វើការយឺតយ៉ាវក្នុងរឿងបើកប្រាក់បង្រៀនបន្ថែមម៉ោង និងប្រាក់តំបន់មកឲ្យពួកគេ។
គ្រូបង្រៀនថ្នាក់ទី១២ ម្នាក់ក្នុងចំណោមគ្រូបង្រៀនជាច្រើនទៀតនៅវិទ្យាល័យវ៉ារិន នៃស្រុកវ៉ារិន គឺលោក គូ ឃា។ លោកមានប្រសាសន៍ថា រូបលោកក៏ដូចជាគ្រូបង្រៀនជាច្រើនទៀត កំពុងជួបការខ្វះខាតសម្រាប់ការរស់នៅប្រចាំថ្ងៃ។ លោក គូ ឃា មានប្រសាសន៍ទៀតថា នៅសាលារបស់លោក គឺមន្ទីរអប់រំ យុវជន និងកីឡា បានរៀបចំឲ្យមានការបង្រៀនបន្ថែមម៉ោង ព្រមទាំងឧបត្ថម្ភប្រាក់តំបន់ដល់គ្រូទាំងអស់បន្ថែមទៀត ដោយសារតែតំបន់នោះ គឺជាទីជនបទដាច់ស្រយាល។ លោក គូ ឃា ឲ្យដឹងថា តាមធម្មតាប្រាក់បង្រៀនបន្ថែមម៉ោងនៅសាលារបស់លោកយ៉ាងហោចណាស់ ក៏គ្រូម្នាក់អាចទទួលបានពីជាង ១០ម៉ឺនរៀល ទៅជិត ២០ម៉ឺនរៀល ព្រមទាំងប្រាក់តំបន់ចំនួន ៤ម៉ឺនរៀលទៀតក្នុង ១ខែៗ ក៏ប៉ុន្តែរយៈពេល ៩ខែហើយ ប្រាក់ទាំងនេះនៅមិនទាន់បើកមកឲ្យគ្រូបង្រៀនទេ៖ «គ្រូសុទ្ធតែមកពីខេត្តឆ្ងាយៗ ហើយស្រុកនេះជាតំបន់ដាច់ស្រយាលផង ខ្វល់នឹងការហូបចុក ស៊ីចាយវាអត់ទាន់គ្រប់គ្រាន់។ មានគ្រូខ្លះគាត់រត់ទៅខ្ចីលុយធនាគារខ្ចីអីចាយសិនទៅ»។
គ្រូបង្រៀនម្នាក់ទៀតឈ្មោះ ទួន បូរ៉ា បានមានប្រសាសន៍ប្រហាក់ប្រហែលគ្នាថា ជារៀងរាល់ថ្ងៃ គ្រូបង្រៀនដែលនៅតំបន់ដាច់ស្រយាលដូចពួកគាត់ បើទីពឹងតែលើប្រាក់ខែចំនួន ៨០ម៉ឺនរៀល គឺប្រាកដជាពិបាកខ្លាំងណាស់។ គ្រូបង្រៀនដដែលបញ្ជាក់ថា ប្រាក់ខែគ្រូបង្រៀនពេលបច្ចុប្បន្ន មិនអាចដោះស្រាយលើការរស់នៅរាល់ថ្ងៃបានទាំងអស់ទេ គឺត្រូវពឹងផ្អែកទៅលើប្រាក់បង្រៀនបន្ថែមម៉ោង និងប្រាក់ឧបត្ថម្ភតំបន់ខ្លះទៀត ក៏ប៉ុន្តែនៅពេលដែលប្រាក់បង្រៀនបន្ថែមម៉ោង និងប្រាក់ឧបត្ថម្ភតំបន់ មិនឃើញបើករយៈពេល ៩ខែមកហើយនោះ គឺជាបញ្ហាធ្ងន់ធ្ងរដែលគ្រូបង្រៀនកំពុងតែប្រឈមមុខ៖ «ប្រាក់បន្ថែមម៉ោងដែលពួកខ្ញុំបានមកហ្នឹង គឺសម្រាប់ទិញសម្លៀកបំពាក់។ ទី២ គឺទាក់ទងនឹងការចាក់សាំងម៉ូតូជិះទៅបង្រៀន ជាពិសេសគឺម្ហូបអាហារ។ នៅកន្លែងខ្ញុំម្ហូបអាហារថ្លៃខុសពីទីប្រជុំជន ពួកខ្ញុំនៅកន្លែងឆ្ងាយដាច់ស្រយាល ជាពិសេសគឺគ្មានផ្សារ»។
ក្រុមគ្រូបង្រៀននៅវិទ្យាល័យវ៉ារិន អំពាវនាវឲ្យមន្ទីរអប់រំ យុវជន និងកីឡា ខេត្តសៀមរាប ធ្វើយ៉ាងណាពន្លឿនការបើកប្រាក់បង្រៀនបន្ថែមម៉ោងនេះ ពីព្រោះនៅតាមសាលាជាច្រើនទូទាំងប្រទេស គឺបានបើកអស់ហើយ។
នាយកវិទ្យាល័យវ៉ារិន លោក រឹម ចាន់សេន មានប្រសាសន៍ថា គ្រូបង្រៀនភាគច្រើននៅសាលារបស់លោក គឺសុទ្ធតែមានជីវភាពយ៉ាប់យ៉ឺន ហើយពេលដែលប្រាក់បង្រៀនបន្ថែមម៉ោងបើកយឺតយ៉ាវទៀតនោះ គឺមានការពិបាកខាងជីវភាពជាខ្លាំង ក៏ប៉ុន្តែលោកមិនអាចជួយដោះស្រាយបានទេ៖ «ដូចជាខាងគ្រូបឋមសិក្សាគេមានប្រាក់ពីរពេល ប្រាក់នោះគេបើកអស់ហើយ ឯខាងមធ្យមប្រាក់បន្ថែមម៉ោងវាដូចជាប្រាក់ពីរពេលដែរ ប៉ុន្តែមិនទាន់បើក អ៊ីចឹងបានជាគ្រូបង្រៀននាំគ្នាសួរនាំ»។
កាលពីសប្ដាហ៍មុន ក្រុមគ្រូបង្រៀនខ្លះនៅវិទ្យាល័យវ៉ារិន បានផ្ញើសារអេឡិចត្រូនិកមកវិទ្យុអាស៊ីសេរី ដោយរអ៊ូរទាំជុំវិញបញ្ហាបើកប្រាក់បង្រៀនបន្ថែមម៉ោង និងប្រាក់តំបន់យឺតយ៉ាវនេះ។ នៅក្នុងសារលិខិត បានរ៉ាយរ៉ាប់ថា នៅវិទ្យាល័យវ៉ារិន ក្នុងខេត្តសៀមរាប គឺជាវិទ្យាល័យតែមួយគត់នៅតំបន់ដាច់ស្រយាល គ្មានផ្សារ និងគ្មានមណ្ឌលសុខភាពនៅជិត ហើយគ្រូបង្រៀនសុទ្ធតែមកពីខេត្តឆ្ងាយៗ។ ចំណែកឯប្រាក់បង្រៀនបន្ថែមម៉ោងបើកយឺតយ៉ាវទៀតនោះ គឺកាន់តែធ្វើឲ្យគ្រូបង្រៀនជួបការលំបាកថែមទៀត។
ប្រធានការិយាល័យអប់រំ យុវជន និងកីឡា ស្រុកវ៉ារិន លោក កែវ សំងាត់ មានប្រសាសន៍ថា បញ្ហាបើកប្រាក់បង្រៀនបន្ថែមម៉ោងមានការយឺតយ៉ាវនេះ មិនមែនតែវិទ្យាល័យវ៉ារិន មួយប៉ុណ្ណោះទេ គឺនៅទូទាំងខេត្តសៀមរាប។ លោកប្រធានការិយាល័យអប់រំ យុវជន និងកីឡាស្រុក បញ្ជាក់ទៀតថា នៅវិទ្យាល័យវ៉ារិន នេះ គឺមានគ្រូបង្រៀនជាង ១០នាក់ ហើយភាពយឺតយ៉ាវនៃការបើកប្រាក់បង្រៀនបន្ថែមម៉ោងនេះ គឺដោយសារតែមន្ទីរអប់រំ យុវជន និងកីឡាខេត្តសៀមរាប កំពុងរៀបចំបញ្ចូលសាច់ប្រាក់ទៅតាមគណនេយ្យ ហើយកំពុងផ្ទៀងផ្ទាត់ឡើងវិញខ្លាចក្រែងគ្រូខ្លះបានទទួលប្រាក់ខ្វះ និងខ្លះទៀតទទួលលើសចំនួន ជាដើម៖ «រឿងថវិកា គឺនៅខាងមន្ទីរអប់រំ យុវជន និងកីឡា ជាអ្នកចាត់ចែង។ ខាងខ្ញុំបានតែធ្វើសំណើសុំឲ្យទេ ប៉ុន្តែខាងមន្ទីរជាអ្នកទម្លាក់លុយឲ្យ អត់ដឹងថាកំណត់នៅថ្ងៃណាទេ»។
បញ្ហាដែលក្រុមគ្រូបង្រៀនទាមទារបើកប្រាក់បង្រៀនបន្ថែមម៉ោងនេះ ឧស្សាហ៍កើតមានញឹកញាប់នៅតាមបណ្ដាខេត្តខ្លះក្នុងប្រទេសកម្ពុជា។
កាលពីខែមិថុនា កន្លងទៅ ក្រុមគ្រូបង្រៀនជាច្រើននាក់នៅវិទ្យាល័យគូលែន នៃស្រុកគូលែន ខេត្តព្រះវិហារ ក៏ធ្លាប់នាំគ្នាធ្វើកូដកម្មមិនបង្រៀនសិស្ស ដើម្បីទាមទារបើកប្រាក់បង្រៀនបន្ថែមម៉ោងនេះដែរ។ ការទាមទាររបស់ក្រុមគ្រូបង្រៀនកាលណោះ បានធ្វើឲ្យនាយកវិទ្យាល័យគូលែន បង្ខំចិត្តលាលែងពីមុខតំណែង នៅពេលដែលមិនអាចរកប្រាក់បង្រៀនបន្ថែមម៉ោងបើកជូនលោកគ្រូអ្នកគ្រូបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។