គ្រូបង្រៀនមួយចំនួននៅវិទ្យាល័យ ជា ស៊ីម បឹងកេងកង បានប្ដឹងនាយកសាលា លោក ង៉ូវ ឈុនហាក់ ទៅកាន់រដ្ឋមន្ត្រីក្រសួងអប់រំ ពាក់ព័ន្ធនឹងរឿងប្រព្រឹត្តអំពើពុករលួយ អសមត្ថភាពក្នុងការគ្រប់គ្រង និងបានគ្រប់គ្រងបែបអនាធិបតេយ្យនៅក្នុងវិទ្យាល័យ។
ក្រុមគ្រូបង្រៀនវិទ្យាល័យនេះ ស្នើឲ្យក្រសួងអប់រំ ដកនាយកសាលានេះចេញ។ ចំណែកឯនាយកសាលា បដិសេធចំពោះការចោទប្រកាន់នេះ។
នៅក្នុងពាក្យបណ្ដឹងនោះ គ្រូបង្រៀននៅវិទ្យាល័យ ជា ស៊ីម បឹងកេងកង ស្នើសុំឲ្យរដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ឲ្យដកតំណែងនាយកសាលានេះចេញ និងស្នើឲ្យស្ថាប័ននេះស្រាវជ្រាវ និងត្រួតពិនិត្យលើភាពមិនប្រក្រតីក្នុងតួនាទី និងភារកិច្ចរបស់នាយកសាលានេះ។
គ្រូបង្រៀនម្នាក់ក្នុងចំណោមគ្រូបង្រៀនដទៃទៀត ដែលបានដាក់ពាក្យប្ដឹងទៅកាន់ក្រសួងអប់រំ លោកគ្រូ ហូ ផល្លា បានឲ្យដឹងថា លោកជាជនរងគ្រោះមួយរូបបានរងនូវការគំរាមកំហែងផ្លូវកាយ ផ្លូវចិត្តពីសំណាក់នាយក និងបក្ខពួក។ លោកថា នាយកសាលាខ្វះនូវគរុកោសល្យ ធ្វើឲ្យចំនួនសិស្សនៅក្នុងវិទ្យាល័យបានថយពីចំនួនជាង ៣ពាន់នាក់ មកនៅប្រមាណ ១ពាន់នាក់ ហើយសព្វថ្ងៃមានសិស្សមិនដល់ ១ពាន់នាក់មករៀន ដោយសារវិន័យសាលាត្រូវបានអនុវត្តធូររលុង៖ «ការអប់រំនៅក្នុងវិទ្យាល័យ ជា ស៊ីម បឹងកេងកង បានស្រុតចុះខ្លាំង ហើយសភាពអប់រំទាំងគ្រូទាំងសិស្សមានសភាពកាន់តែរញ៉េរញ៉ៃ។ គ្រូ គឺថាមានជម្លោះនៅក្នុងអង្គប្រជុំ ហើយរឿងចាយលុយនៅក្នុងសាលាអត់មានបញ្ជីអីច្បាស់លាស់ប្រាប់មកបុគ្គលិក»។
គ្រូបង្រៀនរូបនេះបានលើកឡើងទៀតថា នាយកវិទ្យាល័យ ជា ស៊ីម បឹងកេងកង មិនត្រឹមតែខ្វះនូវគរុកោសល្យ ធ្វើឲ្យចំនួនសិស្សនៅក្នុងវិទ្យាល័យបានថយចុះប៉ុណ្ណោះទេ ហើយចំពោះទីធ្លាសាលាវិញ បានពុះជាកង់ជួលឲ្យឯកជនរកស៊ី មានជួលដាក់ឡាន ជួលដាក់កន្លែងលេងបាល់ ជាដើម។ លោកសុំឲ្យក្រសួងអប់រំ ត្រួតពិនិត្យករណីនេះ ដើម្បីលើកកម្ពស់គុណភាពអប់រំនៅក្នុងសាលាឡើងវិញ។
ជាមួយគ្នានេះដែរ ពាក្យបណ្ដឹងរបស់គ្រូបង្រៀននៅវិទ្យាល័យ ជា ស៊ីម បឹងកេងកង ដែលបានដាក់ទៅកាន់ក្រសួងអប់រំ កាលពីថ្ងៃទី៦ ខែកក្កដា ក៏បានទទូចឲ្យក្រសួងអប់រំ និងស្ថាប័នពាក់ព័ន្ធ ដកនាយកសាលាចេញពីតំណែង ហើយក្រសួងត្រូវតែពិនិត្យ ស្រាវជ្រាវ និងតាមដានទង្វើរបស់ លោក ង៉ូវ ឈុនហាក់ ដើម្បីលុបបំបាត់អំពើពុករលួយ កសាងទំនុកចិត្តលោកគ្រូអ្នកគ្រូនៅវិទ្យាល័យនេះឡើងវិញ។
ចំណែកនាយកវិទ្យាល័យ ជា ស៊ីម បឹងកេងកង លោក ង៉ូវ ឈុនហាក់ បានបដិសេធការចោទនោះ ដោយលោកបានអះអាងថា គ្មានការពិតទាំងអស់។ លោកថា ថវិកាចំណាយមានគណៈកម្មការត្រឹមត្រូវ មានបញ្ជីស្នាមត្រឹមត្រូវ មិនពិតដូចការចោទប្រកាន់នោះទេ៖ «រឿងចោទខ្ញុំហ្នឹងវាអត់ការពិតទេ កន្លងមកការចំណាយផ្សេងៗ គឺមានលិខិតស្នាមត្រឹមត្រូវ»។
ឆ្លើយតបនឹងបញ្ហាចម្រូងចម្រាសនៅវិទ្យាល័យ ជា ស៊ីម បឹងកេងកង នេះ នាយកខុទ្ទកាល័យ និងជាអ្នកនាំពាក្យក្រសួងអប់រំ យុវជន និងកីឡា លោក រស់ សាលីន ឲ្យដឹងថា កន្លងមកក្រសួងធ្លាប់ចុះអធិការកិច្ចនៅវិទ្យាល័យនេះរួចមកហើយ ប៉ុន្តែរាល់បណ្ដឹងទាំងឡាយណាដែលបានដាក់មកកាន់ក្រសួងជាថ្មីទៀតនោះ ក្រសួងនឹងចុះទៅពិនិត្យមើលជាក់ស្តែងទៅលើស្ថានភាពនៅវិទ្យាល័យនេះ៖ «នៅក្នុងករណីនេះ ក្រសួងនឹងចុះអធិការកិច្ចជាក់ស្តែង ដោយមើលលើអង្គហេតុទាំងឡាយណាដែលទាក់ទងនឹងការចោទប្រកាន់នេះ ក្រោយពីក្រសួងទទួលបានពាក្យបណ្ដឹង»។
កាលពីថ្ងៃទី១ ខែកក្កដា កន្លងទៅ នៅវិទ្យាល័យ ជា ស៊ីម បឹងកេងកង ធ្លាប់មានរឿងរ៉ាវកើតឡើងពីជម្លោះសិស្សស្រីថ្នាក់ទី១០ ម្នាក់ មានការបង្ហោះរូបភាពចែកចាយតាមហ្វេសប៊ុក (facebook) ហើយនៅរសៀលថ្ងៃទី៣ ខែកក្កដា ក្រុមគ្រួសារសិស្សស្រីរូបនោះ បានមកសុំឲ្យនាយកវិទ្យាល័យពន្យល់ពីការអនុញ្ញាតឲ្យមនុស្សវ័យចំណាស់ ចូលទៅទះកំផ្លៀងកូនស្រីគាត់ដល់ក្នុងទីធ្លាសាលា។ ទោះជាយ៉ាងណា ទាំងក្រុមគ្រួសារ និងសិស្សស្រីដែលត្រូវគេទះកំផ្លៀងនោះ បានទទួលយកសំណងជំងឺចិត្ត ៥០០ដុល្លារ បញ្ចប់រឿងអស់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។