លោកគ្រូអ្នកគ្រូប្រមាណ ៩០នាក់ នៅវិទ្យាល័យសម្ដេចឪសម្ដេចម៉ែ ខេត្តរតនគិរី បានផ្ដិតមេដៃតវ៉ាភ្លាមៗមិនទទួលយកការសម្រេចឲ្យពួកគាត់បង្រៀនក្នុងមួយថ្ងៃ ៦ម៉ោងខុសពីចំនួនម៉ោងបង្រៀនរៀងរាល់ឆ្នាំដែលបានកំណត់ក្នុងកម្មវិធីបង្រៀនឡើយ។
ការតវ៉ានេះធ្វើឡើងក្នុងកិច្ចប្រជុំកាលពីថ្ងៃសៅរ៍ ទី១២ ខែតុលា នាវិទ្យាល័យសម្ដេចឪសម្ដេចម៉ែ ខេត្តរតនគិរី ដោយមានមន្ត្រីមន្ទីរអប់រំខេត្ត និងគ្រូជាង ៩០នាក់ចូលរួមប្រជុំ។
គ្រូបង្រៀនសុំមិនឲ្យបញ្ចេញឈ្មោះមួយរូប នៅថ្ងៃអាទិត្យ ទី១៣ ខែតុលា មានប្រសាសន៍បញ្ជាក់ថា កម្មវិធីបង្រៀនរៀងរាល់ឆ្នាំរបស់ក្រសួងអប់រំ គឺគ្រូម្នាក់បង្រៀន ៤ម៉ោងក្នុងមួយថ្ងៃ ក៏ប៉ុន្តែកម្មវិធីថ្មីតម្រូវឲ្យគ្រូបង្រៀន ៥ម៉ោង ឬ ៦ម៉ោង។
លោកបន្តថា គ្រូបង្រៀនមានប្រាក់បៀវត្សរ៍តិចតួច ហើយបើកមិនទៀងទាត់ទៀត ដែលធ្វើឲ្យការចំណាយក្នុងគ្រួសារខ្វះខាតរៀងរាល់ខែ ដូច្នេះគ្រូខ្លះត្រូវចេញទៅរកការងារក្រៅម៉ោងបន្ថែមដើម្បីបានប្រាក់កម្រៃបង្គ្រប់ចំណាយ ហេតុនេះការបន្ថែមម៉ោងបង្រៀនដោយមិនមានបន្ថែមប្រាក់បៀវត្សរ៍ដល់គ្រូបង្រៀន នឹងជំរុញឲ្យជីវភាពគ្រូបង្រៀនកាន់តែធ្លាក់ដុនដាប៖ «គេអត់ទាន់ដោះស្រាយឲ្យយើងទេពីបញ្ហានៅចម្រូងចម្រាសគ្នា នៅតវ៉ា នៅផ្ដិតមេដៃ។ បុគ្គលិកទាំងអស់បានផ្តិតមេដៃក្រោយពេលចុះពីប្រជុំវិញនៅម៉ោង ១១ ម្សិលមិញ ជំទាស់ទាំងអស់។ បើសិនជាឡើងម៉ោងហ្នឹង ប្រាក់ខែនៅដដែល គោលការណ៍របស់ក្រសួងដដែល គិតទៅអត់ឡើង»។
កម្មវិធីថ្មីដែលតម្រូវឲ្យគ្រូបង្រៀន ៥ម៉ោង គឺពេលព្រឹកចាប់ពីម៉ោង ៦ ដល់ម៉ោង ១១ ឬរសៀលចាប់ពីម៉ោង ១២ ដល់ម៉ោង ៥។
គ្រូបង្រៀនមួយរូបទៀតសុំមិនឲ្យបញ្ចេញឈ្មោះដូចគ្នា មានប្រសាសន៍បញ្ជាក់ដែរថា កម្មវិធីបង្រៀនថ្មីនេះមិនត្រឹមតែធ្វើឲ្យប៉ះពាល់ជីវភាពគ្រូបង្រៀនទេ ក៏ប៉ុន្តែកម្មវិធីនេះនឹងបង្កការលំបាកដល់ពេលវេលាអាណាព្យាបាលសិស្សានុសិស្សថែមទៀតផង។
លោកកត់សម្គាល់ថា នៅវិទ្យាល័យសម្ដេចឪសម្ដេចម៉ែ ខេត្តរតនគិរី បញ្ហាចោទគឺបរិមាណសិស្សកើនច្រើន ត្រូវខ្វះអាគារសិក្សាមួយខ្នងមាន ១២បន្ទប់។ ចំណែកគ្រូបង្រៀនមានគ្រប់គ្រាន់មិនខ្វះ ដែលត្រូវបន្ថែមម៉ោងបង្រៀននោះទេ។
វិទ្យុអាស៊ីសេរីនៅថ្ងៃអាទិត្យ ទី១៣ ខែតុលា មិនអាចទាក់ទងប្រធានមន្ទីរអប់រំខេត្តរតនគិរី សុំអធិប្បាយបញ្ហានេះបានទេ។ ទោះជាយ៉ាងនេះក៏ដោយ នាយកវិទ្យាល័យសម្ដេចឪសម្ដេចម៉ែ លោក មាស ផានី មានប្រសាសន៍បញ្ជាក់ថា កម្មវិធីនេះត្រូវបានលប់ចោលវិញហើយ ដោយសារតែការតវ៉ារបស់គ្រូបង្រៀនភាគច្រើន៖ «ទីមួយយើងខ្វះសាលា ហើយគេក៏បានណែនាំឲ្យយើងបង្កើនម៉ោងដល់យើង មើលទៅលោកគ្រូ អ្នកគ្រូយើងគាត់អត់ពេញចិត្ត អ៊ីចឹងយើងសម្រួលដូចរាល់ដងវិញអត់បញ្ហាអ្វីទេ រួចរាល់អស់ហើយ»។
ប្រធានសមាគមគ្រូបង្រៀនឯករាជ្យ លោក រ៉ុង ឈុន ចាត់ទុកថា ការសម្រេចឲ្យគ្រូបង្រៀនលើសម៉ោងកំណត់ដោយក្រសួងអប់រំ និងមិនមានការស្ម័គ្រចិត្តពីគ្រូបង្រៀនគឺជាប្រការខុសច្បាប់។ លោកកត់សម្គាល់ថា ក្រសួងអប់រំបានកំណត់ម៉ោងបង្រៀនសម្រាប់គ្រូកម្រិតវិទ្យាល័យ ១៦ម៉ោងក្នុងមួយសប្ដាហ៍ និង ១៨ម៉ោងក្នុងមួយសប្ដាហ៍សម្រាប់គ្រូកម្រិតអនុវិទ្យាល័យ៖ «ការដែលធ្វើបែបហ្នឹងខុសហើយ បើសិនគ្រូបង្រៀនម៉ោងច្រើនត្រូវតែមានការប៉ះប៉ូវលុយម៉ោងឲ្យគាត់ហើយ ហើយបើគាត់ថា ហត់នឿយ គាត់បង្រៀនត្រឹមតែម៉ោងគាត់ទេ នាយកក៏គ្មានសិទ្ធិទៅចាប់បង្ខំពួកគាត់ដែរ»។
យ៉ាងណាក្តី លោក រ៉ុង ឈុន ឲ្យដឹងថា បច្ចុប្បន្នប្រាក់បៀវត្សរ៍គ្រូបង្រៀនជាមធ្យមទទួលបានប្រមាណ ១២០ដុល្លារក្នុងមួយខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។