អាណាព្យាបាលសិស្ស បានរៀបរាប់ឲ្យដឹងថា គ្រូបង្រៀនអាក់ខានពុំសូវទៅបង្រៀនសិស្សជិតមួយឆ្នាំមកហើយ។ ហើយពេលដែលគ្រូពុំបានទៅបង្រៀនម្ដងៗ ពួកគាត់និយាយប្រាប់សិស្សថា ថ្ងៃស្អែកពួកឯងឈប់សម្រាក មិនបាច់មករៀនទេ ព្រោះគ្រូជាប់រវល់ទៅប្រជុំ។
អាណាព្យាបាលរបស់សិស្សសុំមិនឲ្យបញ្ចេញឈ្មោះម្នាក់ រស់នៅភូមិកែវជះ ឃុំបន្ទាយក្រាំង ស្រុកកំពង់រោទិ៍ មានប្រសាសន៍នៅថ្ងៃទី២៥ វិច្ឆិកា ថា គ្រូបង្រៀនមិនត្រឹមតែអវត្តមានពុំបានទៅបង្រៀនសិស្សញឹកញាប់ប៉ុណ្ណោះទេ ពេលខ្លះពួកគាត់បង្រៀនសិស្សដោយគ្រាន់តែសរសេរនៅលើក្ដារខៀនបន្តិចបន្តួច ទុកឲ្យសិស្សសិក្សាដោយខ្លួនឯង។ ចំណែកឯគ្រូបង្រៀនវិញ ក្រោយពីសរសេរដាក់ឲ្យសិស្សរួច ចេញទៅជជែកគ្នានៅខាងក្រៅថ្នាក់រៀនរាប់ម៉ោង ដោយមិនខ្វល់ពីកូនសិស្សរបស់ខ្លួនក្នុងថ្នាក់ឡើយ៖ «ដល់អ៊ីចឹង កូនខ្ញុំវាមកផ្ទះអីវា ម៉ែខ្ញុំគ្មានទឹកចិត្តចង់ទេ បើគ្រូធ្វើអ៊ីចឹង ហើយក្មួយៗខ្ញុំ ផ្ទះនៅអីកើតណោះ ក៏អ៊ីចឹងដែរ។ វាសួរថា លោកគ្រូៗឯងកត់មេរៀនឲ្យខ្ញុំ ហើយមិននៅពន្យល់ខ្ញុំ ហើយឲ្យខ្ញុំធ្វើម៉េចទៅ? គ្រូឆ្លើយថា អញកត់ឲ្យអាឯងហើយ អាឯងមិនចេះមើល ហើយទៅអាឯងមិនកត់ ហើយអញមិនដឹងទេ គ្រូថាអ៊ីចឹងៗ»។
ស្រដៀងគ្នានេះដែរ អាណាព្យាបាលសិស្សសុំមិនបញ្ចេញឈ្មោះម្នាក់ទៀត រស់នៅភូមិកែវជះ ឃុំបន្ទាយក្រាំង ឲ្យដឹងថា ដោយសារសាលានៅឯជនបទដាច់ស្រយាល ពុំមានមន្ត្រីណាចុះត្រួតពិនិត្យតាមដានការបង្រៀនរបស់គ្រូ ទើបធ្វើឲ្យពួកគាត់បង្រៀនសិស្សតាមអំពើចិត្ត ដោយពុំខ្វល់ពីតួនាទីបង្រៀនរបស់ខ្លួន។ លោកបន្តថា ក្មេងៗក្នុងភូមិកំពុងប្រឈមនឹងអក្ខរកម្ម ឬការមិនចេះអក្សរ ដោយសារគ្រូមិនយកចិត្តទុកដាក់បង្រៀនសិស្ស៖ «វាហូបចុកនៅខាងក្រៅ ហូបសឹងរាល់ថ្ងៃ ប្រជាជននៅភូមិហ្នឹងគេស្ងើចដែរ។ អ្នកខ្លះគេនៅជិតៗហ្នឹង គេមិនឲ្យទៅរៀនសាលាហ្នឹង គេឲ្យទៅរៀនសាលាផ្សារផ្សេង។ បើខ្ញុំមានសាលាផ្សេង ខ្ញុំឲ្យកូនខ្ញុំទៅរៀនដែរ នៅភូមិហ្នឹងមានសាលាតែមួយ»។
ឆ្លើយតបនឹងការចោទប្រកាន់នេះ នាយកសាលាបឋមសិក្សា ហ៊ុន សែន ពោធិ ក្រូច លោក សុខ ចេស បញ្ជាក់ថា លោកគ្រូអ្នកគ្រូពុំបានអវត្តមាន ឬការមិនគោរពតួនាទីក្នុងការបង្រៀនសិស្សដូចការចោទប្រកាន់របស់អាណាព្យាបាលសិស្សនោះឡើយ៖ «បើសិនអវត្តមានថ្ងៃណា សូមអញ្ជើញមកបើកនៅសៀវភៅអវត្តមានខ្ញុំ។ ហើយសម្រាប់សាលា កូនគាត់ ព្រោះខ្ញុំជានាយកសាលាបង្រៀនផង ទី១។ ឥឡូវក្នុងម៉ោងនេះ ខ្ញុំឲ្យសិស្សទៅវិញហើយ ព្រោះខ្ញុំមកប្រជុំប្រចាំខែទី១។ ហើយមួយទៀត ខ្ញុំអាចទៅបំប៉ន ឬទៅប្រជុំអីតាមអង្គការអញ្ជើញ តែបើសិស្សរៀនជាមួយនាយក ច្បាស់ជាឈប់ញាប់មែន តែសូមឲ្យមកមើលសៀវភៅអវត្តមានបាទ»។
សាលាបឋមសិក្សា ហ៊ុន សែន ពោធិ ក្រូច ស្ថិតនៅភូមិកែវជះ ឃុំបន្ទាយក្រាំង ស្រុកកំពង់រោទិ៍ ខេត្តស្វាយរៀង។ សព្វថ្ងៃ នៅសាលាមួយនេះមានសិស្សកំពុងសិក្សាប្រមាណជិត ១០០នាក់ ចែកចេញជា ៦កម្រិតថ្នាក់រៀន គឺពីចាប់ថ្នាក់ទី១ ដល់ថ្នាក់ទី៦ និងមានលោកគ្រូបង្រៀនចំនួន ៥នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។