បុគ្គលិកនិងសាស្ត្រាចារ្យវិទ្យាស្ថានជាតិពាណិជ្ជសាស្ត្រ ធ្វើកូដកម្មទាមទារឲ្យគណៈគ្រប់គ្រងវិទ្យាស្ថានផ្ដល់ប្រាក់ជាង ៣ម៉ឺនដុល្លារឲ្យមកសាស្ត្រាចារ្យ និងទាមទារលក្ខខណ្ឌមួយចំនួនទៀត។ ទោះបែបនេះក្ដី គណៈគ្រប់គ្រងវិទ្យាស្ថានមិនទាន់ឆ្លើយតបការទាមទារនេះនៅឡើយទេ។ ចំណែកមន្ត្រីក្រសួងការងារ ស្នើឲ្យភាគីទាំងពីររកដំណោះស្រាយតាមតុចរចាជាជាងការធ្វើកូដកម្ម។
បុគ្គលិកនិងសាស្ត្រាចារ្យដែលស្លៀកសម្លៀកបំពាក់ស្អាតៗ និងពាក់ក្រវាត់កផងនោះ ផ្អាកបង្រៀននិស្សិត ដោយនាំគ្នាចេញមកឈរតវ៉ានៅពីមុខវិទ្យាស្ថានជាតិពាណិជ្ជសាស្ត្រ នៅថ្ងៃទី១៩ ខែឧសភា ទាមទារឲ្យគណៈគ្រប់គ្រងផ្ដល់ប្រាក់ថ្លៃបង់សាលារបស់សិស្សមួយចំនួនជូនពួកគាត់ទៅតាមកិច្ចសន្យា។
ក្រុមគ្រូបង្រៀនទាំងនោះលើកឡើងថា ជាងរៀងរាល់ឆ្នាំ វិទ្យាស្ថានតែងតែផ្ដល់ប្រាក់ថ្លៃបង្រៀននេះជូនពួកគាត់ ប៉ុន្តែនៅឆ្នាំសិក្សា២០១៣-២០១៤ គណៈគ្រប់គ្រងវិទ្យាស្ថានមិនព្រមបើកលុយភាគរយបង់ថ្លៃសិក្សារបស់សិស្សឲ្យក្រុមសាស្ត្រាចារ្យទេ។
សាស្ត្រាចារ្យផ្នែកភាសាអង់គ្លេស លោក ឈឹម ប៊ុនរ័ត្ន ថ្លែងប្រាប់អ្នកកាសែតថា ទឹកប្រាក់ទាមទារជាញើសឈាមប្រឹងប្រែងបង្រៀនរបស់ក្រុមសាស្ត្រាចារ្យ។ លោកសាស្ត្រាចារ្យបញ្ជាក់ថា ចាប់ពីថ្ងៃធ្វើកូដកម្មនេះ ប្រសិនវិទ្យាស្ថានពុំឆ្លើយតបតាមការទាមទារពួកគេមិនព្រមចូលធ្វើការវិញជាដាច់ខាត៖ «អ្វីដែលពួកខ្ញុំធ្វើនេះ គឺទាល់ច្រកហើយ ពីមុនមិនដែលខ្វល់ទេ ប៉ុន្តែពេលនេះ គឺទ្រាំលែងបានហើយ»។
ក្នុងលិខិតទាមទាររបស់សាស្ត្រាចារ្យបញ្ជាក់ថា ទឹកប្រាក់ដែលពួកគេទាមទារចំនួន ៣១.៥០០ដុល្លារសហរដ្ឋអាមេរិក គឺបានមកពីថ្លៃសិស្សបង់ជូនសាលា ប្រាក់ឈ្នួល ១០០% នៃការបង្រៀននេះ ចំនួន៦០% វិទ្យាស្ថានជាអ្នកទុកដាក់ និង ៤០% នៅសល់វិទ្យាស្ថានត្រូវចែកជូនសាស្ត្រាចារ្យបង្រៀន។ ក្រៅពីនេះ ពួកគេទាមទាររក្សាប្រាក់ឧបត្ថម្ភ និងប្រាក់ម៉ោងបង្រៀននៅដដែល ព្រមទាំងចំណុចទាមទារឲ្យវិទ្យាស្ថានបង្ហាញរបាយការណ៍ហិរញ្ញវត្ថុផ្លូវការ ក្នុង២០១៣-២០១៤ និងឆ្នាំបន្តបន្ទាប់។
និស្សិតរៀននៅវិទ្យាស្ថាននេះម្នាក់ គឺលោក ទឹម ផាន់ណាក់ ព្រួយបារម្ភថា ជម្លោះរវាងសាស្ត្រាចារ្យ និងគណៈគ្រប់គ្រងវិទ្យាស្ថាននេះអាចប៉ះពាល់ដល់ការសិក្សារបស់និស្សិត។ ប៉ុន្តែនិស្សិតរូបនេះគាំទ្រការទាមទាររបស់គ្រូ ដោយយល់ឃើញថា ប្រសិនបើសាលាមិនបើកប្រាក់គ្រប់គ្រាន់ទេ នឹងធ្វើឲ្យគ្រូបង្រៀនបាក់ទឹកចិត្ត៖ «បើជម្លោះអូសបន្លាយយូរនឹងប៉ះពាល់ដល់ការសិក្សារបស់ពួកខ្ញុំ។ ខ្ញុំសំណូមពរឲ្យក្រសួងឆាប់ដោះស្រាយរឿងនេះ»។
ក្រៅពីការទាមទារប្រាក់អត្ថប្រយោជន៍ទាំងនោះ ក្រុមអ្នកតវ៉ាដែលមានគ្នាជាង ៨០នាក់ បានផ្តិតមេដៃចោទប្រកាន់ថា គណៈគ្រប់គ្រងវិទ្យាស្ថានប្រព្រឹត្តអំពើពុករលួយ បក្សពួកនិយមដាក់តែសាច់ញាតិឯងធ្វើការក្នុងវិទ្យាស្ថានពុំមានសញ្ញាប័ត្រត្រឹមត្រូវផង។
នាយករងនៃវិទ្យាស្ថានជាតិពាណិជ្ជសាស្ត្រ លោក ទីវ អ៊ីវហួត ដែលមានវត្តមាននៅក្នុងវិទ្យាស្ថានក្នុងពេលផ្ទុះការតវ៉ានេះ បដិសេធមិនផ្ដល់បទសម្ភាសន៍ទេ។ ស្រដៀងគ្នានេះដែរ នាយកគ្រប់គ្រងវិទ្យាស្ថានជាតិពាណិជ្ជសាស្ត្រ លោក លី សុធា បដិសេធមិនផ្ដល់បទសម្ភាសន៍តាមទូរស័ព្ទមកវិទ្យុអាស៊ីសេរីទេ ដោយលោកគ្រាន់តែបញ្ជាក់យ៉ាងខ្លីថា រឿងនេះត្រូវការពេលវេលាច្រើនដើម្បីពន្យល់៖ «រឿងនេះត្រូវការពេលច្រើនដើម្បីខ្ញុំមិនអាចពន្យល់អស់តាមទូរស័ព្ទបានទេ»។
ទាក់ទងករណីនេះដែរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ថាលោកមិនទាន់បានដឹងរឿងនេះនៅឡើយទេ។ ទោះបែបនេះក្តី លោកទាមទារឲ្យភាគីជម្លោះទាំងពីរវិលចូលរកតុចរចាជាជាងការធ្វើកូដកម្ម។ ជាងនេះទៅទៀត លោក ហេង សួរ ស្នើឲ្យភាគីទាំងពីរផ្ដល់របាយការណ៍ពីកំណត់ហេតុប្រជុំនៅពេលកន្លងមក ឲ្យក្រសួងដើម្បីពិនិត្យមើល៖ «សុំឲ្យពួកគាត់ដាក់ឯកសារកិច្ចប្រជុំមកក្រសួងដើម្បីពិនិត្យមើល»។
ឯកសារដែលក្រុមសាស្ត្រាចារ្យផ្ដល់ឲ្យអ្នកសារព័ត៌មាន បញ្ជាក់ថា មុនឈានដល់ការធ្វើកូដកម្ម ពួកគេប្រជុំច្រើនដងច្រើនសា រហូតដល់ដាក់លិខិតសុំអន្តរាគមន៍ពីរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ កាលពីខែមេសា ប៉ុន្តែមិនទាន់ឃើញមានដំណោះស្រាយនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។