ប្រភពព័ត៌មានពីប្រជាពលរដ្ឋនៅស្រុកជាំខ្សាន្ត ខេត្តព្រះវិហារ បានឱ្យដឹងថា យ៉ាងហោចណាស់មានប្រជាពលរដ្ឋខ្មែរចំនួន ២នាក់ បានរងរបួស និងមួយចំនួនទៀត កំពុងបាត់ខ្លួនដោយសារតែទាហានការពារព្រំដែនថៃ នៃខេត្តអ៊ូប៊ុនរ៉ាត់ថានី បានបាញ់រះកាលពីរាត្រីថ្ងៃទី៨ ខែកុម្ភៈ កន្លងទៅ។
ការបាញ់រះនោះ គឺនៅពេលដែលប្រជាពលរដ្ឋខ្មែរជាច្រើននាក់បាននាំគ្នាឡើងភ្នំនៅជិតតំបន់មុំ ៣ នៃស្រុកជាំខ្សាន្ត បំណងឆ្លងដែនទៅកាប់ឈើគ្រញូងខុសច្បាប់ក្នុងទឹកដីថៃ។
បុរសអ្នករត់តាក់ស៊ីម្នាក់ដែលសុំមិនបញ្ចេញឈ្មោះ។ គាត់បានមានប្រសាសន៍កាលពីល្ងាចថ្ងៃទី៩ ខែកុម្ភៈ ថា គាត់បានដឹកអ្នករបួស ២នាក់ ដោយសារទាហានថៃ បាញ់នោះ ទៅកាន់មន្ទីរពេទ្យខេត្តព្រះវិហារ៖ «ខ្ញុំសួរទៅ ថាថៃបាញ់នៅលើភ្នំអ៊ីចឹង។ ថាបាញ់យប់ម្សិលម្ង៉ៃ។ ខ្ញុំជួបតែ ២នាក់ហ្នឹង នៅមន្ទីរពេទ្យ ប៉ុន្តែប្រហែលជាគេចេញទៅបាត់ទៀតហើយ ២នាក់ហ្នឹង ពីព្រោះយប់មិញខ្ញុំជួបគេថា គេយកចេញយប់ហ្នឹងដែរ គេវះ ហើយគេគេចចេញភ្លាម។ គេថា គេមិនចង់ឱ្យនរណាដឹងទេ»។
ប្រភពដដែលបានបញ្ជាក់ថា តាមការសាកសួរពីអ្នករបួសឱ្យដឹងថា អ្នកភូមិដែលឡើងទៅកាប់ឈើគ្រញូងនោះ មានគ្នាចំនួន ៩នាក់ ក៏ប៉ុន្តែបន្ទាប់ពីទាហានថៃ បាញ់រះ គឺអ្នកភូមិចំនួន ៧នាក់ផ្សេងទៀតកំពុងបាត់ខ្លួន។
ទោះយ៉ាងណាអាជ្ញាធរស្រុកជាំក្សាន្ដ បាននិយាយថា គេពុំបានដឹងអំពីហេតុការណ៍នោះទេ។
អភិបាលស្រុកជាំខ្សាន្ត លោក សុខ ហៃ បានមានប្រសាសន៍ថា លោកមិនបានទទួលព័ត៌មាននោះទេ ក៏ប៉ុន្តែលោកជំរុញឱ្យសួរទៅគណៈបញ្ជាការសមរភូមិប្រចាំទិសនោះ។
សមាគមការពារសិទ្ធិមនុស្សអាដហុក ដែលបានតាមដានរឿងនោះឱ្យដឹងថា គេបានរកឃើញបុរសពីរនាក់ដែលរងរបួសដោយសារគ្រាប់កាំភ្លើងទៅព្យាបាលនៅមន្ទីរពេទ្យខេត្តព្រះវិហារ កាលពីរាត្រីថ្ងៃទី៩ ខែកុម្ភៈ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ បានមានប្រសាសន៍ថា ទាំងអ្នករបួស និងគ្រូពេទ្យដែលព្យាបាល គឺហាក់ដូចជាព្យាយាមលាក់លៀមរឿងពិត ចំពោះករណីនោះ ដោយលោកទៅសួររកជនរងគ្រោះដំបូងពុំមានអ្នកណាប្រាប់ទេ។ ក៏ប៉ុន្តែបន្តិចក្រោយមក លោកបានរកឃើញអ្នករបួសចំនួន ២នាក់ ឈ្មោះ វង្ស វាសនា អាយុ ២៤ឆ្នាំ និងឈ្មោះ នូ សាមី ដែលកំពុងព្យាបាលនៅក្នុងមន្ទីរពេទ្យ។ ទោះយ៉ាងណា អ្នករងរបួសម្នាក់ព្យាយាមបង្វែរហេតុការណ៍ដោយថា រូបគាត់មិនមែនរងរបួសដោយសារទាហានថៃ បាញ់ក្នុងពេលឆ្លងដែនទៅកាប់ឈើគ្រញូងទេ។
លោក ឡោ ចាន់៖ «គាត់គ្រាន់តែថា របួសដៃខាងស្តាំរបស់គាត់ហ្នឹង គឺត្រូវគ្រាប់កាំភ្លើងខ្យល់ដោយខ្លួនឯង ពេលដែលគាត់បានទៅរកសត្វព្រៃ។ យើងសង្កេតឃើញថា នេះជាការលាក់លៀម ដែលគាត់មិនហ៊ានបង្ហាញភាពពិត ម្យ៉ាងវិញទៀត ដូចជាមានគំនាបពីអស់លោកមួយចំនួន»។
នៅតាមព្រំដែនខ្មែរ-ថៃ នៃខេត្តឧត្តរមានជ័យ និងខេត្តព្រះវិហារ ពេលបច្ចុប្បន្ន គឺនៅតែមានប្រជាពលរដ្ឋខ្មែរស្លាប់និងរងរបួសជាហូរហែ ដោយសារទាហានថៃ បាញ់នៅពេលឆ្លងដែនទៅកាប់ឈើគ្រញូងមកលក់ដូរខុសច្បាប់។
កាលពីថ្ងៃទី៥ ខែកុម្ភៈ កន្លងទៅ ទាហានថៃ នៃខេត្តសុរិន្ទ បានដឹកសាកសពអ្នកភូមិខ្មែរម្នាក់ឈ្មោះ មិន ឆប អាយុ ៣៤ឆ្នាំ ប្រគល់មកឱ្យក្រុមគ្រួសារវិញតាមច្រកអូរស្មាច់ ខេត្តឧត្តរមានជ័យ។
ប្រភពពីប្រជាពលរដ្ឋខ្មែរនៅតាមព្រំដែនឱ្យដឹងថា មូលហេតុដែលរដ្ឋាភិបាលចាត់វិធានការទប់ស្កាត់ស្កាត់ការឆ្លងដែនទៅកាប់ឈើគ្រញូងក្នុងទឹកដីថៃ មិនមានប្រសិទ្ធភាព គឺដោយសារតែមន្ត្រីយោធានៅតាមព្រំដែនខ្លះ មានជាប់ពាក់ព័ន្ធនិងការជួញដូរឈើគ្រញូងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។