ក្រុមឃាតកបាញ់សម្លាប់លោកឧកញ៉ា អ៊ឹង ម៉េងជឺ នៅកណ្ដាលរាជធានីភ្នំពេញ មិនទាន់ត្រូវបានសមត្ថកិច្ចរកឃើញនៅឡើយ។ ប៉ុន្តែ សមត្ថកិច្ចបានចាប់ខ្លួនអង្គរក្ស ៤នាក់របស់លោកឧកញ៉ា ថោង សារ៉ាត់ ដែលជាភាគីធ្លាប់មានជម្លោះនឹងគ្នា យកទៅសួរចម្លើយនៅស្នងការនគរបាលរាជធានីភ្នំពេញ។
ស្របពេលគ្នានេះដែរ ម្តាយឪពុករបស់លោក កាលពីរសៀលថ្ងៃទី៣ ខែធ្នូ បានរៀបចំសន្និសីទកាសែតមួយដោយបញ្ជាក់ថា កូនប្រុសរបស់ពួកគាត់គេចខ្លួនមួយរយៈ ដោយសារបារម្ភពីសុវត្ថិភាព។
ប្ដីប្រពន្ធជនជាតិវៀតណាម ពីរនាក់ ដែលជាឪពុកម្តាយលោកឧកញ៉ា ថោង សារ៉ាត់ ចេញមុខជាសាធារណៈចោទប្រកាន់ស្នងការនគរបាលរាជធានីភ្នំពេញ លោក ជួន សុវណ្ណ ថាមានបំណងអាក្រក់បំផ្លាញកិត្តិយសក្រុមគ្រួសារគាត់។
ស្ត្រីជាម្តាយរបស់លោកឧកញ៉ា ថោង សារ៉ាត់ គឺលោកស្រី កែវ សាវី បញ្ជាក់ថា សមត្ថកិច្ចបាននាំខ្លួនកូនប្រុសរបស់គាត់យកទៅសួរនាំ និងចាប់ខ្លួនអង្គរក្សកូនប្រុសគាត់ ដោយមិនមានដីកាបង្គាប់ពីតុលាការឡើយ។ លោកស្រីបញ្ជាក់ថា កូនប្រុសគាត់សម្រេចគេចខ្លួនមួយរយៈ ដោយសារតែខ្លាចស្នងការនគរបាលរាជធានីភ្នំពេញ ប្រើអំណាចគាបសង្កត់។ ស្ត្រីម្នាក់នេះថែមទាំងស្នើឲ្យនាយករដ្ឋមន្ត្រី ដក លោក ជួន សុវណ្ណ ចេញពីតំណែងទៀតផង។
ទោះយ៉ាងណាក្តី ស្នងការនគរបាលរាជធានីភ្នំពេញ លោក ជួន សុវណ្ណ បានថ្លែងប្រាប់កាសែតក្នុងស្រុកថា លោកធ្វើការងារតាមច្បាប់។ លោកបន្តថា ប្រតិបត្តិការនេះស្ថិតក្រោមបញ្ជារបស់ព្រះរាជអាជ្ញារងអមសាលាដំបូងរាជធានីភ្នំពេញ លោក មាស ច័ន្ទពិសិដ្ឋ។ លោកបន្តថា ម្តាយឪពុករបស់ លោក ថោង សារ៉ាត់ ចាំបាច់ត្រូវទទួលខុសត្រូវនូវរាល់ពាក្យសម្ដីដែលខ្លួនបាននិយាយនោះ។
មកដល់ល្ងាចថ្ងៃទី៣ ខែធ្នូ អាជ្ញាធរមិនទាន់បង្ហាញលទ្ធផលសួរចម្លើយអង្គរក្សរបស់លោកឧកញ៉ា ថោង សារ៉ាត់ ដែលត្រូវចាប់ខ្លួនតាំងពីថ្ងៃទី១ ខែធ្នូ នោះនៅឡើយទេ។ ក្រុមនគរបាលគ្រាន់តែប្រាប់វិទ្យុអាស៊ីសេរី ដោយខ្លីថា សមត្ថកិច្ចកំពុងតែធ្វើការ។ លោកឧកញ៉ា អ៊ឹង ម៉េងជឺ ត្រូវបានឃាតកបាញ់សម្លាប់កាលពីព្រលប់ថ្ងៃទី២២ ខែវិច្ឆិកា។
បន្ទាប់ពីថ្ងៃកើតហេតុភ្លាមៗ អ្នកលេងហ្វេសប៊ុក (facebook) បានបង្ហោះវីដេអូឃ្លីបពីសកម្មភាពរបស់ឃាតកនៅកន្លែងកើតហេតុ។ អ្នកលេងហ្វេសប៊ុកជាច្រើន បានចោទថា ឃាតកបាញ់ប្រហារលោកឧកញ៉ា អ៊ឹង ម៉េងជឺ គឺជាអង្គរក្សរបស់ស្នងការរងនគរបាលរាជធានីភ្នំពេញ លោក ជួន ណារិន។ ពលរដ្ឋទាំងនោះសំអាងលើភិនភាគជនដៃដល់ និងស្រដៀងគ្នានឹងអង្គរក្ស លោក ជួន ណារិន តាំងពីកម្ពស់កំព អាវ ខោ ស្បែកជើង ជាដើម នៅពេលបុរសនោះចុះពិនិត្យសាកសពក្រោយឃាតកបាញ់សម្លាប់។
ទោះជាយ៉ាងណាក្តី លោក ជួន ណារិន បានចេញមុខបដិសេធចំពោះរឿងនេះ ហើយក៏មិនមានសមត្ថកិច្ចណាហៅបុរសដែលពលរដ្ឋដាក់ការសង្ស័យ ទៅសាកសួរនោះដែរ។ បើតាមព័ត៌មានក្រៅផ្លូវការខ្លះបញ្ជាក់ថា ក្រុមគ្រួសាររបស់លោកឧកញ៉ា អ៊ឹង ម៉េងជឺ ក៏បានគេចខ្លួនទៅរស់នៅក្រៅប្រទេសបាត់ទៅហើយ ដោយសារបារម្ភពីសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។