ជនសង្ស័យ ៣នាក់ សុទ្ធតែជាជនជាតិថៃ ត្រូវបានកម្លាំងមានសមត្ថកិច្ចខាងភាគីកម្ពុជា ចាប់ខ្លួនបានភ្លាមៗនៅជាយដែនកម្ពុជាថៃ ក្នុងស្រុកភ្នំព្រឹក នៅថ្ងៃទី១៩ ខែកញ្ញា។
មុខសញ្ញាដែលឈានដល់ការចាប់ខ្លួននេះ គឺបន្ទាប់ពីជនជាតិថៃ ទាំង ៣នាក់ ហើយម្នាក់ក្នុងចំណោមនោះជាមេបញ្ជាការជាន់ខ្ពស់យោធាថៃ ផងនោះ ព្យាយាមចរាចរលុយដុល្លារក្លែងក្លាយជាង ៧លានដុល្លារសហរដ្ឋអាមេរិក មិនបានសម្រេចនៅក្នុងប្រទេសកម្ពុជា។
អធិការរងទទួលបន្ទុកព្រហ្មទណ្ឌ ប្រចាំស្រុកភ្នំព្រឹក ឲ្យដឹងថា នៅពេលនេះខាងសមត្ថកិច្ចកំពុងកសាងសំណុំរឿង និងឃុំខ្លួនជនជាតិថៃ ទាំងនោះនៅឡើយ នៅក្នុងអធិការដ្ឋានស្រុក មុននឹងបញ្ជូនបន្តទៅតុលាការ នៅព្រឹកថ្ងៃទី២០ ខែកញ្ញា។
អធិការរងទទួលបន្ទុកព្រហ្មទណ្ឌស្រុកភ្នំព្រឹក លោក សារ៉េត វីសេដ្ឋ ឲ្យដឹងថា មូលហេតុដែលឈានដល់ការចាប់ខ្លួនជនជាតិថៃ ទាំង ៣នាក់នោះ គឺធ្វើឡើងនៅបន្ទាប់ពីកម្លាំងបង្កប់របស់សមត្ថកិច្ចក្នុងប្រទេសថៃ បានផ្ដល់ព័ត៌មានមកថា ពួកគេមានលុយដុល្លារក្លែងក្លាយជាង ៧លានដុល្លារសហរដ្ឋអាមេរិក (៧លាន ១សែន ៦ម៉ឺនដុល្លារ) ចង់ដូរលុយពិតពីកម្ពុជា។ លោកបន្តថា លុះមកដល់ព្រឹកថ្ងៃទី១៩ ខែកញ្ញា ខាងសមត្ថកិច្ចបានបញ្ឆោតឲ្យជនជាតិថៃ ទាំង ៣នាក់ ដឹកលុយដែលគ្រោងថានឹងត្រូវធ្វើចរាចរគ្រប់ចំនួន និងដោះដូរនៅមាត់ច្រកព្រំដែនតែម្ដង។
លោកឲ្យដឹងទៀតថា នៅពេលឡានម៉ាកវីហ្គោ (Hillux VIGO) ដឹកលុយក្លែងក្លាយចំនួន ៣កែស ដែលលុយទាំងនោះសុទ្ធតែក្រដាស ១០០ដុល្លារ ហើយចូលមកដល់គោលដៅនៅត្រង់ចំណុចភូមិអូររំដួល ឃុំអូររំដួល ស្រុកភ្នំព្រឹក កម្លាំងមានសមត្ថកិច្ចព័ទ្ធចាប់ខ្លួនបានភ្លាមៗ៖ «បើសិនជាលុយហ្នឹងចរាចរចូលដល់ប្រទេសខ្មែរ យើងមិនដឹងជាទៅជាស្អីទេ។ អ៊ីចឹង យើងទប់ស្កាត់ទាន់ពេលវេលាដោយមានបទបញ្ជាពីលោកស្នងការ ហើយដឹកនាំបញ្ជាផ្ទាល់ដោយលោកស្នងការរងទទួលបន្ទុកព្រហ្មទណ្ឌហ្នឹង ហើយមានការសម្របសម្រួលពីព្រះរាជអាជ្ញា។ យើងបានប្រតិបត្តិការព្រឹកមិញហ្នឹង»។
របាយការណ៍ពីកម្លាំងមានសមត្ថកិច្ចឲ្យដឹងថា ជនជាតិថៃ ទាំង ៣នាក់នោះ មានឈ្មោះ ជិត គិត អាយុ ៤៧ឆ្នាំ ឈ្មោះ ប្លា មូត មានតួនាទីជាយោធាថៃ និងឈ្មោះ ចំរ៉ាត់ វង្សា ជាមេបញ្ជាការកងអនុសេនាធំលេខ៥២ របស់ថៃ។
ពាក់ព័ន្ធនឹងសំណួរ ថាតើការធ្វើចរាចរលុយដុល្លារក្លែងក្លាយដ៏ច្រើនបែបនេះ អាចមានជាប់ទាក់ទិននឹងមនុស្សក្នុងប្រទេសកម្ពុជា ដែរឬយ៉ាងណានោះ? ស្នងការរងទទួលបន្ទុកព្រហ្មទណ្ឌខេត្តបាត់ដំបង លោក ជេត វណ្ណី អះអាងថា ការជួញដូររូបិយវត្ថុដែលផ្ដើមដោយភាគីថៃ នេះ ទំនងជាពុំមានជាប់ពាក់ព័ន្ធនឹងពលរដ្ឋកម្ពុជា នោះទេ។ ទោះជាបែបណា លោកនិយាយថា នេះជារបាយការណ៍បឋមនៅឡើយ។ ម្យ៉ាងវិញទៀត ភស្តុតាងទាំងនេះ គឺជាបន្ទុកដ៏មានសារសំខាន់ណាស់ ក្នុងការកសាងសំណុំរឿងបញ្ជូនទៅតុលាការបន្ត ក្រោយពីបញ្ចប់ការស្រាវជ្រាវរួចរាល់៖ «បញ្ហានេះដូចជាមិនមានទេ។ គ្រាន់តែយើងបង្ក្រាបបាន។ អានេះជាលក្ខខណ្ឌមួយ យើងបង្ក្រាបបានថារូបិយវត្ថុក្លែងក្លាយ»។
ចំណែកបុគ្គលិកផ្នែកអង្កេតនៃអង្គការលីកាដូ (Licadho) លោក ហេង សាយហុង ចាត់ទុកថា នេះជាមោទនភាពមួយរបស់កម្លាំងមានសមត្ថកិច្ចនៅច្រកព្រំដែនកម្ពុជាថៃ។ លោកទទួលស្គាល់ថា វាពិតជាពិបាកណាស់ក្នុងការតាមប្រមាញ់ ដើម្បីទប់ស្កាត់រឿងនេះ។ ហេតុនេះ អ្វីដែលកម្លាំងមានសមត្ថកិច្ចបង្ក្រាបបាននៅពេលនេះ វាគឺជាសំណាងល្អសម្រាប់ពលរដ្ឋកម្ពុជា ដែលចៀសផុតពីការប្រើប្រាស់លុយក្លែងក្លាយដូចនេះ៖ «មានការប្រសើរណាស់ដែលសមត្ថកិច្ចយើងនៅតាមជាយដែន ជាពិសេសនៅតាមជាយដែនព្រំប្រទល់កម្ពុជាថៃ។ គាត់មានវិធានការល្អ។ រឿងការឃាត់ ឬក៏ចាប់ក្នុងបទល្មើសមួយ ដែលយើងមានការពិបាកដូចសព្វថ្ងៃ»។
អង្គការសង្គមស៊ីវិលយល់ឃើញថា ជារឿយៗ ប្រទេសកម្ពុជា តែងជួបបញ្ហានេះ ដោយសារតែប្រទេសកម្ពុជា ភាគច្រើនបំផុត គឺប្រើប្រាស់រូបិយវត្ថុបរទេស ក្នុងនោះមានលុយដុល្លារផង នៅជាយដែនភាគីខាងលិច និយមលុយបាតថៃ។ ដោយឡែកនៅជាយដែនផ្នែកខាងកើតវិញ និយមលុយដុងវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។