អង្គការតម្លាភាពកម្ពុជា (Transparency International Cambodia) អំពាវនាវឲ្យប្រជាពលរដ្ឋរស់នៅតាមបណ្ដារាជធានីខេត្តទាំងអស់ ចូលរួមប្រឆាំងអំពើពុករលួយ តាមរយៈការប្រកួតគូរគំនូរការប្រកួតចម្រៀងសរសេរកំណាព្យ និងការប្រកួតអត្ថបទតែងសេចក្ដី។
មន្ត្រីកម្មវិធីយុវជននៃអង្គការតម្លាភាពកម្ពុជា លោក លី ពិជ័យ មានប្រសាសន៍ថា គោលបំណងសំខាន់នៃការប្រកួតប្រជែងនេះ គឺដើម្បីឲ្យពលរដ្ឋដែលមានឆន្ទៈប្រឆាំងអំពើពុករលួយអាចលាតត្រដាងពីបំណងនិងគំនិតរបស់ខ្លួន តាមរយៈជាការគូរគំនូរ តែងជាបទចម្រៀង សរសេរកំណាព្យ និងជាការតែងសេចក្ដីក៏បាន។
លោក លី ពិជ័យ៖ «ការចូលរួមអំពើពុករលួយក្នុងនាមគាត់ជាពលរដ្ឋក្តី ក្នុងនាមគាត់ជាយុវជនក្តី គាត់អាចធ្វើបានអ្វីខ្លះ គាត់មានស្មារតីប្រឆាំងអំពើពុករលួយក្នុងប្រទេសកម្ពុជាយើង។ គឺជាខ្លឹមសារដែលយើងចង់ឲ្យប្រជាពលរដ្ឋសម្ដែងមតិដោយខ្លួនឯង តាមរយៈការប្រកួតនេះខ្លះគាត់មិនអាចនិយាយ មិនហ៊ាននិយាយសរសេរជារឿងអំពីគេគំរាមផ្សេងៗបាន»។
បេក្ខជនដែលចាប់អារម្មណ៍ចូលរួមប្រកួតប្រជែងនេះ អាចទាក់ទងទៅកាន់លេខទូរស័ព្ទ ០១០ ៥៥៥ ៨៧៦ ឬលេខ ០៩៧ ៦៨៨៨ ៨២៥។ ថ្ងៃផុតកំណត់ចូលរួមប្រកួតនឹងត្រូវបញ្ចប់នៅថ្ងៃទី៣០ មិថុនា ឆ្នាំ២០១៤ ហើយថ្ងៃប្រកាសលទ្ធផលនឹងត្រូវប្រកាសនៅក្នុងទិវាយុវជនអន្តរជាតិ នៅថ្ងៃទី១២ ខែសីហា ឆ្នាំ២០១៤។ ជយលាភីលេខ១ ទទួលបានប្រាក់រង្វាន់ ៤០០ដុល្លារ។ ជយលាភីលេខ២ ទទួលប្រាក់រង្វាន់ ៣០០ដុល្លារ និងជយលាភីលេខ៣ ទទួលប្រាក់រង្វាន់ ២០០ដុល្លារ។ លក្ខខណ្ឌនៃការប្រកួតគឺរាល់ស្នាដៃប្រកួតប្រជែងទាំងអស់ ត្រូវជាកម្មសិទ្ធិផ្ទាល់ខ្លួន ហាមថតចម្លង និងផ្ញើអត្ថន័យសង្ខេបនៃស្នាដៃនីមួយៗ មកជាមួយ»។
អង្គការតម្លាភាពកម្ពុជា មានគណៈកម្មការវិន័យនិងជ្រើសរើសគំនូរ ឬអត្ថបទប្រកួតប្រជែង។ ក្នុងលក្ខខណ្ឌគំនូរ ឬអត្ថបទសរសេរ ឬគូរ បែបបរិហារកេរ្តិ៍បុគ្គល ឬស្ថាប័នណាមួយនោះ គណៈកម្មការនេះអាចទម្លាក់ចេញពីការជ្រើសរើស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។