ភ្ញៀវទេសចរត្អូញត្អែរពីសកម្មភាពចោរឆក់និងលួចនៅតាមឆ្នេរខ្លះនាខេត្តព្រះសីហនុ
2014.10.25
ឆ្នេរអូរឈើទាល ខេត្តព្រះសីហនុ នាពេលរាត្រី កាលពីថ្ងៃទី១៧ ខែតុលា ឆ្នាំ២០១៤។
ភ្ញៀវទេសចរជាតិ និងអន្តរជាតិ បានត្អូញត្អែរអំពីសកម្មភាពចោរកម្មកើតមានច្រើននៅតាមតំបន់ឆ្នេរមួយចំនួន នាខេត្តព្រះសីហនុ ពិសេសនៅពេលរាត្រី ហើយប៉ូលិសបង្ក្រាបមិនបានទាន់ពេល។
ក្តីព្រួយបារម្ភនេះ ត្រូវអភិបាលខេត្តព្រះសីហនុ និងស្នងការប៉ូលិសអះអាងថា ពេលនេះមិនមានចោរកម្មកើតឡើងទៀតទេ ប៉ុន្តែទទួលស្គាល់ថា ពីមុនបានកើតឡើងពិតមែន។
ភ្ញៀវទេសចរទាំងជាតិ និងអន្តរជាតិ ដែលបានទៅកម្សាន្តខេត្តព្រះសីហនុ បានរអ៊ូរទាំថា ចោរលួច ឬចោរឆក់កាបូប និងសម្ភារៈផ្សេងៗ បានកើតមានគួរឲ្យព្រួយបារម្ភនៅតាមតំបន់ឆ្នេរមួយចំនួន នាខេត្តជាប់មាត់សមុទ្រមួយនេះ ពិសេសនៅពេលរាត្រី។ ផ្ដើមពីបញ្ហានេះ ពួកគេក៏បានបង្ហាញអារម្មណ៍ខ្លាចរអា ឬមិនហ៊ាននាំគ្រួសារ ឬគូសង្សារ ទៅកម្សាន្តតំបន់ឆ្នេរនាខេត្តព្រះសីហនុ ទៀតទេនាថ្ងៃអនាគត។
ភ្ញៀវទេសចរជនជាតិអង់គ្លេស ម្នាក់ ស្ថិតក្នុងចំណោមអ្នកទេសចរបរទេសច្រើនទៀត បានឲ្យដឹងថា បទល្មើសចោរកម្មនៅតាមឆ្នេរខេត្តព្រះសីហនុ កន្លងមក រូបលោកធ្លាប់ជូនដំណឹងទៅស្ថានទូតខ្លួនប្រចាំប្រទេសកម្ពុជា ឲ្យចេញសេចក្តីអំពាវនាវទៅជនជាតិអង់គ្លេស ដែលចូលមកទស្សនាតំបន់ឆ្នេរនាខេត្តព្រះសីហនុ ឲ្យប្រុងប្រយ័ត្នពីបញ្ហាសន្តិសុខ និងចោរកម្ម។
ជនបរទេសរូបនេះ បង្ហាញអារម្មណ៍ខ្លាចរអា ឬស្ទើររាងចាល កាលបើរូបលោកបានជួបប្រទះបទល្មើសចោរកម្មនៅតាមតំបន់ឆ្នេរខេត្តព្រះសីហនុ ហើយសមត្ថកិច្ចមិនអាចបង្ក្រាប ឬទប់ស្កាត់ឲ្យទាន់ពេលវេលា។
សម្រាប់ភ្ញៀវទេសចរជាតិ និងអាជីវករលក់ដូរនៅតាមឆ្នេរមួយចំនួន នាខេត្តព្រះសីហនុ បានទទួលស្គាល់ថា ពិតជាមានចោរកម្មលួចម៉ូតូ ឬកាបូប និងសម្ភារៈផ្សេងៗរបស់ភ្ញៀវទេសចរចូលមកទស្សនាតំបន់នេះពិតមែន ពិសេសកើតមានទៅលើជនបរទេស ដែលដើរកម្សាន្តពេលរាត្រីនៅតាមឆ្នេរអូរឈើទាល ជាដើម។
ផ្ដើមពីកង្វល់នេះ ទាំងភ្ញៀវទេសចរ និងអាជីវករលក់ដូរនៅតាមឆ្នេរខេត្តព្រះសីហនុ ស្នើឲ្យសមត្ថកិច្ចគ្រប់ជំនាញ ត្រូវបង្កើនការយកចិត្តទុកដាក់ ឬដាក់កម្លាំងប្រចាំការនៅពេលថ្ងៃ និងយប់ជាប្រចាំ ដើម្បីឃ្លាំមើលបទល្មើសផ្សេងៗឲ្យបានប្រសើរនាថ្ងៃអនាគត។
ទាក់ទិនបញ្ហានេះ លោកឧត្តមសេនីយ៍ត្រី ស៊ាង កុសល ស្នងការនគរបាលខេត្តព្រះសីហនុ បានអះអាងប្រាប់វិទ្យុអាស៊ីសេរី នៅថ្ងៃសុក្រ ទី២៤ ខែតុលា ថា បច្ចុប្បន្ននេះ បទល្មើសចោរឆក់ ឬលួចកាបូបរបស់ភ្ញៀវទេសចរដែលមកកម្សាន្តតាមឆ្នេរនានាក្នុងខេត្តព្រះសីហនុ មិនមានទៀតទេ។ ប៉ុន្តែ លោកទទួលស្គាល់ថា កន្លងមក បទល្មើសទាំងនេះធ្លាប់ធ្វើសកម្មភាពនៅតាមឆ្នេរមួយចំនួននាខេត្តព្រះសីហនុ ពិតមែន។
លោក ស៊ាង កុសល សង្កត់ធ្ងន់ថា កម្លាំងសមត្ថកិច្ចបានដាក់ពង្រាយនៅតាមទីតាំងដែលធ្លាប់កើតមានចោរកម្ម មានឆ្នេរអូរឈើទាល ឬឆ្នេរអូរត្រេះ ជាដើម។ ប៉ុន្តែក្នុងខែតុលា នេះ មិនមានរបាយការណ៍ជុំវិញបទល្មើសណាមួយកើតឡើងទៀតទេ៖ «ខ្ញុំតាមដានរាល់ព្រឹកមិនមានព័ត៌មានចោរកម្មអីទេ ហើយនេះជាព័ត៌មានមិនពិតទេ។ នៅឆ្នេរអូរឈើទាល គឺយើងមានកម្លាំងរបស់យើងដាក់ជាប្រចាំនៅទីនោះ។ ដោយឡែកឆ្នេរអូរត្រេះ មានដាក់ប៉ុស្តិ៍ ឬការិយាល័យសន្តិសុខនៅទីនោះ។ និយាយរួម នៅតាមតំបន់ឆ្នេរ គឺមានប៉ូលិសដាក់ប្រចាំ ដើម្បីរង់ចាំទទួលព័ត៌មានរាល់ថ្ងៃអំពីជនល្មើស។ ពីមុន មានព័ត៌មានពីជនល្មើសនេះដែរ ប៉ុន្តែឥឡូវខ្ញុំឆែកមើលរាល់ព្រឹក គឺអត់មានទេ»។
បញ្ហានេះដែរ លោក ឈិត សុខុន អភិបាលខេត្តព្រះសីហនុ បានឲ្យដឹងដែរថា ចោរលួច ឬឆក់កាបូបរបស់ភ្ញៀវទេសចរ ដែលបានកើតមាននៅតាមឆ្នេរខេត្តព្រះសីហនុ គឺភាគច្រើនជាកុមារមិនទាន់គ្រប់អាយុ ហើយមកតាមអាណាព្យាបាល ដែលស្វែងរកការងារធ្វើនៅក្នុងខេត្តនេះ។ ប៉ុន្តែលោកថា ករណីនេះ ស្ថាប័នពាក់ព័ន្ធខេត្តបានសហការជាមួយអង្គការម្លប់តាប៉ាង បានប្រមូលកុមារអនាថាទាំងនោះទៅធ្វើការអប់រំ ឬគ្រប់គ្រង។ លោកបន្តថា រហូតមកដល់ពេលនេះ មិនមានក្មេងអនាថាដើរធ្វើសកម្មភាពលួច ឬឆក់កាបូបភ្ញៀវទេសចរទៀតទេ៖ «ការងារហ្នឹងយើងបានចាត់ចែងដើម្បីកែលំអហើយ គឺក្មេងៗដែលឪពុកម្តាយវាមកពីខេត្តឆ្ងាយៗ ហើយពេលភ្ញៀវទុកខោអាវចុះងូតទឹកហ្នឹង ពីមុនកើតមានបញ្ហាលួចហ្នឹងមែន ប៉ុន្តែឥឡូវយើងបានពង្រឹង គឺឲ្យក្មេងៗទាំងអស់ហ្នឹងហៅវាមកពន្យល់ និងអប់រំវា ដោយសហការជាមួយអង្គការម្លប់តាប៉ាង»។
ទោះជាបែបនេះក្តី ក្រុមអាជីវករដែលបើករបរលក់ដូរនៅពេលរាត្រីតាមឆ្នេរមួយចំនួន នាខេត្តព្រះសីហនុ ពិសេសឆ្នេរអូរឈើទាល បានអះអាងថា បទល្មើសចោរលួចសម្ភារៈភ្ញៀវទេសចរបរទេស ពិសេសចោរលួចម៉ូតូ ដែលជនបរទេសជួលជិះ ត្រូវចោរលួចអស់ជាច្រើនគ្រឿង និងកើតឡើងជាបន្តបន្ទាប់នៅពេលរាត្រី។ ហើយបទល្មើសទាំងនេះ ជនរងគ្រោះបានត្រឹមសម្រួលចេញថ្លៃសងសំណងទៅម្ចាស់ម៉ូតូ ដើម្បីបញ្ចប់សាច់រឿង ហើយប៉ូលិសមូលដ្ឋានមិនបានផ្តល់ព័ត៌មាន ឬជូនរបាយការណ៍ជូនថ្នាក់លើរបស់ខ្លួនទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ