អាជ្ញាធរខេត្តរតនគិរី មិនបានចាត់ចែងទូកងទៅចូលរួមប្រណាំងក្នុងពិធីបុណ្យអុំទូក បណ្ដែតប្រទីប អកអំបុក និងសំពះព្រះខែឆ្នាំនេះនៅភ្នំពេញទេ ក៏ប៉ុន្តែក្រុមអាជ្ញាធរពាក់ព័ន្ធ បានរៀបចំតំបន់រមណីយដ្ឋានសំខាន់ៗក្នុងខេត្ត ដើម្បីទទួលភ្ញៀវទេសចរដែលមកកម្សាន្តពេលឈប់សម្រាកនៃពិធីបុណ្យជាតិនេះ។
តំបន់ទេសចរណ៍ធម្មជាតិចំនួនបីនៅខេត្តរតនគិរី រួមមាន បឹងយក្សឡោម ទឹកជ្រោះកាចាញ និងតំបន់ទឹកជ្រោះ ៧ជាន់ ឬទឹកជ្រោះអូរសៀនឡែ ត្រូវបានអាជ្ញាធររៀបចំសណ្ដាប់ធ្នាប់ អនាម័យ សន្តិសុខរួចរាល់សម្រាប់ភ្ញៀវទេសចរមកកម្សាន្តនាពិធីបុណ្យអុំទូក ដែលនឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី៧ ខែវិច្ឆិកា។
ប៉ុន្មានថ្ងៃមុនពេលប្រារព្ធពិធីបុណ្យអុំទូក នៅក្រុងបានលុង សភាពការណ៍ជាទូទៅមានសភាពស្ងប់ស្ងាត់ខុសធម្មតា ប្រជាពលរដ្ឋ អាជីវករ មន្ត្រីរាជការខ្លះឈប់សម្រាក ខ្លះនាំក្រុមគ្រួសារធ្វើដំណើរទៅស្រុកកំណើត និងទីក្រុងភ្នំពេញ។ ដោយឡែកតាមមន្ទីរ ស្ថាប័នរដ្ឋនានា បានរៀបចំតុបតែងដោយទង់ជាតិទង់ជ្វាលាតាមអគាររដ្ឋបាលជុំវិញខេត្ត សម្អាតដងផ្លូវសាធារណៈ ដាក់តាំងភ្លើងលំអតាមសួនសាធារណៈ និងជាពិសេសនៅតំបន់មាត់បឹងកន្សែង អាជីវករលក់ដូរបានរៀបចំភ្លើងបំភ្លឺព្រោងព្រាត សម្រាប់ទទួលប្រជាពលរដ្ឋ និងភ្ញៀវទេសចរមកកម្សាន្តនៅមាត់បឹងនេះ។
អភិបាលរងខេត្ត និងជាអ្នកនាំពាក្យសាលាខេត្តរតនគិរី លោក លី វិន ចាត់ទុកសក្ដានុពលវិស័យទេសចរណ៍ គឺជាចំណុចសំខាន់ដែលអាជ្ញាធរខេត្តយកចិត្តទុកដាក់រៀបចំ ដើម្បីទទួលប្រជាពលរដ្ឋដែលអញ្ជើញពីបណ្ដាខេត្តនានា រួមទាំងទីក្រុងភ្នំពេញ មានបំណងមកកម្សាន្តនៅខេត្តភាគឦសានមួយនេះ។ លោកបន្តថា តំបន់រមណីយដ្ឋានសំខាន់ៗក្នុងខេត្ត ជាពិសេសបឹងយក្សឡោម នឹងអាចទាក់ទាញអ្នកទេសចរបានច្រើននាពិធីបុណ្យអុំទូកឆ្នាំនេះ៖ «រៀបចំតំបន់រមណីយដ្ឋានទាំងអស់ក្នុងខេត្តហ្នឹងឲ្យបានសមរម្យ និងមានដាក់តុបតែងសួនច្បារ កោសលាបថ្នាំដាក់ភ្លើងឲ្យវាស័ក្ដិសមទៅ យើងចាំទទួលភ្ញៀវ យើងជឿជាក់ថាភ្ញៀវគាត់នឹងអញ្ជើញមកហើយ។ យើងអត់មានទូកអុំនឹងគេ ពីមុនមកមានទូកត្រពាំងក្រហមមួយ ប៉ុន្តែឥឡូវវាបាក់បែកអស់ហើយ ឃើញខានបីឆ្នាំហ្នឹង»។
មុនផ្ទុះព្រឹត្តិការណ៍មនុស្សផ្អើលជាន់គ្នាស្លាប់រាប់រយនាក់នៅលើស្ពានមជ្ឈមណ្ឌលកម្សាន្តកោះពេជ្រ នាពិធីបុណ្យអុំទូកឆ្នាំ២០១០ យ៉ាងហោចណាស់មានប្រជាពលរដ្ឋក្នុងខេត្ត និងអ្នកទេសចរក្រៅខេត្ត មកកម្សាន្តនៅតំបន់រមណីយដ្ឋាននានាក្នុងខេត្តរតនគិរី ប្រមាណ ៦ពាន់នាក់ នាឱកាសបុណ្យអុំទូកម្តងៗ។
អនុប្រធានគណៈកម្មការគ្រប់គ្រងរមណីយដ្ឋានបឹងយក្សឡោម លោក សុណ្ណ ហ៊ាន រៀបរាប់ថា បឹងយក្សឡោម បច្ចុប្បន្នបានពង្រីកការរៀបចំទីតាំងបានល្អប្រសើរទាំងសន្តិសុខ សណ្ដាប់ធ្នាប់ និងអនាម័យ។ ជាមួយគ្នានោះ សហគមន៍អ្នកអភិរក្សតំបន់ទេសចរណ៍នេះ បានពង្រីកផែសម្រាប់មុជទឹក និងផ្លូវធ្វើដំណើរជុំវិញមាត់បឹងបានល្អ រួមទាំងរក្សាបាននូវលក្ខណៈធម្មជាតិសុទ្ធសាធ គ្មានការកែច្នៃ។ ទោះជាយ៉ាងនេះក្តី លោកថា ការចូលរួមរបស់ភ្ញៀវទេសចរទាក់ទិនការវេចខ្ចប់កាកសំណល់ដាក់ធុងសំរាម គឺជាកត្តាសំខាន់ ដែលជួយធ្វើឲ្យតំបន់បឹងយក្សឡោមក្លាយជាតំបន់ទេសចរណ៍បរិសុទ្ធជាមួយធម្មជាតិស្រស់ស្អាត៖ «របស់ដែលសល់ពីដៃគេបោះចោលពាសវាលពាសកាលអ៊ីចឹង វាអត់ល្អមើល តំបន់នេះជាតំបន់រមណីយដ្ឋាន។ ម្យ៉ាងទៀត នៅពេលគេផឹកស៊ីសុំកុំឲ្យគេឈ្លោះប្រកែក ឬក៏បង្កអំពើហិង្សារបួសស្នាម អ៊ីចឹងវាមិនល្អមើលតំបន់ហ្នឹង។ បើសិនបរទេសគេឃើញ គេរិះគន់ថា កម្ពុជា យើងអត់ទាន់មានច្បាប់ទម្លាប់»។
នៅឯតំបន់ទឹកជ្រោះកាចាញ វិញ ក្រុមសហគមន៍អភិរក្សទឹកជ្រោះនេះ ក៏បានត្រៀមលក្ខណៈធ្វើអនាម័យសម្អាតបរិវេណទឹកជ្រោះ រួមទាំងកន្លែងកម្សាន្តមានស្ពានយោលឆ្លងជ្រោះ ជាដើម។
ប្រធានរមណីយដ្ឋានទឹកជ្រោះ លោក ហៃ វាសនា អះអាងថា តំបន់ទឹកជ្រោះកាចាញ បានកែលំអកន្លែងកម្សាន្តមានស្ពានយោលឆ្លងជ្រោះ កន្លែងអង្គុយហូបអាហារ មានធុងសំរាម ធ្លាចតរថយន្ត និងមានកងសន្តិសុខការពារសណ្ដាប់ធ្នាប់ និងសន្តិសុខសម្រាប់អ្នកទេសចរ៖ «ធ្វើកញ្ចុះបានពីរ ហើយជួសជុលផ្ទះគ្រួសារគ្រឹងកូនកំលោះកូនក្រមុំ សម្អាត ហើយនិងដាំកូនឈើ។ នៅហ្នឹងមានស្រូបយកខ្យល់អាកាសធម្មជាតិមានទឹកធ្លាក់ ហើយនិងស្ពានយោលសម្រាប់កម្សាន្ត ហើយលេងទឹក»។
អាជ្ញាធរក្រុងបានលុង ឲ្យដឹងថា នៅឆ្នាំ២០១៤ នេះ សណ្ឋាគារ និងផ្ទះសំណាក់ បានកើនឡើងរហូតជាង ១ពាន់បន្ទប់ ក្នុងនោះសណ្ឋាគារមាន ១៤កន្លែង និងផ្ទះសំណាក់មាន ៣៥កន្លែង។ ដោយឡែកមានសណ្ឋាគារខ្នាតទំនើបចំនួនបី និងតំបន់កម្សាន្តទំនើប មានអាងហែលទឹកចំនួន២ បានសាងសង់រួច។
ប្រធានមន្ទីរទេសចរណ៍ខេត្តរតនគិរី លោក ង៉ែត វិទូ កត់សម្គាល់ថា រហូតមកទល់នឹងថ្ងៃទី៤ ខែវិច្ឆិកា ចំនួនអ្នកទេសចរមកកាន់ខេត្តរតនគិរី នៅមានចំនួនតិចតួចនៅឡើយ ក៏ប៉ុន្តែតាមផ្ទះសំណាក់ សណ្ឋាគារ បន្ទប់ស្នាក់នៅត្រូវបានភ្ញៀវកក់ទុកជាបន្តបន្ទាប់។ លោកវាយតម្លៃថា ឆ្នាំនេះផ្លូវធ្វើដំណើរ និងអាកាសធាតុអំណោយផលល្អ ហេតុនេះអ្នកទេសចរនឹងធ្វើដំណើរមកកម្សាន្តក្នុងខេត្តនេះច្រើន មិនចាញ់ពិធីបុណ្យអុំទូកកន្លងទៅឡើយ៖ «យើងបានហៅគាត់មកប្រជុំ ហើយអត់ធ្វើដូចពេលចូលឆ្នាំទេ។ ចូលឆ្នាំបានយើងធ្វើកម្មវិធីមានវាយគងសម្រាប់បង្ហាញភ្ញៀវទេសចរ ដល់ពេលអុំទូក យើងគ្រាន់ត្រៀមលក្ខណៈសុវត្ថិភាព អនាម័យតាមតំបន់រមណីយដ្ឋាន និងអូតែល (Hotel) យើងប្រជុំនិយាយជារឿយៗ ដោយសារថាកុំឲ្យឡើងថ្លៃ ប៉ុន្តែជានិច្ចកាល តែងឡើងបន្តិចបន្តួច»។
ខេត្តរតនគិរី ឋិតនៅតំបន់ភាគឦសានប្រទេស ចម្ងាយជិត ៦០០គីឡូម៉ែត្រពីទីក្រុងភ្នំពេញ។ ប្រជាពលរដ្ឋ ៨០ភាគរយ គឺជាជនជាតិដើមភាគតិច។ ក្រៅពីតំបន់ទេសចរណ៍សំខាន់ទាំងបី ខេត្តនេះមានបឹងលង្គុត ទឹកជ្រោះតាតតៃ ទឹកជ្រោះចាអ៊ុង កាទៀង បឹងកម្សាន្តតំបន់វប្បធម៌ជនជាតិដើមភាគតិច តំបន់វាលរំប្លង់ ដំណើរកម្សាន្តតាមដងទន្លេសេសាន ទន្លេស្រែពក តំបន់ទស្សនាសត្វព្រៃនៃឧទ្យានជាតិវីរជ័យ។ ជាពិសេស បឹងកន្សែងនៅកណ្ដាលក្រុងបានលុង ដែលប្រជាពលរដ្ឋរាប់ពាន់នាក់មកប្រមូលផ្តុំគ្នាធ្វើប្រទីបតូចៗ បណ្ដែតក្នុងបឹងដូចពិធីបុណ្យអុំទុក បណ្ដែតប្រទីបនៅទីក្រុងភ្នំពេញដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។