ម្ចាស់ក្រុមហ៊ុនកប៉ាល់ ឬទូកដឹកភ្ញៀវទេសចរចេញទៅកម្សាន្តតាមបណ្ដាកោះនានាក្នុងខេត្តព្រះសីហនុ គ្រោងលើកបដាតវ៉ា និងផ្អាកសកម្មភាពដឹកភ្ញៀវចេញទៅកោះមួយរយៈពេល ដើម្បីប្រឆាំងចំពោះការកំណត់របស់គណៈកម្មាធិការអភិវឌ្ឍន៍ឆ្នេរសមុទ្រ ដែលឲ្យពួកគេដំឡើងតម្លៃលក់សំបុត្រដល់ ២០ដុល្លារ និងការជំរិតយកលុយពីពួកគេចំនួន ៣ដុល្លារពីការលក់សំបុត្រ ១សន្លឹក បង់ជូនរដ្ឋបាលខេត្ត។
បញ្ហានេះ រដ្ឋបាលខេត្តព្រះសីហនុ បញ្ជាក់ថា ថវិកាចំនួន ៣ដុល្លារនេះ គឺត្រូវយកទៅអភិវឌ្ឍតំបន់ឆ្នេរនានានៅមូលដ្ឋាននេះឲ្យមានអនាម័យ និងសោភ័ណភាព ដើម្បីទាក់ទាញកំណើនភ្ញៀវទេសចរឲ្យចូលមកទស្សនាខេត្តនេះបានច្រើននាថ្ងៃអនាគត គឺមិនមែនចូលហោប៉ៅបុគ្គលណាម្នាក់នោះទេ។
ម្ចាស់ក្រុមហ៊ុនកប៉ាល់ និងទូកដឹកភ្ញៀវទេសចរភាគច្រើន ដែលកំពុងបើកធ្វើអាជីវកម្មដឹកភ្ញៀវទេសចរជាតិ និងអន្តរជាតិ ចេញទៅកម្សាន្តតាមបណ្ដាកោះនានាក្នុងខេត្តព្រះសីហនុ បានបន្តរិះគន់ចំពោះសកម្មភាពរបស់រដ្ឋបាលខេត្តព្រះសីហនុ និងគណៈកម្មាធិការអភិវឌ្ឍន៍តំបន់ឆ្នេរសមុទ្រកម្ពុជា ដែលជំរិតឲ្យពួកគេត្រូវតែបង់លុយ ៣ដុល្លារសហរដ្ឋអាមេរិក ជូនរដ្ឋបាលខេត្ត ក្រោមលេសយកទៅអភិវឌ្ឍតំបន់ឆ្នេរសមុទ្រ ថាធ្វើឡើងតាមរបៀបផ្ដាច់ការ និងមានលក្ខណៈគំរាមកំហែង។
ផ្ដើមពីបញ្ហានេះ ម្ចាស់ក្រុមហ៊ុនកប៉ាល់ និងទូកដឹកភ្ញៀវទេសចរមួយចំនួន បានអះអាងថា ពួកគេមានគម្រោងលើកបដាតវ៉ានៅមុខវិមានលំហែកាយរបស់លោកនាយករដ្ឋមន្ត្រី ហ៊ុន សែន នៅឆ្នេរអូរឈើទាល និងផ្អាកសកម្មភាពដឹកភ្ញៀវមួយរយៈពេលខ្លី នៅមុន ឬក្រោយពិធីបុណ្យសមុទ្រដែលនឹងចូលមកដល់នៅថ្ងៃទី២៣ ដល់ថ្ងៃទី២៥ ខែធ្នូ ឆ្នាំ២០១៦។
ម្ចាស់ក្រុមហ៊ុនដឹកភ្ញៀវចេញទៅកម្សាន្តតាមកោះមួយចំនួន មានកោះរ៉ុង និងកោះរ៉ុងសន្លឹម ជាដើម បានស្នើកិច្ចអន្តរាគមន៍ពីប្រមុខដឹកនាំរាជរដ្ឋាភិបាល ឲ្យជួយមានវិធានការ និងទទូចដល់រដ្ឋបាលខេត្តព្រះសីហនុ ពិសេសថ្នាក់ដឹកនាំគណៈកម្មាធិការអភិវឌ្ឍន៍តំបន់ឆ្នេរសមុទ្រកម្ពុជា ឲ្យពិចារណាឡើងវិញចំពោះការកំណត់ឲ្យពួកគេត្រូវតែបង់ថវិកា ៣ដុល្លារជូនរដ្ឋបាលខេត្តនេះ ដើម្បីកុំឲ្យប៉ះពាល់ដល់វិស័យទេសចរណ៍ខេត្តនេះនាថ្ងៃខាងមុខ។
ទាក់ទិនបញ្ហានេះ អភិបាលខេត្តព្រះសីហនុ លោក យន្ត មីន ផ្តល់បទសម្ភាសន៍ដល់អាស៊ីសេរី កាលពីថ្ងៃទី៨ ខែធ្នូ ថា ការកំណត់ឲ្យម្ចាស់ក្រុមហ៊ុនកប៉ាល់ ឬទូកដឹកភ្ញៀវទេសចរចេញទៅកម្សាន្តតាមកោះទាំងអស់ ដែលបើកធ្វើអាជីវកម្មក្នុងខេត្តនេះ ត្រូវបង់ថវិកា ៣ដុល្លារសហរដ្ឋអាមេរិកពីការលក់សំបុត្រជូនភ្ញៀវទេសចរ ១សន្លឹក ជូនរដ្ឋបាលខេត្ត ប្រយោជន៍ដើម្បីយកទៅអភិវឌ្ឍតំបន់ឆ្នេរឲ្យមានសោភ័ណភាព។
លោក យន្ត មីន អំពាវនាវដល់ម្ចាស់ក្រុមហ៊ុនទូកដឹកភ្ញៀវទេសចរទាំងអស់ ត្រូវចូលរួមសហការជាមួយរដ្ឋបាលខេត្ត និងគណៈកម្មាធិការអភិវឌ្ឍន៍តំបន់ឆ្នេរសមុទ្រឲ្យបានទាំងអស់គ្នា ដើម្បីឲ្យរដ្ឋបាលខេត្តមានថវិកាយកទៅអភិវឌ្ឍតំបន់ឆ្នេរនានាឲ្យមានសោភ័ណភាព និងអនាម័យ សម្រាប់ទាក់ទាញភ្ញៀវទេសចរនាថ្ងៃអនាគត៖ « ថ្នាក់ដឹកនាំគណៈកម្មាធិការអភិវឌ្ឍន៍តំបន់ឆ្នេរសមុទ្រកម្ពុជា គឺបានគាំទ្រ និងជំរុញឲ្យរដ្ឋបាលខេត្តព្រះសីហនុ សុំវិភាគទានពីបងប្អូនម្ចាស់ក្រុមហ៊ុនកប៉ាល់ និងទូកដឹកភ្ញៀវទេសចរចេញទៅកម្សាន្តបណ្ដាកោះនានាក្នុងការលក់សំបុត្រ ១សន្លឹកចំនួន ៣ដុល្លារ ដើម្បីយកថវិកាទាំងនេះទៅជួយគាំពារ អភិវឌ្ឍតំបន់ឆ្នេរសមុទ្រខេត្តព្រះសីហនុ របស់យើង ក្នុងនោះ គឺយើងបានប្រមូលបងប្អូនដែលធ្វើអាជីវកម្មដឹកជញ្ជូនភ្ញៀវទេសចរតាមសមុទ្រទាំងអស់ ឲ្យពួកគាត់ចូលរួមគាំទ្រ និងសហការជាមួយរដ្ឋបាលខេត្ត ហើយមកដល់ពេលនេះ គឺម្ចាស់អាជីវកម្មទាំងនោះ ពួកគេបានឯកភាពគ្នានៅក្នុងកិច្ចប្រជុំកាលពីចុងខែវិច្ឆិកា ឆ្នាំ២០១៦ »។
ការកំណត់ឲ្យម្ចាស់ក្រុមហ៊ុនកប៉ាល់ ឬទូកដឹកភ្ញៀវទេសចរទាំងអស់ ត្រូវបង់ថវិកា ៣ដុល្លារសហរដ្ឋអាមេរិក ជូនរដ្ឋបាលខេត្តព្រះសីហនុ តាមរយៈការចេញលិខិតចុងក្រោយ ចុះថ្ងៃទី២៩ ខែវិច្ឆិកា មានបោះត្រា និងចុះហត្ថលេខាលោក សុខ ផន អភិបាលរងខេត្តព្រះសីហនុ។ លក្ខខណ្ឌខ្លះនៅក្នុងលិខិតនេះ បានរំឭកដល់ម្ចាស់ក្រុមហ៊ុន និងម្ចាស់ទូកដឹកជញ្ជូនភ្ញៀវទេសចរទៅកម្សាន្តតាមបណ្ដាកោះនានា អំពីការកំណត់តម្លៃលក់សំបុត្រជូនភ្ញៀវទេសចរ ១សន្លឹក ត្រូវដំឡើងដល់ចំនួន ២០ដុល្លារ និងការកំណត់ថវិកាបង់ជូនរដ្ឋបាលខេត្ត ៣ដុល្លារ សម្រាប់ទ្រទ្រង់ការអភិវឌ្ឍតំបន់ឆ្នេរសមុទ្រខេត្តព្រះសីហនុ។
ត្រង់ចំណុចនេះ ភ្ញៀវទេសចរ សាធារណជនទូទៅ ពិសេសម្ចាស់ក្រុមហ៊ុនកប៉ាល់ និងទូកដឹកភ្ញៀវទេសចរចេញទៅកម្សាន្តតាមកោះនានា បង្ហាញការហួសចិត្ត កាលបើថ្នាក់ដឹកនាំគណៈកម្មាធិការអភិវឌ្ឍន៍តំបន់ឆ្នេរសមុទ្រ និងរដ្ឋបាលខេត្តព្រះសីហនុ បានតម្រូវឲ្យពួកគេដំឡើងថ្លៃលក់សំបុត្រជូនភ្ញៀវធ្វើដំណើរចេញទៅតាមកោះទាំងទៅទាំងមក ត្រូវដំឡើងដល់ ២០ដុល្លារក្នុងថ្លៃលក់សំបុត្រ ១សន្លឹក ដែលតម្លៃនេះ ក្រុមហ៊ុនដឹកភ្ញៀវទេសចរខ្លះបានទម្លាក់តម្លៃសំបុត្រមកត្រឹម ១២ ឬ ១៥ដុល្លារក្នុង ១សន្លឹក ដើម្បីជាការរួមចំណែកកាត់បន្ថយភាពក្រីក្រជាមួយប្រមុខដឹកនាំរាជរដ្ឋាភិបាល និងរួមចំណែកទាក់ទាញកំណើនភ្ញៀវទេសចរឲ្យមកទស្សនាប្រទេសកម្ពុជា ពិសេសខេត្តព្រះសីហនុ ឲ្យបានច្រើនថែមទៀតនាថ្ងៃអនាគត។
យ៉ាងនេះក្តី លិខិតចុងក្រោយចុះថ្ងៃទី២៩ ខែវិច្ឆិកា របស់រដ្ឋបាលខេត្តព្រះសីហនុ ក៏បានចោទម្ចាស់ក្រុមហ៊ុនទូកទេសចរណ៍ដឹកភ្ញៀវចេញទៅកម្សាន្តតាមបណ្ដាកោះ ថាមានភាពមិនប្រក្រតីក្នុងរយៈពេលប៉ុន្មានខែចុងក្រោយ មានដូចជា ក្រុមហ៊ុនបានបញ្ចុះតម្លៃលក់សំបុត្រជូនភ្ញៀវទាបពេក និងដណ្ដើមភ្ញៀវគ្នា បង្កឲ្យមានភាពមិនល្អ និងបង្កភាពអវិជ្ជមានក្នុងមុខរបរប្រកបអាជីវកម្ម បង្កើតជាភាពអនាធិបតេយ្យក្នុងវិជ្ជាជីវៈជាដើម។ ក្នុងន័យនេះ ដើម្បីឲ្យការប្រកបមុខរបរដឹកជញ្ជូនភ្ញៀវទេសចរទៅកម្សាន្តតាមបណ្ដាកោះបានល្អប្រសើរ និងមានរបៀបរៀបរយឡើងវិញ រដ្ឋបាលខេត្តព្រះសីហនុ បានដាក់ចេញនូវវិធានការ ៧ចំណុច ជូនដល់ម្ចាស់ក្រុមហ៊ុនទូកដឹកភ្ញៀវទេសចរទាំងអស់ រួមមាន៖
ត្រូវលក់សំបុត្រជូនភ្ញៀវទេសចរក្នុងម្នាក់តម្លៃ ២០ដុល្លារសហរដ្ឋអាមេរិក
ក្រុមហ៊ុនត្រូវបង់ថ្លៃលក់សំបុត្រ ១សន្លឹកចំនួន ៣ដុល្លារជូនរដ្ឋបាលខេត្ត សម្រាប់ទ្រទ្រង់ការអភិវឌ្ឍឆ្នេរសមុទ្រ
ក្រុមហ៊ុន និងម្ចាស់ទូកដឹកភ្ញៀវទេសចរទាំងអស់ត្រូវចងក្រងជាសមាគម
ត្រូវរៀបចំពេលវេលាចេញដំណើរ និងពេលវេលាវិលវិញឲ្យបានច្បាស់លាស់ ឬចែកវេន និងលេខរៀងទូកកំណត់ដោយក្រុមការងារចម្រុះខេត្តព្រះសីហនុ
ក្រុមហ៊ុន ឬសេវាករទាំងអស់ ត្រូវស្នើសុំអាជ្ញាប័ណ្ណធ្វើអាជីវកម្មដឹកជញ្ជូនភ្ញៀវទេសចរតាមផ្លូវទឹកឲ្យបានត្រឹមត្រូវនៃច្បាប់ចរាចរណ៍
ក្រុមហ៊ុន ឬម្ចាស់អាជីវកម្មណាដែលគ្មានអាជ្ញាប័ណ្ណប្រកបអាជីវកម្មដឹកជញ្ជូនភ្ញៀវទេសចរតាមផ្លូវទឹក មិនត្រូវបានអនុញ្ញាតឲ្យធ្វើអាជីវកម្មក្នុងខេត្តព្រះសីហនុទេ
ជាងនេះ ក្រុមហ៊ុន ឬម្ចាស់អាជីវកម្មណាដែលមិនអនុវត្តតាមខ្លឹមសារនៃសេចក្តីជូនដំណឹងនេះ ត្រូវទទួលខុសត្រូវចំពោះមុខច្បាប់ជាធរមាន ដោយត្រូវដកហូតអាជ្ញាប័ណ្ណ ឬលុបចោលអាជ្ញាប័ណ្ណមិនឲ្យប្រកបអាជីវកម្មដឹកភ្ញៀវទេសចរតទៅទៀតទេ។
ទោះយ៉ាងណា នៅក្នុងលិខិតចំហមួយចំនួនដែលម្ចាស់ក្រុមហ៊ុនកប៉ាល់ និងទូកទេសចរណ៍ខ្លះបានផ្ញើជូនអ្នកយកព័ត៌មានអាស៊ីសេរី ប្រចាំខេត្តព្រះសីហនុ ជាបន្តបន្ទាប់ ស្នើឲ្យជួយផ្សព្វផ្សាយព័ត៌មាននេះ បានដឹងឮដល់លោកនាយករដ្ឋមន្ត្រី ហ៊ុន សែន។ ម្ចាស់ក្រុមហ៊ុនខ្លះបានសរសេរសាររិះគន់ថ្នាក់ដឹកនាំគណៈកម្មាធិការអភិវឌ្ឍន៍តំបន់ឆ្នេរសមុទ្រ និងរដ្ឋបាលខេត្តព្រះសីហនុ ដែលមកកំណត់ឲ្យពួកគេដំឡើងតម្លៃលក់សំបុត្រកប៉ាល់ ឬទូកជូនភ្ញៀវទេសចរ ត្រូវឡើងដល់ ២០ដុល្លារ និងត្រូវបង់លុយ ៣ដុល្លារពីការលក់សំបុត្រទូកជូនភ្ញៀវទេសចរ ១សន្លឹក ជូនរដ្ឋបាលខេត្តព្រះសីហនុ ថាជាសកម្មភាពចាប់ជំរិត មានលក្ខណៈគំរាមកំហែង និងធ្វើឡើងតាមរបៀបផ្ដាច់ការ។
ម្ចាស់ក្រុមហ៊ុនខ្លះ បានប្រដូចការកំណត់ឲ្យពួកគេត្រូវតែបង់លុយ ៣ដុល្លារជូនរដ្ឋបាលខេត្តព្រះសីហនុ ថាធ្វើឡើងតាមរបៀបធ្វើនំអត់ម្សៅ ដោយការកំណត់ឲ្យពួកគេបង់លុយ ៣ដុល្លារនេះ មិនទាន់មានការឯកភាពពីម្ចាស់ក្រុមហ៊ុនកប៉ាល់ និងទូកដឹកភ្ញៀវទេសចរភាគច្រើននៅឡើយទេនាពេលកន្លងមក។
ម្ចាស់ក្រុមហ៊ុនខ្លះ បានចាត់ទុកការតម្រូវរបស់រដ្ឋបាលខេត្តព្រះសីហនុ កំណត់ឲ្យក្រុមហ៊ុនទូក ឬកប៉ាល់ដឹកភ្ញៀវទេសចរ ត្រូវដំឡើងតម្លៃលក់សំបុត្រដល់ ២០ដុល្លារ និងត្រូវបង់ ៣ដុល្លារជូនរដ្ឋបាលខេត្តនេះ ថាបានអនុវត្តផ្ទុយ ឬមិនស្តាប់តាមគោលនយោបាយកាត់បន្ថយភាពក្រីក្ររបស់លោកនាយករដ្ឋមន្ត្រី ហ៊ុន សែន បានដាក់ចេញនោះទេ។ ជាងនេះទៀត ចំពោះការកំណត់តម្លៃលក់សំបុត្រខ្ពស់ហួសហេតុពេក ឬតម្រូវឲ្យពួកគេដំឡើងតម្លៃសំបុត្ររហូតដល់ ២០ដុល្លារ គឺបារម្ភខ្លាចនាំឲ្យភ្ញៀវទេសចរលែងចាប់អារម្មណ៍ធ្វើដំណើរមកទស្សនាខេត្តនេះនៅថ្ងៃអនាគត។
ត្រង់ចំណុចនេះ ម្ចាស់ក្រុមហ៊ុនទូកដឹកភ្ញៀវទេសចរភាគច្រើននាខេត្តព្រះសីហនុ សំណូមពរដល់ប្រមុខដឹកនាំ ឲ្យជួយធ្វើអន្តរាគមន៍ទៅរដ្ឋបាលខេត្តព្រះសីហនុ ដែលកំណត់ឲ្យក្រុមហ៊ុនដឹកជញ្ជូនភ្ញៀវទេសចរទាំងអស់ ចេញទៅកម្សាន្តតាមកោះនានា តម្រូវឲ្យដំឡើងតម្លៃលក់សំបុត្រ និងជំរិតឲ្យក្រុមហ៊ុនត្រូវតែបង់ប្រាក់ ៣ដុល្លារឲ្យរដ្ឋបាលខេត្តជាដាច់ខាតនោះជាថ្មីឡើងវិញ ដើម្បីកុំឲ្យប៉ះពាល់ដល់ជីវភាពប្រជាពលរដ្ឋ ពិសេសកំណើនភ្ញៀវទេសចរដែលចូលមកទស្សនាខេត្តព្រះសីហនុ នាថ្ងៃខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។