ក្រុមមគ្គុទ្ទេសក៍ទេសចរណ៍ជនជាតិខ្មែរមួយចំនួន ដែលនិយាយភាសាបរទេសនៅតំបន់អឺរ៉ុប បានត្អូញត្អែរថា ពួកគេកំពុងប្រឈមមុខនឹងការគ្មានកម្រៃប្រចាំថ្ងៃរយៈពេលជិត ២ខែមកហើយ។ ការរកប្រាក់កម្រៃប្រចាំថ្ងៃមិនបាននេះ គឺដោយសារតែចំនួនភ្ញៀវទេសចរបរទេសដែលចូលមកទស្សនាខេត្តសៀមរាប បានធ្លាក់ចុះក្នុងមួយរយៈពេលកន្លងមក។
មន្ត្រីមន្ទីរទេសចរណ៍ខេត្តសៀមរាប ឲ្យដឹងថា ចំនួនភ្ញៀវទេសចរបរទេសដែលចូលមកទស្សនាខេត្តនេះតាមរយៈច្រកទ្វារព្រំដែនគោក និងជើងយន្តហោះ បានថយចុះមួយកម្រិតក្នុងរយៈពេល ២ខែចុងក្រោយនៃឆមាសទី១ ឆ្នាំ២០១៥។
ភ្ញៀវទេសចរបរទេសដែលតែងមកទស្សនាខេត្តសៀមរាប ហើយធ្លាក់ចុះគួរឲ្យកត់សម្គាល់ទាំងនោះ គឺមកពីតំបន់អឺរ៉ុប តំបន់អាស៊ីបូព៌ា មានជប៉ុន និងកូរ៉េ ជាដើម។
ប្រធានមន្ទីរទេសចរណ៍ខេត្តសៀមរាប គឺលោក ង៉ូវ សេងកាក់។ លោកមានប្រសាសន៍ថា ក្នុងរយៈពេល ២ខែចុងក្រោយនេះ ចំនួនភ្ញៀវទេសចរបរទេសដែលចូលតាមច្រកទ្វារព្រំដែនគោកនៃប្រទេសថៃ និងតាមជើងយន្តហោះមកទស្សនាខេត្តសៀមរាប បានធ្លាក់ចុះមួយកម្រិត។ លោក ង៉ូវ សេងកាក់ មានប្រសាសន៍ថា ចំនួនភ្ញៀវទេសចរបរទេសដែលមកទស្សនាខេត្តសៀមរាប រយៈពេល ៦ខែឆ្នាំ២០១៥ នេះ គឺមានការថយចុះ ១១% បើប្រៀបធៀបនឹងរយៈពេលដូចគ្នាកាលពីឆ្នាំ២០១៤។ ប្រធានមន្ទីរទេសចរណ៍ដដែលបញ្ជាក់ថា លោកមិនដឹងពីមូលហេតុច្បាស់លាស់នៃការថយចុះចំនួនអ្នកទេសចរនោះទេ ប៉ុន្តែលោកគិតថា ប្រហែលមកពីស្ថានភាពនៅក្នុងតំបន់ ឬក៏បណ្ដាលមកពីការភ័យខ្លាចនៅពេលធ្វើដំណើរ៖ «ថយ វៀតណាម ជប៉ុន កូរ៉េ កើនចិន សម្រាប់ខែឆមាសទី១។ វាអាចប៉ះពាល់ពីសភាពការណ៍តំបន់ផង ហើយទំនងជាភ័យខ្លាចនឹងព្រឹត្តិការណ៍ធ្លាក់យន្តហោះច្រើននៅតំបន់អាស៊ីផង»។
ការថយចុះចំនួនអ្នកទេសចរបរទេសមកកាន់ខេត្តសៀមរាប ដែលជាបេះដូងទេសចរណ៍នៃប្រទេសកម្ពុជា នេះ គឺនៅក្រោយពេលដែលប្រទេសមួយចំនួននៅតំបន់អាស៊ីបូព៌ា បានទទួលរងការគំរាមកំហែងដោយជំងឺផ្លូវដង្ហើម ដែលភាសាអង់គ្លេសហៅថា មើស (MERSE)។
កាលពីពាក់កណ្ដាលខែមិថុនា កន្លងទៅ ប្រទេសកូរ៉េខាងត្បូង បានរកឃើញអ្នកកើតជំងឺផ្លូវដង្ហើមចំនួន ១៦២ករណី ហើយក្នុងចំណោមអ្នកជំងឺនោះ គឺ ២១នាក់បានស្លាប់។ ក្រៅពីនេះ អ្នកដែលបានប៉ះពាល់អ្នកជំងឺមើសចំនួន ៦.៥០០នាក់ផ្សេងទៀត ត្រូវបានគេដាក់ឲ្យនៅដាច់ដោយឡែកពីគេ ដើម្បីតាមដានស្ថានភាពសុខភាព។
កាលពីរាត្រីថ្ងៃទី៩ ខែកក្កដា កន្លងទៅ នៅឯព្រលានយន្តហោះអន្តរជាតិខេត្តសៀមរាប ក៏មានការភ្ញាក់ផ្អើលជុំវិញបញ្ហាជំងឺមើសនេះដែរ បន្ទាប់ពីជនជាតិកូរ៉េម្នាក់ ចុះពីយន្តហោះមានអាការៈក្ដៅខ្លួនខ្លាំង ហើយបញ្ជូនទៅកាន់មន្ទីរពេទ្យ។
ទោះយ៉ាងណា ប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត ក្រូស សារ៉ាត់ បានអះអាងថា រហូតមកដល់ពេលនេះ នៅខេត្តសៀមរាប និងខេត្តដទៃទៀតរបស់កម្ពុជា មិនមានករណីជំងឺមើសនៅឡើយទេ។
កាលពីសប្ដាហ៍មុន អាជ្ញាធរជាតិអប្សរាទទួលបន្ទុកការពារ និងថែរក្សាប្រាសាទបុរាណ បានចេញរបាយការណ៍បញ្ជាក់ថា ក្នុងរយៈពេល ៦ខែនៃឆមាសទី១ ឆ្នាំ២០១៥ គឺចំនួនភ្ញៀវទេសចរបរទេសដែលទិញសំបុត្រចូលទៅទស្សនារមណីយដ្ឋានអង្គរ មានការកើនឡើង ១,៦១%។
ទោះយ៉ាងណា ប្រធាននាយកដ្ឋានផ្សព្វផ្សាយរបស់អាជ្ញាធរអប្សរា លោក ឡុង កុសល ទទួលស្គាល់ថា ថ្វីត្បិតតែតួលេខនៃចំនួនភ្ញៀវទេសចរដែលទិញសំបុត្រចូលទស្សនារមណីយដ្ឋានអង្គរមានការកើនឡើង ក៏ប៉ុន្តែចំនួនភ្ញៀវដែលមកទស្សនាខេត្តសៀមរាប ទាំងមូល គឺអាចថយចុះជាងកាលពីឆមាសទី១ នៃឆ្នាំ២០១៤ មែន៖ «ជាទូទៅ គឺយើងតែងតែផ្អែកទៅលើមូលដ្ឋាន និងទិន្នន័យតួលេខរបស់មន្ទីរទេសចរណ៍ដូចគ្នា អ៊ីចឹងខ្ញុំគិតថា តួលេខរបស់មន្ទីរទេសចរណ៍ដែលថាភ្ញៀវធ្លាក់ចុះនៅក្នុងឆមាសទី១ ឆ្នាំ២០១៥ គឺជាតួលេខដ៏ត្រឹមត្រូវហើយ»។
ក្រុមមគ្គុទ្ទេសក៍ទេសចរណ៍ជនជាតិខ្មែរដែលនិយាយភាសាអឺរ៉ុប មួយចំនួន បានត្អូញត្អែរអំពីការបាត់បង់ចំណូលប្រចាំថ្ងៃ ដោយសារការធ្លាក់ចុះនៃចំនួនអ្នកទេសចរបរទេសនេះ។
អ្នកមគ្គុទ្ទេសក៍ទេសចរណ៍ភាសាអាល្លឺម៉ង់ លោក ឃ្លោក សាខឿន បានត្អូញត្អែរថា រយៈពេលជាង ៥០ថ្ងៃមកហើយ រូបលោកមិនដែលបាននាំភ្ញៀវទេសចរដើរកម្សាន្តទេ។ លោក ឃ្លោក សាខឿន បញ្ជាក់ថា ការធ្លាក់ចុះនៃចំនួនភ្ញៀវទេសចរពីតំបន់អឺរ៉ុប មានអង់គ្លេស អាល្លឺម៉ង់ ឬក៏អេស្ប៉ាញ ជាដើមនោះ មិនមែនតែរូបលោកម្នាក់ទេដែលប្រឈមមុខនឹងការបាត់បង់ចំណូលប្រចាំថ្ងៃ គឺមានមគ្គុទ្ទេសក៍ទេសចរណ៍ជាច្រើនទៀត៖ «តាមធម្មតាភ្ញៀវអង់គ្លេស ភ្ញៀវមកពីអឺរ៉ុប ដូចជាអាល្លឺម៉ង់ អី គឺខែ៥ ខែ៦ តែងតែមានភ្ញៀវយ៉ាងហោចណាស់ក៏ ៣-៤ក្រុមដែរក្នុងម្នាក់ៗ ប៉ុន្តែឆ្នាំនេះគឺ ៥០ថ្ងៃមកហើយ ខ្ញុំមិនដែលមានភ្ញៀវសោះ»។
មគ្គុទ្ទេសក៍ទេសចរណ៍ដដែលបញ្ជាក់ថា លោកមិនដឹងច្បាស់ពីមូលហេតុថា ហេតុអ្វីបានជាភ្ញៀវទេសចរបរទេសធ្លាក់ចុះនៅក្នុងពេលនេះ ដែលជារដូវពុំធ្លាប់ធ្លាក់ចុះដូច្នេះទេ។
ស្ថិតិរបស់មន្ទីរទេសចរណ៍ខេត្តសៀមរាប ឲ្យដឹងថា ក្នុងរយៈពេល ៥ខែឆ្នាំ២០១៥ នេះ គឺមានភ្ញៀវទេសចរបរទេសប្រមាណ ៩៩ម៉ឺននាក់ បានមកទស្សនាខេត្តសៀមរាប។ ចំនួននេះ គឺថយចុះ ១១% បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៤ កន្លងទៅ គឺមានចំនួន ១លាន ១សែននាក់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។