រយៈពេលបីថ្ងៃនៃពិធីបុណ្យចូលឆ្នាំខ្មែរប្រពៃណីជាតិ ឆ្នាំ២០១៤ នេះ ចំនួនភ្ញៀវទេសចរនៅខេត្តកំពង់ឆ្នាំង បានកើនឡើងជាង ១ម៉ឺននាក់ និងខេត្តពោធិ៍សាត់ បានកើនឡើងជាង ១ម៉ឺននាក់ដែរ បើប្រៀបធៀបទៅនឹងឆ្នាំមុន។ ចំណែកបញ្ហាគ្រោះថ្នាក់ចរាចរណ៍ក្នុងរយៈពេលបីថ្ងៃនេះវិញ គឺកើតមានច្រើនករណីគួរឲ្យព្រួយបារម្ភ។
មន្ត្រីនៃមន្ទីរទេសចរណ៍ខេត្តទាំងពីរ ឲ្យដឹងនៅថ្ងៃទី១៧ ខែមេសា ថា តំបន់ទេសចរណ៍ទឹកធ្លាក់ច្រកល្អៀង នៅស្រុកក្រគរ និងទឹកធ្លាក់ល្បាក់កំរោញ នៅស្រុកភ្នំក្រវាញ មានអ្នកចូលទៅកម្សាន្តច្រើនជាងគេក្នុងចំណោមតំបន់ទេសចរណ៍ចំនួន ៩កន្លែង នៅទូទាំងខេត្តពោធិ៍សាត់។ ចំណែកនៅកំពង់ឆ្នាំង មានតំបន់ទេសចរណ៍ភ្នំសន្ទូច នៅស្រុករលាប្អៀរ និងវត្តត្រឡែងកែង នៅស្រុកកំពង់ត្រឡាច ដែលមានមនុស្សចូលទៅកម្សាន្តច្រើនជាងគេ ក្នុងចំណោមតំបន់ទេសចរណ៍ចំនួន ២៤កន្លែងនៅទូទាំងខេត្ត។
ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី មានប្រសាសន៍ថា ពលរដ្ឋភាគច្រើនបានចាប់អារម្មណ៍នឹងការកម្សាន្តនៅតាមវត្តអារាម ដែលមន្ទីរបានចាត់ទុកជាមណ្ឌលកម្សាន្តសំខាន់ៗចំនួន ១២កន្លែង ប៉ុន្តែនៅតាមតំបន់ទេសចរណ៍របស់ខេត្តវិញ មិនសូវមានការទាក់ទាញមនុស្សឲ្យទៅកម្សាន្តឡើយ ដោយសារតែនៅតំបន់ទាំងនោះមិនទាន់មានការអភិវឌ្ឍ។
លោកបានបូកសរុបតួលេខនៃចំនួនភ្ញៀវទៅកម្សាន្តនៅតាមតំបន់ទេសចរណ៍ និងមណ្ឌលកម្សាន្តនានាក្នុងខេត្តសម្រាប់រយៈពេលបីថ្ងៃ នៃពិធីបុណ្យចូលឆ្នាំខ្មែរមានជាង ៧ម៉ឺននាក់ (៧៧.៩៣៩នាក់) ដោយនៅក្នុងឆ្នាំ២០១៣ មានជាង ៦ម៉ឺននាក់ (៦៥.៦៩៣នាក់) ក្នុងនោះមានភ្ញៀវអន្តរជាតិកើនឡើងចំនួន ២២នាក់៖ «តំបន់ទេសចរណ៍នៅក្នុងខេត្តហ្នឹង គឺពុំសូវមានសកម្មភាពទេសចរណ៍ទៅលេងកម្សាន្តនៅទីនោះទេបាទ! មណ្ឌលដែលកម្សាន្តភាគច្រើន គឺនៅតាមវត្តអារាម»។
ចំណែកនាយករដ្ឋបាលនៃមន្ទីរទេសចរណ៍ខេត្តពោធិ៍សាត់ កញ្ញា ផល សំណាង ថ្លែងថា ក្នុងរយៈពេលបីថ្ងៃនៃពិធីបុណ្យចូលឆ្នាំខ្មែរឆ្នាំនេះ មានភ្ញៀវទេសចរណ៍ជាង ៧ម៉ឺននាក់ (៧២.៤៤៥នាក់) ដោយនៅក្នុងឆ្នាំ២០១៣ មានចំនួនជាង ៦ម៉ឺននាក់ (៦៩.៥៤២នាក់) ហើយមានភ្ញៀវទេសចរបរទេសចំនួន ៣៨៩នាក់ផ្សេងទៀត ប៉ុន្តែនៅក្នុងឆ្នាំ២០១៤ នេះពុំមានវត្តមានភ្ញៀវទេសចរអន្តរជាតិនោះទេ៖ «ក្នុងចំណោម ៩កន្លែងហ្នឹងមានតែទឹកធ្លាក់ច្រកល្អៀងទេបង ព្រោះខែចូលឆ្នាំខ្មែរគេតម្រូវទៅហ្នឹង។ ដល់ពេលខ្ញុំប្រៀបធៀបគិតជាភាគរយធៀបជាមួយឆ្នាំ២០១៣ ទៅ ឃើញថាវាកើនឡើង ៣,៦០ភាគរយ»។
ទាក់ទងនឹងគ្រោះថ្នាក់ចរាចរណ៍វិញ ត្រូវបានមន្ត្រីនៃស្នងការដ្ឋាននគរបាលខេត្តទាំងពីរអះអាងថា ករណីគ្រោះថ្នាក់ចរាចរណ៍បានកើនឡើង បើធៀបនឹងឆ្នាំមុន។ សម្រាប់ខេត្តកំពង់ឆ្នាំង មានគ្រោះថ្នាក់ចំនួន ៧ករណី កើនឡើងជាងឆ្នាំ២០១៣ ចំនួន ៣ករណី ក្នុងនោះមាន ២នាក់ស្លាប់ និងរបួសធ្ងន់ចំនួន ១៦នាក់។ ចំណែកនៅឯខេត្តពោធិ៍សាត់ មានគ្រោះថ្នាក់ចំនួន ៩ករណី កើនឡើងជាងឆ្នាំទៅចំនួន ២ករណី ក្នុងនោះមានក្មេងស្លាប់ម្នាក់ និងរងរបួសធ្ងន់ចំនួន ១១នាក់។
ប្រធានការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង លោក អៀរ ប៊ុនធឿន គូសបញ្ជាក់ថា គ្រោះថ្នាក់ចរាចរណ៍ក្នុងរយៈពេលបីថ្ងៃនេះ ភាគច្រើន គឺបង្កឡើងដោយម៉ូតូដែលបើកលើសល្បឿនកំណត់ បើកជែងក្នុងស្ថានភាពគ្រោះថ្នាក់ និងបើកបរក្នុងស្ថានភាពស្រវឹង ជាដើម៖ «ប៉ុន្តែចំនួនអ្នកស្លាប់ថយ ឆ្នាំនេះស្លាប់តែ ២ទេ ឆ្នាំមុនស្លាប់រហូតដល់ ៤នាក់។ ក្នុងហ្នឹង ខ្ញុំបញ្ជាក់បន្តិចទៀតថា ខូចម៉ូតូរហូតដល់ ៩គ្រឿង ក្នុងហ្នឹងម៉ូតូខូចធ្ងន់ ៣គ្រឿង»។
ពិធីបុណ្យចូលឆ្នាំខ្មែរប្រពៃណីជាតិឆ្នាំមមីនេះ បានចាប់ពីថ្ងៃទី១៤ ១៥ និងថ្ងៃទី១៦ ខែមេសា ដែលនៅតាមវត្តមួយចំនួនមិនទាន់ឆ្លងបញ្ចប់នៅឡើយទេ គិតមកដល់ថ្ងៃទី១៧ ខែមេសា។ ឆ្នាំនេះ ទាក់ទងនឹងសន្តិសុខសុវត្ថិភាព គេមិនសូវឃើញមានករណីក្មេងស្ទាវវាយកាប់ចាក់គ្នានៅតាមវត្តអារាម ឬមណ្ឌលកម្សាន្តផ្សេងៗ ដូចកាលពីឆ្នាំទៅឡើយ នៅខេត្តកំពង់ឆ្នាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។