រយៈពេលបីថ្ងៃនៃពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំនេះ អ្នកទេសចរមកកម្សាន្តនៅខេត្តរតនគិរី កើនឡើង ៨% ប្រៀបធៀបពិធីបុណ្យអុំទូកបណ្ដាឆ្នាំកន្លងទៅ។ តំបន់រមណីយដ្ឋានក្នុងខេត្តរួមមាន បឹងយក្សឡោម និងទឹកជ្រោះកាចាញ ទទួលបានអ្នកទេសចរច្រើនកកកុញអញ្ជើញពីបណ្ដាខេត្តនានា និងទីក្រុងភ្នំពេញ រួមទាំងអ្នកទេសចរបរទេសទៀតផង។
តំបន់រមណីយដ្ឋានបឹងយក្សឡោមដ៏ល្បីល្បាញក្នុងខេត្តរតនគិរី រយៈពេលបីថ្ងៃនៃពិធីបុណ្យអុំទូកឆ្នាំនេះ អ្នកទេសចរច្រើនរាប់ពាន់នាក់មកកម្សាន្តក្នុងមួយថ្ងៃៗ។
អ្នកទេសចរខ្លះមុជទឹកលេងក្នុងបឹង អ្នកខ្លះជួបជុំអង្គុយហូបអាហារជុំវិញមាត់បឹង អ្នកខ្លះថតរូបអនុស្សាវរីយនៅមុខខ្ទមនិមិត្តរូបរបស់កូនកំលោះក្រមុំជនជាតិដើមភាគតិចទំពួន អ្នកខ្លះជិះដំរីជុំវិញបឹង និងអ្នកខ្លះទៀត ទិញវត្ថុអនុស្សាវរីយផលិតដោយសហគមន៍ជនជាតិដើម ដែលដាក់លក់ក្នុងរមណីយដ្ឋាន។
អ្នកទេសចរមកពីទីក្រុងភ្នំពេញ កញ្ញា ចែមច័ន្ទ សុថារត្ន សម្ដែងអារម្មណ៍រីករាយខណៈនាង និងក្រុមគ្រួសារ បានមកកម្សាន្តនៅបឹងយក្សឡោមលើកដំបូងនាឱកាសឈប់សម្រាកក្នុងពិធីបុណ្យអុំទូកឆ្នាំនេះ។ កញ្ញាវាយតម្លៃខ្ពស់ចំពោះធនធានធម្មជាតិ ជាពិសេសព្រៃឈើនៅជុំវិញបឹងយក្សឡោម ដែលរួមចំណែកធ្វើឲ្យបឹងធម្មជាតិមួយនេះ ក្លាយជាតំបន់ទេសចរណ៍ពិសេសនៃខេត្តភាគឦសាន៖ «មានអារម្មណ៍ថាសប្បាយចិត្ត ហើយក៏មានអារម្មណ៍ថាស្រស់ថ្លាមែនទែន ពេលដែលបានឃើញទេសភាពធនធានធម្មជាតិរបស់ខ្មែរ ដូចជាមានបឹងយក្សឡោម តាមទឹកជ្រោះផ្សេងៗ តាមព្រៃឈើ តាមជួរភ្នំ ហើយក៏បានឃើញជនជាតិភាគតិច។ អ៊ីចឹងមានអារម្មណ៍ថាបានស្គាល់ច្បាស់ពីជនជាតិខ្មែរ ក៏ដូចជាធនធានធម្មជាតិរបស់ខ្មែរយើងដែរ»។
ចំណែកអ្នកទេសចរមកពីខេត្តបាត់ដំបង អ្នកស្រី ម៉ា សុភ័ណ្ឌ រៀបរាប់ដែរថា បឹងយក្សឡោមពិតជាស្រស់ស្អាតមិនចាញ់តំបន់ទេសចរណ៍នៅខេត្តភាគពាយ័ព្យនោះឡើយ។ ចំណុចដែលធ្វើឲ្យអ្នកស្រីរិះគន់ គឺតម្លៃម្ហូបអាហារមានតម្លៃខ្ពស់ បើប្រៀបធៀបតំបន់ទេសចរណ៍នៅខេត្តបាត់ដំបង៖ «មកលេងនេះសប្បាយៗជាងខេត្តយើងបាត់ដំបង ទៀត។ ខ្ញុំមកមើលទឹកបឹងហ្នឹងស្អាតធូរអារម្មណ៍អ៊ីចឹងណា។ ម្ហូបនៅនេះថ្លៃជាងខាងយើងនៅនោះ នៅនោះមាន់មួយ ៤ម៉ឺន នៅយើងមាន់មួយ ៣ម៉ឺន ឬ ២ម៉ឺន ៥ពាន់តែប៉ុណ្ណឹង»។
ក្រៅពីការរិះគន់នេះ អនុប្រធានគណៈកម្មការអភិរក្សតំបន់ទេសចរណ៍ លោក សុវណ្ណ ហ៊ាន កត់សម្គាល់ដែរថា ចំណុចអវិជ្ជមានបន្ថែមទៀត គឺបញ្ហាកាកសំណល់គ្មានការវេចខ្ចប់ដាក់ធុងសំរាម បន្ទាប់ពីអ្នកទេសចរនាំគ្នាហូបអាហារជាលក្ខណៈគ្រួសារនៅបរិវេណបឹង។ ករណីនេះ បង្កឲ្យប៉ះពាល់អនាម័យសណ្ដាប់ធ្នាប់ល្អនៃតំបន់រមណីយដ្ឋាន។ ហេតុនេះ លោកអំពាវនាវឲ្យអ្នកទេសចរ យកចិត្តទុកដាក់បញ្ហានេះ ដើម្បីរួមចំណែកអនុវត្តពាក្យស្លោក រមណីយដ្ឋានស្អាត មានអនាម័យ ទេសចរណ៍រីកចម្រើន៖ «ចោល អូ! មិនធម្មតាទេ ហេហេ យើងនៅតែមានបញ្ហាហ្នឹង ប៉ុន្តែទាក់ទងនឹងសុវត្ថិភាព យើងមើលទៅល្អ ព្រោះខ្មែរយើងយល់ច្រើន អត់ដូចពីមុនៗទេ។ ឥឡូវគាត់ផឹកស្រវឹងមែន គាត់អត់មានវាយតប់គ្នាឈ្លោះគ្នាទេ តែខុសត្រង់ថាគាត់អត់បានវេចខ្ចប់ថង់ប្លាស្ទិកក្នុងបឹងណា»។
ទោះជាយ៉ាងនេះក្តី ម្ចាស់តូបលក់អាហារនៅបឹងយក្សឡោម លោក ចំរើន កត់សម្គាល់ថា ឆ្នាំនេះអ្នកលក់ដូរអាចរកប្រាក់ចំណូលសមរម្យពីភ្ញៀវទេសចរ ដោយសារចំនួនអ្នកទេសចរច្រើនខុសធម្មតា។ លោកបញ្ជាក់ថា តម្លៃលក់ម្ហូបអាហារជូនអ្នកទេសចរដូចថ្ងៃធម្មតា ប៉ុន្តែវាអាចថ្លៃខ្ពស់ជាងបណ្ដាខេត្តផ្សេង ដោយសារខេត្តរតនគិរី គ្រឿងអាហារបរិភោគមាន មាន់ ត្រី ជ្រូក នៅទីផ្សារមានតម្លៃខ្ពស់៖ «ភ្ញៀវទេសចរមកលេងច្រើន ហើយណាមួយថ្ងៃនេះចុងបង្ហើយផង មកលេងច្រើនតាំងពីព្រឹកមកម្ល៉េះ។ និយាយទៅ តម្លៃលក់ថេររហូតមក មិនថាថ្ងៃបុណ្យ មិនថាថ្ងៃធម្មតា បាទ! និយាយទៅឲ្យតែលក់ដាច់សប្បាយចិត្តណាស់»។
នៅវេលាយប់ ប្រជាពលរដ្ឋក្នុងខេត្ត និងអ្នកទេសចរ បានមកជួបជុំគ្នាមាត់បឹងកន្សែង នៅកណ្ដាលក្រុងបានលុង ជាកន្លែងកម្សាន្តមានតូបលក់ដូរនំចំណី ភេសជ្ជៈ កន្លែងអង្គុយយកខ្យល់អាកាសមាត់បឹង និងជាពិសេស បឹងនេះក៏ជានិមិត្តរូបនៃកន្លែងបណ្ដែតប្រទីបធ្វើដោយដៃរបស់ពលរដ្ឋចម្រុះជនជាតិ មានខ្មែរ ឡាវ ចិន វៀតណាម និងជនជាតិដើមភាគតិច។
អធិការប៉ូលិសក្រុងបានលុងស្តីទី លោក យន់ ប៊ុណ្ណា មានប្រសាសន៍បញ្ជាក់ថា សន្តិសុខ និងសណ្ដាប់ធ្នាប់ ជាពិសេសការធ្វើចរាចរដោយម៉ូតូ និងរថយន្តនៅបរិវេណមាត់បឹង ត្រូវបិទជាបណ្ដោះអាសន្ន ការពារកកស្ទះចរាចរណ៍។ លោកបន្តថា ការបាញ់កាំជ្រួច និងលេងគ្រឿងផ្ទុះមានសំឡេងខ្លាំងត្រូវហាមឃាត់ ដើម្បីរក្សាបរិយាកាសមិនភ្ញាក់ផ្អើលដល់អ្នកមកកម្សាន្តនៅមាត់បឹងកន្សែងនៅពេលយប់៖ «កម្លាំងប៉ុស្តិ៍បឹងកន្សែង និងកម្លាំងអធិការ គេរៀបចំសណ្ដាប់ធ្នាប់ហ្នឹងឲ្យឡាន និងម៉ូតូមានកន្លែងផ្ញើត្រឹមត្រូវ អត់ឲ្យចូលកន្លែងមាត់បឹងកន្សែងហ្នឹងទេ ស្ទះចរាចរណ៍។ ច្រើនណែនណាន់តាន់តាប់រាប់មិនអស់ទេ ខ្ទង់ប្រហែលជារាប់ពាន់ៗជាង។ បានណែនាំដែរ មិនឲ្យបាញ់កាំជ្រួចធំៗដែលអាចប៉ះពាល់ដល់ភ្ញៀវ ប៉ុន្តែក្មេងៗចេះតែបាញ់អាតូច»។
អាជ្ញាធរខេត្តរតនគិរី បានរៀបចំតំបន់រមណីយដ្ឋានសំខាន់ៗមានបឹងយក្សឡោម ទឹកជ្រោះកាចាញ និងទឹកជ្រោះ៧ជាន់ ឬទឹកជ្រោះអូរសៀនឡែ សម្រាប់ទទួលអ្នកទេសចរនាពេលឈប់សម្រាកក្នុងពិធីបុណ្យអុំទូក ដែលចាប់ផ្ដើមពីថ្ងៃទី៥ ដល់ថ្ងៃទី៧ ខែវិច្ឆិកា។
ទាក់ទិនដំណើរកម្សាន្តរបស់អ្នកទេសចរមកកាន់ខេត្តរតនគិរី នេះដែរ ប្រធានមន្ទីរទេសចរណ៍ខេត្ត លោក ង៉ែត វិទូ ថ្លែងថា ផ្ទះសំណាក់ សណ្ឋាគារមានបន្ទប់គ្រប់គ្រាន់សម្រាប់អ្នកទេសចរ។ លោកថា មានការដំឡើងថ្លៃតិចតួចពីម្ចាស់សណ្ឋាគារខ្លះ ប៉ុន្តែមិនមែនជាបញ្ហាធំដុំនោះឡើយ៖ «យើងទទួលបានគ្រប់គ្រាន់ ដោយសារសណ្ឋាគារយើងនៅឆ្នាំ២០១៤ កើនឡើងជាង ១០០បន្ទប់ទៀត។ យើងថាយើងណែនាំយ៉ាងម៉េចក៏គាត់នៅ ប៉ុន្តែសណ្ឋាគារដែលគេគោរពច្បាប់ គឺគេអត់ឡើងទេបាទ»។
ចំពោះស្ថានភាពសន្តិសុខសណ្ដាប់ធ្នាប់ក្នុងពិធីបុណ្យអុំទូកនៅខេត្តរតនគិរី ស្នងការប៉ូលិស លោក ងួន គឿន អះអាងថា មានលក្ខណៈល្អ គ្មានអំពើលួចប្លន់បង្ករបួសស្នាមអ្វីឡើយ ក្រៅពីគ្រោះថ្នាក់ចរាចរណ៍មួយករណី ទាក់ទិនប្រជាពលរដ្ឋក្នុងខេត្តដែលបណ្ដាលឲ្យមនុស្សម្នាក់ស្លាប់។ លោកបន្តថា កងកម្លាំងត្រូវបានដាក់ឲ្យការពារសុវត្ថិភាពតាមតំបន់ទេសចរណ៍ និងប៉ូលិសចរាចរ ត្រូវបានដាក់ពង្រាយតាមផ្លូវសាធារណៈ ដើម្បីត្រួតពិនិត្យសុវត្ថិភាពចរាចរណ៍នាពិធីបុណ្យអុំទុកនេះ៖ «បុណ្យអុំទូកនៅនេះសប្បាយណាស់ ប្រជាពលរដ្ឋយើងទៅលេងបុណ្យអុំទូកនៅភ្នំពេញស្ងាត់ភូមិស្ងាត់ស្រុកអត់ស្អីទេ នៅនេះកម្លាំងការពារយើងការពារលំនៅឋានផ្ទះសម្បែងរបស់គាត់ សុវត្ថិភាពអត់មានបញ្ហាអ្វីទេរហូតមកដល់ថ្ងៃនេះ»។
តួលេខបណ្ដោះអាសន្នរបស់មន្ត្រីមន្ទីរទេសចរណ៍ខេត្តរតនគិរី ឲ្យដឹងថា រយៈពេលបីថ្ងៃនៃពិធីបុណ្យអុំទូកនៅខេត្តរតនគិរី មានអ្នកទេសចរសរុបជិត ៧ពាន់នាក់មកកម្សាន្ត ក្នុងនោះអ្នកទេសចរបរទេសមានជាង ២០០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។