ប្រធានមន្ទីរទេសចរណ៍ខេត្តព្រះសីហនុ អះអាងពីការកើនឡើងនៃចំនួនភ្ញៀវទេសចរចូលទស្សនាឆ្នេរសមុទ្រ ក្នុងរយៈពេល ៣ថ្ងៃនៃពិធីបុណ្យអុំទូកឆ្នាំនេះ ថាបានកើនចំនួន ១៥% បើប្រៀបធៀបនឹងរយៈពេលដូចគ្នានេះកាលពីឆ្នាំ២០១៣។ រីឯគ្រោះថ្នាក់ចរាចរណ៍ បានកើតមាន ២ករណី ស្លាប់មនុស្សម្នាក់ និងរបួសធ្ងន់ស្រាលជិត ១០នាក់។
លោក នូ សុផល ប្រធានមន្ទីរទេសចរណ៍ខេត្តព្រះសីហនុ បានឲ្យវិទ្យុអាស៊ីសេរី ដឹងនៅថ្ងៃសៅរ៍ ទី៨ ខែវិច្ឆិកា ថា ចំនួនភ្ញៀវទេសចរចូលមកទស្សនាខេត្តព្រះសីហនុ ចាប់ពីថ្ងៃទី៥ ដល់ថ្ងៃទី៧ ខែវិច្ឆិកា មានចំនួនជាង ៨ម៉ឺន ២ពាន់នាក់ (៨២.២៥៩នាក់)។ ក្នុងនោះ ភ្ញៀវបរទេសមានចំនួនជិត ១ម៉ឺននាក់ (៩.៨៧១នាក់) រីឯភ្ញៀវក្នុងស្រុកមានជាង ៧ម៉ឺន ២ពាន់នាក់ (៧២.៣៨៨នាក់)។ លោកបន្តថា ចំនួននេះបើប្រៀបធៀបឆ្នាំ២០១៣ គឺបានកើនចំនួន១៥%។ ឆ្នាំ២០១៣ ចំនួនភ្ញៀវទេសចរសរុបមានចំនួនជាង ៧ម៉ឺន ១ពាន់នាក់ (៧១.៥១៧នាក់)។
ទាក់ទិនបញ្ហានេះ លោក ស៊ាង កុសល ស្នងការនគរបាលខេត្តព្រះសីហនុ ឲ្យដឹងថា រយៈពេល ៣ថ្ងៃនៃពិធីបុណ្យអុំទូកឆ្នាំនេះ មិនមានបទល្មើសព្រហ្មទណ្ឌកើតឡើងទេ។ ប៉ុន្តែគ្រោះថ្នាក់ចរាចរណ៍ បានកើតមាន ២ករណី សម្លាប់មនុស្សម្នាក់ និងរបួសធ្ងន់ស្រាលជិត ១០នាក់។ លោកបន្តថា គ្រោះថ្នាក់នេះក៏មានជនបរទេសរងរបួសចំនួន ៤នាក់ដែរ៖ «គ្រោះថ្នាក់ចរាចរណ៍យប់មិញនេះ ទាំងជនបរទេសទាំងខ្មែរចំនួន ៧នាក់។ ប៉ុន្តែគ្រាន់តែថា មានអ្នករងរបួសតិចតួច គាត់បានទៅផ្ទះខ្លួនឯងអស់ទៅ។ ហើយអ្នកទាំង ៧នាក់ហ្នឹងរបួសស្រាលខ្លះដែរ តែគាត់នៅកន្លែងកើតហេតុហ្នឹង។ ឥឡូវយើងកំពុងតែស្រាវជ្រាវទៀត ព្រោះឡានរងគ្រោះថ្នាក់មាន ៤គ្រឿង ខ្លាចមានអ្នករងរបួសទៀត ព្រោះអីយប់មិញយប់ជ្រៅពេក រហូតដល់ម៉ោង ២ ជិត ៣ បានយើងធ្វើការងារនេះចប់»។
លោកបន្ថែមថា គ្រោះថ្នាក់ចរាចរណ៍នេះកើតឡើងចំពោះរថយន្តធុនតូច និងរថយន្តកុងតឺន័រនៅតាមផ្លូវជាតិលេខ៤។
លោក អ៊ី សុខា ស្នងការរងទទួលបន្ទុកសណ្ដាប់ធ្នាប់នៃស្នងការដ្ឋាននគរបាល ខេត្តព្រះសីហនុ ឲ្យដឹងដែរថា ក្នុងរយៈពេល ៣ថ្ងៃនៃពិធីបុណ្យអុំទូក គ្រោះថ្នាក់ចរាចរណ៍ទាំង ២ករណីនេះ កើតលើកទី១នៅថ្ងៃទី៥ និងលើកទី២ នៅយប់ថ្ងៃទី៧ ខែវិច្ឆិកា បង្កដោយរថយន្តកុងតឺន័របើកបុករថយន្តធុនតូចចំនួន ៤គ្រឿង នៅតាមបណ្តោយផ្លូវជាតិលេខ៤ នៅឃុំបិតត្រាំង ស្រុកព្រៃនប់ ខេត្តព្រះសីហនុ។
លោកបន្តថា បច្ចុប្បន្នប៉ូលិសជំនាញកំពុងធ្វើការងារនេះដោយយកចិត្តទុកដាក់ ព្រោះករណីគ្រោះថ្នាក់ចរាចរណ៍នៅយប់ថ្ងៃទី៧ ខែវិច្ឆិកា គឺមានមនុស្សរងរបួសដែលមានវត្តមាននៅនឹងកន្លែងកើតហេតុមានចំនួន ៧នាក់ ហើយអាចមានអ្នករងគ្រោះផ្សេងទៀតត្រូវបញ្ជូនទៅកាន់មន្ទីរពេទ្យ មុនប៉ូលិសទៅដល់កន្លែងកើតហេតុ៖ «បីថ្ងៃហ្នឹងគ្រោះថ្នាក់ចរាចរណ៍កើតឡើង ២លើក និងស្លាប់មួយនាក់។ គ្រោះថ្នាក់នេះកើតឡើងនៅឃុំបិតត្រាំង ត្រង់គីឡូម៉ែត្រលេខ២១១ និង ២១២។ យប់មិញនេះអត់មានស្លាប់ទេ។ ហើយខ្ញុំក៏អត់បានដេកដែរយប់មិញនេះ ដោយសារតែរថយន្តបុកបន្តកន្ទុយគ្នា៤ ទៅ ៥គ្រឿង»។
ទោះជាបែបណា លោក ឈិត សុខុន អភិបាលខេត្តព្រះសីហនុ និងលោក ស៊ាង កុសល ស្នងការនគរបាលខេត្តព្រះសីហនុ បានវាយតម្លៃថា សភាពការណ៍សន្តិសុខរួមក្នុងរយៈពេល ៣ថ្ងៃនៃពិធីបុណ្យអុំទូកឆ្នាំនេះនៅខេត្តព្រះសីហនុ គឺមានសុវត្ថិភាពល្អ មិនមានចោរកម្មរំខានដល់ការសប្បាយរបស់ភ្ញៀវទេសចរ ចូលមកទស្សនាខេត្តទេសចរណ៍មួយនេះគួរឲ្យកត់សម្គាល់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។