អាជ្ញាធរខេត្តកំពង់ធំ ឲ្យដឹងថា ភ្ញៀវទេសចរទៅទស្សនាកម្សាន្តនៅក្នុងឱកាសពិធីបុណ្យចូលឆ្នាំរយៈពេលបួនថ្ងៃ ចាប់ពីថ្ងៃទី១៣ ដល់ថ្ងៃទី១៦ មេសា មានចំនួនជាង ១០ម៉ឺននាក់។ ចំនួននេះមានការថយចុះប្រមាណ ១០ភាគរយ បើប្រៀបធៀបទៅនឹងឆ្នាំកន្លងទៅ។
តើមានមូលហេតុអ្វីខ្លះដែលបណ្ដាលឲ្យចំនួនភ្ញៀវទេសចរថយចុះបែបនេះ?
ប្រធានមន្ទីរទេសចរណ៍ខេត្តកំពង់ធំ លោក សេង អាន មានប្រសាសន៍ថា រយៈពេលបួនថ្ងៃចាប់ពីថ្ងៃទី១៣ ដល់ថ្ងៃទី១៦ មេសា រមណីយដ្ឋាននៅទូទាំងខេត្តកំពង់ធំ ទទួលបានភ្ញៀវទេសចរជាង ១០ម៉ឺននាក់ (១០៧,៦០៨នាក់)។
លោកបញ្ជាក់ថា រមណីយដ្ឋានដែលមានមនុស្សទៅលេងកម្សាន្តច្រើនជាងគេ គឺរមណីយដ្ឋានប្រាសាទសំបូរព្រៃគុក ទទួលបានភ្ញៀវទៅលេងកម្សាន្តជាង ៧ម៉ឺននាក់ក្នុងរយៈពេលបួនថ្ងៃ។ លោកបន្តថា ចំនួននេះ គឺមានការធ្លាក់ចុះប្រមាណ ១០ភាគរយ បើប្រៀបធៀបទៅនឹងឆ្នាំ២០១៥ ក្នុងពិធីបុណ្យចូលឆ្នាំខ្មែរដូចគ្នា។ លោកឲ្យដឹងថា មូលហេតុនាំឲ្យភ្ញៀវធ្លាក់ចុះ ដោយសារតែអាកាសធាតុឆ្នាំនេះក្តៅខ្លាំងពេក ដែលធ្វើឲ្យពលរដ្ឋខ្មែរមួយចំនួនមិនសូវចង់ដើរលេងកម្សាន្ត ព្រមទាំងពួកគាត់មានតំបន់គោលដៅទៅលេងកម្សាន្តផ្សេងទៀត៖ « អាកាសធាតុក្តៅផង ដោយសារគោលដៅទេសចរណ៍នៅក្នុងប្រទេសកម្ពុជា វាមានគោលដៅច្រើនគ្រប់បណ្ដាខេត្ត »។
កាលពីឆ្នាំ២០១៥ ក្នុងអំឡុងពេលពិធីបុណ្យចូលឆ្នាំខ្មែររយៈពេលបីថ្ងៃ រមណីយដ្ឋានក្នុងខេត្តកំពង់ធំ ទាំងអស់ អាចទទួលបានភ្ញៀវទៅលេងកម្សាន្តចំនួនជាង ១២ម៉ឺននាក់។ ក្នុងចំណោមរមណីយដ្ឋានទាំងអស់ រមណីយដ្ឋានប្រាសាទសំបូរព្រៃគុក ដែលបានរៀបចំពិធីសំបូរសង្ក្រាន្តឆ្នាំថ្មីដែរនោះ គឺមានភ្ញៀវទេសចរទៅលេងកម្សាន្តជាង ៩ម៉ឺននាក់។
លោក សេង អាន ឲ្យដឹងដែរថា ថ្វីត្បិតតែចំនួនភ្ញៀវទេសចរជាតិធ្លាក់ចុះក៏ដោយ ប៉ុន្តែចំពោះភ្ញៀវទេសចរអន្តរជាតិវិញ ឆ្នាំនេះមានចំនួន ១៤០នាក់ គឺកើនឡើងជាង ១០០ភាគរយ បើប្រៀបធៀបឆ្នាំមុនដែលមានចំនួនជាង ៣០នាក់ប៉ុណ្ណោះ។
ទោះបីជាចំនួនភ្ញៀវទេសចរនៅឆ្នាំនេះថយចុះក៏ដោយ ប៉ុន្តែបញ្ហាផ្សេងៗមិនបានចោទឡើងទេ ហើយខាងមន្ទីរប្ដេជ្ញាចិត្តថា នឹងខិតខំធ្វើយ៉ាងណាដើម្បីទាក់ទាញភ្ញៀវទេសចរមកលេងកម្សាន្តនៅតំបន់រមណីយដ្ឋានក្នុងខេត្តកំពង់ធំ បន្ថែមទៀតនាឱកាសក្រោយ។
អភិបាលខេត្ត និងជាគណៈបញ្ជាការខេត្តកំពង់ធំ លោក អ៊ុត សំអន មានប្រសាសន៍នៅថ្ងៃទី១៨ មេសា ថា ថ្វីត្បិតតែចំនួនភ្ញៀវទេសចរធ្លាក់ចុះជាងឆ្នាំមុនក៏ដោយ ប៉ុន្តែជាជោគជ័យមួយក្នុងការរៀបចំព្រឹត្តិការណ៍សំបូរសង្ក្រាន្តឆ្នាំថ្មីនាទឹកដីប្រាសាទសំបូរព្រៃគុក។ ម្យ៉ាងការថែរក្សាសន្តិសុខសណ្ដាប់ធ្នាប់ គឺមានភាពប្រសើរជាងឆ្នាំមុនទៀតផង៖ « យើងចាត់ទុកថាជោគជ័យ ព្រោះថានៅពេលយើងមិនបានធ្វើសំបូរសង្ក្រាន្ត គឺមានមនុស្សទៅមើលប្រហែលខ្ទង់ ១ម៉ឺនទៅ ២ម៉ឺនប៉ុណ្ណោះទេ »។
លោកបន្ថែមទៀតថា ក្រោយពិធីបុណ្យចូលឆ្នាំប្រពៃណីខ្មែររួច អាជ្ញាធរបន្តការពារសន្តិសុខសណ្ដាប់ធ្នាប់ ព្រមទាំងចាត់វិធានការថែរក្សាអនាម័យនៅតំបន់រមណីយដ្ឋានទាំងអស់។ លើសពីនេះ អាជ្ញាធរនាំគ្នាប្រជុំវាយតម្លៃអំពីចំណុចខ្លាំង និងកង្វះខាតដែលកើតមានកន្លងមក ដើម្បីត្រៀមរៀបចំពិធីបុណ្យជាតិធំៗនៅឱកាសក្រោយឲ្យកាន់តែមានលក្ខណៈប្រសើរឡើង។
របាយការណ៍វាយតម្លៃអំពីស្ថានភាពក្នុងឱកាសបុណ្យចូលឆ្នាំខ្មែរប្រពៃណីជាតិរយៈពេលបួនថ្ងៃរបស់អគ្គស្នងការដ្ឋាននគរបាលជាតិ បង្ហាញថា សន្តិសុខសណ្ដាប់ធ្នាប់សាធារណៈ គឺល្អជាងពេលធម្មតា។ របាយការណ៍បញ្ជាក់ថា បទល្មើសព្រហ្មទណ្ឌថយចុះ ៣ករណី។ បន្ថែមពីនេះ គ្រោះថ្នាក់ចរាចរណ៍ថយចុះ ៣ករណី (៩៨ករណីនៅឆ្នាំ២០១៦ និង ១០១ករណីនៅឆ្នាំ២០១៥) ប៉ុន្តែមនុស្សស្លាប់កើនឡើង ១១នាក់ (៤៧នាក់នៅឆ្នាំ២០១៦ និង ៣៦នាក់នៅឆ្នាំ២០១៥) បើប្រៀបធៀបនឹងឆ្នាំ២០១៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។