មន្ត្រីមន្ទីរទេសចរណ៍ខេត្តព្រះសីហនុ បានអះអាងថា ចំនួនភ្ញៀវទេសចរជាតិ និងអន្តរជាតិ ដែលចូលមកទស្សនាមូលដ្ឋាននេះក្នុងពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំនេះ បានកើនជិត ១០ម៉ឺន (៩៨.១០៣) នាក់។
រីឯបញ្ហាសន្តិសុខវិញ កម្លាំងជំនាញស្ថាប័នពាក់ព័ន្ធនៃស្នងការនគរបាលខេត្តនេះ រក្សាសុវត្ថិភាពជូនភ្ញៀវទេសចរចូលមកកម្សាន្តតំបន់ឆ្នេរ ឬកោះជាដើម ទទួលបានលទ្ធផលល្អ ដោយគ្មានបទល្មើសចោលលួច ឆក់ ឬប្លន់កើតឡើងទេ។
ប្រធានមន្ទីរទេសចរណ៍ខេត្តព្រះសីហនុ លោក នូ សុផល បានបង្ហាញស្ថិតិថា កំណើនភ្ញៀវទេសចរជាតិ និងអន្តរជាតិ ដែលចូលមកទស្សនាខេត្តជាប់សមុទ្រ ក្នុងរយៈពេល ៣ថ្ងៃនៃពិធីបុណ្យអុំទូកចាប់ពីថ្ងៃទី២៤ ដល់ថ្ងៃទី២៦ ខែវិច្ឆិកា បានកើនជិត ២០ភាគរយ បើប្រៀបធៀបឆ្នាំ២០១៤។ ក្នុងនោះភ្ញៀវជាតិមាន ៨៦.៨២១នាក់ និងភ្ញៀវអន្តរជាតិមាន ១១.២៨២នាក់។
លោក នូ សុផល ឲ្យដឹងទៀតថា មានភ្ញៀវទេសចរជាតិ និងអន្តរជាតិ បានចូលទៅកម្សាន្តតាមកោះនានា ក្នុងខេត្តព្រះសីហនុ មាន ៣.៧៥០នាក់។
ទាក់ទិនបញ្ហានេះ លោក ជួន ណារិន្ទ ស្នងការនគរបាលខេត្តព្រះសីហនុ បានអះអាងថា កម្លាំងជំនាញគ្រប់ស្ថាប័នបានរក្សាសុវត្ថិភាពជូនភ្ញៀវទេសចរដែលចូលមកកម្សាន្តតាមឆ្នេរ ឬកោះជាដើម មានសន្តិសុខល្អ ដោយគ្មានបទល្មើសផ្សេងៗកើតឡើងទេ។ បញ្ហានេះលោកស្នងការបញ្ជាក់ថា នៅមុនថ្ងៃពិធីបុណ្យអុំទូកចូលមកដល់លោកបានបែងចែកកម្លាំងជំនាញដើម្បីទទួលខុសត្រូវនៅតាមគោលដៅចាប់ពីថ្នាក់មូលដ្ឋានរហូតដល់ថ្នាក់ខេត្ត រង់ចាំពង្រឹងសន្តិសុខ ដោយប្ដូរវេនប្រចាំការទាំងយប់ថ្ងៃ៖ «ក្នុងរយៈពេល ៣ថ្ងៃនេះ គឺយើងបានការពារសុវត្ថិភាព និងសន្តិសុខជូនភ្ញៀវជាតិ និងអន្តរជាតិបានល្អ ដែលចូលមកកម្សាន្តខេត្តព្រះសីហនុ ក្នុងពិធីបុណ្យអុំទូកឆ្នាំនេះ។ ក្នុងនោះបទល្មើសលួច ឆក់ ឬប្លន់ មិនមានកើតឡើងទេ ប៉ុន្តែមានជួបគ្រោះថ្នាក់ចរាចរណ៍តិចតួច»។
ជាងនេះទៀត លោក ជួន ណារិន្ទ ក៏បានឲ្យដឹងថា ស្ថាប័នលោកបានសហការជាមួយកម្លាំងស្ថាប័នជំនាញដទៃទៀតដើម្បីចុះល្បាតទាំងនៅលើដីគោក ពិសេសភ្ញៀវដែលនិយមទៅកម្សាន្តតាមកោះ ដោយបានចុះអប់រំ ឬណែនាំអំពីវិធីការពារសុវត្ថិភាពជូនភ្ញៀវទេសចរថែមទៀត។ លោកបន្តថា ពិធីបុណ្យអុំទូកឆ្នាំនេះ មានគ្រោះថ្នាក់ចរាចរណ៍កើតឡើងចំនួន ៥ករណី ប៉ុន្តែមិនមានគ្រោះថ្នាក់ដល់អាយុជីវិតមនុស្សទេ៖ «យើងបានបែងចែកកម្លាំងជា ៣គោលដៅ គឺគោលដៅរក្សាសណ្ដាប់ធ្នាប់ចរាចរណ៍នៅតាមផ្លូវសាធារណៈ កម្លាំងល្បាត និងកម្លាំងបង្កប់នៅគ្រប់គោលដៅសំខាន់ៗ ចាប់ពីថ្នាក់មូលដ្ឋានរហូតដល់ថ្នាក់ខេត្ត ដែលមានភ្ញៀវទេសចរចូលទៅកម្សាន្ត។ ក្នុងនោះយើងក៏បានចុះទៅអប់រំភ្ញៀវទេសចរ ដែលចូលទៅកម្សាន្តតាមកោះ ឲ្យពាក់អាវពោងដើម្បីការពារសុវត្ថិភាពនៅតាមផែកាណូត ឬកប៉ាល់ដឹកអ្នកដំណើរជាដើម»។
យ៉ាងណាក៏ដោយចុះ មន្ត្រីសង្គមស៊ីវិល និងភ្ញៀវទេសចរជាតិ ដែលចូលទៅកម្សាន្តខេត្តព្រះសីហនុ បានកត់សម្គាល់ឃើញថា តម្លៃសេវាស្នាក់នៅ និងអាហារហូបចុកជាដើម ត្រូវក្រុមអាជីវករដំឡើងថ្លៃខ្ពស់ទ្វេដងបើប្រៀបធៀបតម្លៃបម្រើសេវាថ្ងៃធម្មតា។
ត្រង់ចំណុចនេះ លោក សុខ សុខុម ប្រធានអង្គការស្រាវជ្រាវជាតិកម្ពុជា ហៅកាត់ ស៊ី.អិន.រ៉ូ (CNRO) ប្រចាំខេត្តព្រះសីហនុ បានរិះគន់ចំពោះតម្លៃសេវាកម្មស្នាក់នៅ ឬម្ហូបអាហារ ពិសេសសេវាបម្រើនៅឆ្នេរអូរឈើទាល ថាមានតម្លៃខ្ពស់កប់ពពកនៅពេលមានពិធីបុណ្យជាតិ ឬបុណ្យឆ្លងឆ្នាំ ដែលអាជ្ញាធរខេត្តព្រះសីហនុ គ្រប់គ្រងមិនទាន់បានល្អ៖ «ភ្ញៀវជាតិគាត់បានរអ៊ូរទាំថា ពួកគេលែងចង់ហ៊ានចូលអង្គុយនៅតាមតូបសង់នាឆ្នេរអូរឈើទាលទៀតហើយ ព្រោះតម្លៃតុអង្គុយមួយតុត្រូវបង់លុយជូនម្ចាស់តូបចំនួន ៤០ដុល្លារ ដោយមិនទាន់គិតតម្លៃម្ហូបផងទេ ហើយក៏មានភ្ញៀវទេសចរខ្លះ ក៏បានបង្ខំចិត្តទិញសំបុត្រទូកជិះទៅលំហែនៅលើកោះរ៉ុងជាដើម»។
ជាងនេះទៀត ភ្ញៀវទេសចរបានរអ៊ូរទាំថា ខេត្តព្រះសីហនុ មិនមានឆ្នេរឲ្យបានទូលំទូលាយសម្រាប់ផ្ដល់ជូនប្រជាពលរដ្ឋចូលទស្សនា ឬងូតទឹកសមុទ្រកម្សាន្តនោះទេ ព្រោះឃើញឆ្នេរភាគច្រើនត្រូវហ៊ុមព័ទ្ធដោយរបងទុកចោល គ្មានការអភិវឌ្ឍ ហើយទេសចរមិនអាចដើរឆ្លងកាត់បានទេ។
ទាក់ទិនកង្វល់នេះ រដ្ឋាភិបាលកម្ពុជា កាលពីពេលថ្មីៗនេះ បានសម្រេចដកហូតដីឆ្នេរសាធារណៈមកគ្រប់គ្រងវិញ ខណៈមានជនឆ្លៀតឱកាសយកដីតំបន់ឆ្នេរធ្វើជាកម្មសិទ្ធិរបស់ខ្លួន។ ថ្លែងប្រាប់អ្នកសារព័ត៌មានក្រោយចប់កិច្ចប្រជុំរដ្ឋសភា នៅថ្ងៃទី១៩ ខែវិច្ឆិកា រវាងរដ្ឋមន្ត្រីក្រសួងទេសចរណ៍ និងគណៈកម្មការទី៧ នៃរដ្ឋសភា រដ្ឋមន្ត្រីក្រសួងទេសចរណ៍ លោក ថោង ខុន លើកឡើងថា បន្ទាប់ពីយកឆ្នេរនៅតាមបណ្ដាខេត្តជាប់មាត់សមុទ្រ រដ្ឋនឹងរៀបចំឲ្យមានសោភណភាពដើម្បីទុកឲ្យពលរដ្ឋដើរលំហែកម្សាន្ត។ ការសម្រេចបែបនេះ នៅពេលដែលតំបន់ឆ្នេរបានក្លាយជាកន្លែងទាក់ទាញទេសចរណ៍ទី២ បន្ទាប់ពីខេត្តសៀមរាបអង្គរ និងជាតំបន់សេដ្ឋកិច្ចទី២ បន្ទាប់ពីរាជធានីភ្នំពេញ ប៉ុន្តែតំបន់ឆ្នេរត្រូវរួមតូច ដោយមហិច្ឆតារបស់ក្រុមឈ្មួញលោភលន់មួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។