មន្ត្រីសហជីពទូទាំងប្រទេសកម្ពុជា គ្រោងនឹងជួបប្រជុំគ្នាពីបច្ចេកទេសនៃការដំឡើងប្រាក់ឈ្នួលអប្បបរមាដល់កម្មករក្នុងវិស័យឧស្សាហកម្មកាត់ដេរ និងស្បែកជើង សម្រាប់ឆ្នាំ២០១៤ នៅថ្ងៃទី១៨ ធ្នូ នៅក្រសួងការងារ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ មានប្រសាសន៍នៅថ្ងៃទី១៧ ធ្នូ ថា សហជីពធំៗប្រមាណ៤០ ឬគណៈកម្មការប្រឹក្សាការងារ នឹងជួបប្រជុំគ្នាថ្ងៃទី១៨ ធ្នូ រួចបញ្ជូនរបាយការណ៍លទ្ធផលនៃការជជែកគ្នានេះទៅក្រសួងការងារវិញ ដើម្បីឈានទៅដល់ការសម្រេចសម្រាប់ការដំឡើងប្រាក់ឈ្នួលអប្បបរមាដល់កម្មករនៅដើមឆ្នាំ២០១៤ ខាងមុខ។
កាលពីថ្ងៃទី១៦ ធ្នូ ក្រុមការងារជជែកពីការដំឡើងប្រាក់ឈ្នួលអប្បបរមា បានដាក់រូបមន្ត៣ សម្រាប់រៀបចំដំឡើងប្រាក់ឈ្នួលជូនកម្មករ ដែលត្រូវធ្វើការពិនិត្យ និងជ្រើសរើសយក១ ដូចជាការកំណត់ដំឡើងជាអត្រារួមរយៈពេល ៥ឆ្នាំ ពីឆ្នាំ២០១៤ ដល់ឆ្នាំ២០១៨ រួចបែងចែកស្មើភាពជាអត្រាដំឡើងប្រចាំឆ្នាំ។ ការកំណត់ដំឡើងប្រាក់ឈ្នួលជាសន្ទស្សន៍រួមក្នុងរយៈពេល ៥ឆ្នាំ ឲ្យបាន ១០០% នៃប្រាក់ឈ្នួលអប្បបរមា ឆ្នាំ២០១៣ គឺពី ៨០ដុល្លាររហូតដល់ ១៦០ដុល្លារនៅឆ្នាំ២០១៨ និងរូបមន្តទី៣ គឺកំណត់ដំឡើងតែម្ដងគត់នៅឆ្នាំ២០១៤ គឺដំឡើង ១០០% ដែលស្មើនឹង ១៦០ដុល្លារ ហើយនឹងមានការពិភាក្សាជារៀងរាល់ឆ្នាំ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ បានបញ្ជាក់ថា ការចង់បានរបស់សហជីពលោកមិនស្ថិតនៅក្នុងរូបមន្តណាមួយនោះទេ។ ប៉ុន្តែវាស្រដៀងបន្តិចបន្តួចទៅនឹងរូបមន្តទី៣។ ស្រដៀងនោះត្រង់ថា លោកចង់ឲ្យដំឡើងនៅឆ្នាំទី១ គឺឆ្នាំ២០១៤ ឲ្យដល់ ១៥៤ដុល្លារ មិនមែន ១៦០ដុល្លារទេ រួចសឹមគិតអំពីការចរចាគ្នាពីប្រាក់អត្ថប្រយោជន៍ផ្សេងៗនៅឆ្នាំបន្តបន្ទាប់ទៀតបាន ដែលធ្វើដូច្នេះកម្មករអាចរស់នៅសមរម្យ ហើយទប់ទល់នឹងស្ថានភាពអតិផរណា ឬទំនិញនៅលើទីផ្សារបាន។
លោក អាត់ ធន់ អះអាងថា ការចរចានេះ ទាំងរដ្ឋាភិបាល និយោជក និងកម្មករ សុទ្ធតែមានចេតនាចង់ដំឡើងប្រាក់ឈ្នួលបន្ថែមនៅឆ្នាំ២០១៤។
វិទ្យុអាស៊ីសេរី មិនអាចទាក់ទង លោក ជាតិ ខេមរា មន្ត្រីជាន់ខ្ពស់នៃសមាគមនិយោជករោងចក្រកាត់ដេរកម្ពុជា បានទេ នៅថ្ងៃទី១៧ ធ្នូ។ ប៉ុន្តែនៅក្នុងកិច្ចប្រជុំនៅថ្ងៃទី១៦ នៅក្រសួងការងារ អគ្គលេខាធិការនៃសមាគមនេះ លោក ខេន លូ (Ken Loo) បានថ្លែងតាមរយៈអ្នកបកប្រែថា លោកបានប្រជុំជាមួយសមាជិកកាលពីថ្ងៃអាទិត្យ ដោយទាំងអស់គ្នាបានសម្ដែងការព្រួយបារម្ភពីការចរចាក្នុងការដំឡើងប្រាក់ឈ្នួលនេះ។ ប៉ុន្តែពួកគេយល់ស្របឲ្យមានការដំឡើងប្រាក់ឈ្នួល។ លោកបន្តថា តាមតួលេខ និងរូបមន្តដែលបានលើកឡើង គឺមានរោងចក្រជាច្រើនអាចនឹងប្រឈមទៅនឹងការបិទទ្វារ ដោយសារមានការបិទទ្វារជាច្រើនរួចមកហើយ។
លោក ខេន លូ បានលើកឡើងពីមតិភាគច្រើនរបស់សមាជិកសមាគមរោងចក្រកាត់ដេរថា ពួកគេឯកភាពលើចំណុច១ គឺដំឡើងប្រាក់ឈ្នួលនៅរយៈពេល ២ឆ្នាំដំបូងក្នុងបន្តិចទាបបន្តិច រួចបន្ទាប់មកចាប់ពីឆ្នាំទី៣ ទី៤ ទៅត្រូវបង្កើតកំណើនបន្តិចវិញ និងឆ្នាំទី៥ នឹងត្រូវកំណត់ដំឡើងឲ្យដល់គោលដៅតែម្ដង។
របាយការណ៍របស់ក្រុមការងារតូចៗរបស់ក្រសួងការងារ ដែលបានរកឃើញថា កម្មករម្នាក់ត្រូវមានប្រាក់ចំណូលក្នុងរង្វង់ពី ១៥៧ដុល្លារ ទៅ ១៧៧ដុល្លារ ក្នុង១ខែ ទើបឲ្យកម្មកររស់នៅសមរម្យបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។