អភិបាលខេត្តព្រះសីហនុ និងមន្ត្រីនគរបាល ក្រសួងមហាផ្ទៃ ផ្ញើសាក្រើនរំលឹកដល់អ្នកប្រើប្រាស់ផ្លូវ ឬអ្នកបើកបរយានយន្តគ្រប់ប្រភេទ ពិសេសអ្នកបើកបររថយន្តកុងទឺន័រ ត្រូវគោរពច្បាប់ចរាចរណ៍ឲ្យបានទាំងអស់គ្នា ដើម្បីទប់ស្កាត់គ្រោះថ្នាក់ចរាចរណ៍នៅក្នុងអំឡុងពិធីបុណ្យចូលឆ្នាំខ្មែរប្រពៃណីជាតិឆ្នាំនេះ។
ក្រុមអ្នកបើកបររថយន្តកុងទឺន័រ ចេញពីកំពង់ផែអន្តរជាតិខេត្តព្រះសីហនុ បានប្ដេជ្ញាថា នឹងគោរពច្បាប់ចរាចរណ៍ទាំងអស់គ្នា ជាពិសេសពួកគេបានប្ដេជ្ញាមិនទទួលទានគ្រឿងស្រវឹងពេលបើកបរនោះទេ។
អភិបាលខេត្តព្រះសីហនុ លោក ឈិត សុខុន បានអំពាវនាវដល់អ្នកបើកបរយានយន្តគ្រប់ប្រភេទ ពិសេសអ្នកបើកបររថយន្តកុងទឺន័រ ត្រូវគោរពច្បាប់ចរាចរណ៍ឲ្យបានខ្ជាប់ខ្ជួន និងមិនត្រូវបើកបរក្នុងស្ថានភាពស្រវឹង ឬបើកវ៉ាជែងក្នុងស្ថានភាពផ្លូវកោងនោះទេ។ ជាងនេះ លោកស្នើដល់អ្នកប្រើប្រាស់ផ្លូវ ឬអ្នកបើកបរយានយន្ត ត្រូវមានការយោគយល់ និងអធ្យាស្រ័យឲ្យគ្នាទៅវិញទៅមក ដើម្បីចូលរួមកាត់បន្ថយគ្រោះថ្នាក់ចរាចរណ៍ ក្នុងពេលបុណ្យចូលឆ្នាំខ្មែរឆ្នាំនេះ។
បញ្ហានេះ មន្ត្រីនគរបាលក្រសួងមហាផ្ទៃ បានសហការជាមួយមន្ត្រីមន្ទីរសាធារណការ តំណាងកំពង់ផែអន្តរជាតិ និងកម្លាំងសមត្ថកិច្ចខេត្តព្រះសីហនុ ក៏បានបើកយុទ្ធនាការចុះអប់រំអ្នកបើករថយន្តកុងទឺន័រ តាមផ្លូវជាតិលេខ៤ ដើម្បីកាត់បន្ថយគ្រោះថ្នាក់ពេលបុណ្យចូលឆ្នាំខ្មែរនេះដែរ។
លោក យ៉ើ យ៉ាន់ណូ តំណាងក្រុមត្រួតពិនិត្យចម្រុះពង្រឹងការអនុវត្តច្បាប់គោលដៅដើមទីនៃអគ្គស្នងការនគរបាលជាតិក្រសួងមហាផ្ទៃ មានប្រសាសន៍ថា តំណាងមន្ទីរសាធារណការ និងតំណាងកំពង់ផែអន្តរជាតិខេត្តព្រះសីហនុ ព្រមទាំងមន្ត្រីកងរាជអាវុធហត្ថ និងនគរបាលខេត្តនេះ កាលពីថ្ងៃទី៦ ខែមេសា បានចុះអប់រំអ្នកបើករថយន្តកុងទឺន័រទាំងអស់ ត្រូវគោរពច្បាប់ពេលដឹកជញ្ជូនទំនិញចេញពីក្នុងកំពង់ផែអន្តរជាតិខេត្តព្រះសីហនុ ឲ្យបានខ្ជាប់ខ្ជួន។ ជាងនេះ មន្ត្រីជំនាញក៏បានតម្រូវឲ្យក្រុមហ៊ុនរថយន្តដឹកកុងទឺន័រ ទាំងអស់ ត្រូវមានបច្ចេកទេសត្រឹមត្រូវមុននឹងដឹកទំនិញចេញពីកំពង់ផែដើមទីពីខេត្តព្រះសីហនុ។
លោក យ៉ើ យ៉ាន់ណូ បញ្ជាក់ថា គោលបំណងបើកយុទ្ធនាការត្រួតពិនិត្យ និងចុះអប់រំពីច្បាប់ចរាចរណ៍ដល់អ្នកបើកបររថយន្តកុងទឺន័រ ដែលប្រើប្រាស់ផ្លូវជាតិលេខ៤ ពេលនេះ គឺមានគោលដៅចូលរួមកាត់បន្ថយគ្រោះថ្នាក់ចរាចរណ៍ឲ្យថយមកកម្រិតទាប ក្នុងពិធីបុណ្យចូលឆ្នាំខ្មែរឆ្នាំនេះ។
ឆ្លើយតបការអំពាវនាវនេះ ក្រុមអ្នកបើកបររថយន្តក្រុង ពិសេសអ្នកបើកបររថយន្តកុងទឺន័រ នៅតាមក្រុមហ៊ុនមួយចំនួនដែលប្រើប្រាស់ផ្លូវជាតិលេខ៤ បានប្ដេជ្ញាថា នឹងចូលរួមកាត់បន្ថយអត្រាស្លាប់ ឬគ្រោះថ្នាក់ចរាចរណ៍ក្នុងអំឡុងពិធីបុណ្យចូលឆ្នាំថ្មីឆ្នាំនេះ។
អ្នកបើកបររថយន្តកុងទឺន័រ ចេញពីកំពង់ផែអន្តរជាតិ ខេត្តព្រះសីហនុ ជាច្រើននាក់ បានផ្ដល់បទសម្ភាសន៍ឲ្យវិទ្យុអាស៊ីសេរីថា នឹងចូលរួមគោរពច្បាប់ចរាចរណ៍ផ្លូវគោកទាំងអស់គ្នា ជាពិសេសពួកគេបានប្ដេជ្ញាមិនទទួលទានគ្រឿងស្រវឹងពេលបើកបរជាដាច់ខាត។
តាមរយៈការប្ដេជ្ញានេះ លោក ឈិត សុខុន អភិបាលខេត្តព្រះសីហនុ និងលោក យ៉ើ យ៉ាន់ណូ តំណាងក្រុមត្រួតពិនិត្យចម្រុះពង្រឹងការអនុវត្តច្បាប់គោលដៅដើមទីនៃអគ្គស្នងការនគរបាលជាតិ មានជំនឿថា នឹងអាចកាត់បន្ថយគ្រោះថ្នាក់ចរាចរណ៍ថយមកចំនួនទាបនៅក្នុងអំឡុងពេលពិធីបុណ្យចូលឆ្នាំខ្មែររយៈពេល ៣ថ្ងៃ ដែលនឹងចាប់ផ្ដើមពីថ្ងៃទី១៤ ដល់ថ្ងៃទី១៦ ខែមេសា ជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។