តំណាងអង្គការ ធ្រីប អែដវ៉ាយសឺ (Trip Advisor) ដែលមានមូលដ្ឋាននៅប្រទេសសិង្ហបុរី (Singapore) បានមកដល់ខេត្តសៀមរាប ប្រទេសកម្ពុជា ហើយបានប្រកាសជាផ្លូវការកាលពីរាត្រីថ្ងៃទី៧ ខែមេសា កន្លងទៅ ថាទីក្រុងសៀមរាប បានជាប់លេខ១ សម្រាប់គោលដៅទេសចរណ៍ក្នុងតំបន់អាស៊ី និងលេខ២ នៅទូទាំងពិភពលោក សម្រាប់ឆ្នាំ២០១៥ នេះ។
ការប្រកាសជ័យលាភីដែលបានពីការបោះឆ្នោតនៅជុំវិញពិភពលោកនេះ ធ្វើឡើងនៅលើទ្រូងផ្លូវ ផបស្ទ្រីត (Pub Street) ជិតផ្សារចាស់ ដែលជាកន្លែងប្រជុំក្រុមអ្នកទេសចរចម្រុះជាតិសាសន៍របស់ទីក្រុងសៀមរាប។
មន្ត្រីក្រសួងទេសចរណ៍ នៃប្រទេសកម្ពុជា និងអាជ្ញាធរខេត្តសៀមរាប រួមទាំងប្រជាពលរដ្ឋជាច្រើនទៀតមានមោទនភាពយ៉ាងខ្លាំងនៅក្នុងពេលដែលអង្គការ ធ្រីប អែដវ៉ាយសឺ បានប្រកាសថា ទីក្រុងសៀមរាប បានជាប់ចំណាត់ថ្នាក់លេខ១ ខាងគោលដៅទេសចរណ៍ក្នុងតំបន់អាស៊ី និងចំណាត់ថ្នាក់លេខ២ នៅទូទាំងពិភពលោកនោះ។
ក្រុមភ្លៀងឆៃយ៉ាំដែលមានលក្ខណៈជាប្រពៃណីខ្មែរ បានប្រគំ ហើយឈរនៅចាំនាំមុខគណៈប្រតិភូចម្រុះ ដើម្បីឆ្ពោះទៅកាន់វេទិកាមួយដែលសង់កណ្ដាលផ្លូវនៃទីប្រជុំភ្ញៀវទេសចរបរទេស នៅជិតតំបន់ផ្សារចាស់ ធ្វើឲ្យពិធីនៅក្នុងពេលរាត្រីកាន់តែមានសភាពអធិកអធម និងគួរឲ្យរំភើប។
រដ្ឋមន្ត្រីក្រសួងទេសចរណ៍ នៃប្រទេសកម្ពុជា គឺលោកបណ្ឌិត ថោង ខុន។ លោកបានថ្លែងនៅក្នុងពិធីអបអរសាទរនៃការទទួលជ័យលាភីរបស់ទីក្រុងសៀមរាប នោះថា មិនត្រឹមតែប្រជាពលរដ្ឋនៅខេត្តសៀមរាប ប៉ុណ្ណោះទេ គឺប្រជាពលរដ្ឋខ្មែរនៅទូទាំងប្រទេសពិតជាមានមោទនភាពយ៉ាងក្រៃលែង ដោយសារទីក្រុងសៀមរាបអង្គរជាសម្បត្តិបេតិកភណ្ឌពិភពលោក បានជាប់លេខ១ ខាងគោលដៅទេសចរណ៍ក្នុងតំបន់អាស៊ី និងលេខ២ នៅទូទាំងពិភពលោកសម្រាប់ឆ្នាំ២០១៥។ លោក ថោង ខុន មានប្រសាសន៍ទៀតថា លោកសូមថ្លែងអំណរគុណចំពោះអង្គការ ធ្រីប អែដវ៉ាយសឺ ប្រចាំតំបន់អាស៊ី-ប៉ាស៊ីហ្វិក និងប្រតិភូដែលបាននាំយកជ័យលាភីមកប្រកាសជាផ្លូវការនេះ៖ «ជាការពិត អ្វីដែលយើងបានទទួលដ៏វិសេសវិសាលនេះ គឺដោយសារការខិតខំប្រឹងប្រែងរបស់យើងទាំងអស់គ្នាទាំងផ្នែកសាធារណៈ ទាំងផ្នែកឯកជន ជាពិសេសពីក្រសួងទេសចរណ៍ ពីអាជ្ញាធរខេត្តសៀមរាប និងកម្លាំងប្រដាប់អាវុធ ដែលខិតខំការពារសន្តិសុខសុវត្ថិភាពជូនភ្ញៀវទេសចរ»។
អង្គការ ធ្រីប អែដវ៉ាយសឺ បានបញ្ជាក់ថា សម្រាប់ឆ្នាំ២០១៥ នេះ គេបានជ្រើសរើសយកគោលដៅទេសចរណ៍ដ៏អស្ចារ្យចំនួន ៤៦៩កន្លែងពីជុំវិញពិភពលោកនៃតំបន់អាស៊ី អាហ្វ្រិក អាមេរិក និងអាមេរិកកណ្ដាល ជាដើម ដាក់ឲ្យប្រជាពលរដ្ឋរាប់លាននាក់នៅទូទាំងពិភពលោកបោះឆ្នោត ហើយទីបំផុត ទីក្រុងសៀមរាបអង្គរ បានជាប់ចំណាត់ថ្នាក់លេខ១ ក្នុងតំបន់អាស៊ី និងលេខ២ នៅទូទាំងពិភពលោក។
តំណាងអង្គការ ធ្រីប អែដវ៉ាយសឺ ប្រចាំតំបន់អាស៊ី-ប៉ាស៊ីហ្វិក កញ្ញា លីឡាយ ចេង (Lily Cheng) មានប្រសាសន៍នៅក្នុងពិធីប្រកាសជ័យលាភីនោះថា ទីក្រុងសៀមរាប ដែលត្រូវជ្រើសរើសឲ្យជាប់ចំណាត់ថ្នាក់លេខ១ នៃគោលដៅទេសចរណ៍ក្នុងតំបន់អាស៊ី និងលេខ២ នៅទូទាំងពិភពលោកនោះ គឺបានពីការវិនិច្ឆ័យដ៏ពិសេសរបស់ប្រជាពលរដ្ឋរាប់លាននាក់នៅជុំវិញពិភពលោក៖ «ដោយសារតែប្រជាពលរដ្ឋច្រើនលាននាក់បានឲ្យឈ្មោះទីក្រុងសៀមរាប ជាគោលដៅទេសចរណ៍លេខ១ ក្នុងតំបន់អាស៊ី និងលេខ២ នៅទូទាំងពិភពលោកនេះ គឺខ្ញុំដែលគ្រាន់តែជាតំណាងនាំយកជ័យលាភីមកជូន ក៏សូមសម្ដែងការអបអរសាទរដែរ»។
កាលពីថ្ងៃទី២៤ ខែមីនា កន្លងទៅ រដ្ឋមន្ត្រីក្រសួងទេសចរណ៍ បានប្រកាសព័ត៌មានជាបន្ទាន់មួយថា ទីក្រុងសៀមរាបអង្គរ បានជាប់លេខ១ នៃគោលដៅទេសចរណ៍ក្នុងតំបន់អាស៊ី ទីក្រុងអ៊ីស្តាន់ប៊ុល (Istanbul) នៃប្រទេសទួរគី (Turkey) ជាប់លេខ២ និងទីក្រុងហាណូយ (Hanoi) របស់វៀតណាម (Vietnam) ជាប់លេខ៣។ ចំណែកចំណាត់ថ្នាក់នៅក្នុងពិភពលោក គឺទីក្រុងម៉ារ៉ាកេច (Marrakech) នៃប្រទេសម៉ារ៉ុក (Morocco) ជាប់លេខ១ និងទីក្រុងសៀមរាបអង្គររបស់ខ្មែរជាប់លេខ២ ហើយទីក្រុងអ៊ីស្តាន់ប៊ុល ជាប់លេខ៣។
មន្ត្រីរដ្ឋាភិបាលកម្ពុជា និងផ្នែកឯកជន បានប្រឹងប្រែងទាក់ទាញអ្នកទេសចរបរទេសឲ្យចូលមកទស្សនាទេសចរណ៍ធម្មជាតិ និងទេសចរណ៍វប្បធម៌នៅកម្ពុជា ជាយូរមកហើយ រហូតដល់គេបានលើកតម្កើងប្រទេសកម្ពុជា គឺជាព្រះរាជាណាចក្រអច្ឆរិយទៀតផង។
សហប្រធានក្រុមការងារវិស័យទេសចរណ៍ឯកជន លោក ហូ វណ្ឌី មានជំនឿថា អង្គការ ធ្រីប អែដវ៉ាយសឺ ដែលប្រកាសលទ្ធផលនៃចំណាត់ថ្នាក់នៃគោលដៅទេសចរណ៍មកឲ្យកម្ពុជា នេះ គឺច្បាស់លាស់។ លោក ហូ វណ្ឌី ចាត់ទុកថា ការវិនិច្ឆ័យនេះ គឺកាន់តែធ្វើឲ្យអ្នកទេសចរបរទេសមានទំនុកចិត្ត ក្នុងការធ្វើដំណើរមកកម្សាន្តនៅកម្ពុជា កាន់តែច្រើនឡើងៗ៖ «មិនមែនវាយតម្លៃត្រឹមថាប្រាសាទមួយដ៏ល្អស្អាតប៉ុណ្ណឹងទេ គឺគេវាយតម្លៃទាំងអស់ ទាំងហេដ្ឋារចនាសម្ព័ន្ធ តាំងពីការបដិសណ្ឋារកិច្ច ការផ្គត់ផ្គង់សេវាឯកជនយ៉ាងម៉េច និងរដ្ឋយ៉ាងណានោះ»។
កាលពីថ្ងៃទី១០ ខែមីនា កន្លងទៅ ទីក្រុងសៀមរាប ធ្លាប់បានរដ្ឋាភិបាលផ្ដល់ជ័យលាភីជាទីក្រុងស្អាត ដែលមានរហស្សនាមថា រំដួល ៣ទង ម្ដងមកហើយនៅក្នុងចំណោមខេត្ត-ក្រុងចំនួន ៤ផ្សេងទៀត។
អភិបាលខេត្តសៀមរាប លោក ឃឹម ប៊ុនសុង ធ្លាប់បានលោកថ្លែងនៅក្នុងការប្រារព្ធពិធីអបអរសាទរទីក្រុងសៀមរាប ដែលដណ្ដើមបានចំណាត់ថ្នាក់ជាទីក្រុងស្អាត ផ្ការំដួល ៣ទង នោះថា ទីក្រុងស្អាតជាស្ពានចម្លងវប្បធម៌ជួបគ្នា ជាកន្លែងដែលមានការប្រាស្រ័យទាក់ទងគ្នា ផ្លាស់ប្ដូរគំនិត និងចំណេះដឹង ជាស្ពានចម្លងឲ្យមានការតភ្ជាប់រវាងប្រជាជន និងប្រជាជននៅគ្រប់ទិសទី និងគ្រប់ជាតិសាសន៍ ហើយក៏កំពុងដើរតួជាផលិតផលទេសចរណ៍ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។