បុគ្គលិកក្រុមហ៊ុន ទ្រូថាម អាស៊ី (Truetime Asia) ជាង ១០០នាក់បាននាំគ្នាបិទច្រកចូលទៅក្រុមហ៊ុននេះ នៅព្រឹកថ្ងៃ ទី១៤ ខែវិច្ឆិកា ដើម្បីរារាំងមិនអោយបុគ្គលិកដែលក្រុមហ៊ុនទើបជ្រើសរើសថ្មីចូលធ្វើការ។ តំណាងក្រុមហ៊ុនចាត់ទុកសកម្មភាពរបស់ក្រុមបុគ្គលិកដែលតវ៉ាថា ជាទង្វើខុសច្បាប់។
ក្រុមបុគ្គលិកដែលតវ៉ាស្រែកប្រកូកប្រកាសតាមឧបករណ៍បំពងសំឡេង ដោយបន្តទាមទារអោយក្រុមហ៊ុនបំពេញតាមសំណើរបស់ពួកគេ គឺបញ្ឈប់អ្នកគ្រប់គ្រង ៣នាក់ពីការងារ។ ការតវ៉ានោះឈានដល់ប្រតាយប្រតប់គ្នាមួយប្រាវទៀតផង។
តំណាងអ្នកធ្វើកូដកម្មម្នាក់ លោក យី វិចិត្រ មានប្រសាសន៍ថា ការរារាំងនេះកើតឡើងបន្ទាប់ពីក្រុមហ៊ុនបានបដិសេធការស្នើសុំជួបចរចាជាថ្មី ដែលដាក់ដោយសហព័ន្ធសហជីពតំណាងអោយកម្មករ។ លោកបន្តថា សំណើរបស់អ្នកតវ៉ាមិនបានផ្លាស់ប្ដូរទេ គឺនៅតែបន្តទាមទារអោយក្រុមហ៊ុនបញ្ឈប់អ្នកគ្រប់គ្រង ៣នាក់ពីការងារ៖ «រើសបុគ្គលិកថ្មីចូលអំឡុងពេលកូដកម្ម អ៊ីចឹងចំណុចហ្នឹងគឺធ្វើខុសច្បាប់ហើយ។ អ៊ីចឹងយើងក៏មានសិទ្ធិបិទមិនអោយពួកគាត់ចូលដូចគ្នដែរ»។
បុគ្គលិក ទ្រូថាម អាស៊ី បានធ្វើកូដកម្មទាមទារបញ្ឈប់អ្នកគ្រប់គ្រង ៣នាក់នេះមានរយៈពេល ជាង១ខែមកហើយ តែនៅមិនទាន់មានដំណោះស្រាយនៅឡើយ។ ក្នុងអំឡុងពេលមានការតវ៉ា ក្រុមហ៊ុនក៏បានរើសបុគ្គលិកថ្មីអោយចូលធ្វើការជាបន្តបន្ទាប់។ ភាគីដែលតវ៉ា និងភាគីក្រុមហ៊ុនធ្លាប់បានចរចាគ្នាដែរនាពេលកន្លងទៅ ក្នុងនោះក្រុមហ៊ុនប្រកាន់ជំហរមិនបញ្ឈប់អ្នកគ្រប់គ្រង ៣នាក់តាមការទាមទារ និងទុកឱកាសអោយអ្នកតវ៉ាដែលចង់ចូលធ្វើការវិញក្រុមហ៊ុននឹងទទួលយក។
យ៉ាងណាបុគ្គលិកដែលប្រឆាំងការសម្រេចនេះអះអាងថា ពួកគេមិនអាចទទួលបាន ដោយសំអាងថា អ្នកគ្រប់គ្រងទាំង ៣នាក់នោះធ្លាប់រំលោភសិទ្ធិ និងប្រើហិង្សាដាក់បុគ្គលិក។ អ្នកគ្រប់គ្រងទាំងបីរូបនោះមានឈ្មោះ ញ៉ែម សុភៈ ញ៉ែម សុភា និងលោក ទឹម ណារិន។ អ្នកទាំងបីត្រូវបានក្រុមហ៊ុនផ្អាកមិនឲ្យធ្វើការអស់រយៈពេលបីខែរួចមកហើយ លុះដល់ពេលពួកគេចូលធ្វើការវិញ បុគ្គលិកបានងើបតវ៉ាជាថ្មី។ លុះក្រោយមកភាគីក្រុមហ៊ុនបានបណ្តេញតំណាងបុគ្គលិកដែលដឹកនាំការតវ៉ានៅពេលកន្លងទៅចំនួន ៩នាក់ចេញពីការងារ ដោយបញ្ជាក់មូលហេតុពិតប្រាកដ។ ក្រុមហ៊ុនបានឲ្យប្រាក់មួយចំនួនទៅតំណាងបុគ្គលិកដើម្បីឲ្យពួកគេឈប់ធ្វើការ ប៉ុន្តែបុគ្គលិកតបថា ពួកគេត្រូវការយុត្តិធម៌។
អ្នកគ្រប់គ្រងម្នាក់ គឺលោក ញ៉ែម សុភា ដែលព្យាយាមនាំបុគ្គលិកមួយចំនួនចូលទៅក្នុងការិយាល័យរបស់ក្រុមហ៊ុន និងបានប៉ះទង្គិចពាក្យសម្ដីជាមួយបុគ្គលិកដែលតវ៉ាមានប្រសាសន៍ថា ក្រុមហ៊ុនពុំបានរើសបុគ្គលិកថ្មីទេ ហើយថា អ្នកតវ៉ាគួរតែគោរពច្បាប់។
លោកក៏បានបដិសេធដែរចំពោះការចោទប្រកាន់ថា លោកបានប្រើហិង្សាលើបុគ្គលិក៖ «រួចឥឡូវមកកាត់ពួកបុគ្គលិកចាស់ហើយបុគ្គលិកថ្មីទៀត។ បើថាយើងទាមទារអត់អោយបុគ្គលិកថ្មីចូល យើងធ្វើអោយបុគ្គលិកចាស់ហ្នឹងត្រូវអោយគេចូលវិញ។ យើងហាមគេអត់អោយចូលធ្វើការ បើមានសិទ្ធិ ច្បាប់ក្រឹត្យក្រមគេចែង ក្រដាសមកបានខ្ញុំប្រាប់អត់អោយចូល តែនេះគេអត់មានក្រដាសស្នាម គេធ្វើអីស្រេចនឹងចិត្ត កាន់ដៃអត់អោយគេចូល សួរថាតើគេធ្វើត្រូវ ឬខុស?»។
ប្រធានសហព័ន្ធសហជីពអភិវឌ្ឍន៍កម្មករ លោក តែប តុន មានប្រសាសន៍ថា ក្រុមហ៊ុនគួរតែជួបចរចាជាថ្មីជាមួយសហជីពដើម្បីរកដំណោះស្រាយ។
ការតវ៉ាមិនអោយបុគ្គលិកថ្មីចូលធ្វើការនេះធ្វើឡើងនៅក្រោយពេលដែលក្រុមបុគ្គលិកដែលតវ៉ាទើបផ្លាស់ប្ដូរសហព័ន្ធសហជីពថ្មី ដើម្បីអោយជួយការងារតវ៉ារបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។