មន្ត្រីយោធាជាន់ខ្ពស់កម្ពុជា ឲ្យដឹងថា ប្រទេសកម្ពុជា បានបាត់បង់កងរក្សាសន្តិភាពជ្រកក្រោមឆត្ររបស់អង្គការសហប្រជាជាតិ ចំនួន ២នាក់ ដែលស្លាប់ក្នុងបេសកកម្មរក្សាសន្តិភាពនៅប្រទេសម៉ាលី។ មន្ត្រីជំនាញកំពុងបំពេញបែបបទបញ្ជូនសាកសពកងទ័ពទាំងពីរ មកកាន់ប្រទេសកម្ពុជា វិញក្នុងពេលឆាប់ៗនេះ។
លោកឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រងកងកម្លាំងរក្សាសន្តិសុខ បោសសម្អាតមីន និងកាកសំណល់សង្គ្រាមកម្ពុជា មានប្រសាសន៍នៅរសៀលថ្ងៃពុធ ទី១១ ខែមិថុនា ថា កងរក្សាសន្តិភាពកម្ពុជា ទាំងពីរ បានស្លាប់នៅប្រទេសម៉ាលី កាលពីថ្ងៃទី១០ ខែមិថុនា ម្សិលមិញ។
លោកថា តាមការសន្និដ្ឋានជំហានដំបូង ការស្លាប់របស់កងទ័ពទាំងពីរ អាចបណ្ដាលមកពីពុលចំណី ឬមានជំងឺផ្លូវដង្ហើម៖ «ឥឡូវនេះយើងគិតតាមការយើងមើលឃើញដោយភ្នែកយើងផ្ទាល់ អាចទាស់ចំណី ឬជំងឺផ្លូវដង្ហើម។ ហើយឥឡូវនេះ ទាំងអង្គការសហប្រជាជាតិ គេកំពុងធ្វើកោសល្យវិច័យទៅលើសាកសព គឺគេយកលាមក និងទឹកនោម ឈាម ទៅពិនិត្យ ហើយបន្ទាប់មកគេទៅពិនិត្យនៅកន្លែងរស់នៅ មានទឹក មានអាហារ និងបរិស្ថាននៅជុំវិញខ្លួននៅកន្លែងជុំវិញខ្លួន។ កន្លែងអង្គភាពយើងហ្នឹង គេកំពុងធ្វើ ហើយលទ្ធផលយ៉ាងណា ខ្ញុំនឹងជម្រាបជូននៅពេលក្រោយ»។
លោកឧត្តមសេនីយ៍ សែម សុវណ្ណនី បន្ថែមថា សាកសពរបស់កងទ័ពទាំងពីរមិនទាន់បញ្ជូនមកដល់ប្រទេសកម្ពុជា នៅឡើយទេ ព្រោះមន្ត្រីជំនាញកំពុងបំពេញសំណុំបែបបទ ប៉ុន្តែនឹងបញ្ជូនមកដល់កម្ពុជា ក្នុងពេលឆាប់ៗ។ លោកបន្តថា សាកសពកងរក្សាសន្តិភាពទាំងពីរ ក្រុមគ្រូពេទ្យជំនាញកំពុងធ្វើកោសល្យវិច័យជាមុន មុននឹងបញ្ជូនមកកម្ពុជា៖ «សាកសពទាំងពីរជាធម្មតាមុននឹងគេបញ្ជូនមកកម្ពុជា គឺត្រូវរៀបចំបែបបទ និងនីតិវិធីបញ្ជូនឆ្លងប្រទេស។ ហើយក្រោយពីបំពេញបែបបទហើយ ជាធម្មតាគេធ្វើពិធីគោរពវិញ្ញាណក្ខន្ឋគ្រប់ប្រទេស ដែលនៅតំបន់បេសកកម្មហ្នឹង គឺធ្វើពិធីគោរពវិញ្ញាណក្ខន្ឋ ហើយបានគេរុញសាកសពចូលយន្តហោះ ដើម្បីធ្វើមាតុភូមិនិវត្តន៍។ ជាធម្មតា យើងធ្លាប់ធ្វើជាមួយបណ្ដាប្រទេសផ្សេងៗ ដូចជា នៅស៊ូដង់ និងប្រទេសផ្សេងៗ គឺដូចគ្នា។ រីឯពេលវេលាសាកសពមកដល់កម្ពុជា មិនទាន់ដឹងពិតប្រាកដពេលណាទេ ប៉ុន្តែឆាប់ៗហ្នឹងហើយ»។
លោកឧត្តមសេនីយ៍ សែម សុវណ្ណនី បញ្ជាក់ថា ចាប់តាំងពីប្រទេសកម្ពុជា បានបញ្ជូនកងរក្សាសន្តិភាពក្នុងក្របខ័ណ្ឌ ឬក្រោមឆត្ររបស់អង្គការសហប្រជាជាតិ តាំងពីឆ្នាំ២០០៦ រួមក គឺទើបតែពេលនេះ ទើបមានកងរក្សាសន្តិភាព ២នាក់បានស្លាប់។ កាលពីខែកុម្ភៈ ឆ្នាំ២០១៤ ប្រទេសកម្ពុជា បានបញ្ជូនកងទ័ពជ្រកក្រោមឆត្ររបស់អង្គការសហប្រជាជាតិ ជាង ៣០០នាក់ (៣០៩) ក្នុងបេសកកម្មរក្សាសន្តិភាពនៅប្រទេសម៉ាលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។