អាជ្ញាធរប៉ូលិសខណ្ឌឫស្សីកែវ បានចាប់ខ្លួនសកម្មជនសហជីពចំនួន ២នាក់ ដើម្បីសាកសួរក្នុងពេលចែកលិខិតជូនដំណឹងដល់កម្មករ អំពីការផ្អាកធ្វើការលើសម៉ោង និងបានដោះលែងមកវិញ ក្រោយពីឃាត់ខ្លួនប្រមាណ ១ម៉ោង។
ប្រធានសម្ព័ន្ធសហជីពជាតិ លោក ហ្វា សាលី បានឲ្យដឹងនៅថ្ងៃទី២៧ កុម្ភៈ ថា សកម្មជននៅក្នុងសហជីពរបស់លោកចំនួន ២នាក់ ត្រូវអាជ្ញាធរស្លៀកពាក់ស៊ីវិលចាប់ខ្លួន និងនាំខ្លួនទៅសាកសួរនៅទីស្នាក់ការ ដោយចោទប្រកាន់ថា ចែកខិត្តប័ណ្ណជូនដំណឹងសហជីពដល់កម្មករដោយគ្មានការអនុញ្ញាត។
លោក ហ្វា សាលី បានឲ្យដឹងបន្ថែមថា ការចាប់នោះកើតឡើងនៅម៉ោង ១១ថ្ងៃត្រង់ នៅមុខរោងចក្រកាត់ដេរ អេហ្វឺគ្រីន (EVER GREEN) នៅក្នុងសង្កាត់គីឡូលេខ៦ ខណ្ឌឫស្សីកែវ និងបានដោះលែងមកវិញមួយម៉ោងក្រោយមក។ លោកចាត់ទុកថា នេះគឺជាសកម្មភាពរំលោភច្បាប់ ពីព្រោះនៅប្រទេសកម្ពុជា មិនមានច្បាប់ចែងថា ការចែកលិខិតជូនដំណឹងពីសហជីពឲ្យទៅកម្មករ ត្រូវសុំច្បាប់អាជ្ញាធរនោះទេ៖ «ខ្ញុំមានការចាប់អារម្មណ៍ចំពោះទង្វើរបស់អាជ្ញាធរ ដែលធ្វើជាសមត្ថកិច្ចតែដូចជាចោរប្លន់។ គ្មានឯកសណ្ឋានត្រឹមត្រូវ ឃាត់គេឃាត់ឯង គ្មានបង្ហាញតួនាទី ស្ថាប័នថាមកពីទីណា? ដូច្នេះ យើងសុំថ្កោលទោស»។
លិខិតដែលចែកជូនកម្មករនោះ គឺការអំពាវនាវរបស់សហជីព សុំឲ្យកម្មករចូលរួមធ្វើសកម្មភាពតវ៉ា ដោយកុំឲ្យធ្វើការថែមម៉ោងចាប់ពីថ្ងៃទី២៤ កុម្ភៈ ដល់ថ្ងៃទី២៨ កុម្ភៈ អញ្ជើញកម្មករចូលរួមវេទិកាសាធារណៈនៅថ្ងៃទី៨ មីនា នៅទីលានប្រជាធិបតេយ្យ និងបើគ្មានដំណោះស្រាយ នឹងមានកូដកម្មទូទាំងប្រទេសអត់មកធ្វើការចាប់ពីថ្ងៃទី១២ ដល់ថ្ងៃទី១៥ មីនា និងចាប់ពីថ្ងៃទី១៦ ដល់ថ្ងៃទី១៩ មីនា គឺកម្មករនិយោជិតមកកន្លែងធ្វើការ ប៉ុន្តែអត់បំពេញការងារ។
សមាជិកសម្ព័ន្ធសហជីព ២នាក់ ដែលត្រូវចាប់ខ្លួននោះឈ្មោះ លោក យិន សារឿន ជាអគ្គលេខាធិការរង និងលោក ជួប និត ជាហេរញ្ញិករបស់សម្ព័ន្ធសហជីពជាតិ។
លោក យិន សារឿន ជាអគ្គលេខាធិការរងសម្ព័ន្ធសហជីពជាតិ ដែលត្រូវចាប់ខ្លួន និងសាកសួរ បាននិយាយឲ្យដឹងថា ការចាប់នោះជាការខុសច្បាប់៖ «ពេលនោះគាត់មកសួរថា ខ្ញុំមកពីណា មកពីខាងសហជីព គេថាអ្នកណាគេអ្នកឲ្យមកចែក ខ្ញុំថាអត់មានអ្នកណាឲ្យមកចែកទេ គឺមកខ្លួនឯង ហើយគាត់ថា ហាមអត់ឲ្យចែក ហើយគាត់ឃាត់ខ្ញុំ ហើយឲ្យឈប់ និងហៅទៅខាងខណ្ឌ។ គេថាមេគេហៅឲ្យទៅខណ្ឌ។ ពីដំបូង ខ្ញុំសួរដែរ ថាបងឯងមកពីខាងណា? ព្រោះគាត់អត់មានស្លៀកពាក់ត្រឹមត្រូវសោះ»។
ទាក់ទងការចាប់ខ្លួនសមាជិកសហជីពនេះ លោក ស៊ិន សំអាត ប៉ូលិសនៅក្នុងខណ្ឌឫស្សីកែវ ទទួលបន្ទុកសន្តិសុខ បានឲ្យដឹងថា ការឃាត់ខ្លួនសាកសួរសមាជិកសហជីពនោះ មិនមែនជាការចាប់ខ្លួនទេ ហើយអ្នកសាកសួរនោះជាអាជ្ញាធរថ្នាក់សង្កាត់ទេ៖ «គេមានចាប់ឯណា គេគ្រាន់តែហៅមកសួរនាំ ហើយគេអោយគាត់ទៅវិញហើយ»។
លោក អំ សំអាត ប្រធានផ្នែកស៊ើបអង្កេតរបស់អង្គការការពារសិទ្ធិមនុស្សលីកាដូ (LICADHO) បានចាត់ទុកសកម្មភាពចាប់ខ្លួន និងហៅទៅសាកសួរនៅទីស្នាក់ការរបស់អាជ្ញាធរនេះថា ជាអំពើខុសច្បាប់ គំរាមកំហែងលើសកម្មជនសហជីព។
កាលពីថ្ងៃទី១៣ កុម្ភៈ តំណាងសហព័ន្ធសហជីពសមាគម និងកម្មករនិយោជិតនៅគ្រប់វិស័យ បានអំពាវនាវដល់សមាជិកសមាជិកា កម្មករនិយោជិត មន្ត្រីរាជការ និងប្រជាពលរដ្ឋ សូមចូលរួមតវ៉ាទាមទារទាំងអស់គ្នា ធ្វើពហិការមិនធ្វើការថែមម៉ោង និងធ្វើកូដកម្មទូទាំងប្រទេស ដើម្បីសុំឲ្យមានការដោះលែងជនជាប់ចោទ ២១នាក់ និងទម្លាក់ចោលការចោទប្រកាន់លើសកម្មជនសិទ្ធិមនុស្ស និងកម្មករទាំង ២៣នាក់ សុំឲ្យមានការចរចាដំឡើងប្រាក់ឈ្នួលគោល ១៦០ដុល្លារ ក្នុងមួយខែឡើងវិញ និងត្រូវដាក់ទោសដល់ជនល្មើសដែលបានប្រើហិង្សា និងសម្លាប់កម្មករ ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានរបួស បាត់បង់ជីវិត និងជាប់ឃុំឃាំង ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។