មន្ត្រីនៃក្រសួងការងារ និងបណ្ដុះបណ្ដាលវិជ្ជាជីវៈ តំណាងកាស៊ីណូ ហ្គ្រែន ដាយម៉ុន ស៊ីធី (Grand Diamond City Casino) ក្រុងប៉ោយប៉ែត និងប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា ប្រមាណ ១០នាក់ ប្រជុំពិភាក្សារកដំណោះស្រាយបញ្ហាថៅកែកាស៊ីណូបញ្ឈប់ប្រធានសហជីពម្នាក់ពីការងារ ដែលធ្វើឡើងនៅមន្ទីរការងារខេត្តបន្ទាយមានជ័យ នៅរសៀលថ្ងៃទី៣១ មករា។
នៅក្នុងជំនួបនេះ លក្ខខណ្ឌការងារចំនួន ៤ចំណុចត្រូវបានភាគីពាក់ព័ន្ធលើកទៅពិភាក្សាដោះស្រាយរួមគ្នា ដោយមានការសម្របសម្រួលពីមន្ត្រីក្រសួងការងារ។ លក្ខខណ្ឌការងារទាំងនោះរួមមាន ក្រុមហ៊ុនត្រូវឲ្យប្រធានសហជីពចូលធ្វើការវិញ ទាមទារឲ្យបុគ្គលិកធ្វើការងារមិនលើសពី ៨ម៉ោងក្នុងមួយថ្ងៃ ក្រុមហ៊ុនត្រូវផ្ដល់ប្រាក់បន្ថែមចំពោះអ្នកធ្វើការវេនយប់ និងផ្ដល់ប្រាក់ថ្លៃអាហារចំនួន ៣ពាន់បាត ឬប្រមាណ ៨០ដុល្លារក្នុងមួយខែ។
ប្រធានសហព័ន្ធសហជីពកម្មករនិយោជកវិស័យទេសចរណ៍ និងសេវាកម្មកម្ពុជា ប្រចាំនៅកាស៊ីណូ ហ្គ្រែន ដាយម៉ុន ស៊ីធី (Grand Diamond City Casino) ក្រុងប៉ោយប៉ែត លោក ប៊ុន សុធី ឲ្យដឹងនៅថ្ងៃទី៣១ មករា ថា ខាងក្រុមហ៊ុនបានបញ្ចេញសញ្ញាភ្លើងខៀវច្រើននៅក្នុងការពិភាក្សានេះ ក៏ប៉ុន្តែមិនទាន់សម្រេចជាផ្លូវការនៅឡើយទេ៖ « គេនិយាយគេត្រេកអរដែលយើងកម្មករចេះតស៊ូសាមគ្គីគ្នា ហើយគេនឹងព្យាយាម ដែលអ្វីដែលអាចឲ្យបាន គេនឹងឲ្យ ហើយអ្វីដែលឲ្យមិនបាន គេសុំជំពាក់ ដោយគោរពទៅតាមពេលវេលា។ ដោយសារគេទាមទារពេលវេលាដើម្បីសម្របសម្រួល ដោយលើកឡើងថា ក្រុមហ៊ុនគេរកស៊ីជួនខាតជួនចំណេញ។ អ៊ីចឹងគេនឹងរៀបចំតាមលទ្ធភាព ប៉ុន្តែគេមិនទាត់ចោលទេ។ ពួកគាត់ក៏សប្បាយចិត្តដែរ ដោយសារឃើញក្រុមហ៊ុនព្រមដាក់ចិត្តមកនិយាយជាមួយពួកខ្ញុំ »។
អាស៊ីសេរី ពុំអាចទាក់ទងតំណាងក្រុមហ៊ុនកាស៊ីណូ ហ្គ្រែន ដាយម៉ុន ស៊ីធី (Grand Diamond City Casino) ក្រុងប៉ោយប៉ែត និងមន្ត្រីក្រសួងការងារ ដើម្បីសុំអត្ថាធិប្បាយបន្ថែមជុំវិញបញ្ហានេះបានទេ នៅថ្ងៃទី៣១ មករា។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី ដែលបានចូលរួមកិច្ចពិភាក្សានៅមន្ទីរការងារដែរ មានប្រសាសន៍ថា ការប្រជុំនេះជជែកគ្នាប្រមាណ ៤ម៉ោង គឺភាគីទាំងសងខាងហាក់យោគយល់គ្នាទៅវិញទៅមក។ លោកសង្ឃឹមថា ការងារនេះនឹងមានដំណោះស្រាយក្នុងពេលខាងមុខ ប្រសិនបើភាគីទាំងសងខាងរក្សាជំហរដោះស្រាយជាមួយគ្នាដោយសន្តិវិធី៖ « ខ្ញុំគិតថាគួរតែមានការយោគយល់គ្នារវាងកម្មករ និងក្រុមហ៊ុន គួរតែគោរពច្បាប់ការងាររបស់កម្ពុជា ទាំងអស់គ្នា ដើម្បីធានាបានស្ថិរភាពការងារ ក៏ដូចជាជីវភាពរស់នៅរបស់កម្មករ។ យើងសំណូមពរឲ្យក្រុមហ៊ុនគោរពច្បាប់ការងារតែម្ដង កុំឲ្យធ្វើអ្វីដូចការពីមុនដែលខុសឆ្គង គឺយើងត្រូវកែទាំងអស់គ្នា »។
លោក ប៊ុន សុធី ត្រូវបានក្រុមហ៊ុនកាស៊ីណូមួយនេះបណ្ដេញចេញពីការងារកាលពីថ្ងៃទី១៩ ខែវិច្ឆិកា ឆ្នាំ២០១៦ ក្រោមហេតុផលផ្សព្វផ្សាយព័ត៌មានខុសពីការពិត ដែលថាក្រុមហ៊ុនកេងចំណេញកម្លាំងពលកម្មរបស់បុគ្គលិក។ ប៉ុន្តែលោក ប៊ុន សុធី លើកឡើងថា លោកពុំបានធ្វើខុសដូចការចោទប្រកាន់នោះទេ។ លោកទាមទារឲ្យថៅកែកាស៊ីណូ ហ្គ្រែន ដាយម៉ុន ស៊ីធី (Grand Diamond City Casino) ក្រុងប៉ោយប៉ែត ទទួលរូបលោកចូលធ្វើការជាធម្មតាវិញឲ្យបានឆាប់។
ភាគីទាំងសងខាងនឹងជួបគ្នាម្ដងទៀត ដើម្បីដោះស្រាយបញ្ចប់បញ្ហា ក៏ប៉ុន្តែពុំទាន់កំណត់ថ្ងៃជួបគ្នានៅពេលណាច្បាស់លាស់នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។