ក្រុមតំណាងសហជីពនៅសហរដ្ឋអាមេរិក និងសកម្មជនការពារសិទ្ធិកម្មករកម្ពុជា ចាប់ផ្ដើមធ្វើយុទ្ធនាការស្វែងរកការគាំទ្រពីក្រុមហ៊ុនអ្នកបញ្ជាទិញសម្លៀកបំពាក់ និងស្បែកជើងនៅសហរដ្ឋអាមេរិក និងអឺរ៉ុប ឲ្យរដ្ឋាភិបាលកម្ពុជា ដោះលែង និងទម្លាក់ចោលការចោទប្រកាន់ប្រឆាំងនឹងកម្មករចំនួន ២៣នាក់ និងដំឡើងប្រាក់ខែគោលឲ្យកម្មករចំមួន ១៦០ដុល្លារក្នុងមួយខែ។
តំណាងមជ្ឈមណ្ឌលអប់រំច្បាប់សម្រាប់សហគមន៍ និងសហភាពសហជីពកម្ពុជា និងសកម្មជនសហជីពប្រចាំនៅសហរដ្ឋអាមេរិក ប្រមាណ ២០នាក់ កាលពីថ្ងៃសុក្រ ទី២ ខែឧសភា បាននាំគ្នាតវ៉ានៅខាងមុខហាងលក់សម្លៀកបំពាក់ អេច្ឆ.អែន.អិម (H&M) នៅទីក្រុង Boston រដ្ឋ Massachusetts។
លោក មឿន តុលា ប្រធានកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ មានប្រសាសន៍ថា សហជីពកម្មករនឹងធ្វើការតវ៉ាមួយចំនួននៅរដ្ឋ Massachusetts និងទីក្រុង New York ដើម្បីឲ្យក្រុមហ៊ុនបញ្ជាទិញសម្លៀកបំពាក់ពីកម្ពុជា អន្តរាគមន៍ទៅរដ្ឋាភិបាលកម្ពុជា ដោះលែងសកម្មជនសិទ្ធិមនុស្ស និងកម្មករ ២១នាក់ និងដំឡើងប្រាក់ខែគោលចំនួន ១៦០ដុល្លារ។
លោក មឿន តុលា៖ «យើងចង់ឲ្យក្រុមហ៊ុនបញ្ជាទិញទាំងអស់ហ្នឹង មានកិច្ចព្រមព្រៀងដែលមានកាតព្វកិច្ចផ្លូវច្បាប់ជាខាងក្រុមហ៊ុន បូកនឹងខាងសហជីព កំណត់ឲ្យមានប្រាក់ឈ្នួលវិស័យកាត់ដេរមួយតែម្តង»។
លោកបន្តថា ក្នុងដំណើរយុទ្ធនាការស្វែងរកការគាំទ្រពីសហជីពនៅសហរដ្ឋអាមេរិក និងម្ចាស់ក្រុមហ៊ុនបញ្ជាទិញសម្លៀកបំពាក់នៅសហរដ្ឋអាមេរិក នេះ លោក និងអ្នកស្រី យ៉ាង សុភ័ណ្ឌ តំណាងឲ្យសហភាពសហជីពកម្ពុជា ក៏បានជួបប្រជុំនឹងសហជីពប្រចាំសហរដ្ឋអាមេរិក មន្ត្រី និងសិស្សនៅតាមសកលវិទ្យាល័យមួយចំនួននៅសហរដ្ឋអាមេរិក ដើម្បីជំរុញទាមទារប្រាក់ខែគោល។
លោក មឿន តុលា បន្តថា លោកមានសង្ឃឹមថា សកម្មភាពតវ៉ានៅសហរដ្ឋអាមេរិក នឹងជំរុញឲ្យរដ្ឋាភិបាលកម្ពុជា ពិចារណាឡើងវិញចំពោះការដោះលែងកម្មករទាំង ២១នាក់ឲ្យមានសេរីភាពឡើងវិញ និងដំឡើងប្រាក់ខែគោលឲ្យកម្មករ។
នៅព្រឹកថ្ងៃសៅរ៍ នេះ តំណាងសហជីព និងតំណាងមជ្ឈមណ្ឌលអប់រំច្បាប់សម្រាប់សហគមន៍ និងសហភាពសហជីពកម្ពុជា នឹងបន្តធ្វើការតវ៉ានៅមុខហាងលក់សម្លៀកបំពាក់ និងស្បែកជើងល្បីៗមួយចំនួនទៀត ដូចជា ក្រុមហ៊ុន Gap ក្រុមហ៊ុន Adidas ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។