កូនស្រីសពអ្នកស្រី ហួត សារ៉ាវឌី សង្ឃឹមថា នឹងទទួលបានយុត្តិធម៌ ខណៈភ្នាក់ងារជំនាញក្រសួងផ្ទៃ កំពុងបន្តធ្វើកោសល្យវិច័យរកមូលហេតុពិតនៃករណីស្លាប់តារាសម្ដែងជើងចាស់អ្នកស្រី ហួត សារ៉ាវឌី កាលពីយប់ថ្ងៃទី១៤ ខែមេសា នៅខេត្តព្រៃវែង។ ការស៊ើបអង្កេតជាថ្មីនេះ នៅបន្ទាប់ពីសំណុំរឿងនេះមានភាពចម្រូងចម្រាស ដោយសារដំបូងឡើយអាជ្ញាធរមូលដ្ឋានសន្និដ្ឋានថា ជាគ្រោះថ្នាក់ចរាចរណ៍ ប៉ុន្តែគ្រួសារជនរងគ្រោះអះអាងថា ជាករណីប្លន់រំលោភសម្លាប់។
រហូតមកដល់ពេលនេះ ក្រសួងមហាផ្ទៃ នៅមិនទាន់រកឃើញថា ករណីស្លាប់តារាសម្ដែងជើងចាស់ អ្នកស្រី ហួត សារ៉ាវឌី តាមបណ្ដោយផ្លូវជាតិលេខ១ ក្នុងស្រុងកំពង់ត្របែក ខេត្តព្រៃវែង នោះ ជាគ្រោះថ្នាក់ចរាចរណ៍ ឬជាករណីប្លន់រំលោភសម្លាប់នៅឡើយ បន្ទាប់ពីរើកកាយសំណុំរឿងនេះជាងកន្លះខែហើយ តាមបណ្ដឹងរបស់គ្រួសារជនរងគ្រោះ។
ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ លោក សុខ ខេមរិន មានប្រសាសន៍ថា នាយកដ្ឋានបច្ចេកទេសវិទ្យាសាស្ត្រ កំពុងពិនិត្យមើលលើឯកសារ និងសំណាកស្លាកស្នាមផ្សេងៗ ដែលទទួលបានពីកន្លែងកើតហេតុ។ លោកបញ្ជាក់ថា លទ្ធផលពិនិត្យសំណាកអាចនឹងចេញក្នុងរយៈពេលពីរបីថ្ងៃទៀត។
អ្នកស្រី ហួត សារ៉ាវឌី និងស្វាមីក្រោយបានស្លាប់នៅក្បែរដងផ្លូវជាតិលេខ១ ស្ថិតក្នុងភូមិប្រាសាទ ឃុំប្រាសាទ ស្រុកកំពង់ត្របែក កាលពីយប់ថ្ងៃទី១៤ ខែមេសា ខណៈដែលពួកគាត់ធ្វើដំណើរដោយម៉ូតូទៅលេងស្រុកកំណើតស្ថិតនៅឃុំអន្សោង ស្រុកកំពង់ត្របែក ខេត្តព្រៃវែង ក្នុងឱកាសបុណ្យចូលឆ្នាំថ្មី។ ករណីស្លាប់នេះ អាជ្ញាធរមូលដ្ឋានសន្និដ្ឋានថា ជាគ្រោះថ្នាក់ចរាចរណ៍ ចំណែកគ្រួសារជនរងគ្រោះអះអាងថា ជាករណីប្លន់រំលោភសម្លាប់ ព្រោះនៅទីតាំងកន្លែងកើតនោះ មានភស្តុតាងជាច្រើនបញ្ជាក់ថា អ្នកស្រី ហួត សារ៉ាវឌី ពិតជាស្លាប់ដោយសារការរំលោភសម្លាប់បំបិទមាត់ដោយក្រុមក្មេងស្ទាវ។
កូនច្បងរបស់អ្នកស្រី ហួត សារ៉ាវឌី គឺកញ្ញា ជុង សារ៉ាច័ន្ទ សង្ឃឹមថា ក្រសួងមហាផ្ទៃ នឹងផ្ដល់យុត្តិធម៌ដល់គ្រួសារពួកគាត់៖ «ប្រសិនបើអូនបន្លាយតិចទៀតខ្ញុំនឹងទៅសួរ ហើយទៅផ្លូវណាផ្សេងដែលគិតថា អាចដោះស្រាយរឿងនេះបាន ព្រោះអីឥឡូវទើបតែជាងកន្លះខែទេ អ៊ីចឹងទុកអោយប៉ូលិសធ្វើការសិនទៅ»។
កញ្ញា ជុង សារ៉ាច័ន្ទ ធ្លាប់រៀបរាប់ថា ក្នុងពេលកើតហេតុម្ដាយរបស់នាងបានទូរស័ព្ទស្រែកប្រាប់ថា ឲ្យជួយគាត់ផង ព្រោះមានក្មេងស្ទាវមួយក្រុមរត់ចេញពីកៀនថ្នល់ ដៃមានកាន់ដំបង ហើយវាយប្ដីរបស់គាត់ជាអ្នកបើកម៉ូតូចំកញ្ចឹងក រួចរេចង្កូតម៉ូតូដួលធ្លាក់ពីថ្នល់ ហើយក៏ដាច់ទូរស័ព្ទ។ ពេលនោះ សាច់ញាតិចេញស្វែងរកដែរ តែរកមិនឃើញ លុះព្រឹកឡើងទើបមានអ្នកដំណើរប្រាប់ថា ពួកគាត់ស្លាប់ទៅហើយ។
កញ្ញា ជុង សារ៉ាច័ន្ទ ប្រាប់វិទ្យុអាស៊ីសេរីថា ប្រសិនបើគ្រោះថ្នាក់ចរាចរណ៍មែន ក្បាលរបស់ម្ដាយនាងមិនអាចផុងម្ដងពីរកន្លែងទេ ហើយម៉ូតូបើគ្រោះថ្នាក់ខ្លាំង ក៏មិនមែនវៀចតែកង់ និងបែកស្តុបដែរ គឺត្រូវខូចខាតធ្ងន់ធ្ងរជាងនេះ។ ម្យ៉ាងទៀត បើបើកបុកបង្គោលក៏មិនអាចស្លាប់ម្ដងទាំងពីរនាក់ដែរ ព្រោះបង្គោលនោះទាបណាស់ ហើយម្ដាយរបស់នាងក៏មិនអាចដួលទៅរហូតដល់របូតខោចេញពីខ្លួនដែរ ហើយបើសិនជាដួលទៅកកិតនឹងថ្មក្រួស ហើយរហែករបូតខោនោះ គឺប្រហែលជាសាច់ភ្លៅ និងសាច់គូថគាត់អាចត្រូវដាច់រយះអស់ហើយ មិនមែននៅល្អនោះទេ។ ចំណែកសាកសពឱពុកចុងវិញ គឺផុងលលាដ៍ក្បាលខាងក្រោយ ដោយសារត្រូវគេវាយ។ នៅក្បែរសពក៏មានដំបងប៉ុនកំភួនជើងប្រឡាក់ឈាមទៀតផង។
ជុំវិញករណីនេះ អ្នកសម្របសម្រួលនៃអង្គការអាដហុក (ADHOC) ប្រចាំខេត្តព្រៃវែង អ្នកស្រី អ៊ាង គឹមលី មានប្រសាសន៍ថា ករណីនេះ ដោយសារតែអាជ្ញាធរមូលដ្ឋានធ្វើការធ្វេសប្រហែស មិនបានស៊ើបអង្កេតនៅទីតាំងកើតហេតុឲ្យបានច្បាស់លាស់។ អ្នកស្រីសង្កេតឃើញថា ជាទូទៅ អាជ្ញាធរមួយចំនួនមិនសូវយកចិត្តទុកដាក់ពិនិត្យភស្តុតាង និងធ្វើកោសល្យវិច័យសាកសព ឬក៏សួរសាក្សីនៅកន្លែងកើតនោះទេ ពោលគឺពួកគាត់តែងតែធ្វើការសន្និដ្ឋានតែម្ដង៖ «នៅពេលដែលគាត់ ធ្វើការសន្និដ្ឋានដោយអត់បានស៊ើបអង្កេត និងស្រាវជ្រាវច្បាស់លាស់បែបនេះ គឺធ្វើអោយខាតប្រយោជន៍ និងធ្វើអោយជនរងគ្រោះរងនៅភាពអយុត្តិធម៌ ហើយចំណែកជនប្រព្រឹត្តរួចខ្លួនពីទោសដែលខ្លួនបានប្រព្រឹត្ត។ អ៊ីចឹងបើនៅតែធ្វើបែបនេះរបស់អាជ្ញាធរ នឹងធ្វើអោយជនប្រព្រឹត្តគាត់មានបទពិសោធន៍ក្នុងការប្រព្រឹត្តដែលធ្វើអោយរួចខ្លួនពីបទល្មើស»។
មន្ត្រីសមាគមការពារសិទ្ធិមនុស្សអាដហុក ក៏សង្ឃឹមថា នាយកដ្ឋាននគរបាលព្រហ្មទណ្ឌក្រសួងមហាផ្ទៃ នឹងបង្ហាញរកការពិត ហើយផ្ដល់យុត្តិធម៌ដល់គ្រួសារជនរងគ្រោះ។
អ្នកស្រី ហួត សារ៉ាវឌី អតីតជាតារាសម្ដែង និងតារាចម្រៀងជើងចាស់មួយដួងដែលរួមជំនាន់ជាមួយអ្នកនាង អម្ពរ ទេវី និងធ្លាប់រួមសម្ដែងជាមួយតារាល្បីៗជាច្រើនទៀត។ អ្នកស្រីក៏ធ្លាប់គ្រងតំណែងជាតួឯងក្នុងរឿង "ភ្នំទាបជាងស្មៅ" និងរឿងជាច្រើនទៀតដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។