បញ្ហាគ្រោះថ្នាក់ចរាចរណ៍រៀងរាល់ថ្ងៃនៅកម្ពុជា បានទាញការចាប់អារម្មណ៍កាន់តែខ្លាំងពីសំណាក់មន្ត្រីរដ្ឋាភិបាល និងរហូតដល់មន្ត្រីជាន់ខ្ពស់ស្ថានទូតអាមេរិក។
យ៉ាងណាមិញ គ្រោះថ្នាក់នេះបានបណ្ដាលមកពីកត្តាជាច្រើន ប៉ុន្តែមានការកត់សម្គាល់មួយ ចំពោះអ្នកបើកបររថយន្តធន់ធ្ងន់ និងអ្នកបើករថយន្តកុងតឺន័រ ជាដើម ដែលថានៅពុំមានសមត្ថភាពគ្រប់គ្រាន់នៅឡើយ ក្នុងការកាន់ដៃចង្កូតបើកបរនាពេលបច្ចុប្បន្ន ដែលបានបង្កឲ្យមានសោកនាដកម្មដោយសារគ្រោះថ្នាក់ចរាចរណ៍ជារៀងរាល់ថ្ងៃ។
ឯកអគ្គរដ្ឋទូតសហរដ្ឋអាមេរិក លោក វីល្លៀម ថត (William Todd) បានផ្ដោតការចាប់អារម្មណ៍ថា ផ្លូវនៅកម្ពុជា គឺបានសាងសង់ឡើងមិនត្រឹមត្រូវតាមបច្ចេកទេស សម្រាប់បើកបរក្នុងល្បឿនលឿនទេ ដែលបង្កឲ្យមានគ្រោះថ្នាក់ចរាចរណ៍ ហើយគ្រោះថ្នាក់នេះកំពុងធ្វើឲ្យមនុស្សស្លាប់ច្រើនជាងគេបង្អស់។
ឯកអគ្គរដ្ឋទូតសហរដ្ឋអាមេរិក លោក វីល្លៀម ថត បានសរសេរនៅក្នុងប្លុកផ្ទាល់ខ្លួនរបស់លោក ដោយបានបង្ហោះទៅលើគេហទំព័ររបស់ស្ថានទូតអាមេរិក ជាភាសាអង់គ្លេស ហើយបានប្រែសម្រួលថា ការសាងសង់ផ្លូវនៅកម្ពុជា មិនត្រឹមត្រូវតាមបច្ចេកទេសសម្រាប់បើកបរក្នុងល្បឿនលឿននោះទេ។ លោកបានដកស្រង់របាយការណ៍ពីអង្គការជនពិការអន្តរជាតិបែលហ្សិក ហេនឌីខេប (Handicap) ២០១២ ថា តិចជាង ៣០% នៃអ្នកបើកបរ យល់ដឹងពីផ្លាកសញ្ញាចរាចរណ៍ និងល្បឿនដែលបានកំណត់។ ចំណែកក្រសួងសាធារណការ និងដឹកជញ្ជូន រកឃើញថា ៧០% ទៀតនៃអ្នកបើកបរយានយន្ត បានទិញប័ណ្ណបើកបរ តាមរយៈការប្រព្រឹត្តអំពើពុករលួយពីសាលាបង្រៀនបើកបរឯកជនមួយចំនួន។
លោក វីល្លៀម ថត បានសរសេរទៀតថា ថ្មីៗនេះលោកមើលឃើញថា មានតែ ៦% ប៉ុណ្ណោះនៃរថយន្តដឹកទំនិញធំៗ ដែលបានឆ្លងកាត់ការត្រួតពិនិត្យបច្ចេកទេសសុវត្ថិភាពរថយន្តត្រឹមត្រូវ ហើយជាប់ ហើយថា បញ្ហាទាំងអស់ គួរតែមានការដោះស្រាយជាបន្ទាន់មួយ។
ឆ្លើយតបបញ្ហានេះ រដ្ឋមន្ត្រីក្រសួងសាធារណការ និងដឹកជញ្ជូន លោក ត្រាំ អ៊ីវតឹក មានប្រសាសន៍នៅថ្ងៃទី១១ មេសា ថា ដើម្បីបញ្ចៀសគ្រោះថ្នាក់ចរាចរណ៍នោះ រដ្ឋាភិបាលកំពុងខិតខំរកឥណទានពីសហគមន៍អន្តរជាតិ ដើម្បីស្ថាបនាផ្លូវឲ្យបានធំទូលាយជាងពេលបច្ចុប្បន្ន ទន្ទឹមនឹងការស្ថាបនាពង្រីកផ្លូវមួយចំនួនពីស្គន់ ឆ្ពោះទៅខេត្តសៀមរាប ផ្លូវជាតិលេខ៥ ពង្រីកដោយចែកជា ៤គន្លង ទៅដល់ស្ពានព្រែកក្ដាម ហើយនិងពង្រីកផ្លូវពីខេត្តបាត់ដំបង ទៅស្រុកសិរីសោភ័ណ ខេត្តបន្ទាយមានជ័យ ជាដើម។
របាយការណ៍ប៉ូលិសនាយកដ្ឋានសណ្ដាប់ធ្នាប់នៃក្រសួងមហាផ្ទៃ បានបង្ហាញថា ៣ខែដើមឆ្នាំ២០១៣ គ្រោះថ្នាក់ចរាចរណ៍បានកើតមានជាង ១ពាន់លើក ស្លាប់មនុស្សចំនួន ៥៤០នាក់ និងរបួសជាង ២ពាន់នាក់។ អត្រាគ្រោះថ្នាក់នេះថយចុះ បើប្រៀបធៀបឆ្នាំ២០១២ ក៏ប៉ុន្តែចំនួនមនុស្សស្លាប់បានកើនឡើង។
គ្រោះថ្នាក់ភាគច្រើន បណ្ដាលមកពីអ្នកបើកបរមានល្បឿនលឿន បើកប្រជែង និងស្រវឹងជាដើម។ ដើម្បីកាត់បន្ថយគ្រោះថ្នាក់អ្នកបើកបរ ឬអ្នកប្រើប្រាស់ផ្លូវគ្រប់រូប ចាំបាច់ត្រូវគោរពច្បាប់ និងមានសុជីវធម៌ក្នុងការបើកបរ។
ក្រសួងសាធារណការ បានបង្ហាញថា មាន ៨០% នៃអ្នកបើកបរម៉ូតូ គ្មានប័ណ្ណបើកបរទេ ហើយមានអ្នកស្លាប់ដោយសារគ្រោះថ្នាក់ចរាចរណ៍ ៧៥% គឺជាអ្នកបើកបរម៉ូតូ។
ការខូចខាតដោយសារគ្រោះថ្នាក់ចរាចរណ៍ប្រមាណ ៣១០លានដុល្លារក្នុងមួយឆ្នាំ។
កម្ពុជា ជាប្រទេសមួយក្នុងចំណោមប្រទេសដែលទទួលអនុវត្តន៍សកម្មភាពទសវត្សសុវត្ថិភាពចរាចរណ៍ផ្លូវគោក ឆ្នាំ២០១០ ដល់ឆ្នាំ២០២០ របស់អង្គការសហប្រជាជាតិ ដែលលើកទិសដៅកាត់បន្ថយអ្នកស្លាប់ដោយសារគ្រោះថ្នាក់ចរាចរណ៍ឲ្យបាន ៥០%។ ចំណែករដ្ឋាភិបាលកម្ពុជា ថា ដើម្បីដោះស្រាយបញ្ហានេះ សម្រាប់អ្នកបើកបររថយន្តត្រូវបន្ថយល្បឿន កុំបើកបរលឿនពេក រីឯអ្នកបើកបរម៉ូតូ ទាំងអ្នកឌុប និងអ្នករួមដំណើរ ត្រូវពាក់មួកសុវត្ថិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។