សេចក្ដីប្រកាសព័ត៌មានរបស់ស្ថានទូតអាមេរិកប្រចាំកម្ពុជា ចុះថ្ងៃទី២៣ មេសា សរសេរថា លោក វីល្លៀម ថត (William E.Todd) មន្ត្រីស្ថានទូតសហរដ្ឋអាមេរិកប្រចាំកម្ពុជា បានចូលរួមក្នុងពិធីបញ្ចប់ការសាងសង់អាគារសិក្សាថ្មីនៃវិទ្យាល័យព្រះអង្គដួងនេះ ស្ថិតក្នុងទីរួមខេត្តព្រៃវែង។
លិខិតបន្តថា ការសាងសង់នេះ ត្រូវប្រើវេលារយៈពេលជាង ៣ឆ្នាំ បន្ទាប់ពីវិទ្យាល័យមួយខ្នងនេះធ្លាប់បានកសាងម្ដងរួចមកហើយ កាលពីទសវត្សឆ្នាំ១៩៥០ ប៉ុន្តែត្រូវខ្ទេចខ្ទាំ និងរងការខូចខាតស្ទើរទាំងស្រុងក្នុងអំឡុងសង្គ្រាមស៊ីវិលនៅកម្ពុជា។
សេចក្ដីប្រកាសព័ត៌មានឲ្យដឹងទៀតថា អាគារសិក្សាថ្មីនេះ រួមមានថ្នាក់រៀនចំនួន ១៨បន្ទប់ បន្ទន់អនាម័យចំនួន ១៦ កន្លែងលាងដៃ និ បទជើងតូចមួយ អណ្ដូងទឹក ចង្ក្រានបាយ និងកន្លែងលេងកីឡា។ តាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍ (USAID) បានចំណាយលុយសាងសង់ប្រមាណ ៧០ម៉ឺនដុល្លារ។
លោក វីល្លៀម ថត មានប្រសាសន៍តាមរយៈការស្រង់សំដីក្នុងលិខិតចុះថ្ងៃទី២៣ មេសា ថា៖ វិទ្យាល័យព្រះអង្គដួង គឺជាឧទាហរណ៍ដ៏ប្រពៃមួយនៃការប្ដេជ្ញារបស់ប្រទេសអាមេរិក ចំពោះប្រជាជនកម្ពុជា។ យើងសង្ឃឹមថា សាលានេះនឹងផ្ដល់បរិយាកាសល្អសម្រាប់ការបង្រៀនល្អ និងការរៀនសូត្រប្រកបដោយការសប្បាយរីករាយ ដែលនាំឲ្យកុមារមានអនាគតល្អ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។