មនុស្សម្នាជាច្រើន ជាពិសេសយុវជន បាននាំគ្នាទិញផ្កាជូនអ្នកដែលខ្លួនស្រឡាញ់ នៅថ្ងៃទី១៤ កុម្ភៈ ដែលជាថ្ងៃនៃសេចក្ដីស្រឡាញ់។
កន្លងមក យុវជនមួយចំនួនបានយល់ថា ថ្ងៃនៃក្ដីស្រឡាញ់នេះ គឺជាថ្ងៃបូជាខ្លួនប្រាណជូនសង្សារ។ ក៏ប៉ុន្តែ អ្នកសង្កេតការណ៍សង្គមបានអះអាងថា សកម្មភាពទិញផ្កា និងការបូជាខ្លួនប្រាណជូនសង្សារនៅថ្ងៃបុណ្យក្ដីស្រឡាញ់ ឆ្នាំ២០១៤ នេះ បានថយចុះច្រើនប្រៀបធៀបឆ្នាំមុនៗ ដោយសារយុវជនភាគច្រើនបានយល់អត្ថន័យនៃថ្ងៃបុណ្យនេះ និងដោយសារមានការអប់រំពីមជ្ឈដ្ឋាននានាជាច្រើនឲ្យយុវជនយល់ដឹង។
ជាអាទិ៍ នៅមុនថ្ងៃបុណ្យនៃក្ដីស្រឡាញ់ ក្រសួងអប់រំ យុវជន និងកីឡា បានចេញសេចក្ដីប្រកាសព័ត៌មានមួយ អំពាវនាវដល់យុវជន មាតាបិតាសិស្ស ឲ្យអប់រំកូនចៅកុំឲ្យភ្លើតភ្លើននៅថ្ងៃបុណ្យនៃក្ដីស្រឡាញ់ ដែលកាលមុនគេហៅថា ថ្ងៃបុណ្យសង្សារនេះ។ សេចក្ដីអំពាវនាវរបស់ក្រសួងអប់រំ យុវជន និងកីឡា បានរំឭកឲ្យយុវជនខ្មែរកុំឲ្យងប់ងុលនឹងវប្បធម៌បរទេសពេក ហើយចេះស្រឡាញ់ និងរក្សាប្រពៃណីជាតិរបស់ខ្លួនឲ្យបានថ្កុំថ្កើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។