ក្រុមអាជីវករប្រមាណជាង ១០០នាក់ ដែលកំពុងធ្វើអាជីវកម្មលក់ដូរនៅតាមឆ្នេរសមុទ្រក្នុងខេត្តព្រះសីហនុ ដាក់ញត្តិសុំកិច្ចអន្តរាគមន៍ពីរដ្ឋាភិបាល រដ្ឋសភា និងក្រសួងដែនដី នគរូបនីយកម្ម និងសំណង់ បន្ទាប់ពីអាជ្ញាធរខេត្តទេសចរណ៍មួយនេះ ចេញលិខិតបញ្ជាឲ្យពួកគាត់រុះរើសំណង់អាជីវកម្មចេញពីលើដីចំណីឆ្នេរក្នុងតំបន់ឆ្នេរចំនួនបីកន្លែង ដោយទុកពេលឲ្យមួយខែ។ អភិបាលខេត្តព្រះសីហនុ ឆ្លើយតបថា អាជ្ញាធរត្រូវតែអនុវត្តទៅតាមគោលការណ៍ ដើម្បីរៀបចំកែលំអ អភិវឌ្ឍនៅតំបន់ឆ្នេរនោះឲ្យមានសោភណភាពល្អ។
អាជីវករដែលកំពុងធ្វើអាជីវកម្មលក់ដូរនៅឆ្នេរអូរត្រេះ ចំនួន ៦២តូប ឆ្នេរអូរឈើទាល (ទល់មុខដីក្រុមហ៊ុន សុខា អូតែល អតីតដីអារីស្តុន) ៥៧តូប និងឆ្នេរមុខព្រះរាជដំណាក់ចាស់កំពង់សោម ចំនួន ១១តូប ហាក់មានក្តីសង្ឃឹមថា នឹងបានដំណោះស្រាយសមរម្យ បន្ទាប់ពីខុទ្ទកាល័យលោកនាយករដ្ឋមន្ត្រី ហ៊ុន សែន ស្ថាប័នរដ្ឋសភា និងក្រសួងដែនដី នគរូបនីយកម្ម និងសំណង់ ទទួលញត្តិរបស់ពួកគាត់នៅថ្ងៃទី១៨ ខែកុម្ភៈ។
ក្រុមអាជីវករបង្ហាញការព្រួយបារម្ភយ៉ាងខ្លាំង នៅបន្ទាប់ពីអាជ្ញាធរខេត្តព្រះសីហនុ បានចេញសេចក្តីជូនដំណឹងចុះថ្ងៃទី១២ កុម្ភៈ ដែលតម្រូវឲ្យពួកគាត់រុះរើសំណង់អាជីវកម្មចេញពីលើដីចំណីឆ្នេរក្នុងរយៈពេលមួយខែ គិតចាប់ពីថ្ងៃទី១៣ កុម្ភៈ ដល់ថ្ងៃទី១៣ ខែមីនា ឆ្នាំ២០១៦ ដោយគ្មានការប្រជុំពិគ្រោះយោបល់អ្វីនោះឡើយ។ ក្នុងលិខិតនោះក៏បញ្ជាក់ថា បើពលរដ្ឋមិនរុះរើមុនពេលផុតកំណត់កាលបរិច្ឆេទទេ គឺគណៈបញ្ជាការឯកភាពរដ្ឋបាលខេត្ត នឹងចាត់វិធានការរុះរើដោយមិនទទួលខុសត្រូវរាល់ការខូចខាត។
ចំណាត់ការនេះ ក្រុមអាជីវករទាំងបីកន្លែង ថានឹងធ្វើឲ្យប៉ះពាល់ដល់មុខរបរពួកគាត់យ៉ាងធ្ងន់ធ្ងរ ហើយបណ្ដាលឲ្យពួកគាត់កាន់តែក្រីក្រ និងធ្វើចំណាកស្រុក ព្រោះបាត់បង់អាជីវកម្មលក់ដូរដែលបម្រើវិស័យទេសចរណ៍ ដើម្បីរកប្រាក់កម្រៃសម្រាប់ផ្គត់ផ្គង់ជីវភាពគ្រួសារប្រចាំថ្ងៃ។
តំណាងក្រុមអាជីវករដែលមានតូបលក់ដូរ ៦២តូបនៅក្នុងតំបន់ឆ្នេរអូរត្រេះ លោក ឯក វិធាន មានប្រសាសន៍ថា ពួកគាត់មិនព្រមរុះរើដើរចេញទៅណានោះទេ។ លោកជឿជាក់ថា ប្រមុខរដ្ឋាភិបាល ព្រមទាំងស្ថាប័នថ្នាក់ជាតិ នឹងមិនទុករាស្ត្រឲ្យក្រីក្រកំសត់ ខ្វះការងារធ្វើ និងបាត់បង់មុខរបរចិញ្ចឹមជីវិតនោះទេ៖ « ប្រសិនមិនអនុញ្ញាតឲ្យពួកខ្ញុំរកស៊ីជាប្រចាំថ្ងៃឡើងវិញទេ ជីវិតពួកយើងប្រៀបបានត្រឡប់ថយក្រោយទៅ ២០ឆ្នាំមុន។ វាធ្វើឲ្យយើងអន្តរាយ កាន់តែក្រឡើង។ អ៊ីចឹងសូមទទូចដល់សម្ដេចយោគយល់ដល់ពួកខ្ញុំ »។
ក្រុមអាជីវករទាំងនោះ បានលើកបដាដែលសរសេរថា គាំទ្រគោលនយោបាយឈ្នះៗរបស់ លោក ហ៊ុន សែន និងលើករូបថតលោកនាយរដ្ឋមន្ត្រី ហ៊ុន សែន ផងដែរ។
លោក ឯក វិធាន មានប្រសាសន៍ថា ពួកគាត់បានចូលទៅលក់ដូរនៅតំបន់នោះតាំងពីមិនទាន់មានភ្ញៀវទេសចរ រហូតដល់មានភ្ញៀវទេសចរ និងបានរៀបចំទីកន្លែងយ៉ាងស្អាតសម្រាប់ទាក់ទាញភ្ញៀវទេសចរ។ ដូច្នេះ ពួកគាត់មិនយល់ឡើយ ដែលអាជ្ញាធរមិនឲ្យពួកគាត់បន្តលក់ដូរដើម្បីចិញ្ចឹមក្រពះ។
វិទ្យុអាស៊ីសេរី មិនអាចសាកសួរមន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន គឺលោក គង់ ចំរើន បានទេ ដោយលោកគ្រវីក្បាលមិនព្រមនិយាយជាមួយអ្នកសារព័ត៌មាន។
តំណាងអាជីវករម្នាក់ទៀត គឺលោកស្រី ភឿក សុខេន មានប្រសាសន៍ថា ពួកគាត់សំណូមពរឲ្យរដ្ឋាភិបាល រដ្ឋសភា និងក្រសួងដែនដី ជួយអន្តរាគមន៍ធ្វើយ៉ាងណាឲ្យពួកគាត់បានលក់ដូរវិញ និងរៀបចំតូបលក់ជាស្តង់ដារតាមគំរូដូចតូបនៅឆ្នេរអូរឈើទាល ដែលអាជ្ញាធរបានអនុវត្តកន្លងមក៖«យើងមិនមែនមកប្រឆាំងការអភិវឌ្ឍរបស់រដ្ឋាភិបាលនោះទេ យើងមកដើម្បីឲ្យរដ្ឋាភិបាលជួយរកដំណោះស្រាយជូនប្រជាពលរដ្ឋបានអភិវឌ្ឍនៅនឹងកន្លែង ហើយរៀបចំទៅតាមស្តង់ដាររបស់រដ្ឋាភិបាលនោះ យើងអាចទទួលយកបាន »។
អភិបាលខេត្តព្រះសីហនុ លោក យន្ត មីន មានប្រសាសន៍ថា អាជ្ញាធរពុំបានរំលោភបំពានលើអាជីវករនោះទេ ប៉ុន្តែសូមឲ្យពួកគាត់ស្ម័គ្រចិត្តដើរចេញទៅ ព្រោះថា គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងសាលាខេត្តព្រះសីហនុ មានផែនការរៀបចំកែលំអ និងអភិវឌ្ឍសួនច្បារនៅតំបន់ឆ្នេរខ្សាច់ក្នុងខេត្តព្រះសីហនុ ដើម្បីធានាបាននូវការគ្រប់គ្រង និងរក្សាបរិស្ថានប្រកបដោយនិរន្តរភាព៖ « យើងធ្វើការទៅតាមផែនការ ហើយឆ្នេរទាំងអស់ហ្នឹង គឺចាត់ទុកជាឆ្នេរស្អាតរបស់ពិភពលោក ឆ្នេរស្អាតរបស់កម្ពុជា។ អ៊ីចឹងកន្លងមក ការរស់នៅរបស់គាត់នោះ គឺធ្វើឲ្យប៉ះពាល់ដល់ឆ្នេរស្អាត។ ដូច្នេះ យើងត្រូវគ្រប់គ្រងបែបឆ្នេរស្អាត ដែលមានរបៀបរៀបរយតាមបទដ្ឋានរបស់ឆ្នេរស្អាត »។
លោកថា អាជ្ញាធរក៏កំពុងតែគិតគូរជួយសម្រួលដល់ពួកគាត់ដែរ ប៉ុន្តែលោកមិនទាន់ធ្វើអត្ថាធិប្បាយឡើយ ដោយរង់ចាំសេចក្តីសម្រេចរបស់អាជ្ញាធរថ្នាក់ជាតិ។
រីឯក្រុមអង្គការសង្គមស៊ីវិលរិះគន់ថា អាជ្ញាធរគួរតែរកវិធីសាស្ត្រដោះស្រាយជូនពលរដ្ឋជាមុនសិន មុននឹងចេញវិធានការរុះរើតូបពួកគាត់ ពោលគឺមិនមែនបណ្ដេញពួកគាត់ចេញមុន ហើយរកវិធីជួយក្រោយឡើយ។
មន្ត្រីសម្របសម្រួលនៃអង្គការលីកាដូ (LICADHO) ខេត្តព្រះសីហនុ លោក ប៊ួន ណារិទ្ធ មានប្រសាសន៍ថា ប្រសិនបើអាជ្ញាធររុះរើតូបអាជីវករទាំងនោះ គឺភ្ញៀវទេសចរដែលត្រៀមនឹងដើរកម្សាន្តនៅពេលបុណ្យចូលឆ្នាំខាងមុខ នឹងពិបាករកកន្លែងអង្គុយលេង និងអាហារបរិភោគ ជាពិសេសអាជីវករច្បាស់ជាតែលតោលក្នុងការស្វែងរកមុខរបរថ្មី៖ « អាជីវករទាំងឡាយហ្នឹងហាក់ដូចជាមិនដឹងថា ទៅរកស៊ីអី ហើយទៅជាច្របូកច្របល់មិនដឹងថា ជាចាប់អី ដោយសារទុនរបស់គាត់រកស៊ី គឺបានវិនិយោគទៅលើការលក់ដូរនោះ ហើយជំពាក់លុយធនាគារផ្សេងៗ។ អ៊ីចឹងធ្វើឲ្យបាត់បង់សេដ្ឋកិច្ចគ្រួសារពួកគាត់យ៉ាងគំហុកតែម្តង »។
មន្ត្រីការពារសិទ្ធិមនុស្សរូបនេះ ស្នើដល់អាជ្ញាធរខេត្ត ត្រូវអភិវឌ្ឍ ឬបើកឆ្នេរមួយចំនួនដែលឈ្មួញ និងបុគ្គលមានអំណាចក្នុងជួររដ្ឋាភិបាលបច្ចុប្បន្ន ហ៊ុមព័ទ្ធរបងថ្មទុកចោលគ្មានការអភិវឌ្ឍ ឲ្យមានអនាម័យ និងមានសោភណភាពជាមុនសិន មុននឹងតម្រូវឲ្យពលរដ្ឋ ឬក្រុមអាជីវករកំពុងលក់ដូរ ឈប់លក់ដូរបម្រើសេវាទេសចរណ៍នាមូលដ្ឋានខេត្តព្រះសីហនុ។
ក្រុមអាជីវករ ក៏ប្រកាសដាច់អហង្ការថា មិនព្រមរុះរើចេញនោះទេ ហើយនឹងនៅតែបន្តតវ៉ាលុះត្រាបានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។