ថ្មីៗនេះ មានការបង្ហោះវីដេអូមួយនៅបណ្ដាញសង្គមហ្វេសប៊ុក (Facebook) បង្ហាញពីសកម្មភាពរបស់ជនមិនស្គាល់មុខមួយក្រុម វាយបំផ្លាញផ្នូររបស់សហគមន៍ជនជាតិវៀតណាម អស់ជាង ១០ផ្នូរ នៅស្រុកស្អាង ខេត្តកណ្ដាល។ អាជ្ញាធរស្រុកស្អាង និងសហគមន៍ជនជាតិវៀតណាម ដែលមានសាច់ញាតិបញ្ចុះនៅតំបន់នោះ អះអាងថា មូលហេតុដែលបង្កឲ្យមានហេតុការណ៍នេះ អាចពាក់ព័ន្ធនឹងការរើសអើងពូជសាសន៍។
នៅលើផ្ទៃដីប្រហែលកន្លះហិកតារហ៊ុមព័ទ្ធដោយវាលស្រែ និងដំណាំដាំដុះរបស់អ្នកភូមិជនជាតិខ្មែរ គេឃើញមានផ្នូរជនជាតិវៀតណាម ប្រមាណ ៣០០ ត្រូវបានសាងសង់ជាជួរៗ។ ផ្នូរនៅជួរខាងឆ្វេង ជាផ្នូរដែលសង់ឡើងតាមសាសនាព្រះពុទ្ធ ឯខាងស្ដាំ តាមសាសនាយេស៊ូបែបកាតូលិក។ ដីមួយកន្លែងនេះ ស្ថិតក្នុងភូមិក្នុងព្រែក ឃុំព្រែកគយ ស្រុកស្អាង ខេត្តកណ្ដាល ជាកម្មសិទ្ធិរបស់សហគមន៍ជនជាតិវៀតណាម ប្រមាណ ៣០០គ្រួសារ រស់នៅតាមដងទន្លេបាសាក់ និងស្ថិតក្រោមការចាត់ចែងរបស់វិហារសហគមន៍ព្រះយេស៊ូ បែបកាតូលិកមួយ។
វាលស្មសានមួយកន្លែងនេះ មានសភាពស្ងប់ស្ងាត់ ក៏ប៉ុន្តែកាលពីថ្ងៃទី៦ ខែកក្កដា កន្លងទៅ ផ្នូរជនជាតិវៀតណាម ជាង ១០ ត្រូវបានរំខានដោយជនមិនស្គាល់មុខមួយក្រុម មានគ្នាប្រមាណពី ៣ ទៅ ៤នាក់។ ផ្នូរជាងដប់នោះ រងការវាយបំផ្លាញដោយអន្លើ ត្រង់ផ្នែកខាងមុខ។
ក្រោយហេតុការណ៍នេះកើតឡើង វីដេអូខ្លីមួយមិនស្គាល់ប្រភព ត្រូវបានផ្សព្វផ្សាយលើបណ្ដាញសង្គមហ្វេសប៊ុក ដោយបង្ហាញពីសកម្មភាពរបស់ជនមិនស្គាល់មុខមួយក្រុមនោះប្រើញញួរវាយបំផ្លាញផ្នូរ។
ក្នុងវ័យជាង ៧០ឆ្នាំ លោក ង្វៀន ស្វឹនថ ជាគ្រូសាសនាយេស៊ូខាងកាតូលិក ទទួលបន្ទុកចាត់ចែងពិធីសាសនានៅតំបន់នោះជាង ២០ឆ្នាំមកហើយ។ លោកបានឲ្យដឹងថា សកម្មភាពបំផ្លាញផ្នូរសហគមន៍ជនជាតិវៀតណាម នៅស្រុកស្អាង មិនមែនទើបតែកើតឡើងជាលើកទីមួយនោះទេ តែលោកថា ការវាយបំផ្លាញ ហើយមានថតជាវីដេអូបែបនេះ គឺជាលើកទីមួយហើយ និងទំនងជាពាក់ព័ន្ធការរើសអើងពូជសាសន៍។
លោក ង្វៀន ស្វឹនថ៖ «វាយផ្នូរហ្នឹង លើកទី៣ហើយ។ លើកទី១ ទី២ វាយតែខាងកាតូលិកទេ នៅពេលបោះឆ្នោតកន្លងទៅ។ ឥឡូវវិញ គឺស្មុគស្មាញ ប្រហែលដោយសាររឿងព្រំដែនហើយ បានពួកគេមកវាយទៀតហ្នឹង។ តែយើងមានដឹងអី! ប្រហែលពួកហ្នឹងស្អប់វៀតណាម ហើយ បានជាមកវាយកម្ទេចផ្នូរជីដូនជីតាវៀតណាម អ៊ីចឹង»។
ជនជាតិវៀតណាម រស់នៅតំបន់នោះ បានសម្ដែងអារម្មណ៍ឈឺចាប់ នៅពេលផ្នូរសាច់ញាតិរបស់ពួកគេរងការវាយបំផ្លាញដោយមិនដឹងមូលហេតុពិតប្រាកដ។ យ៉ាងណា លោកគ្រូសាសនា ង្វៀន ស្វឹនថ អំពាវនាវឲ្យសហគមន៍វៀតណាម រំងាប់កំហឹង និងរក្សាភាពស្ងៀមស្ងាត់៖ «ជនជាតិវៀតណាម យើង ឃើញគេវាយផ្នូរអ៊ីចឹងឈឺចិត្តណាស់ ទោះបីគ្មានជាប់សាច់ឈាមក៏ដោយ។ ខ្លួនខ្ញុំផ្ទាល់ ក៏ឈឺចាប់ដែរ ក៏ប៉ុន្តែខ្ញុំក៏ពន្យល់បងប្អូនឲ្យស្ងប់ ដោយសារយើងរស់លើទឹកដីខ្មែរទេ កុំឲ្យគេខឹង កុំឲ្យមានការសងសឹក ស្ងប់ទៅ កុំធ្វើអីទាំងអស់»។
លោក ហ្វាន អ៊ុតអិម ជាជនជាតិវៀតណាម ម្នាក់ដែលផ្នូររបស់ឪពុកលោករងការវាយបំផ្លាញ។ ស្រដៀងនឹងការយល់ឃើញរបស់លោកគ្រូសាសនាដែរ លោក ហ្វាន អ៊ុតអិម អះអាងថា រឿងនេះមិនមែនជារឿងគំនុំរវាងបុគ្គលនិងបុគ្គលទេ។
លោក ហ្វាន អ៊ុតអិម៖ «មិនដឹងខាងណាវាយទេ។ បើថាសង្ស័យ ក៏មិនដឹងសង្ស័យអ្នកណាដែរ។ ខ្ញុំក៏មិនដែលមានគំនុំជាមួយអ្នកណាដែរ។ ខ្ញុំក៏មិនដឹងថា ម៉េចបានជាគេទៅវាយផ្នូរអ៊ីចឹងដែរ។ ក្នុងជីវភាពប្រចាំថ្ងៃខ្ញុំ ខ្ញុំក៏មិនដែលធ្វើឲ្យអ្នកណាស្អប់ខ្ពើមខ្ញុំដែរ។ បើគេស្អប់ខ្ពើមខ្ញុំ គេវាយតែផ្នូរជីដូនជីតាខ្ញុំបាត់ហើយ ចាំបាច់អីទៅវាយផ្នូរអ្នកដទៃដែរ?»។
ក្នុងចំណោមផ្នូរប្រមាណ ៣០០ នៅលើដីនោះ ផ្នូរដែលចាស់បំផុតត្រូវបានសាងសង់ឡើងនៅឆ្នាំ២០០០ ឯផ្នូរថ្មីបំផុតហើយរងការបំផ្លាញដែរនោះ សង់ឡើងនៅខែកក្កដា ថ្មីៗនេះ។
បុរសជនជាតិវៀតណាម មួយក្រុមដែលធ្វើដំណើរទៅពិនិត្យមើលតំបន់ផ្នូរនោះ សុទ្ធតែអះអាងថា មិនចង់ប្ដឹងផ្ដល់នោះទេ តែសំណូមពរឲ្យអាជ្ញាធរជួយទប់ស្កាត់កុំឲ្យមានហេតុការណ៍បែបនេះកើតឡើងទៀត៖ «និយាយរឿងប្ដឹង ខ្ញុំក៏មិនដឹងថា ម៉េចដែរ ហើយបើប្ដឹង ក៏មិនដឹងថា គេដោះស្រាយឲ្យពួកខ្ញុំឬអត់ដែរ។ ប៉ុន្តែពួកខ្ញុំចង់បានតែមួយសុខទេ។ ក្រោយៗកុំវាយទៀត។ បើប្ដឹងផ្ដល់ខ្លាចមានគំនុំសងសឹក ហើយមកវាយថែមទៀត។ ម្យ៉ាងទៀត យើងជាជនជាតិវៀតណាម រស់នៅលើដីគេទេ កុំប្ដឹងផ្ដល់អី ពិបាករស់ណាស់!»។
ខេត្តកណ្ដាល ជាខេត្តមួយក្នុងចំណោមខេត្តដទៃទៀត ដែលមានជនជាតិវៀតណាម រស់នៅច្រើន។របាយការណ៍ស្រាវជ្រាវក្នុងឆ្នាំ២០១៤ របស់អង្គការការពារសិទ្ធិជនជាតិភាគតិច ដែលសិក្សាពីជនអន្តោប្រវេសន៍វៀតណាម រស់នៅខេត្តកណ្ដាល និងកំពង់ឆ្នាំង បានបង្ហាញថា ជនអន្តោប្រវេសន៍ទាំងនោះ ដែលមួយចំនួនបានកើត និងរស់នៅលើទឹកដីកម្ពុជា ជាច្រើនជំនាន់មកហើយ ចាត់ទុកប្រទេសកម្ពុជា ដូចជាប្រទេសដើមកំណើតរបស់ខ្លួន ក៏ប៉ុន្តែពួកគេបាត់បង់ទាំងស្រុងនូវសិទ្ធិទទួលបានការអប់រំ សេដ្ឋកិច្ចសង្គម និងនយោបាយ។
ក្រមព្រហ្មទណ្ឌត្រង់មាត្រា២៦២ ស្ដីពីបទប្រមាថទីបញ្ចុះសពចែងថា អំពើប្រមាថតាមមធ្យោបាយណាមួយក៏ដោយទៅលើផ្នូរ ទីបញ្ចុះសព កោដ្ឋ ឬសំណង់ដែលកសាងឡើងសម្រាប់រំលឹកវិញ្ញាណក្ខន្ធនៃអ្នកទទួលមរណភាព ត្រូវផ្ដន្ទាទោសដាក់ពន្ធនាគារពី ១ខែ ទៅ ១ឆ្នាំ និងពិន័យជាប្រាក់ពីមួយសែនរៀល ទៅពីរលានរៀល។
ចាប់តាំងពីហេតុការណ៍នៃការវាយបំផ្លាញផ្នូររបស់សហគមន៍ជនជាតិវៀតណាម បានកើតឡើងសមត្ថកិច្ចស្រុកស្អាង នៅមិនទាន់កំណត់មុខសញ្ញានៃជនប្រព្រឹត្តបទល្មើសបាននៅឡើយ។ អធិការស្ដីទីនៃអធិការដ្ឋាននគរបាលស្រុកស្អាង លោក សយ សារវ័ន្ត នៅថ្ងៃទី១៧ ខែកក្កដា បញ្ជាក់ថា នគរបាលស្រុកស្អាង នឹងនៅតែបន្តការស៊ើបអង្កេតនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។