ពេលបច្ចុប្បន្ន ក្រុមហ៊ុនឯកជនខ្លះដែលប្រកបអាជីវកម្មដឹកដី ដឹកខ្សាច់ និងថ្មលក់ ដើម្បីផលប្រយោជន៍ផ្ទាល់ខ្លួន កំពុងបំផ្លាញផ្លូវលំមួយចំនួននៅតាមទីជនបទឱ្យខូចខាត។ នៅខេត្តសៀមរាប ក្រុមប្រជាពលរដ្ឋជាច្រើននាក់ បានប្រមូលផ្ដុំគ្នាធ្វើការប្រឆាំងនឹងរថយន្តដឹកដីធំៗទាំងនោះ ដោយបិទផ្លូវមិនឱ្យចេញចូលទេ។
ក្រុមប្រជាពលរដ្ឋប្រមាណ ១០០នាក់ នៅភូមិតានី ឃុំរុនតាឯក ចម្ងាយជាង ៣០គីឡូម៉ែត្រ ភាគឦសានពីទីរួមខេត្តសៀមរាប បាននាំគ្នាបិទកំណាត់ផ្លូវលំ១ខ្សែ តាំងតែពីព្រឹកព្រលឹមថ្ងៃសុក្រ ទី១ ខែសីហា។
ការប្រមូលផ្ដុំគ្នា ដោយយកកំណាត់លូចំនួន ៣កង់ ទៅដាក់បញ្ឈរកាត់ទ្រូងផ្លូវនោះ បំណងរារាំងរថយន្តដឹកក្រួសក្រហម និងដឹកខ្សាច់របស់ក្រុមហ៊ុនជាច្រើន មិនឱ្យឆ្លងកាត់តំបន់ពួកគេរស់នៅទៀតទេ ដោយសារតែរថយន្តទាំងនោះដឹកធ្ងន់ ហើយបំផ្លាញផ្លូវក្រួសក្រហមឱ្យខូចខាត ក៏ប៉ុន្តែគ្មានអ្នកណាម្នាក់ទទួលខុសត្រូវលើការខូចខាតទេ។
តំណាងអ្នកភូមិតានី គឺលោក ព្រំ ដាម៉ូ។ លោកមានប្រសាសន៍ថា លោក និងអ្នកភូមិជាច្រើនទៀត បានស្រុះស្រួលគ្នាតវ៉ាប្រឆាំងនឹងរថយន្តជាច្រើនគ្រឿងរបស់ក្រុមហ៊ុន លី អ៊ុំ អេង និងក្រុមហ៊ុន ២ទៀត ដែលតែងចេញចូលដឹកដីក្រហម និងខ្សាច់ជារៀងរាល់ថ្ងៃ បណ្ដាលឱ្យខូចខាតផ្លូវលំ១ខ្សែយ៉ាងធ្ងន់ធ្ងរ។ បុរសដដែលអះអាងថា បច្ចុប្បន្ន ផ្លូវលំក្រាលក្រួសក្រហមប្រវែង ៣គីឡូម៉ែត្រ កំពុងខូចខាតមានគ្រលុកជ្រៅៗពិបាកធ្វើដំណើរ។
លោក ព្រំ ដាម៉ូ៖ «ផ្លូវវេទនាណាស់! ជួនកាល កូនសិស្សគ្នារៀនអ៊ីចឹងទៅ មិនទាន់ដល់សាលាផង ឡានដឹកខ្សាច់ជាន់សាចប្រឡាក់ខោអាវគ្នាពេញ គ្រលុកសឹងតែទាំងអស់ បើកកាត់មិនបាន។ ជ្រៅណាស់ការធ្វើដំណើរ គឺអត់កើតតែម្ដង ជួនកាលគ្នាពោះធំ ឆ្លងទន្លេឆ្លងអីអ៊ីចឹង ទម្រាំដឹកដល់ពេទ្យ កើតតាមផ្លូវបាត់ ជាពិសេសក្មួយខ្ញុំហ្នឹងបណ្ដោយ»។
ប្រធានគណៈកម្មការទ្រទ្រង់សាលាបឋមសិក្សាតានី និងជាអ្នកជំនាញផ្សព្វផ្សាយសហគមន៍ អ្នកស្រី យី ស៊ឹង មានប្រសាសន៍ប្រហាក់ប្រហែលគ្នាថា ឡានដឹកដី និងខ្សាច់ធំៗរបស់ក្រុមហ៊ុនជាច្រើន តែងឆ្លងកាត់ភូមិរបស់គាត់រៀងរាល់ថ្ងៃ។ ឡានទាំងនោះ បានធ្វើឱ្យដីហ៊ុយខ្លាំងនៅរដូវប្រាំង និងរដូវវស្សា ធ្វើឱ្យផ្លូវក្រាលក្រួសក្រហមក្នុងភូមិ១ខ្សែ បាក់ស្រុតគ្រប់កន្លែង។ អ្នកស្រី យី ស៊ឹង បញ្ជាក់ថា បច្ចុប្បន្ន ឡានដឹកដី និងខ្សាច់របស់ក្រុមហ៊ុន កំពុងធ្វើឱ្យប៉ះពាល់ដល់ការរស់នៅរបស់ប្រជាពលរដ្ឋ សិស្សសាលា និងព្រះសង្ឃ។
អ្នកស្រី យី ស៊ឹង៖ «សម័យនេះទៅហើយ ដើរចុះភក់ដូចក្របី! ព្រះសង្ឃ ក៏អត់មានមកបិណ្ឌបាត សូម្បីតែថ្ងៃសីលថ្ងៃអី ចាស់ៗភូមិនេះគាត់អត់ទៅវត្តទេ ជិះម៉ូតូគាត់ខ្លាចដួល ផ្លូវអាក្រក់ម្ល៉េះ ដើរទៅក៏រអិលដួល ដោះទ្រនាប់ជើង។ សាលាអត់មានសិស្សបង្រៀន ខ្ញុំសួរម៉ែៗហើយថា កូនអត់មករៀនទេ ដោយសារប្រឡាក់ដី ប្រឡាក់ខោអាវ។ ថ្នាក់មត្តេយ្យនោះបាត់អស់រលីងតាំងពីចុងខែមិថុនា ថ្នាក់ទី១ ក៏បាត់អស់ ថ្នាក់ទី២ ក៏បាត់អស់។ ផ្លូវប្រជាពលរដ្ឋ គឺប្រជាពលរដ្ឋបិទ សូម្បីតែក្រុមហ៊ុន លី ហាំង សេង និង លី អ៊ុំ អេង នេះ មិនជួសជុល ភូមិខ្ញុំក៏មិនភ័យដែរ សុខចិត្តរៃលុយគ្នាធ្វើសាថ្មីទៀត ព្រោះផ្លូវនេះអត់មានក្រុមហ៊ុនណាមកធ្វើឱ្យ ឬក៏ឃុំណាមកធ្វើឱ្យទេ គឺអង្គការ ខុនសឺន (CONCERN) ទេ»។
ក្រុមអ្នកភូមិ បានចោទប្រកាន់ថា អាជ្ញាធរភូមិតានី និងឃុំរុនតាឯក ថាមិនដែលយកចិត្តទុកដាក់ជួយដោះស្រាយបញ្ហាដែលក្រុមហ៊ុនដឹកដី និងខ្សាច់ បំផ្លាញផ្លូវលំមួយខ្សែនោះទេ មានតែហាមឃាត់ប្រជាពលរដ្ឋ កុំឱ្យតវ៉ាបិទផ្លូវ។
កាលពីព្រឹកថ្ងៃសុក្រ ទី១ ខែសីហា បន្ទាប់ពីអ្នកភូមិលើកគ្នាបិទផ្លូវបានបន្តិច មានតំណាងក្រុមហ៊ុនមួយបានបើកឡានទៅពិនិត្យមើលស្ថានភាពនោះ។
តំណាងក្រុមហ៊ុនដែលមិនព្រមចុះពីលើរថយន្ត ហើយថែមទាំងបដិសេធការធ្វើអធិប្បាយផងនោះ ឱ្យដឹងថា បច្ចុប្បន្ន មានក្រុមហ៊ុនអាជីវកម្មដឹកដី និងបូមខ្សាច់ចំនួន៣ កំពុងប្រើប្រាស់ផ្លូវលំក្រួសក្រហម ដែលឆ្លងកាត់ភូមិតានី ដូចជាក្រុមហ៊ុនបូមខ្សាច់ លី អ៊ុំ អេង ក្រុមហ៊ុនដែលមានម្ចាស់ឈ្មោះ ណេង និងក្រុមហ៊ុនមួយផ្សេងទៀត ដែលគេមិនស្គាល់ឈ្មោះច្បាស់។ បុរសដដែលបញ្ជាក់ថា ក្រុមហ៊ុនទាំងបីដែលមានឡានធំបើកលើផ្លូវលំនោះ តែងតែមានបំណងចង់ជួយជួសជុលផ្លូវខូចខាតឡើងវិញ ក៏ប៉ុន្តែការមិនអាចជួសជុលបានមួយរយៈមកនេះ ដោយសារតែគេដឹងថា អាជ្ញាធរឃុំរុនតាឯក មិនឱ្យពួកគេធ្វើ៖ «ផ្លូវនេះឆ្នាំមុនៗ គេចាក់ដីទេតើ គេមានឱ្យខូចឯណា? និយាយរួមទៅ គេធ្វើឡើងប៉ុន្មានឆ្នាំហើយនោះ យើងមានឡាន យាយ ហ្កេច មានលីវ៉ាល័រ។ យាយ ហ្កេច មានដីក្រហម ឡានយើងចាំតែដឹកធ្វើទេ។ សព្វដងគេជួសជុលណា តែគេអត់ឱ្យយើងធ្វើ គេទុកធ្វើផ្លូវនេះ ហើយបិទមិនឱ្យឡានរត់បណ្ដោយ តែក្រុមហ៊ុនគេថា បើបិទផ្លូវហ្នឹង អត់ឱ្យគេធ្វើ គេនឹងទិញដីមួយកន្លែងសម្រាប់ធ្វើមកស្ពានមួយទៀត»។
ទោះយ៉ាងណា មេឃុំរុនតាឯក លោក គុយ វៃ បានបដិសេធថា លោកមិនធ្លាប់រារាំងក្រុមហ៊ុនណាមួយ ថាមិនឱ្យធ្វើផ្លូវដែលកំពុងខូចខាតនោះទេ។ លោក គុយ វៃ ប្រតិកម្មថា ក្រុមហ៊ុនដែលនិយាយថា លោកជាអ្នកហាមឃាត់មិនឱ្យជួសជុលផ្លូវនោះ គឺជារឿងមួលបង្កាច់ទាំងស្រុង។ លោកមេឃុំរុនតាឯក បញ្ជាក់ថា ពេញ១ព្រឹកថ្ងៃទី១ ខែសីហា លោកព្យាយាមសម្របស្រួលជាមួយប្រជាពលរដ្ឋឱ្យបើកផ្លូវធម្មតាឡើងវិញ ដោយលោកនឹងកោះហៅក្រុមហ៊ុនឡានដឹកដី និងខ្សាច់ទាំងអស់ មកធ្វើកិច្ចសន្យាម្ដងទៀត ឱ្យធានាជួសជុលផ្លូវខូចខាតនេះ។
ចំណែកអភិបាលស្រុកបន្ទាយស្រី លោក សូរ សុន មានប្រសាសន៍ថា អាជ្ញាធរស្រុកក៏កំពុងប្រឹងប្រែងសម្របសម្រួលបញ្ហានេះដែរ។ អភិបាលស្រុកដដែលបញ្ជាក់ថា លោកបានប្រាប់ទៅអាជ្ញាធរឃុំរុនតាឯក ឱ្យសម្របសម្រួលប្រជាពលរដ្ឋ បានបើកផ្លូវជាធម្មតាឡើងវិញនេះម្យ៉ាង ឯរឿងម្យ៉ាងទៀត ផ្លូវលំភូមិតានី នោះ គឺលោកកំពុងទាក់ទងសុំក្រុមវិស្វកម្មរបស់រដ្ឋាភិបាល ឱ្យជួយធ្វើ និងចាក់កៅស៊ូតែម្ដង៖ «ខ្ញុំតែងតែបានជម្រាបជូនឱ្យធ្វើផ្លូវជូនប្រជាពលរដ្ឋវិញ ព្រោះផ្លូវនោះ វាភូមិធម្មជាតិ ផង ភូមិស្នាសង្គ្រាម ផង និងភូមិតានី ផង។ ខ្ញុំកំពុងតែសម្រួលសម្បើមហើយនេះ ហើយមួយទៀត ខ្ញុំបានដាក់សំណើសុំទៅខាងកងវិស្វកម្មរបស់រដ្ឋាភិបាលខាង៣១៧ សំណើសុំចាក់កៅស៊ូហើយ។ ប៉ុន្តែដល់ពេលរាំងបន្តិច គេចាក់កៅស៊ូឱ្យ»។
ទោះយ៉ាងណា ក្រុមប្រជាពលរដ្ឋនៅមិនទាន់ជឿជាក់ទៅលើការសម្របសម្រួលរបស់អាជ្ញាធរឃុំរុនតាឯក និងស្រុកបន្ទាយស្រី នោះទេ ពីព្រោះថា ចាប់តាំងពីមានឡានដឹកដី និងខ្សាច់ឆ្លងកាត់ បណ្ដាលឱ្យផ្លូវខូចរយៈពេល ៣ឆ្នាំមកហើយ គឺអាជ្ញាធរ និងក្រុមហ៊ុនធ្លាប់ធ្វើកិច្ចសន្យា ថានឹងជួយជួសជុលចំនួន ៣លើកមកហើយដែរ ក៏ប៉ុន្តែរហូតមកដល់ពេលនេះ គេមិនទាន់ឃើញក្រុមហ៊ុនណាមួយ មកជួសជុលផ្លូវតាមការសន្យាឡើយ។
ក្រុមប្រជាពលរដ្ឋភូមិតានី នៅតែបន្តបិទកំណាត់ផ្លូវលំក្រាលក្រួសក្រហមនោះតទៅទៀត កាលពីម៉ោង ៥ល្ងាច ថ្ងៃទី១ ខែសីហា ហើយពួកគេអំពាវនាវឱ្យរដ្ឋាភិបាល ជួយធ្វើផ្លូវថ្នល់ឱ្យបានស្អាត ពីព្រោះគេយល់ថា ផ្លូវថ្នល់ជាសរសៃឈាមសេដ្ឋកិច្ច ដែលចេញពីសហគមន៍ជនបទទៅកាន់ទីក្រុង ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។