ការលុបបំបាត់ល្បែងស៊ីសង គឺជាចំណុចមួយក្នុងចំណោមចំណុចជាង ១០ ផ្សេងទៀត ដែលក្រសួងមហាផ្ទៃ បានដាក់ចេញឲ្យអនុវត្តជាច្រើនឆ្នាំមកហើយ ដើម្បីធានាបាននូវភូមិឃុំមានសុវត្ថិភាព។ ក៏ប៉ុន្តែ បើទោះបីជាក្រសួងមហាផ្ទៃ ដាក់ចេញនូវវិធានការលុបបំបាត់ករណីនេះយ៉ាងណាក្តី ក៏បច្ចុប្បន្ន ស្ទើរតែគ្រប់ខេត្តក្រុងនៃប្រទេសកម្ពុជា នៅតែមានប្រជាពលរដ្ឋខ្លះនាំគ្នាលេងល្បែងស៊ីសងដដែល។ ជាក់ស្តែង បញ្ហានេះកំពុងកើតមាននៅស្រុកស្រីស្នំ ខេត្តសៀមរាប ដែលជាប់ព្រំប្រទល់គ្នានឹងខេត្តឧត្តរមានជ័យ គឺប្រជាពលរដ្ឋខ្លះកំពុងនាំគ្នាលេងបៀ និងចាក់កន្ទុយលេខ ជាដើម។
ប្រជាពលរដ្ឋមួយចំនួននៅស្រុកស្រីស្នំ ចម្ងាយជាង ១០០គីឡូម៉ែត្រភាគខាងត្បូងឆៀងខាងលិចពីទីរួមខេត្តសៀមរាប បានសម្ដែងការព្រួយបារម្ភអំពីបញ្ហាសន្តិសុខនៅក្នុងសហគមន៍ ដែលពួកគេរស់នៅ ព្រមទាំងគ្រួសារក្រីក្រខ្លះអាចក្លាយទៅជាអ្នកវ័ណ្ឌកដោយសារតែជំពាក់បំណុល។
ក្តីព្រួយបារម្ភនេះ បានកើតឡើងបន្ទាប់ពីគេមើលឃើញថា ពេលបច្ចុប្បន្ននៅជុំវិញកន្លែងរស់នៅ គឺមានកើតល្បែងស៊ីសងខ្លះ ដូចជាលេងបៀ និងល្បែងចាក់កន្ទុយលេខជាដើម ហើយសមត្ថកិច្ចមូលដ្ឋានមានការបង្ក្រាបតិចតួច។
បុរសម្នាក់រស់នៅក្នុងទីរួមស្រុកស្រីស្នំ ដែលសុំមិនបញ្ចេញឈ្មោះ អះអាងកាលពីរសៀលថ្ងៃពុធ ទី១៥ ខែកក្កដា ថា ជារៀងរាល់ថ្ងៃ ល្បែងចាក់កន្ទុយលេខ គឺកំពុងកើតមានជាច្រើនកន្លែង។ ការកើនឡើងនៃល្បែងនេះ បានធ្វើឲ្យគ្រួសារក្រីក្រខ្លះដែលខ្ចីបុលប្រាក់គេ ហើយងប់ងុលនឹងល្បែងផង បានរត់ចោលផ្ទះសម្បែងក៏មាន។ បុរសដដែលបញ្ជាក់ថា បច្ចុប្បន្នមានមេលក់កន្ទុយលេខជាច្រើននៅស្រុកស្រីស្នំ ប៉ុន្តែលោកមិនដឹងថា អាជ្ញាធរ និងសមត្ថកិច្ច ដឹងរឿងនេះដែរឬក៏អត់?៖ «ឆ្នោតគេលេងរាល់ថ្ងៃហ្នឹង ១ថ្ងៃបីពេល ឆ្នោតយួន។ អ្នកលក់មានច្រើនកន្លែង ប៉ុន្តែដោយសារសមត្ថកិច្ចពង្រឹងទៅ គឺមានអ្នកលួចលក់តាមទូរស័ព្ទក៏មាន»។
ចំណែកប្រជាពលរដ្ឋម្នាក់ទៀតបានអះអាងថា នៅក្នុងទីរួមស្រុកស្រីស្នំ បច្ចុប្បន្ន គឺពិតជាមានអ្នកចាក់កន្ទុយលេខជាច្រើន ហើយលោកព្រួយបារម្ភអំពីរឿងអសន្តិសុខ ព្រមទាំងអាណិតគ្រួសារក្រីក្រខ្លះ ដែលងប់នឹងល្បែង ហើយក្លាយទៅជាអ្នកជំពាក់បំណុល។
កាលពី ៣-៤ថ្ងៃមុន ប្រជាពលរដ្ឋម្នាក់នៅស្រុកស្រីស្នំ បានផ្ញើសារអេឡិចត្រូនិកចូលមកវិទ្យុអាស៊ីសេរី ដោយប្រាប់ថា នៅក្នុងភូមិគោកថ្កូវ ឃុំក្លាំងហាយ គឺមានផ្ទះមួយកន្លែងបានបើកល្បែងចាក់កន្ទុយលេខជាយូរមកហើយ ក៏ប៉ុន្តែគេមិនដែលឃើញអាជ្ញាធរ និងសមត្ថកិច្ចមូលដ្ឋានណាអើពើ និងទៅបង្ក្រាបនៅឡើយ។
អាជ្ញាធរបានបដិសេធថា នៅក្នុងមូលដ្ឋានរបស់គេបច្ចុប្បន្ន មិនមានការបើកលេងបៀទេ ក៏ប៉ុន្តែរឿងល្បែងចាក់កន្ទុយលេខ គឺវាអាចមានខ្លះមែន។
ជំទប់ទី១ ឃុំក្លាំងហាយ លោក ស្មុគ្រ ម៉ាច មានប្រសាសន៍ថា ការលេងល្បែងស៊ីសងនៅតាមភូមិនៃឃុំរបស់លោក ដូចជាបៀជាដើម គឺមិនមានទេ។ ទោះយ៉ាងណា លោកជំទប់ទី១ ទទួលស្គាល់ថា ល្បែងចាក់កន្ទុយលេខ គឺអាចមាន ក៏ប៉ុន្តែមិនមានរូបភាពធំដុំឡើយ៖ «ឆ្នោតអាចឃើញមានលេង ប៉ុន្តែមិនដែលលេងដល់អស់ទ្រព្យសម្បត្តិរហូតដល់ប្ដឹងផ្ដល់គ្នានៅសាលាឃុំ គឺមិនដែលមានទេ»។
សមាជិកក្រុមប្រឹក្សាស្រុកស្រីស្នំ លោក ហូរ ឈិន មានប្រសាសន៍ថា នៅតាមភូមិខ្លះ គឺពិតជាមានការលេងបៀ និងល្បែងចាក់កន្ទុយលេខមែន ប៉ុន្តែមិនញឹកញាប់ទេ។ លោកបញ្ជាក់ថា ក្រុមអ្នកលេងល្បែងស៊ីសងទាំងនោះ មិនមែននៅមួយកន្លែងទេ គឺតែងចល័ត ម្ដងលេងនៅក្នុងស្រុកស្រីស្នំ និងម្ដងឆ្លងទៅលេងនៅស្រុកចុងកាល់ ខេត្តឧត្តរមានជ័យ ហើយពេលខ្លះ គេទៅលេងនៅស្រុកផ្សេងទៀតដែលជាហេតុធ្វើឲ្យសមត្ថកិច្ចមិនអាចតាមបង្ក្រាបបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។