ពលរដ្ឋនៅស្រុកមេមត់ ខេត្តត្បូងឃ្មុំ ខកចិត្តនៅពេលអាជ្ញាធរស្រុកបដិសេធជាលើកទី២ ចំពោះសំណើសុំចូលរួមពិភាក្សាក្នុងកិច្ចប្រជុំក្រុមប្រឹក្សាស្រុក ដើម្បីដោះស្រាយបញ្ហាដែលពួកគាត់ជួបប្រទះក្នុងជីវភាពប្រចាំថ្ងៃ។
អាជ្ញាធរស្រុកសំអាងហេតុផលថា មិនទាន់បានសិក្សាលើបញ្ហារបស់ពលរដ្ឋឲ្យបានស៊ីជម្រៅ។ យ៉ាងណា ហេតុផលនេះ ពលរដ្ឋចាត់ទុកថាគ្រាន់តែលេសមិនចង់ឲ្យពួកគាត់ចូលរួមតែប៉ុណ្ណោះ។
ពលរដ្ឋដែលមានបញ្ហាផ្សេងៗនៅស្រុកមេមត់ រួមមានបញ្ហាដីធ្លី បញ្ហាតម្លៃភ្លើងអគ្គិសនី បានខកខានម្តងជាពីរដង មិនអាចចូលរួមប្រជុំជាមួយក្រុមប្រឹក្សាស្រុកមេមត់ បើទោះបីជាពួកគាត់បានសរសេរសំណើសុំចូលរួមជាផ្លូវការយ៉ាងណាក៏ដោយ។
ពលរដ្ឋម្នាក់នៅឃុំទន្លូង លោក ឈុន វុត្ថា ឲ្យដឹងថា លោក និងពលរដ្ឋដែលមានបញ្ហាផ្សេងទៀត នាំគ្នាទៅរង់ចាំចូលរួមប្រជុំនៅសាលាស្រុកមេមត់ តាំងពីព្រឹករហូតដល់ថ្ងៃត្រង់ កាលពីថ្ងៃទី២៨ វិច្ឆិកា ក៏ប៉ុន្តែប្រធានក្រុមប្រឹក្សាមិនអនុញ្ញាតឲ្យពួកលោកចូលឡើយ។ លោកបន្តថា មូលហេតុមិនឲ្យចូល ដោយសារតែខាងនាយករដ្ឋបាលសាលាស្រុក មិនបានបញ្ជូនសំណើលោកទៅប្រធានក្រុមប្រឹក្សា និងមិនបានដាក់បញ្ចូលពីបញ្ហារបស់ពួកគាត់ទៅក្នុងរបៀបវារៈ។ ប៉ុន្តែ លោកយល់ថា នេះគ្រាន់តែជាហេតុផលមួយមិនចង់ឲ្យពលរដ្ឋអាចមានឱកាសលើកឡើងពីបញ្ហារបស់ខ្លួនតែម្តង៖ «បាទ! ខ្ញុំគិតថា ប្រាកដជាចេតនាហើយ មិនមែនអចេតនាទេ ព្រោះក្រដាសស្នាមនេះគេបានសួរលម្អិតបញ្ជាក់ណាស់។ រួចខាងនាយករដ្ឋបាលហ្នឹង កាលពីដាក់ទៅដំបូងដូចជាដីសាលារៀន គេសួរច្បាស់លាស់ណាស់ ដើម្បីដាក់ជារបៀបវារៈ»។
លោកស្នើឲ្យអាជ្ញាធរស្រុក បើកទូលាយក្នុងការងារនេះ ដើម្បីអាចឲ្យប្រជាពលរដ្ឋមានឱកាសចូលរួមស្តាប់ ចូលរួមផ្តល់យោបល់ទៅដល់អាជ្ញាធរតាមមូលដ្ឋានទាំងនោះ អំពីទុក្ខលំបាករបស់ពួកគាត់។
ទាក់ទងបញ្ហានេះ នាយករដ្ឋបាលសាលាស្រុកមេមត់ លោក ប៉ោ អៀត មានប្រសាសន៍នៅថ្ងៃទី២៩ វិច្ឆិកា ថា មិនមែនខាងរដ្ឋបាលមិនចង់បញ្ចូលរបៀបវារៈ ឬមានចេតនាគេចវេសមិនចង់ឲ្យពលរដ្ឋចូលរួមក្នុងអង្គប្រជុំក្រុមប្រឹក្សាស្រុកនោះទេ។ លោកបន្តថា លោកបានបញ្ជូនសំណើនោះទៅប្រធានក្រុមប្រឹក្សា និងគណៈអភិបាលស្រុករួចហើយ ក៏ប៉ុន្តែសំណើរបស់ពលរដ្ឋស្ដីពីបញ្ហាមួយចំនួននោះ ខាងប្រធានក្រុមប្រឹក្សា និងគណៈអភិបាលស្រុក មិនទាន់បានចុះសិក្សាលម្អិតទេ។ ដូចនេះ ខាងអាជ្ញាធរត្រូវការពេលវេលាប្រមូលព័ត៌មានឲ្យបានគ្រប់គ្រាន់ ដើម្បីឆ្លើយតបទៅនឹងសំណូមពរប្រជាពលរដ្ឋវិញ៖ «មិនមែនទេ យើងចង់បានណាស់ចង់បានប្រជាពលរដ្ឋគាត់ចូលរួមបំពេញនូវកង្វះខាតដែលគណៈអភិបាលពិនិត្យមិនបានដិតដល់ ឲ្យគាត់ជួយ។ ប៉ុន្តែកន្លងមក យើងវារវល់ដូចខ្ញុំជម្រាបពីដើមអ៊ីចឹង។ ឥឡូវហ្នឹងសៅរ៍អាទិត្យអត់បានសម្រាកផង មិនមែនយើងមានចេតនាទុករបៀបវារៈអត់បញ្ចូលទេ»។
លោកបន្ថែមថា យ៉ាងណា ប្រជាពលរដ្ឋដែលមានបញ្ហា នឹងត្រូវអញ្ជើញឲ្យចូលរួមប្រជុំជាមួយក្រុមប្រឹក្សាស្រុកនៅក្នុងកិច្ចប្រជុំលើកទី៧ នៅខែធ្នូ ខាងមុខទៀត។ លោកថា អាជ្ញាធររីករាយនឹងដោះស្រាយនូវអ្វីដែលជាផលប្រយោជន៍របស់ប្រជាពលរដ្ឋ។
យ៉ាងណាក៏ដោយ សមាជិកក្រុមប្រឹក្សាស្រុកមេមត់ គណបក្សសង្គ្រោះជាតិ លោក គង់ សំអាន យល់ថា ហេតុផលនេះពិបាកទទួលយកណាស់ ពីព្រោះលោកបានបញ្ជូនសំណើពលរដ្ឋចូលទៅនាយករដ្ឋបាលសាលាស្រុករហូតដល់ ១០ថ្ងៃទៅហើយ គឺតាំងពីថ្ងៃទី១៧ វិច្ឆិកា ហេតុអ្វីបានជាមិនមានការសិក្សាលើសំណើមួយនេះ?៖ «បញ្ហាមួយដែលដាក់ចូលទៅ យើងត្រូវតែនិយាយគ្នានៅក្នុងក្រុមប្រឹក្សាទៅ។ គាត់ចង់សុំលើកពេលថាសុំការសិក្សាស្រាវជ្រាវអី ក៏គួរគាត់សម្រេចក្នុងក្រុមប្រឹក្សាហ្នឹង ឬក៏ឲ្យខាងគណៈអភិបាល ឬប្រតិបត្តិធ្វើទៅ យើងកុំទាន់អាលសម្រេច។ គាត់គួរប្រាប់ គាត់មិនគួរបិទរឿងហ្នឹងចោលទេ»។
ច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ កាលពីឆ្នាំ២០០៨ ផ្នែកទី៤ ស្ដីពីអង្គប្រជុំ និងបទបញ្ជាផ្ទៃក្នុងរបស់ក្រុមប្រឹក្សាមាត្រា៦៨ ចែងថា អង្គប្រជុំរបស់ក្រុមប្រឹក្សា ត្រូវធ្វើឡើងជាសាធារណៈ។ ក្រុមប្រឹក្សាអាចប្រជុំជាសម្ងាត់បាន ក៏ប៉ុន្តែដំណើរការនៃកិច្ចប្រជុំនោះ ត្រូវកំណត់ឡើងដោយសេចក្តីណែនាំរបស់រដ្ឋមន្ត្រីក្រសួងមហាផ្ទៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។