ពលរដ្ឋនៅឃុំទន្លូង ស្រុកមេមត់ ខេត្តត្បូងឃ្មុំ ថានឹងដាក់ពាក្យប្ដឹងមេប៉ុស្តិ៍ឃុំទន្លូង ទៅស្ថាប័នពាក់ព័ន្ធ ករណីមេប៉ុស្តិ៍រូបនេះគំរាមកំហែង និងប្រើសម្ដីមិនសមរម្យមកកាន់ពួកគាត់។
ចំណែកមេប៉ុស្តិ៍ឃុំទន្លូង ថាមិនបានគំរាមកំហែងនោះទេ។ លោកគ្រាន់ហៅគាត់មកបកស្រាយនៅប៉ុស្តិ៍នគរបាល ជុំវិញរឿងដើរប្រមូលស្នាមមេដៃពីពលរដ្ឋប៉ុណ្ណោះ។
ប្រជាពលរដ្ឋម្នាក់នៅឃុំទន្លូង លោក ឈុន វុត្ថា ចោទមេប៉ុស្តិ៍ថាបានប្រើទង្វើគំរាមកំហែង និងប្រើពាក្យសម្ដីមិនសមរម្យមកលើខ្លួន នៅថ្ងៃទី១៦ តុលា នៅពេលលោកបានដើរប្រមូលស្នាមមេដៃប្រជាពលរដ្ឋមួយចំនួន ដែលបង្ហាញពីការមិនពេញចិត្តនឹងសេចក្តីសម្រេចរបស់អាជ្ញាធរស្រុក និងខាងអគ្គិសនីឯកជនមួយចំពោះតម្លៃអគ្គិសនីកាលពីពេលកន្លងទៅ។
លោកបន្តថា នៅពេលលោកដើរប្រមូលស្នាមមេដៃពីពលរដ្ឋ មានមនុស្សហៅទូរស័ព្ទមកកាន់លោក ដោយប្រាប់ថា មេប៉ុស្តិ៍ឃុំទន្លូង ប្រាប់ឱ្យលោកបញ្ឈប់សកម្មភាពនោះជាបន្ទាន់។ ប្រភពដដែលបន្ថែមថា ឮដូចនេះ លោកក៏ចូលទៅសាកសួររឿងនេះពីនាយប៉ុស្តិ៍ គឺលោក ទា ពៅ ប៉ុន្តែបែរជាត្រូវមេប៉ុស្តិ៍នោះក្របួចកអាវបញ្ចូលដាក់ក្នុងរថយន្ត ប៉ុន្តែលោកមិនព្រមចូល និងមិនឱ្យលោកហៅទូរស័ព្ទទៅនរណាឡើយ។
លោក ឈុន វុត្ថា៖ «ខ្ញុំគិតថា គាត់ធ្វើហ្នឹងធ្វើរំលោភបំពានលើប្រជាពលរដ្ឋហើយ។ ធ្វើនេះដូចជាគំរាមប្រជាពលរដ្ឋហ៊ានធ្វើអីដោយសារខ្លាចអំណាចខ្លួនជាមេប៉ុស្តិ៍។ ក៏ប៉ុន្តែ ខ្ញុំអត់មានខ្លាចទេអំណាចជាមេប៉ុស្តិ៍ ព្រោះខ្ញុំដឹងអំពីច្បាប់ មេប៉ុស្តិ៍ហ្នឹងរបៀបម៉េចដែរ។ គាត់ត្រូវតែមានកាតព្វកិច្ចបម្រើប្រជាពលរដ្ឋ ហើយនិងមានភាពខន្តីចំពោះប្រជាពលរដ្ឋ មិនមែនគាត់មកដល់ គាត់អត់មានខន្តី គាត់ក្របួចក អាចប្រជាពលរដ្ឋទៅសួរនាំ។ សីលធម៌គេមិនដែលធ្វើដូចមេប៉ុស្តិ៍ហ្នឹងទេ»។
លោកបន្ថែមទៀតថា ទង្វើនេះ គឺជារឿងមិនសមរម្យ និងជាការគំរាមកំហែងពីសំណាក់មន្ត្រីនគរបាលយុត្តិធម៌ទៅកាន់ប្រជាពលរដ្ឋ។ លោកបញ្ជាក់ថា នឹងប្ដឹងមេប៉ុស្តិ៍នោះទៅស្ថាប័នពាក់ព័ន្ធ ដើម្បីឱ្យមន្ត្រីនគរបាលទាំងអស់ប្រកាន់ក្រមសីលធម៌ឱ្យបានត្រឹមត្រូវចំពោះប្រជាពលរដ្ឋ។
ឆ្លើយតបនឹងបញ្ហានេះ នាយប៉ុស្តិ៍ឃុំទន្លូង លោក ទា ពៅ មានប្រសាសន៍ថា លោកមិនបានគំរាមកំហែងនោះទេ ប៉ុន្តែនៅពេល លោក ឈុន វុត្ថា ទៅសួរនាំលោករឿងថាលោកឱ្យបញ្ឈប់សកម្មភាពដើរផ្ដិតស្នាមេដៃនៅហាងកាហ្វេនោះ លោកគ្រាន់តែអូសគាត់ចេញ ដើម្បីទៅសួរនាំនៅនគរបាលប៉ុស្តិ៍តែប៉ុណ្ណោះ ពីព្រោះលោកមិនអាចឆ្លើយ ឬសួរនៅហាងកាហ្វេបានឡើយ៖ «អត់មានក្របួចអីទេ គ្រាន់តែអូសគាត់មក គាត់មិនមក ទៅសួរនាំទៅ។ មានរឿងអី? បានជាមកសួរខ្ញុំហ្នឹង ខ្ញុំមិនដឹងរឿងអីផង»។
លោកបន្ថែមចំពោះរឿងថា លោក ឈុន វុត្ថា គ្រោងនឹងប្ដឹងលោកជុំវិញបញ្ហានេះ លោកថាជាសិទ្ធិរបស់គេ។
ចំណែកមន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តកំពង់ចាម លោក នាង សុវ៉ាត មានប្រសាសន៍ថា ចំពោះការហៅពលរដ្ឋទៅឆ្លើយ ឬសាកសួរនៅប៉ុស្តិ៍នគរបាលនោះ វាជារឿងផ្លូវការ ប៉ុន្តែលោកថា ករណីក្របួចកអាវពលរដ្ឋនោះ គឺជារឿងមិនត្រឹមត្រូវ និងខុសពីវិន័យរបស់មន្ត្រីនគរបាល ដែលអាចប្រឈមនឹងការពិន័យរដ្ឋបាល ដូចជាការដកប្រាក់ខែ ឬបញ្ឈរជើង ឬដកតំណែងតែម្តង ប្រសិនបើធ្ងន់ធ្ងរ។
លោក នាង សុវ៉ាត៖ «ប៉ុន្តែអារឿងក្របួចកអាវនេះ គឺជារឿងព្រហ្មទណ្ឌ ដែលជារឿងប្រើហិង្សាទៅលើប្រជាពលរដ្ឋហើយ ហើយយើងសមត្ថកិច្ច តែយើងប្រើហិង្សាលើពលរដ្ឋវាជាប់ពីបទបង្ករបួសស្នាមដោយចេតនា ហើយដោយសមត្ថកិច្ចទៀត។ អាហ្នឹងបើនិយាយអំពីកំហុសវិញ គឺជាកំហុសធ្ងន់ធ្ងរ ពីព្រោះអីយើងជាអ្នកផ្តល់សន្តិសុខជូនប្រជាពលរដ្ឋ យើងធ្វើឱ្យប្រជាពលរដ្ឋភ័យវិញ ហើយយើងប្រើហិង្សាលើប្រជាពលរដ្ឋ។ អាហ្នឹងបើនិយាយពីកំហុសវាធ្ងន់ជាងប្រជាពលរដ្ឋ»។
លោកបន្ថែមថា កន្លងមកធ្លាប់មានមន្ត្រីប៉ូលិសមួយចំនួន តែងតែបញ្ចេញសកម្មភាពជាការគំរាមកំហែងខុសពីវិន័យរបស់ខ្លួន ហើយសកម្មភាពទាំងនោះ ធ្វើឱ្យបាត់បង់ទំនុកចិត្តពីពលរដ្ឋ និងធ្វើឱ្យពលរដ្ឋលែងសហការជាមួយតែម្តង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។