ប្រជាពលរដ្ឋមួយចំនួននៅខេត្តតាកែវ ថ្លែងនៅថ្ងៃទី៨ តុលា ថា ល្បែងស៊ីសងចាក់សត្វ ឬហៅថាយូគី ល្បែងភ្នាល់បាល់ ប្រដាល់ ល្បែងបៀជាដើម កំពុងតែលេងស៊ីសងនៅក្នុងឃុំអង្គរបុរី ស្រុកអង្គរបុរី។
ពលរដ្ឋសុំមិនបញ្ចេញឈ្មោះ ថ្លែងថា នៅរាល់ថ្ងៃសៅរ៍ និងអាទិត្យ មានរថយន្តទំនើបៗមកភ្នាល់ល្បែងនៅឃុំអង្គរបុរី នោះ។ គាត់សុំឲ្យសមត្ថកិច្ចចុះបង្ក្រាបល្បែងស៊ីសង និងល្បែងភ្នាល់នោះផង កុំឲ្យកើតអសន្តិសុខក្នុងមូលដ្ឋាន។ លោកថា ក្រុមគ្រួសារខ្លះមានកូនចៅលេងល្បែងចាញ់អស់ម៉ូតូ និងសម្ភារៈក្នុងផ្ទះ បង្កជម្លោះក្នុងក្រុមគ្រួសារ៖ «ឡានណែនៗចូលទៅលេង ដូចទីផ្សារសេរីអ៊ីចឹង ឡើងណែនតែម្តងដូចកាស៊ីណូមានច្បាប់អ៊ីចឹង»។
មេភូមិកំពង់ហ្លួង លោក កឹម តែម ថ្លែងថា ល្បែងមានលេងនៅក្នុងតំបន់នោះ ដូចជាកន្ទុយលេខ និងលេងបៀស៊ីសង១០០រៀល មិនមានការភ្នាល់ធំដុំនោះទេ។
មេឃុំអង្គរបុរី លោក ជូរ ផារិន ថ្លែងថា ល្បែងស៊ីសងពិតជាមាន ប៉ុន្តែមិនមែនទ្រង់ទ្រាយធំ ឬមានការស៊ីសងរហូតអស់ប្រាក់កាសអ្នកភូមិច្រើនទេ។ លោកថា ល្បែងទាំងនោះភាគច្រើនភ្នាល់ប្រដាល់ និងស្ត្រីៗលេងបៀតិចតួច៖ «មិនមែនយូគីទេ គេមានចាក់បាល់ មានអាពេលកីឡាម្តងម្កាល គេចាក់តាមទូរទស្សន៍ អេច្ឆ.ធី.វី (HTV) គេចាក់មើលកីឡាប្រដាល់ ហើយចាក់អីនាយអាយហ្នឹង។ ល្បែងភ្នាល់ទេ មិនមែនលេងយូគីទេ វាគ្រាន់តែថា ប្រដាល់វៃគ្នាថៃ-ខ្មែរអីហ្នឹង។ វាលេងមិនជាធំដុំអីទេ លេងតែថ្ងៃសៅរ៍ ថ្ងៃអាទិត្យអីហ្នឹងនាយអាយកំប៉ិកកំប៉ុកអី ស្រីៗនាយអាយ គាត់ចេះតែលេងទឹកក្រហម ទឹកអីហ្នឹង»។
ជំទប់ទី១ ឃុំអង្គរបុរី លោក ហួត ចាំ ឲ្យដឹងថា ល្បែងស៊ីសងនៅក្នុងឃុំនោះមានលេងក្បែរផ្លូវធ្វើដំណើរ និងលេងដោយចំហ។ លោកថា អាជ្ញាធរជាស៊ីវិលមិនអាចបង្ក្រាបល្បែងនោះបានទេ បើប៉ូលិសមិនអើពើចូលរួមបង្ក្រាប។ លោកបន្ថែមថា ល្បែងនោះទំនងជាមានអ្នកកាង ទើបអ្នកលេងល្បែងកើតមានរាល់ចុងសប្ដាហ៍ មិនខ្លាចញញើតបញ្ជានាយករដ្ឋមន្ត្រី៖ «ល្បែងស៊ីសង គេលេងគឺសុទ្ធតែមានខ្នងគេហើយ។ ឃើញតែថ្ងៃសៅរ៍ ថ្ងៃអាទិត្យ ឃើញច្រើនមែន ឃើញតាំងពីកីឡាភ្នាល់ប្រដាល់អីឡើងទៅ»។
ពាក់ព័ន្ធបញ្ហានោះ អនុប្រធានប៉ុស្តិ៍រដ្ឋបាលឃុំអង្គរបុរី លោក សៅ សឿន ថ្លែងថា មានអ្នកទាក់ទងលោកតាមទូរស័ព្ទ មកសុំបើកល្បែងស៊ីសងក្នុងឃុំនេះកន្លង ប៉ុន្តែមិនមានការអនុញ្ញាត អ្នកទាក់ទងបានផ្តាច់ទូរស័ព្ទ។ លោកថា ល្បែងតាមលោកដឹង ដូចជាមានចាក់សត្វ ភ្នាល់ប្រដាល់ ជាដើម។ លោកកំពុងឃ្លាំមើល ក្រែងល្បែងស៊ីសងវារីកធំនៅក្នុងឃុំ នាំឲ្យមានកង្វល់ពីរឿងអសន្តិសុខ៖ «ល្បែងយូគីហ្នឹង មិនមែនយូគី ទេ អាហ្នឹងគេហៅលេងចាក់សត្វ។ កាលមុនមានមែន គឺយូរហើយ តែឥឡូវនេះ គាត់មកសុំលេង តែខ្ញុំហ្នឹងថាឲ្យគាត់ទៅទាក់ទងលោកអធិការទៅ ព្រោះខ្ញុំពុំមានសិទ្ធិឲ្យលេងល្បែងទេ។ ខ្ញុំរាយការណ៍ទៅលោកស្តីទី ជុំ សុខន ហើយ ថាល្បែងស៊ីសងហ្នឹង គាត់មកសុំទាក់ទងខ្ញុំ គឺថាខ្ញុំអត់មានសិទ្ធិអនុញ្ញាតឲ្យគាត់សុំទៅលើទៀតទៅ ពីព្រោះថា ល្បែងស៊ីសងវាជាការប្រព្រឹត្តខុសច្បាប់»។
ក្រុមប្រឹក្សាស្រុកអង្គរបុរី លោក អ៊ុំ គាវ ថ្លែងថា បានទទួលបណ្ដឹងអំពីល្បែងស៊ីសងកើតឡើងនៅក្នុងស្រុកអង្គរបុរី ដែរ។ លោកនឹងលើកបញ្ហានោះដាក់ជូនអភិបាលស្រុក នៅពេលប្រជុំប្រចាំខែ ដើម្បីទប់ស្កាត់ បង្ក្រាប និងដើម្បីគោរពបទបញ្ជានាយករដ្ឋមន្ត្រី ហាមពលរដ្ឋលេងល្បែងស៊ីសង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។