ចំណែកគម្រោងពីរដ្ឋាភិបាលត្រូវដោះស្រាយជូនប្រជាជនរងផលប៉ះពាល់ដោយសារគម្រោងនោះ ក្នុងទឹកប្រាក់ជិត ៤២លានដុល្លារ។
អាជ្ញាធរឃុំស្រែគរ ស្រុកសេសាន ខេត្តស្ទឹងត្រែង ពាំនាំពាក្យស្នើសុំរបស់ជនជាតិដើមភាគតិចទំពួន ព្នង ចារាយ ឡាវ កួយ និងគ្រឹង ដែលទាមទារឲ្យអាជ្ញាធរ និងក្រុមហ៊ុនចិន ដែលវិនិយោគទំនប់វារីអគ្គិសនីសេសានក្រោម២ ព្រមសងនូវសំណងដើមឈើហូបផ្លែ ព្រៃតំណម ព្រៃកប់សពដូនតា ជាដើម ដែលមិនមានចែងនៅក្នុងសំណងរបស់រដ្ឋាភិបាល។
ការទាមទាររបស់ជនជាតិដើមភាគតិចនេះ បានធ្វើឡើងក្រោយពីរដ្ឋសភាបានអនុម័តសេចក្តីព្រាងច្បាប់ស្ដីពីការ អនុម័តយល់ព្រមលើការធានាទូទាត់របស់រាជរដ្ឋាភិបាលនៃ ព្រះរាជាណាចក្រកម្ពុជា កាលពីថ្ងៃទី១៥ ខែកុម្ភៈ បន្ទាប់ពីសង្គមស៊ីវិល និងជនជាតិដើមភាគតិចទាមទារកុំឲ្យរដ្ឋសភាអនុម័ត ខណៈការវាយតម្លៃសំណងមិនទាន់ឯកភាពពីសហគមន៍ជនជាតិដើមភាគតិច ច្រើនជនជាតិដែលរស់នៅតំបន់វិនិយោគទំនប់វារីអគ្គិសនីសេសានក្រោម២ ផ្ទាល់នោះ។
មេឃុំស្រែគរ លោក សៀក មេគង្គ ថ្លែងបន្ថែមថា ពលរដ្ឋមិនទាន់ដឹងច្បាស់នៅឡើយពីសំណងផ្សេងៗក្នុងវិនិយោគទំនប់ អគ្គិសនីសេសានក្រោម២ នោះ ទើបសុំឲ្យអាជ្ញាធរត្រូវទារពីរដ្ឋាភិបាល និងក្រុមហ៊ុនបន្ថែមឲ្យគាត់ទៀត៖ «សំណងដើមខ្នុរ ដើមស្វាយ អត់មានឮសោះ ដូច្នេះខ្ញុំសុំឲ្យក្រុមហ៊ុន ឬក៏រដ្ឋាភិបាល សូមពិចារណាឡើងវិញ»។
តំណាងសហគមន៍ជនជាតិដើមភាគតិចព្នង ភូមិក្បាលរមាស លោក កែវ មីប ថ្លែងថា រដ្ឋាភិបាល និងអភិបាលខេត្ត ប្រជុំប្រាប់ពីសំណង គឺតែលើការដូរទីតាំងថ្មី និងចែកដីកសិកម្មទេ ប៉ុន្តែមិនបានប្រាប់សំណងដើមឈើ ដែលគាត់បានដាំហូបផ្លែប្រចាំឆ្នាំនោះឡើយ៖ «ពេលដែលគេដកហូតទៅ យើងបានថ្លៃដំណាំខ្លះៗ»។
តំណាងសហគមន៍ជនជាតិឡាវ លោក ហ្វុត ខឿន ថ្លែងថា រដ្ឋាភិបាលមិនបានគិតពីសំណងផ្ទះក្នុងចម្ការដែលសង់ធំៗ ប្រហែលផ្ទះសង់ក្នុងភូមិនោះទេ។ ហេតុនេះ ពលរដ្ឋទាមទារឲ្យសងតម្លៃនោះដែរ។
តំណាងសហគមន៍ជនជាតិកួយ លោក ចាន់ ថុន ថ្លែងថា ព្រៃតំណម និងព្រៃកប់សពដូនតា ក្រុមហ៊ុន និងអាជ្ញាធរ មិនទាន់គិតចូលក្នុងសំណងដែរ។ ពួកគាត់ក៏សុំឲ្យរដ្ឋាភិបាល និងក្រុមហ៊ុនជួយចេញថ្លៃទិញគោ ក្របី ស្រា សម្រាប់សែនខ្មោចអារក្ស ទាំងកន្លែងត្រូវចេញ និងកន្លែងត្រូវចូលទៅរស់នៅ ដើម្បីបង្ការខ្មោចព្រាយ កុំឲ្យមកធ្វើបាបពួកគាត់ និងកូនចៅ៖ «តាមប្រពៃណី បើសិនជាយើងមិនកាប់ជ្រូក កាប់មាន់ មិនសែន ប៉ះគេមើលមិនជា មានតែងាប់ប៉ុណ្ណឹង»។
ជំទប់ទី២ ឃុំស្រែគរ លោក កា ធី ថ្លែងថា អភិបាលខេត្តស្ទឹងត្រែង ប្រជុំប្រាប់ថា ទីតាំងថ្មីដែលសហគមន៍ត្រូវទៅរស់នៅមានចម្ងាយ ១៥គីឡូម៉ែត្រ ពីទីតាំងចាស់ដែលស្ថិតនៅត្រើយម្ខាងទន្លេសេសាន។ ប៉ុន្តែអ្វីដែលពលរដ្ឋក្នុងសហគមន៍មិនទាន់ដឹងច្បាស់ពីសំណងនោះ គឺដើមឈើហូបផ្លែ និងផ្ទះក្នុងដីស្រែចម្ការ និងដីកប់សពដូនតា ព្រៃតំណម និងជួយចេញថ្លៃគោ ក្របី ស្រា ដែលសហគមន៍គេនឹងកាប់សែនព្រេន ជម្រាបលាខ្មោចអារក្ស សុំសុខសប្បាយ ដែលគេត្រូវរើលំនៅចេញ និងសែនព្រេនខ្មោចអារក្ស ពេលគេចូលទៅរស់នៅតំបន់ថ្មី។
មេឃុំស្រែគរ ឲ្យដឹងថា តាមការសិក្សាពីឆ្នាំ២០១១ រាជរដ្ឋាភិបាលស្រង់ចំនួនពលរដ្ឋដែលនឹងប្ដូរចេញក្នុងឃុំនោះមានតែ ៤៥០គ្រួសារទេ ប៉ុន្តែនៅដើមឆ្នាំ២០១៣ ពលរដ្ឋបែកពីឪពុកម្តាយ បានកើនចំនួនរហូតទៅដល់ ៤៧០គ្រួសារ ហើយកំពុងបែករៀបការបែកចេញច្រើនទៀត។ លោកថា កិច្ចសន្យាប្ដូរពលរដ្ឋរស់នៅក្នុងតំបន់ប៉ះពាល់ទំនប់វារីអគ្គិសនី សេសានក្រោម២ គឺតាមការប្រជុំប្រាប់ គឺប៉ះពាល់តែពលរដ្ឋ ៣ឃុំទេ មាន ៦ភូមិ និងមានចំនួនគ្រួសារតែជាង ៧០០គ្រួសារទេដែលត្រូវរើទៅរស់នៅចំណុចត្រពាំងជ្រៃ ចម្ងាយ ១៥គីឡូម៉ែត្រពីភូមិចាស់។ ក្នុង ១គ្រួសារ នឹងបានដីភូមិក្បាល ៥០ម៉ែត្រ គុណ ១០០ម៉ែត្រ។ ដីស្រែចម្ការ គឺក្នុង ១គ្រួសារទទួលបាន ៥ហិកតារ មិនតែប៉ុណ្ណោះ រដ្ឋាភិបាលនឹងជីកអណ្ដូងទឹកមួយសម្រាប់អ្នកប្រើប្រាស់ទឹកស្អាត ៥គ្រួសារ។
សេចក្តីថ្លែងហេតុរបស់រាជរដ្ឋាភិបាលកម្ពុជា លេខ០១ ស.ជ.ណ នបច ចំណុចទី៥ ដោះស្រាយផលប៉ះពាល់មានទឹកប្រាក់ជិត ៤២លានដុល្លារ ជូនប្រជាជនរងផលប៉ះពាល់ដោយសារគម្រោង ដែលក្នុងនោះរួមមាន ការដោះស្រាយប៉ះប៉ូវគោលនយោបាយ ការសង់លំនៅថ្មី ការសង់ហេដ្ឋារចនាសម្ព័ន្ធចាំបាច់នានា រួមមាន ផ្លូវថ្នល់ សាលារៀន វត្តអារាម មណ្ឌលសុខភាព ប្រព័ន្ធផ្គត់ផ្គង់ទឹកស្អាត សាលាឃុំ ប៉ុស្តិ៍នគរបាល ប្រព័ន្ធធារាសាស្ត្រជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។