ដីស្រែចម្ការចំនួនជាង ៣ពាន់ហិកតារ ដែលប្រជាពលរដ្ឋចំនួន ៧០គ្រួសារ ធ្លាប់បានកាន់កាប់បង្កបង្កើនផលជាច្រើនឆ្នាំមកនោះ ឥឡូវនេះត្រូវបានក្រុមហ៊ុនចិន សហការជាមួយអាជ្ញាធរមូលដ្ឋានស្រុករតនៈមណ្ឌល ចុះទៅវាស់វែងលើកធ្វើជាគម្រោងទំនប់រណបមួយផ្សេងទៀត ដើម្បីទប់ទឹកយកផ្គត់ផ្គង់ឲ្យប្រព័ន្ធប្រឡាយកង្ហត នៅស្រុកបាណន់ ខេត្តបាត់ដំបង។
គម្រោងនេះ បានធ្វើឲ្យអ្នកភូមិជាម្ចាស់ដី ប្រឆាំងជំទាស់ និងទាមទារឲ្យរដ្ឋាភិបាលផ្ដល់សំណងឲ្យបានសមរម្យជូនពួកគាត់។ អ្នកភូមិឈ្មោះ រឿន ឆុក តំណាងឲ្យប្រជាពលរដ្ឋជាច្រើនគ្រួសារ ថ្លែងនៅថ្ងៃទី១៦ ខែសីហា ថា ក្រុមហ៊ុនចិន សាងសង់ទំនប់កង្ហត និងមន្ត្រីជំនាញរបស់អាជ្ញាធរមូលដ្ឋាន ស្រុករតនៈមណ្ឌល បានចុះទៅវាស់វែងដីនោះ ធ្វើឲ្យពួកគាត់មិនអាចដាំដុះនៅលើដីនោះបានទៀតនោះឡើយ។
លោក រឿន ឆុក៖ «ពួកគាត់មកវាស់វែង គាត់អត់ឲ្យដាំ គាត់ខកខានមិនបានដាំដោយសារលោកអ្នកវាស់វែងនោះមិនឲ្យធ្វើ គាត់ថាបានធ្វើក៏រាជរដ្ឋាភិបាលក៏មិនសងដែរ ថ្លៃពូជថ្លៃអាត្រាក់។ ជារួមមក ប្រជាពលរដ្ឋចង់បានធ្វើនៅលើដីនោះ តែបើគាត់មិនឲ្យគាត់ធ្វើ អ៊ីចឹងគាត់ឲ្យមានសំណងជាមុន ទើបមានការឈូសឆាយជាក្រោយ»។
វិទ្យុអាស៊ីសេរី នៅពុំទាន់អាចទាក់ទងតំណាងក្រុមហ៊ុនចិន សាងសង់ទំនប់កង្ហត និងអាជ្ញាធរពាក់ព័ន្ធស្រុករតនៈមណ្ឌល ដើម្បីបញ្ជាក់ជុំវិញបញ្ហានេះបានទេ។
ដីស្រែចម្ការទំហំប្រហែល ៣ពាន់ហិកតារ របស់ប្រជាពលរដ្ឋ ៧០គ្រួសារនោះ ស្ថិតនៅភូមិអូរត្រែង ភូមិទឹកសាប ភូមិផ្លូវមាស និងភូមិសេកសក ឃុំផ្លូវមាស ស្រុករតនៈមណ្ឌល ខេត្តបាត់ដំបង។
កន្លងទៅនេះ អ្នកភូមិមានផលប៉ះពាល់ទាំងនោះបានសុំឲ្យសមាគមការពារសិទ្ធិមនុស្សអាដហុក (Adhoc) ជួយអន្តរាគមន៍ករណីនេះទៅអាជ្ញាធរខេត្ត។ អ្នកសម្របសម្រួលសមាគមអាដហុក ប្រចាំខេត្តបាត់ដំបង លោក យិន ម៉េងលី ថ្លែងថា សមាគមបានធ្វើលិខិតអន្តរាគមន៍មួយដាក់ជូនអាជ្ញាធរខេត្តបាត់ដំបង រួចហើយ ប៉ុន្តែរហូតមកទល់ពេលនេះ គេនៅពុំទាន់បានដឹងថា អាជ្ញាធរមានគម្រោងដោះស្រាយសំណងជូនប្រជាពលរដ្ឋបែបណានោះទេ។
លោកបន្តថា អាជ្ញាធរត្រូវប្រកាន់ជំហរឲ្យមានតម្លាភាព ចំពោះការដោះស្រាយសំណងជូនប្រជាពលរដ្ឋដែលរងផលប៉ះពាល់៖ «ជាពិសេស ត្រូវបង្ហាញឯកសារសម្រេចពីថ្នាក់ណាដែលធ្វើការដោះស្រាយដីមួយម៉ែត្រការ៉េ ដីប្រភេទទី១ ដីប្រភេទទី២ ប្រភេទទី៣ ប៉ុន្មាន ត្រូវបង្ហាញ ត្រូវមានត្រាឲ្យបានច្បាស់លាស់ ដើម្បីឲ្យប្រជាពលរដ្ឋគាត់បានអស់ចិត្ត។ ទី២ ដោះស្រាយជាបន្ទាន់បញ្ហាប្រឈមមុខ គឺរឿងខកខានរបស់ប្រជាពលរដ្ឋមិនបានធ្វើស្រែ មិនបានដាំពោតល្ង ពីព្រោះនៅតាមពួកគាត់អះអាងមួយឆ្នាំ គាត់រកបានយ៉ាងតិច ២០លានរៀលនៃប្រាក់ចំណូល»។
បច្ចុប្បន្ន ក្រុមអ្នកភូមិទាំងនោះពុំបានដាំដុះដំណាំនៅលើដីនោះទេ ដោយសារខ្លាចមានការឈូសបំផ្លាញចោល ហើយពុំទទួលបានសំណងថែមទៀត។ បញ្ហានេះ សមាគមអាដហុក យល់ថា កំពុងបង្កឲ្យមានផលប៉ះពាល់ខ្លាំងលើជីវភាពរបស់អ្នកភូមិ។ ប្រជាពលរដ្ឋភាគច្រើនបានយកប្លង់ដីទៅខ្ចីលុយពីធនាគារ ដើម្បីបានប្រាក់យកទៅធ្វើដើមទុនបង្កបង្កើនផល។ ហើយបញ្ហានេះ ពួកគាត់កំពុងប្រឈមទៅនឹងការដែលធនាគាររឹបអូសយកប្លង់ដី បើសិនពួកគាត់ពុំមានប្រាក់ទូទាត់សងធនាគារនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។