កាលពីដើមខែតុលា កន្លងទៅ មានករណីបាញ់ប្រហារមួយកើតឡើងនៅខេត្តត្បូងឃ្មុំ។ បច្ចុប្បន្ន ជនរងគ្រោះ និងប្រពន្ធ រស់នៅឃុំសេដា ស្រុកតំបែរ ខេត្តត្បូងឃ្មុំ កំពុងបារម្ភចំពោះសុវត្ថិភាពរបស់ខ្លួន ស្របពេលជនល្មើសនៅមិនទាន់បានចាប់ខ្លួននៅឡើយ។
អ្នកស្រីស្នើឲ្យតុលាការ ពន្លឿននីតិវិធីចំពោះរឿងក្តីនេះ ដើម្បីចាប់ជនដៃដល់មកផ្ដន្ទាទោសទៅតាមផ្លូវច្បាប់ ទើបអាចឲ្យពួកគាត់ស្ងប់ចិត្តបាន។
ការស្នើសុំនេះ បន្ទាប់ពីគ្រួសារជនរងគ្រោះមិនបានទទួលដំណឹងណាមួយពីសំណាក់តុលាការ និងសមត្ថកិច្ច ចំពោះសំណុំរឿងបាញ់ លោក អែល អ៊ីសា ពីសំណាក់ លោក ឃុត សោភ័ណ្ឌ ដែលជាប់សែស្រឡាយរបស់មន្ត្រីយោធាជាន់ខ្ពស់ កាលពីដើមខែតុលា។
ប្រពន្ធជនរងគ្រោះ អ្នកស្រី យ៉ារ៉ូ ម៉ី ឲ្យដឹងថា អ្នកស្រី និងគ្រួសារ កំពុងមានការបារម្ភជាខ្លាំង បន្ទាប់ពីដឹងថា ជនល្មើសកំពុងឋិតនៅក្រៅសំណាញ់ច្បាប់នៅឡើយ និងរស់នៅមិនឆ្ងាយពីពួកគាត់នោះ។ អ្នកស្រីហាក់មានសង្ឃឹមតិចតួចណាស់ថា សមត្ថកិច្ចអាចចាប់ជនដៃដល់បាន ពីព្រោះជនដៃដល់ជាប់ខ្សែលោហិតជាមួយអ្នកធំ និងម្យ៉ាង អ្នកស្រីមិនមានថវិកាទៀតនោះ។ អ្នកស្រីថា ប្រសិនបើសមត្ថកិច្ចនៅតែមិនអាចចាប់ជនល្មើសបានទេ អ្នកស្រី និងក្រុមគ្រួសារ ត្រូវបន្តរស់នៅដោយភាពភិតភ័យរហូត។
អ្នកស្រី យ៉ារ៉ូ ម៉ី៖ «អាហ្នឹងគេធ្វើមកលើខ្ញុំ ហើយខ្ញុំនៅភ័យដល់ថ្នាក់ហ្នឹងទៀត គេធ្វើខ្ញុំគេដូចជាអត់មានភ័យសោះ គេមានសិទ្ធិសេរីភាពដើររកស៊ីតាមស្រួល តែខ្ញុំនេះចេញរកស៊ីដូចញ៉ូចញ៉ើមៗ ដូចអត់ចង់ទៅណា ខ្ញុំលាក់ខ្លួនរហូត។ អត់ហ៊ាននៅផ្ទះណា បិទទ្វារចោលហ្នឹង បងប្អូនមករកនៅផ្ទះអីអត់ឃើញណា។ ខ្ញុំអត់ហ៊ាននៅទេ ខ្ញុំប្រាប់ត្រង់ហ្មង ព្រោះអីខ្ញុំខ្លាច ព្រោះវាធ្វើមកលើខ្ញុំសាហាវដល់ថ្នាក់ហ្នឹង»។
ទោះបីមានសង្ឃឹមតិចតួចក៏ដោយ តែអ្នកស្រីស្នើសុំឲ្យតុលាការ និងស្ថាប័នពាក់ព័ន្ធ ធ្វើយ៉ាងម៉េចចាប់អ្នកបាញ់ប្ដីអ្នកស្រីនោះមកផ្ដន្ទាទោសទៅតាមផ្លូវច្បាប់ ដើម្បីធានាបាននូវយុត្តិធម៌ដល់គ្រួសារអ្នកស្រី និងដើម្បីធានាការគោរពច្បាប់នៅកម្ពុជា។ អ្នកស្រីក៏បានប្រមូលស្នាមមេដៃពលរដ្ឋជាច្រើននាក់ ដើម្បីធ្វើជាសាក្សីដាក់ចូលសមាគមការពារសិទ្ធិមនុស្សអាដហុក (adhoc) ឲ្យជួយធ្វើអន្តរាគមន៍ជុំវិញរឿងនេះ។
ចំណែក លោក អែល អ៊ីសា ជាជនរងគ្រោះផ្ទាល់ បានថ្លែងឲ្យដឹងថា នៅពេលដែលលោក និងប្រពន្ធទៅទារប្រាក់ពីឈ្មោះ ឃុត សោភ័ណ្ឌ ចំនួន ៥០០ដុល្លារ ជំពាក់ថ្លៃចាក់ដី ប៉ុន្តែ ឃុត សោភ័ណ្ឌ មិនឲ្យ ហើយបែរជាគំរាមឲ្យនៅផឹកស្រាជាមួយខ្លួនរហូតដល់ប៉ះពាក្យសម្ដីគ្នា ក៏ ឃុត សោភ័ណ្ឌ ឡើងយកកាំភ្លើងមកបាញ់រូបលោក និងមានចេតនាបើកឡានបុកសម្លាប់ទៀតផង។ លោកបញ្ជាក់ថា មិនមែនតែលោកទេដែលត្រូវ ឃុត សោភ័ណ្ឌ គំរាម និងបាញ់នោះ ប៉ុន្តែកន្លងមក ក៏មានពលរដ្ឋជាច្រើនជួបបញ្ហានេះដែរ។ លោកថា ប្រសិនបើសមត្ថកិច្ចមិនចាត់វិធានការទេ ជនល្មើសនឹងបង្កបញ្ហាបែបនេះបន្តទៀតនៅក្នុងសង្គម។
ទាក់ទងបញ្ហានេះ នាយកក្រឡាបញ្ជីនៃសាលាដំបូងខេត្តកំពង់ចាម លោក អំ សំអាត មិនអាចឆ្លើយបានទេ ថាតើសំណុំរឿងនេះដំណើរការដល់ណានោះ ពីព្រោះលោកមិនបានចាំ ហើយម្យ៉ាង លោកកំពុងធ្វើដំណើរផង។
មិនខុសគ្នានេះ ស្នងការនគរបាលខេត្តត្បូងឃ្មុំ លោក ម៉ៅ ពៅ ក៏មិនអាចមានប្រសាសន៍បានដែរជុំវិញករណីនេះ ពីព្រោះលោកជាប់ប្រជុំ។
លោក ឃុត សោភ័ណ្ឌ ដែលគេដឹងថា ជាប់សែស្រឡាយជាមួយ លោក គន់ គីម ជាអគ្គមេបញ្ជាការរង និងនាយសេនាធិការចម្រុះនៃកងយោធពលខេមរភូមិន្ទ បានបាញ់ លោក អែល អ៊ីសា ប្ដីអ្នកស្រី យ៉ារ៉ូ ម៉ី ត្រូវធ្លុះជើងទាំងពីរកាលពីថ្ងៃទី៣ តុលា។ ក្រោយមក សំណុំរឿងនេះក៏បានបញ្ជូនទៅដល់ដៃតុលាការ កាលពីថ្ងៃទី១៤ តុលា ប៉ុន្តែរហូតមកដល់ពេលនេះ គ្រួសារជនរងគ្រោះនៅតែមិនទាន់បានទទួលដំណឹងត្រឡប់សោះឡើយ។
ដោយឡែកមន្ត្រីសម្របសម្រួលនៃសមាគមការពារសិទ្ធិមនុស្សអាដហុក ខេត្តកំពង់ចាម លោក នាង សុវ៉ាត មានប្រសាសន៍ថា ករណីនេះវាចូលដល់ដំណាក់កាលមួយដែលជនរងគ្រោះត្រូវលាក់ខ្លួន ប៉ុន្តែជនល្មើសត្រូវមានសេរីភាពទៅវិញ ដោយសារតែវប្បធម៌អាងខ្នងបក្សអាងពួក ហើយអាចធ្វើអ្វីស្រេចតែនឹងចិត្ត។ វប្បធម៌នេះហើយ ដែលលោកថាវាជាវប្បធម៌និទ្ទណ្ឌភាពនាពេលបច្ចុប្បន្ននោះ៖ «ខ្ញុំគិតថា តុលាការគួរតែធ្វើរឿងហ្នឹងមកដល់ថ្ងៃនេះ ហើយមិនគួរទុករឿងហ្នឹងឲ្យអ៊ីចឹងទេ ដើម្បីឲ្យប្រជាពលរដ្ឋជឿថា គាត់អាចជួយដល់ពួកគាត់បាន។ មានតែលោកទេខិតខំធ្វើរឿងហ្នឹង បង្ហាញស្នាដៃមកឲ្យឃើញមក។ ចៅហ្វាយខេត្តតាំងពីថ្ងៃហ្នឹងមកដល់ថ្ងៃនេះ ខ្ញុំឃើញថា អ្នកនៅខេត្តត្បូងឃ្មុំ ដែលឋិតក្រោមអាណាព្យាបាលរបស់គាត់ គាត់កំពុងតែភ័យ។ ហើយគេជឿលើគាត់ គេអាងលើគាត់ថាចៅហ្វាយខេត្តថ្មី ថាគាត់នឹងអាចកសាងនូវអ្វីៗដែលជាបញ្ហាកន្លងមកបានហើយ។ ហើយមនុស្សហ្នឹងអត់ពិបាកទេ ព្រោះមនុស្សហ្នឹងវាសុទ្ធតែជាបងប្អូនអ្នកធំ ដូចនេះសួរតែអ្នកធំគ្នាឯងក៏ដឹងដែរថា មនុស្សហ្នឹងឈ្មោះអី នៅឯណាហ្នឹងដឹងហើយ។ វាអត់មានអីពិបាកទេ បើគេចង់ធ្វើ បើគេចង់ឲ្យជនល្មើសហ្នឹងទទួលទោស តែបើមិនចង់ធ្វើមួយរយឆ្នាំទៀត ក៏នៅតែអត់បានដែរ»។
លោកបន្ថែមថា ប្រសិនបើតុលាការ និងសមត្ថកិច្ច នៅតែមិនអាចចាត់វិធានការចំពោះអ្នកប្រព្រឹត្តិបានទេនោះ នឹងធ្វើឲ្យពលរដ្ឋបាត់បង់ជំនឿចិត្តលើរាជរដ្ឋាភិបាល និងប្រព័ន្ធតុលាការនៅកម្ពុជា ហើយវាក៏បង្កើតនូវវប្បធម៌កាត់សេចក្តី ឬកាត់ទោសជនល្មើសដោយតុលាការហ្វូងមនុស្សជំនួសវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។