អំពើគំរាមកំហែង និងប្រើហិង្សាទៅលើអ្នកកាសែតពីក្រុមឈ្មួញរកស៊ីដឹកឈើខុសច្បាប់ នៅតែកើតមាននាខេត្តភាគឧត្តរនៃប្រទេសកម្ពុជា។ កាលពីបីថ្ងៃមុន ឈ្មួញរកស៊ីដឹកឈើម្នាក់ក្នុងខេត្តសៀមរាប បានហៅបក្ខពួកមួយចំនួន ទៅព្រួតគ្នាវាយដុំរាងកាយអ្នកកាសែតក្នុងស្រុកម្នាក់។
អ្នកយកព័ត៌មានឱ្យកាសែតរស្មីកម្ពុជាម្នាក់ កំពុងតែពិចារណាទៅលើការដាក់ពាក្យបណ្ដឹងទៅសាលាដំបូងខេត្តសៀមរាប ដើម្បីប្រឆាំងនឹងឈ្មួញរកស៊ីដឹកឈើខុសច្បាប់ម្នាក់ ដែលបានហៅបក្ខពួកទៅវាយតប់រូបគាត់ ដោយមានចេតនាទុកជាមុន។
លោក សឿង សែត អ្នកយកព័ត៌មានកាសែតរស្មីកម្ពុជា ប្រចាំខេត្តសៀមរាប មានប្រសាសន៍កាលពីរសៀលថ្ងៃច័ន្ទ ទី៦ ខែតុលា ថា កាលពីរំលងអាធ្រាត្រថ្ងៃទី៣ ខែតុលា កន្លងទៅ ឈ្មួញរកស៊ីដឹកឈើខុសច្បាប់ម្នាក់ឈ្មោះ អ៊ុំ វឌ្ឍនៈ ហៅ ពៅ ប្រជ្រុយ បានហៅបក្ខពួកទៅវាយតប់រូបគាត់។
លោក សឿង សែត បញ្ជាក់ថា ដើមហេតុបណ្ដាលឱ្យក្រុមឈ្មួញដឹកឈើព្រួតវាយរូបលោកនោះ បន្ទាប់ពីលោកបានចុះផ្សាយអត្ថបទស្ដីពីឈ្មួញរូបនោះ ទទួលបានសិទ្ធិដឹកឈើដើម្បីធ្វើវេទិកាបុណ្យអុំទូក ប៉ុន្តែសាលាខេត្តសៀមរាប មិនទាន់បានចេញលិខិតអនុញ្ញាតឱ្យផង បែរជាឈ្មួញនោះឆ្លៀតឱកាសដឹកឈើ ២-៣ឡាន យកមកលក់តាមដេប៉ូទៅហើយ។
បន្ទាប់ពីមានការចេញផ្សាយតាមកាសែត ក្រុមឈ្មួញបានរៀបចំផែនការ រួចហើយបានហៅរូបលោកទៅស៊ីផឹក ដោយបង្កឱ្យមានការទាស់សម្ដីគ្នា ហើយក៏ហៅបក្ខពួកមកវាយតែម្ដង៖ «គ្នានៅកន្លែងកើតហេតុមុនពេលវាយតប់ហ្នឹង ៣នាក់ ប៉ុន្តែអា ២នាក់ទៀតអត់មានធ្វើសកម្មភាពទេ។ អ្នកធ្វើសកម្មភាព គឺពីរនាក់បងប្អូន។ ហៅគ្នាវាមកវាយខ្ញុំ មកដល់ឈប់តែឡានរត់មកវាយបណ្ដោយ អ្នកមកហ្នឹងអត់បានសួរនាំមូលហេតុថាម៉េចអីម៉េចផង។ វាគ្រាន់ថាខ្ញុំមិនបានបែកឈាម ប៉ុន្តែបើគិតផ្លូវច្បាប់វិញ វាស្ទើរតែក្លាយទៅជាប៉ុនប៉ងមនុស្សឃាតទៅហើយ»។
ប្រភពពីអ្នកកាសែតក្នុងស្រុកឱ្យដឹងថា ឈ្មួញឈើដែលហៅបក្ខពួកទៅវាយអ្នកកាសែតនោះ គេដឹងថាជាទាហាន ក៏ប៉ុន្តែមិនដឹងនៅអង្គភាពណាពិតប្រាកដទេ។
បន្ទាប់ពីការវាយតប់ ហើយមានការប្ដឹងផ្ដល់ទៅការិយាល័យប៉ូលិសព្រហ្មទណ្ឌផងនោះ ឈ្មួញដឹកឈើខុសច្បាប់ សុខចិត្តបង់ប្រាក់ថ្លៃរបួសស្នាមទៅឱ្យអ្នកកាសែតចំនួន ២លានរៀល។
ទោះយ៉ាងណា វិទ្យុអាស៊ីសេរី មិនអាចទាក់ទងបុរសឈ្មោះ អ៊ុំ វឌ្ឍនៈ ហៅ ពៅ ប្រជ្រុយ ដើម្បីសុំការបំភ្លឺចំពោះការចោទប្រកាន់នោះយ៉ាងណានៅឡើយទេ ដោយសារតែលោកមិនទទួលទូរស័ព្ទ។
ចំណែកនាយរងការិយាល័យព្រហ្មទណ្ឌកម្រិតធ្ងន់នៃស្នងការនគរបាលខេត្តសៀមរាប លោក ណុល រ៉ុង មានប្រសាសន៍ថា ពិតជាមានក្រុមឈ្មួញដឹកឈើប្រើហិង្សាទៅលើអ្នកកាសែតមែន ក៏ប៉ុន្តែករណីនេះមិនមានការប្ដឹងផ្ដល់គ្នាទេ៖ «ដូចពួកហ្នឹងរកស៊ីឈើទេដឹង អ្នកកាសែតអ្នកអីជុំគ្នាយ៉ាងម៉េចទៀត ខ្ញុំគ្រាន់តែឱ្យកូនចៅទៅកន្លែងកើតហេតុមួយភ្លែត ទៅមើលរឿងរ៉ាវនោះណា ហើយគាត់មិនបានប្ដឹងផ្ដល់អីទេ»។
កាលពីពាក់កណ្ដាលខែកញ្ញា កន្លងទៅ ក្លឹបអ្នកកាសែតកម្ពុជា ធ្លាប់សម្ដែងការព្រួយបារម្ភអំពីសុវត្ថិភាព និងសេរីភាពសារព័ត៌មាន ដែលរងការគំរាមកំហែងនៅកម្ពុជា។ ស្ថាប័នដដែល ក៏ស្នើឱ្យអ្នកកាសែត ត្រូវគោរពវិជ្ជាជីវៈឱ្យបានត្រឹមត្រូវ។
រយៈពេល៣ខែដើមឆ្នាំ២០១៤ មានការគំរាមកំហែងលើអ្នកកាសែតចំនួន ៥រូប។ កាលពីខែកញ្ញា កន្លងទៅ អង្គភាពប្រឆាំងអំពើពុករលួយ បានចាប់ខ្លួនអ្នកយកព័ត៌មានឱ្យទូរទស្សន៍ចំនួន ២រូប ប្រចាំនៅខេត្តកំពត ដោយបញ្ជូនឱ្យតុលាការឃុំខ្លួនក្នុងពន្ធនាគារ។ ហើយកាលពីខែកក្កដា កងរាជអាវុធហត្ថខេត្តស្ទឹងត្រែង ចាប់ខ្លួនអ្នកកាសែតក្នុងស្រុក ៣នាក់ ដោយចោទពីបទកំហែងយកប្រាក់ ៥០០ដុល្លារ នៅពេលអ្នកកាសែតទាំងនោះទៅថតរូបគំនរឈើ ដែលអាចពាក់ព័ន្ធនឹងការជួញដូរខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។