ធ្វើជាអ្នកស្ម័គ្រចិត្តគឺជាជនគំរូ គឺជាប្រធានបទនៃទិវាអន្តរជាតិអ្នកស្ម័គ្រចិត្ត លើកទី៣ ដែលប្រារព្ធឡើងនៅកម្ពុជា នៅថ្ងៃទី៥ ធ្នូ ឆ្នាំ២០១៣នេះ។
រដ្ឋលេខាធិការនៃក្រសួងអប់រំយុវជន និងកីឡា លោក ស៊ាន បូរ៉ាត បានថ្លែងថា ការចូលរួមស្ម័គ្រចិត្តគឺជាការចូលរួមចំណែកដ៏មានតម្លៃបំផុត និងមិនអាចខ្វះបាន ដើម្បីធ្វើឲ្យប្រសើរឡើងនូវលក្ខខណ្ឌសង្គម ក្នុងការលើកតម្កើងការអភិវឌ្ឍសេដ្ឋកិច្ចជាតិ និងសិទ្ធិចូលរួមរបស់យុវជនក្នុងកិច្ចការសង្គម។
ចំណែកតំណាងអ្នកសម្របសម្រួលមូលនិធិសហប្រជាជាតិសម្រាប់ប្រជាជន ហៅថា យូ.អែន.ហ្វែស.ភី.អេ (UNFPA) លោក ម៉ាក ឌែរវីអ៊ុយ (Marc Derveeuw) មានប្រសាសន៍តាមរយៈអ្នកបកប្រែថា យុវជនពិតជាមានសារសំខាន់សម្រាប់ការអភិវឌ្ឍជាតិ។ លោកថា អង្គការនេះបានប្ដេជ្ញាចិត្តក្នុងការកសាងសុខុមាលភាពយុវជន ជំរុញភាពរីកចម្រើនខាងផ្នែកបញ្ញាស្មារតី បង្កើតចំណេះដឹងអំពីសិទ្ធិរបស់ពួកគេ សីលធម៌ និងគុណតម្លៃ និងជំនាញដែលយុវជនត្រូវការ ដើម្បីជំរុញការងារស្ម័គ្រចិត្ត។ លោកបញ្ជាក់ថា ប្រជាពលរដ្ឋកម្ពុជាសព្វថ្ងៃ មានជីវភាពប្រសើរឡើងដោយសារតែការងាររបស់អ្នកស្ម័គ្រចិត្តដែលបានជួយការងារជាច្រើន។ លោកថ្លែងបែបនេះ នៅក្នុងទិវាអន្តរជាតិអ្នកស្ម័គ្រចិត្ត ដែលមានអ្នកចូលរួមពិសេសយុវជនប្រមាណ ៧០០នាក់ ចូលរួមនៅវិទ្យាស្ថានជាតិអប់រំ។
យុវជនម្នាក់ដែលបានចូលរួមក្នុងពិធីនេះដែរ បានចាប់អារម្មណ៍អារម្មណ៍យ៉ាងខ្លាំងចំពោះការងារស្ម័គ្រចិត្ត។
យុវជន ផង់ ពិណន់ អាយុ ២៣ឆ្នាំ ជានិស្សិតឆ្នាំទី៣ នៃសាកលវិទ្យាល័យភូមិន្ទភ្នំពេញ ផ្នែកសង្គមវិទ្យា បានថ្លែងថា គាត់បានធ្វើការស្ម័គ្រចិត្តតាមរយៈអង្គការសង្គមស៊ីវិលប្រមាណ ៣ឆ្នាំមកហើយ ជាមួយយុវជនក្នុងសហគមន៍ដោយលើកទឹកចិត្តឲ្យយុវជនចាប់អារម្មណ៍ការសិក្សារៀនសូត្រ និងធ្វើការងារស្ម័គ្រចិត្តក្នុងសហគមន៍។ យុវជនដដែលអះអាងថា ការងារស្ម័គ្រចិត្តពិតជាបានធ្វើឲ្យរូបគេមានក្ដីសង្ឃឹមជាច្រើនសម្រាប់ថ្ងៃអនាគត។
ពុំមានរបាយការណ៍ណាមួយបានធ្វើការស្រាវជ្រាវជាក់លាក់ថា មានយុវជនកម្ពុជា ប៉ុន្មាននាក់ដែលចេញធ្វើការងារស្ម័គ្រចិត្តលើគ្រប់វិស័យនោះទេ។ ប៉ុន្តែរបាយការណ៍វិភាគស្ថានភាពយុវជនដែលធ្វើឡើងដោយអង្គការសហប្រជាជាតិឆ្នាំ២០០៩ ដែលសង្គមស៊ីវិលស្រង់ដាក់ក្នុងសេចក្ដីព្រាងគោលនយោបាយជាតិស្ដីពីការអភិវឌ្ឍយុវជនកម្ពុជា ថា មានយុវជនប្រមាណ ៣៥% ទៅ ៤០% ចូលប្រឡូកក្នុងតួនាទីស្ម័គ្រចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕