ស្ត្រីអតីតអ្នកផ្សព្វផ្សាយ និងលក់ស្រាបៀបាត់វ៉េស័រ (Budweiser) បានប្រមូលផ្តុំគ្នាធ្វើកូដកម្មនៅថ្ងៃទី៥ សីហា ទាមទារឲ្យក្រុមហ៊ុន អានកូ (Anco Brother Co.,Ltd) របស់លោកឧកញ៉ា កុក អាន សមាជិកព្រឹទ្ធសភានៃគណបក្សប្រជាជនកម្ពុជា អនុវត្តការសម្រេចរបស់ក្រុមប្រឹក្សាអាជ្ញាកណ្ដាល ដែលបង្គាប់ឲ្យទូទាត់សំណងដល់អតីតបុគ្គលិកដែលក្រុមហ៊ុននេះបានបណ្ដេញចេញ។
អតីតអ្នកផ្សព្វផ្សាយ និងលក់ស្រាបៀបាត់វ៉េស័រ អះអាងថា ក្រុមហ៊ុន អានកូ របស់លោកឧកញ៉ា កុក អាន សមាជិកព្រឹទ្ធសភានៃគណបក្សប្រជាជនកម្ពុជា បានបញ្ឈប់កម្មការិនីផ្សព្វផ្សាយ និងលក់ស្រាបៀចំនួន ១២នាក់ ដោយពុំគោរពតាមច្បាប់ស្ដីពីការងារ។
អតីតអ្នកផ្សព្វផ្សាយ និងលក់ស្រាបៀបាត់វ៉េស័រ ដែលតវ៉ាខាងមុខក្រុមហ៊ុន អានកូ ដែលមានទីតាំងស្ថិតនៅសង្កាត់វាលវង់ ខណ្ឌ៧មករា រាជធានីភ្នំពេញ នៅថ្ងៃទី៥ សីហា ទទូចឲ្យលោកឧកញ៉ា កុក អាន នាយកក្រុមហ៊ុន អានកូ ទូទាត់ប្រាក់បំណាច់ផ្តាច់កិច្ចសន្យាការងារ និងគោរពតាមការសម្រេចរបស់ក្រុមប្រឹក្សាអាជ្ញាកណ្ដាលចំនួន ៣ចំណុចកាលពីខែមិថុនា កន្លងទៅ។
អតីតអ្នកផ្សព្វផ្សាយ និងលក់ស្រាបៀបាត់វ៉េស័រ ក្នុងចំណោមកម្មការិនី ១២នាក់ ដែលក្រុមហ៊ុននេះបានបញ្ឈប់ ដែលបានចូលរួមធ្វើកូដកម្មនេះ លោកស្រី អ៊ុន សុធារី បានលើកឡើងថា លោកស្រីបានបម្រើការនៅក្នុងក្រុមហ៊ុននេះជាង ១ឆ្នាំមកហើយ។ លោកស្រីថា ក្រុមហ៊ុននេះបានបញ្ឈប់លោកស្រី និងកម្មការិនី ១១នាក់ទៀតកាលពីដើមខែមករា កន្លងទៅ ដោយមិនបានបញ្ជាក់មូលហេតុច្បាស់លាស់។ លោកស្រី អ៊ុន សុធារី អះអាងថា ការចូលរួមធ្វើកូដកម្មនេះ ដើម្បីទាមទារប្រាក់ជាង ១.០០០ដុល្លារ ដោយសារក្រុមហ៊ុនមិនបានជូនសំណងអ្វីទាំងអស់ក្រៅពីប្រាក់ខែចុងក្រោយ។ លោកស្រីទទូចឲ្យក្រុមហ៊ុន អានកូ របស់លោកឧកញ៉ា កុក អាន ដែលកម្មករអះអាងថា មានទ្រព្យសម្បត្តិស្តុកស្តម្ភ សងសំណងជូនពួកគេ៖ «ការទាមទាររបស់ពួកខ្ញុំនៅពេលនេះ គឺទាមទារសំណងអតីតភាពចន្លោះពីជិត ៣ឆ្នាំ ដល់ ១៦ឆ្នាំ និងទំហំសំណងចន្លោះចាប់ពី ៦៣៤ដុល្លារ ដល់ ៤៥៧ដុល្លារ ខ្ញុំ និងកម្មការិនី ៧នាក់ទៀតយល់ថា ក្រុមហ៊ុន អានកូ ដែលបានបញ្ឈប់ពួកខ្ញុំ ពួកខ្ញុំទទួលយកអត់បានទេ ដូច្នេះក្រុមហ៊ុនត្រូវតែគោរពច្បាប់»។
នៅក្នុងលិខិតសម្រេច និងបង្គាប់របស់ក្រុមប្រឹក្សាអាជ្ញាកណ្ដាល ចុះថ្ងៃទី១២ ខែមិថុនា បានបង្គាប់ឲ្យនិយោជកក្រុមហ៊ុន អានកូ ទូទាត់ប្រាក់បំណាច់ផ្តាច់កិច្ចសន្យាការងារជូនកម្មការិនីទាំង ៣ចំណុច រួមមាន ប្រាក់បំណាច់បណ្ដេញចេញតាមមាត្រា៨៩ នៃច្បាប់ស្ដីពីការងារ។ ប្រាក់បំណាច់ទូទាត់ជួសការជូនដំណឹងមុន តាមមាត្រា៧៥ នៃច្បាប់ស្ដីពីការងារ និងប្រាក់បំណាច់ទូទាត់ជួសការឈប់សម្រាកប្រចាំឆ្នាំ មានប្រាក់ឈ្នួលរយៈពេល ៣ឆ្នាំចុងក្រោយ។ ប៉ុន្តែរហូតមកដល់ពេលនេះ ក្រុមហ៊ុនមិនទាន់បានអនុវត្តតាមការសម្រេចនេះនៅឡើយ។
វិទ្យុអាស៊ីសេរី មិនអាចទាក់ទង លោកឧកញ៉ា កុក អាន សមាជិកព្រឹទ្ធសភានៃគណបក្សប្រជាជនកម្ពុជា ដែលជាប្រធានក្រុមហ៊ុន អានកូ បាននៅឡើយនៅថ្ងៃទី៥ ខែសីហា។
ប៉ុន្តែ ប្រធានផ្នែកនារីផ្សព្វផ្សាយនៃក្រុមហ៊ុន អានកូ លោក ឈុំ មហាកុសល បានលើកឡើងថា ការសម្រេចរបស់ក្រុមប្រឹក្សាអាជ្ញាកណ្ដាល គឺធ្វើឡើងដោយមិនមានការចុះធ្វើអធិការកិច្ចត្រឹមត្រូវ។ លោកថា ការតវ៉ារបស់កម្មករនៅពេលនេះ គឺជាសិទ្ធិរបស់កម្មករ ប៉ុន្តែក្រុមហ៊ុនបានដោះស្រាយប្រាក់ខែចុងក្រោយ និងប្រាក់ខែបន្ថែមមួយខែជូនកម្មករទាំងនោះរួចអស់ហើយ។
ចំណែកឯមន្ត្រីផ្នែកតស៊ូមតិ នៃសហព័ន្ធសហជីពកម្មករចំណីអាហារ និងសេវាកម្មកម្ពុជា លោក អ៊ុំ វិសាល ដែលចូលរួមឃ្លាំមើលការតវ៉ារបស់នារីផ្សព្វផ្សាយស្រាបៀទាំងនោះ បាននិយាយថា លោកសោកស្ដាយចំពោះក្រុមហ៊ុន អានកូ ដែលជាក្រុមហ៊ុនល្បីឈ្មោះមួយនៅកម្ពុជា មិនព្រមដោះស្រាយ និងទូទាត់សំណងជូនកម្មការិនី។ លោកថា កម្មការិនីដែលត្រូវបានក្រុមហ៊ុនបញ្ឈប់អំឡុងបំពេញការងារ ប្រឈមនឹងបញ្ហាជាច្រើន ដូច្នេះក្រុមហ៊ុន អានកូ ត្រូវដោះស្រាយតាមការសម្រេចរបស់ក្រុមប្រឹក្សាអាជ្ញាកណ្ដាល៖ «ខ្ញុំយល់ថា សំណងដែលកម្មករទាមទារនៅពេលនេះ ជាសំណងតិចតួចប៉ុណ្ណោះ ដូច្នេះខ្ញុំគិតថា ក្រុមហ៊ុន អានកូ របស់លោកឧកញ៉ា កុក អាន មិនគួរបន្តអូសបន្លាយមិនព្រមដោះស្រាយជូនកម្មករនោះទេ»។
អតីតអ្នកផ្សព្វផ្សាយ និងលក់ស្រាបៀបាត់វ៉េស័រ នៅតែប្រកាន់ជំហរបន្តធ្វើកូដកម្មនៅមុខក្រុមហ៊ុន អានកូ បន្តទៀត និងព្រមានធ្វើយុទ្ធនាការជាទ្រង់ទ្រាយធំ ដើម្បីអំពាវនាវឲ្យពលរដ្ឋឈប់ប្រើប្រាស់ទំនិញក្រុមហ៊ុននេះ ដែលរួមមាន ទឹកបរិសុទ្ធ អេវីយ៉ង់ (EVIAN) ស្រាបៀបាត់វ៉េស័រ (Budweiser) បារី ៥៥៥ និងផលិតផលជាច្រើនប្រភេទទៀត បើសិនជាក្រុមហ៊ុននៅតែគ្មានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។