ក្រុមកម្មករ បានឲ្យដឹងថា មូលហេតុដែលពួកគេបន្តបិទផ្លូវ ដោយសារទំនាស់ការងារអូសបន្លាយពេលជាង ២សប្ដាហ៍មកនេះគ្មានមន្ត្រីពីស្ថាប័នពាក់ព័ន្ធ ឬថៅកែរោងចក្រចេញមុខជួបចរចាជាមួយកម្មករទេ។
ក្រុមកម្មករ វីនម៉េកស៊ូ មានទីតាំងនៅឃុំពពេល ស្រុកត្រាំកក់ ខេត្តតាកែវ បានអះអាងថា កម្មករជាង ៦០០នាក់ នៅព្រឹកថ្ងៃអង្គារ ទី២១ ខែឧសភា បានបន្តបិទផ្លូវជាតិលេខ៣ នៅវេលាម៉ោងជិត ៧ព្រឹកបន្តទៀត បន្ទាប់ពីបានបិទផ្លូវនេះកាលពីថ្ងៃច័ន្ទ ព្រោះថៅកែរោងចក្រគេចមិនចេញមុខដោះស្រាយទំនាស់ការងារដែលកម្មករទាមទារ។
កម្មករ បានឲ្យដឹងថា វិវាទការងារនេះ ពួកគេបានទាមទារឲ្យថៅកែរោងចក្រអនុវត្តលក្ខខណ្ឌចំនួន ១២ចំណុច មានដូចជា មិនត្រូវបញ្ឈប់កម្មការិនីពីការងារពេលមានផ្ទៃពោះ មិនត្រូវបង្ខំកម្មករឲ្យធ្វើការថែមម៉ោង រោងចក្រគ្មានអនាម័យ គ្មានសេវាសុខភាព និងមិនត្រូវរើសអើងកម្មករមានអាយុចាស់ និងមិនត្រូវបណ្ដេញកម្មករដោយគ្មានហេតុផលពីការងារជាដើម។ ប៉ុន្តែ ទំនាស់ដែលអូសបន្លាយ ២សប្ដាហ៍មកហើយនេះ ថៅកែរោងចក្រគេចមិនជួបចរចាជាមួយកម្មករ ដើម្បីរកដំណោះស្រាយទេ៖ «ថែមម៉ោងក្នុងច្បាប់គេចែងមកឲ្យថែមតែពីរម៉ោងទេ តែរោងចក្រនេះបង្ខំឲ្យថែមម៉ោងដល់ ៤ម៉ោង គឺពីម៉ោង ៤ល្ងាច ដល់ម៉ោង ៨យប់។ កុំរើសអើងស្ត្រី កុំរើសអើងមនុស្សចាស់។ កុំរើសអើងអ្នកពោះធំ។ ហើយកម្មករបុរសអត់ឲ្យធ្វើការពេញសិទ្ធិទេ នៅបណ្ដែតរហូត ហើយអត់រើសចូលទៀត រើសអើងបុរស។ ហើយការងារដូចជាអូសពុម្ព ការងារដែលធ្ងន់ៗឲ្យស្ត្រីធ្វើទាំងអស់ ដូចជាវ៉ៃពុម្ព ទាញម៉ាស៊ីន ឬដោះម៉ាស៊ីនជាដើម ឲ្យស្ត្រីធ្វើទាំងអស់ ហើយការងារនេះ គឺជាការងារបុរស»។
បុគ្គលិកសម្ព័ន្ធសហជីពកម្ពុជា លោក នី ចន្ទតារាវុធ ដែលបានចុះឃ្លាំមើលសកម្មភាពបិទផ្លូវរបស់កម្មករ បានឲ្យដឹងថា នៅថ្ងៃទី២១ ខែឧសភា ឃើញមានមន្ត្រីពីខេត្តតាកែវ បានមកជួបកម្មករ និងស្នើឲ្យបើកផ្លូវ ប៉ុន្តែមិនទាន់មានដំណោះស្រាយជូនកម្មករទេ។ លោកព្រួយបារម្ភខ្លាចទំនាស់នៅរោងចក្រ វីនម៉េកស៊ូ អាចនឹងបន្តរីករាលដាលធ្ងន់ធ្ងរ បើអាជ្ញាធរពាក់ព័ន្ធមិនរកដំណោះស្រាយបញ្ចប់ជម្លោះបានឆាប់ទេនោះ៖ «នៅតែបន្តធ្វើ ហេតុអីតាំងពីថ្ងៃទី៧ ខែឧសភា ឥឡូវមកដល់ថ្ងៃទី២១ ហើយ ចុះហេតុអីខាងនិយោជកហ្នឹងអត់មកទល់មុខជាមួយតំណាងសហជីព និងពួកខ្ញុំ»។
លោកមើលឃើញថា ទំនាស់នៅរោងចក្រ វីនម៉េកស៊ូ ដែលអូសបន្លាយពេលច្រើនថ្ងៃ និងឈានដល់បិទផ្លូវជាតិលេខ៣ រយៈពេល ២ថ្ងៃមកនេះ ដោយសារតែមន្ត្រីក្រសួង ឬមន្ទីរពាក់ព័ន្ធ និងថៅកែរោងចក្រមិនចេញមុខជួបចរចាជាមួយកម្មករ។
កម្មករ បានឲ្យដឹងថា ជម្លោះការងារនៅរោងចក្រ វីនម៉េកស៊ូ បានចាប់ផ្ដើមពីថ្ងៃទី៧ ខែឧសភា មកម្ល៉េះ។ បន្ថែមលើនេះ ក្រុមកម្មករបានអះអាងថា បើគ្មានដំណោះស្រាយទេ ពួកគេនឹងនៅតែបន្តបិទផ្លូវជាតិលេខ៣ នាថ្ងៃស្អែក និងថ្ងៃបន្តបន្ទាប់ទៀត រហូតមានអាជ្ញាធរពាក់ព័ន្ធ និងថៅកែក្រុមហ៊ុនចេញមុខដោះស្រាយជូនពួកគេ។
វិទ្យុអាស៊ីសេរី មិនអាចទាក់ទងតំណាងរោងចក្រ វីនម៉េកស៊ូ និងមន្ត្រីស្ថាប័នពាក់ព័ន្ធខេត្តតាកែវ ដើម្បីបំភ្លឺបានទេ នៅរសៀលថ្ងៃទី២១ ខែឧសភា។
ប៉ុន្តែ កម្មករបានឲ្យដឹងថា នៅរសៀលម៉ោង ៤ល្ងាច ថ្ងៃអង្គារ ពួកគេបានបើកផ្លូវជាតិលេខ៣ ឲ្យមានចរាចរឡើងវិញ បន្ទាប់ពីមានមន្ត្រីខេត្តតាកែវ បានមកជួបកម្មករ និងធានារកដំណោះស្រាយវិវាទជូនកម្មករ នៅថ្ងៃពុធ ទី២២ ខែឧសភា។
យ៉ាងណាក៏ដោយ ក្រុមកម្មកររោងចក្រ វីនម៉េកស៊ូ បានស្នើដល់ថ្នាក់ដឹកនាំក្រសួងការងារ និងជាពិសេស លោកនាយករដ្ឋមន្ត្រី ហ៊ុន សែន ឲ្យជួយអន្តរាគមន៍ទៅថៅកែរោងចក្រ ត្រូវដោះស្រាយវិវាទការងារជូនពួកគេឲ្យបានឆាប់ ព្រោះទំនាស់នេះបានអូសបន្លាយជាង ២សប្ដាហ៍មកហើយៗថៅកែរោងចក្របានគេចមិនជួបជាមួយកម្មករ ដើម្បីបញ្ចប់ជម្លោះការងារនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។