ក្រុមពលករស្វែងរកការងារធ្វើនៅប្រទេសថៃ បញ្ជាក់ទាំងក្ដីអស់សង្ឃឹមថា ក្រុមហ៊ុន សេនជូរី យឺតយ៉ាវមិនបានបញ្ជូនពួកគាត់ទៅធ្វើការអស់រយៈពេលជាង ១ឆ្នាំមកហើយ។ ការយឺតយ៉ាវនេះ ធ្វើឲ្យក្រុមពលករជួបការលំបាកគ្មានប្រាក់បង់ទៅឲ្យធនាគារ។
ពលការិនីវ័យ ៣០ឆ្នាំប្លាយ អ្នកស្រី គាត ថុល រស់នៅភូមិអណ្ដូងសាលា ឃុំព្រាល ស្រុកកញ្ជ្រៀច ខេត្តព្រៃវែង ថ្លែងនៅថ្ងៃទី១៦ ខែតុលា ថា ដោយសារជីវភាពមានការខ្វះខាត ពិបាកក្នុងការរស់នៅប្រចាំថ្ងៃ អ្នកស្រីបានសម្រេចចិត្តប្រថុយយកប្លង់ដី និងផ្ទះដែលជាទីស្រឡាញ់របស់ខ្លួន ទៅដាក់បញ្ចាំធនាគារ អេស៊ីលីដា (ACLEDA Bank) ដើម្បីខ្ចីប្រាក់ពីធនាគារទៅឲ្យក្រុមហ៊ុននាំពលករទៅធ្វើការនៅប្រទេសថៃ ក្រែងលោទទួលបានជីវភាពប្រសើរឡើងនៅថ្ងៃខាងមុខ។ ប៉ុន្តែ ផ្ទុយទៅវិញ អ្វីៗមិនបានដូចបំណងនៃការគ្រោងទុកនោះឡើយ៖ «គេសន្យាថា ២ខែកន្លះ គេនឹងយកយើងទៅ។ ដល់ពេលនេះ ខ្ញុំអត់បានទៅទទួល ផ្អាកៗថា ៣ខែ ដល់រយៈ ៣ខែមិនបានទៅ ថា ៤ខែ ដល់ ៤ខែមិនបានទៅ ខ្ញុំឯណេះអស់រលីង។ វាចុះកិច្ចសន្យា ខ្ញុំឡើងទៅដល់កន្លែងតែម្ដង ឡើងទៅដល់វាថាទី៩ ហ្នឹង អាចឲ្យប៉ាសស្ព័រឡើងទៅធ្វើការងារ។ ឥឡូវចូលខែ១០ ហើយ អត់បានទៅផង»។
ចំណែកឯក្រុមពលករមកពីស្រុកកំចាយមារ ខេត្តព្រៃវែង មានប្រសាសន៍ស្រដៀងគ្នានេះដែរថា ក្រុមហ៊ុននេះដោះស្រាយគេចវេះយករួចខ្លួនពីមួយថ្ងៃទៅមួយថ្ងៃ ក្នុងគោលបំណងបោកយកប្រាក់ពួកគាត់ ហើយមិនចង់ទទួលខុសត្រូវលើកិច្ចសន្យា ដែលធានាបញ្ជូនពលករទៅធ្វើការនៅប្រទេសថៃ នោះឡើយ៖ «បើខ្ញុំតែម្ដង លក់ក្របីអស់ហើយ គ្រាន់ថាចុះឈ្មោះភ្លាមលក់ភ្លាមហ្មង ក្របីលក់អាលីងតែហ្មង គ្មានអីភ្ជួរទេ ប្រញាប់ថា ៣ខែបានចេញ អ៊ីចឹងលក់អាលីងតែហ្មង គ្មានក្របីចិញ្ចឹមទៀតឥឡូវហ្នឹង។ ខ្ញុំសុំប៉ាសស្ព័រក៏មិនឲ្យ សុំលុយវិញក៏មិនឲ្យ ទៅចរចាគ្នាហ្នឹងសុំស្អីក៏មិនដែរ គាត់ប្រកែកថាក្រសួងមិនបើកស៊ីញេចេញឲ្យ ក្រសួងឯណាមិនចេញ គេចេញគ្រប់តែគ្នា អត់តែក្រុមហ៊ុនហ្នឹងមួយមិនចេញ។ អាលីង គ្មានសល់មួយរយទេ កត់ឈ្មោះភ្លាមស៊ីញេភ្លាម ផ្ដិតមេដៃមេអីហើយ គេយកលុយទៅឲ្យគេទាំងដុំហ្នឹង ទៅម្នាក់ៗគ្រប់ៗគ្នាទៅមកផ្ទះវិញ។ មកដល់ខែប៉ុន្មានឲ្យទៅដល់នេះមិនបានទៅ ២ឆ្នាំទល់ឥឡូវហ្នឹងទៅ។ ពិបាកវេទនាតែម្ដង រកលុយសងគេរហូតហ្មង មិនដែលសល់ផងដេកចាំមើលតែប៉ាសស្ព័រៗ ឥឡូវប៉ាសស្ព័រអីមិនទាន់បានឡើងទៅផង»។
ឆ្លើយតបនឹងការចោទប្រកាន់នេះ ប្រធានក្រុមហ៊ុន សេនជូរី លោក អេង សុវណ្ណារិទ្ធ បង្ហាញថា ការយឺតយ៉ាវមិនបានបញ្ជូនពលករទៅធ្វើការតាមពេលកំណត់ ដោយសារក្រុមហ៊ុនរៀបចំសម្រួលកន្លែងការងារនៅប្រទេសថៃ ឲ្យប្រសើរឡើងដល់ពលករ ដើម្បីឲ្យពួកគាត់ទទួលបានប្រាក់ចំណូលខ្ពស់៖ «ដល់យើងសាកល្បងមើលទៅអត់មានកន្លែងស្នាក់នៅ លំបាកដល់ពលករ ហើយយើងពិបាកធ្វើការសហការជាមួយរោងចក្រ។ ដល់អ៊ីចឹង យើងអត់បញ្ជូនទៅ។ ដល់ពេលអ៊ីចឹង ក្រុមហ៊ុនខ្ញុំក៏ផ្ទេរមករករោងចក្រថ្មី ប៉ុន្តែពលករមួយចំនួនដែលយើងមានរោងចក្រថ្មី គាត់អត់ទៅទេ។ ទារទៅ តែរោងចក្រដែលយើងបានដូចថា ជ្រើសរើសមកត្រូវមានរោងចក្រអេឡិចត្រូនិក ដល់ទៅរោងចក្រផ្សេងទៀត គាត់អត់ទៅទេ»។
លោកបន្តថា ចំពោះប្រាក់ដែលពលករបានបង់ទៅឲ្យក្រុមហ៊ុនម្នាក់ ១៥០ដុល្លារ ប្រាក់នោះខាងក្រុមហ៊ុនបានយកទៅធ្វើលិខិតឆ្លងដែន និងរត់ការធ្វើលិខិតស្នាមផ្សេងៗអស់ទៅហើយ។ ក្រុមហ៊ុនគ្មានថវិកាសម្រាប់បង់ជូនពលករឲ្យបានគ្រប់ចំនួនវិញនោះឡើយ។
វិទ្យុអាស៊ីសេរី មិនអាចទាក់ទងមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំការបកស្រាយបំភ្លឺជុំវិញបញ្ហានេះបានទេ នៅថ្ងៃទី១៦ តុលា ដោយទូរស័ព្ទរោទ៍ តែពុំមានអ្នកទទួល។
ក្រុមពលករនៅខេត្តព្រៃវែង និងខេត្តស្វាយរៀង រួមទាំងអស់ជាង ១០០នាក់ បានបង់ប្រាក់ឲ្យទៅក្រុមហ៊ុន សេនជូរី នាំទៅធ្វើការប្រទេសថៃ ក្នុងមួយនាក់ ១៥០ដុល្លារ។ ក្រុមពលករអះអាងថា ក្នុងកិច្ចសន្យា ក្រុមហ៊ុននឹងត្រូវបញ្ជូនពួកគាត់ទៅធ្វើការក្នុងចន្លោះពី ៣ ទៅ ៤ខែ រាប់ចាប់ពីថ្ងៃបង់ប្រាក់ទៅឲ្យក្រុមហ៊ុន។ ក្រុមពលករបានបង់ប្រាក់ចុះកិច្ចសន្យាជាមួយក្រុមហ៊ុន នៅថ្ងៃទី២៣ កក្កដា ឆ្នាំ២០១២ រហូតមកទល់ពេលនេះ អស់រយៈពេលជាងមួយឆ្នាំហើយ។ ក្រុមពលករទាំងជាង ១០០នាក់នោះ នៅពុំទាន់មាននរណាម្នាក់បានចេញទៅធ្វើការប្រទេសថៃ តាមរយៈក្រុមហ៊ុននេះនៅឡើយ។ ប្រជាពលរដ្ឋទទូចសុំឲ្យអាជ្ញាធរមានសមត្ថកិច្ចដែលមានការពាក់ព័ន្ធនឹងបញ្ហានេះ ធ្វើយ៉ាងណាជួយដោះស្រាយយកប្រាក់ពីក្រុមហ៊ុន ប្រគល់ពួកគាត់ឲ្យបានគ្រប់ចំនួន ដើម្បីយកទៅបង់ថ្លៃខ្ចីបុលពីធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។