តំណាងកម្មកររោងចក្រ អ៊ែដ្យាយល៍ ស្វេតថឺ (Agile Sweater) នៅខេត្តកំពង់ស្ពឺ ប្រមាណ ៣០នាក់ និងតំណាងសហជីពបានជួបជុំធ្វើសន្និសីទសារព័ត៌មាននៅមុខក្រសួងការងារ ក្នុងបំណងបន្តស្វែងរកកិច្ចអន្តរាគមន៍ពីក្រសួងការងារ និងក្រសួងពាណិជ្ជកម្ម នៅថ្ងៃទី១៧ ខែកុម្ភៈ បន្ទាប់ពីពួកគេអះអាងថា ពុំមានដំណោះស្រាយ ហើយប្រឈមនឹងការធ្វើទុក្ខបុកម្នេញពីខាងភាគីក្រុមហ៊ុន។ ចំណែកភាគីក្រុមហ៊ុន ច្រានចោលចំពោះការចោទប្រកាន់នេះ ហើយថា ក្រុមហ៊ុនតែងតែផ្ដល់ដំណោះស្រាយជាហូរហែតាមរយៈក្រសួងការងារ និងស្ថាប័នពាក់ព័ន្ធកន្លងមក។
ក្នុងសន្និសីទសារព័ត៌មាននៅថ្ងៃទី១៧ ខែកុម្ភៈ ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ស្នើឲ្យក្រសួងការងារ ពន្លឿននីតិវិធីដោះស្រាយវិវាទការងារតាមការសន្យាកាលពីពេលកន្លងមក។ បន្ទាប់ពីនោះ តំណាងកម្មករ និងលោក ប៉ាវ ស៊ីណា ក៏បន្តដាក់លិខិតទៅក្រសួងពាណិជ្ជកម្ម ដើម្បីឲ្យបង្កកការនាំចេញផលិតផលពីរោងចក្រនេះទៅទីផ្សារបរទេស ដើម្បីដាក់សម្ពាធឲ្យក្រុមហ៊ុនទទួលយកកម្មករប្រមាណ ៥០០នាក់ ចូលធ្វើការវិញ ដកពាក្យបណ្ដឹងប្រឆាំងលើមន្ត្រីសហជីព និងកម្មករ និងទាមទារឲ្យក្រុមហ៊ុនដកជនពាលពីរោងចក្រ ព្រមទាំងដោះស្រាយសំណើ ៩ចំណុច ដែលកម្មករស្នើសុំកន្លងមក។
លោក ប៉ាវ ស៊ីណា ពន្យល់ថា ការទាមទារឲ្យបិទការនាំចេញសំលៀកបំពាក់នេះ ដោយសារក្រុមហ៊ុនជ្រើសរើសកម្មករថ្មីជំនួសកន្លែងកម្មករចាស់ដែលតវ៉ា និងមិនត្រឹមតែមិនផ្ដល់ដំណោះស្រាយទេ ថែមទាំងជួលក្រុមជើងកាងឲ្យគំរាមកំហែង និងប្រើហិង្សាទៀត។ លោកថា ទង្វើនេះ គឺរំលោភបំពានលើសិទ្ធិតវ៉ាអហិង្សា និងរំលោភលើសិទ្ធិមនុស្សយ៉ាងធ្ងន់ធ្ងរ៖ « និយាយពីច្បាប់ស្ដីពីការងារ គឺក្នុងអំឡុងកម្មករធ្វើកូដកម្មដោយសន្តិវិធី គេហាមប្រាមមិនឲ្យនិយោជកជ្រើសរើសកម្មករថ្មីចូលជំនួសទេ ក្នុងករណីដែលក្រុមហ៊ុនល្មើសច្បាប់នេះ គឺក្រុមហ៊ុនមានកាតព្វកិច្ចមួយ គឺសងប្រាក់រំឭកជូនកម្មកររាប់តាំងពីថ្ងៃឈប់ រហូតដល់ថ្ងៃក្រុមហ៊ុនយកកម្មករនោះចូលធ្វើការវិញ »។
លោក ប៉ាវ ស៊ីណា ឲ្យដឹងដែរថា ក្រោយពីដាក់លិខិតសុំកិច្ចអន្តរាគមន៍ពីក្រសួងពាណិជ្ជកម្មហើយនោះ មន្ត្រីដែលទទួលលិខិតបានសន្យាថា នឹងជួយបញ្ជូនលិខិតនោះឲ្យដល់ថ្នាក់ដឹកនាំក្រសួងពិនិត្យដោះស្រាយ។
កម្មកររោងចក្រ អ៊ែដ្យាយល៍ ស្វេតថឺ ដែលមានទីតាំងស្ថិតនៅភូមិបូរីកម្មករ សង្កាត់រការធំ ក្រុងច្បារមន ខេត្តកំពង់ស្ពឺ បានផ្ទុះការតវ៉ាតាំងពីថ្ងៃទី២៥ ខែធ្នូ ឆ្នាំ២០១៥ រហូតមកទល់បច្ចុប្បន្ន។ លោក ប៉ាវ ស៊ីណា ឲ្យដឹងថា អំឡុងពេលនៃការធ្វើកូដកម្មនេះ ក៏មានការចូលរួមសម្របសម្រួលពីមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ស្ពឺ និងតំណាងក្រសួងការងារដែរ ប៉ុន្តែនៅតែមិនទាន់ទទួលបានដំណោះស្រាយនៅឡើយទេ។
លោក ប៉ាវ ស៊ីណា ដាក់ការសង្ស័យថា ការដែលជាប់គាំងដំណោះស្រាយនេះ គឺដោយសារមានមន្ត្រីខិលខូច ឃុបឃិតគ្នាប្រព្រឹត្តអំពើពុករលួយជាមួយក្រុមហ៊ុន ទើបគ្មានឆន្ទៈដោះស្រាយពិតប្រាកដ៖ « បើសិនជាពួកគាត់មិនមានការពាក់ព័ន្ធជាមួយនិយោជក ហើយពួកគាត់មិនពាក់ព័ន្ធជាមួយមន្ត្រីពាក់ព័ន្ធនៅក្នុងខេត្តទេ គឺគាត់មិនអាចបិទបាំងបញ្ហាទាំងអស់នេះបានទេ។ កាតព្វកិច្ចក្រុមហ៊ុន ត្រូវតែដោះស្រាយ ព្រោះថា កម្មករមានសិទ្ធិទាមទារលក្ខខណ្ឌការងារដោយសន្តិវិធី ហើយអ្វីដែលមានចែងក្នុងច្បាប់ គឺក្រុមហ៊ុនត្រូវតែអនុវត្ត ហើយអ្វីដែលកម្មករទាមទារលើសពីច្បាប់ គឺជាសិទ្ធិរបស់កម្មករ ហើយនិយោជកមានសិទ្ធិពិចារណាឲ្យ ឬមិនឲ្យដែរ »។
វិទ្យុអាស៊ីសេរី បានព្យាយាមទាក់ទងអ្នកនាំពាក្យក្រសួងការងារ លោក ហេង សួរ ជាច្រើនលើកនៅថ្ងៃទី១៧ ខែកុម្ភៈ ប៉ុន្តែពុំមានអ្នកទទួលទូរស័ព្ទ។
រីឯតំណាងរោងចក្រ អ៊ែជ្យាយល៍ ស្វេតថឺ អ្នកស្រី ជិន សាន់ឌី បានច្រានចោលការចោទប្រកាន់របស់តំណាងកម្មករ និងបានលើកឡើងថា ក្រុមហ៊ុនបានព្យាយាមដោះស្រាយជាច្រើនលើកច្រើនសាជាមួយកម្មកររួចហើយ ដោយមានការចូលរួមពីមន្ទីរការងារខេត្ត រហូតដល់ក្រសួងការងារទៀតផង ប៉ុន្តែផ្ទុយទៅវិញ កម្មករមិនដែលគោរពសេចក្ដីសម្រេចណាមួយនោះទេ។
អ្នកស្រីបញ្ជាក់ថា កម្មករនៅតែតវ៉ានោះ ច្រើនបំផុតគឺ ៥០នាក់ និងអះអាងថា សំណើរបស់កម្មករទាំង ៩ចំណុចដែលរួមមានគិតតម្លៃឡូត៍តាមស្តង់ដារ បន្ថែមលុយបាយ ថែមម៉ោង ២ដុល្លារទៀត និងដករដ្ឋបាលចេញពីរោងចក្រជាដើមនោះ គឺលើសពីច្បាប់បានកំណត់។ ចំពោះរឿងជនពាលនៅក្នុងរោងចក្រ គឺអ្នកស្រីបដិសេធដាច់អហង្ការតែម្ដង៖ « ហើយអ្វីដែលព័ត៌មានថា ទាមទារឲ្យកម្មករចូលធ្វើការវិញ ខាងក្រុមហ៊ុនក៏បានប្រកូកប្រកាសឲ្យចូលហើយ ប៉ុន្តែពួកគាត់មិនចូលខ្លួនឯង។ ដល់ពេលចុងក្រោយ យកព័ត៌មានថាក្រុមហ៊ុនមិនឲ្យចូលហ្នឹងមកប្រើ។ គេបានកំណត់ហើយថា ពីពេលណាដល់ពេលណាចូលធ្វើការវិញ ប៉ុន្តែពួកគាត់អត់ទេ នៅតែបន្តធ្វើអ៊ីចេះបន្តអ៊ីចុះ។ ពួកខ្ញុំសុទ្ធតែមានកំណត់ហេតុ និងរបាយការណ៍ច្បាស់លាស់ ទាក់ទងនឹងខាងក្រសួង ក៏គាត់មានរបាយការណ៍ដែរ មិនមែនខ្ញុំចេះតែនិយាយតែម្ខាង »។
ផ្ទុយពីការលើកឡើងនេះ លោក ប៉ាវ ស៊ីណា បញ្ជាក់ថា ប្រសិនបើមានការដោះស្រាយមែននោះ គឺកម្មករមិននៅធ្វើការតវ៉ាដែលបណ្ដាលឲ្យជួបទុក្ខលំបាក ប៉ះពាល់ដល់ជីវភាពទៀតនោះទេ។ លោកបញ្ជាក់ថា ការដែលក្រុមហ៊ុនទម្លាក់កំហុសលើកម្មករថា មិនព្រមចូលធ្វើការនោះ គឺជារឿងកុហកបោកប្រាស់ ដើម្បីឲ្យមតិសាធារណៈយល់ឃើញថា រឿងទាំងអស់នេះគឺសហជីពជាអ្នកបង្កបញ្ហាទៅវិញ។
កម្មការិនីម្នាក់ ឈ្មោះ ចាប់ គន្ធធឿន រៀបរាប់ថា ការដែលរោងចក្រមិនព្រមផ្ដល់ដំណោះស្រាយសមរម្យ ហើយបញ្ឈប់ពួកគាត់ពីការងារនោះ គឺបានបណ្ដាលឲ្យពួកគាត់ជួបបញ្ហាសេដ្ឋកិច្ចក្នុងគ្រួសារ៖ « អូសបន្លាយជិតចូល ៣ខែហើយ នៅតែមិនមានដំណោះស្រាយដែលទទួលកម្មករពួកយើងចូលធ្វើការវិញទៀត ដែលប៉ះពាល់ដល់វិបត្តិសេដ្ឋកិច្ចក្នុងគ្រួសារ និងវិបត្តិអត់ការងារធ្វើតែម្តង »។
ក្រុមកម្មករអះអាងថា អាជ្ញាធរខេត្តកំពង់ស្ពឺ ហាក់កំពុងកាងការពារឲ្យរោងចក្រដោយគ្មានឆន្ទៈដោះស្រាយទុក្ខលំបាកដែលកម្មករស្នើសុំនោះទេ។ យ៉ាងណាក៏ដោយចុះ ក្រុមកម្មករនៅមានជំនឿនៅលើកិច្ចអន្តរាគមន៍ពីស្ថាប័នថ្នាក់ជាតិ និងប្រមុខរដ្ឋាភិបាលឆាប់ៗនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។