ការជួបពិភាក្សារវាងថ្នាក់ដឹកនាំក្រសួងការងារ និងតំណាងសហជីពកម្មករចំនួន ៦ នៅព្រឹកថ្ងៃច័ន្ទ ទី៣០ ខែធ្នូ នាទីស្ដីការក្រសួងការងារ ដើម្បីពិភាក្សារឿងឡើងប្រាក់ខែអប្បបរមាឲ្យកម្មករនោះ មិនទទួលបានលទ្ធផលទេ ដោយសារភាគីតំណាងរោងចក្រ ឬសមាគមរោងចក្រកាត់ដេរកម្ពុជា មិនចូលរួម។ ក្នុងជំនួបនេះ មានក្រុមកម្មកររាប់រយក្រុមហ៊ុន និងមានចំនួនរាប់ម៉ឺននាក់ បានមកប្រមូលផ្តុំគ្នានៅមុខក្រសួងការងារ និងបានបិទផ្លូវសហព័ន្ធរុស្ស៊ី ចន្លោះពីម៉ោង ៩ព្រឹក ដល់ម៉ោងជិត ១២ថ្ងៃត្រង់។
បន្ទាប់ពីជំនួបដឹកនាំដោយលោក អ៊ុំ មាន រដ្ឋលេខាធិការក្រសួងការងារ និងមេដឹកនាំសហជីពធំៗចំនួន៦ ត្រូវបរាជ័យ ដោយសារអវត្តមានតំណាងភាគីថៅកែរោងចក្រ កាលពីព្រឹកថ្ងៃច័ន្ទ ទី៣០ ខែធ្នូ រួចមក ក្រុមកម្មកររាប់ម៉ឺននាក់ក៏បានបន្តដើរហែក្បួនមកកាន់ទីស្តីការគណៈរដ្ឋមន្ត្រី នៅរសៀលថ្ងៃដដែល ដើម្បីស្នើឲ្យថ្នាក់ដឹកនាំស្ថាប័នរដ្ឋាភិបាលមួយនេះ ជួយអន្តរាគមន៍វិញម្ដង។ ប៉ុន្តែក្បួនហែរបស់ក្រុមកម្មករ មិនបានទៅដល់មុខទីស្ដីការគណៈរដ្ឋមន្ត្រីទេ ដោយសារតែកម្លាំងប៉ូលិស ប៉េអឹម មានសមត្ថកិច្ច បានដាក់ពង្រាយបន្លាលួស និងពង្រាយកម្លាំងរាប់រយនាក់រារាំងជុំវិញទីតាំងទីស្ដីការគណៈរដ្ឋមន្ត្រី ហើយក្រុមកម្មករ និងមេដឹកនាំសហជីព ក៏បានប្រមូលផ្តុំគ្នានៅក្បែរក្រសួងការពារជាតិ តាមផ្លូវសហព័ន្ធរុស្ស៊ី ដើម្បីបន្តទាមទារឲ្យរដ្ឋាភិបាល ជួយដំឡើងប្រាក់ខែជូនពួកគេចំនួន ១៦០ដុល្លារក្នុង១ខែសម្រាប់កម្មករម្នាក់។
ទោះជាបែបណា ក្រុមកម្មករបានប្រកាសរំសាយនៅម៉ោង ៣ និង ៣០នាទីល្ងាចថ្ងៃច័ន្ទ ដោយប្រកាសប្រមូលផ្តុំនៅមុខក្រសួងការងារ នៅព្រឹកថ្ងៃអង្គារ ទី៣១ ខែធ្នូ ជាបន្តទៀត។
នៅក្នុងពិធីប្រមូលផ្តុំ ក្រុមកម្មករបានបន្តអំពាវនាវដល់ប្រមុខដឹកនាំរដ្ឋាភិបាល ឲ្យជួយដំឡើងប្រាក់ខែគោលជូនពួកគេឲ្យបាន ១៦០ដុល្លារក្នុង១ខែ ទើបព្រមចូលធ្វើការវិញ។
លោក រ៉ុង ឈុន ប្រធានសហភាពសហជីពកម្ពុជា ស្ថិតក្នុងចំណោមមេដឹកនាំសហជីពចំនួន ៦ ដែលបានចូលជួបចរចាជាមួយមន្ត្រីក្រសួងការងារ នៅព្រឹកថ្ងៃច័ន្ទ មានប្រសាសន៍ថា ក្រុមកម្មករនឹងបន្តធ្វើកូដកម្មមិនចូលធ្វើការរហូតដល់មានដំណោះស្រាយសមស្របលើបញ្ហាដំឡើងប្រាក់ខែគោល ដែលក្រុមកម្មករបានទាមទារ ១៦០ដុល្លារក្នុង១ខែ ទើបរំសាយការតវ៉ា។
ស្រដៀងគ្នាដែរ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ក៏បានរៀបរាប់នៅពីមុខក្រសួងការងារ នៅព្រឹកថ្ងៃច័ន្ទ ថា នឹងបន្តដឹកនាំក្រុមកម្មករដើម្បីទាមទារដំឡើងប្រាក់ខែគោល ឆ្នាំ២០១៤ ឲ្យបាន ១៦០ដុល្លារក្នុង១ខែ ទើបកម្មករព្រមទទួលយក។
ទោះយ៉ាងណា សមាគមរោងចក្រកាត់ដេរនៅកម្ពុជា ហៅកាត់ថា ជីម៉ាក់ (GMAC) ដែលជាតំណាងឲ្យភាគីថៅកែរោងចក្រ កាលពីថ្ងៃទី២៩ ខែធ្នូ បានចេញលិខិតចំហប្រកាសមិនចូលរួមប្រជុំចរចាជាមួយក្រសួងការងារ ឬមេដឹកនាំសហជីពនោះទេ។ សមាគមកាត់ដេរបានដាក់លក្ខខណ្ឌឲ្យអ្នកដឹកនាំសហជីពចំនួន ៦ និងមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ ធានាចំពោះសុវត្ថិភាព និងការពារទ្រព្យសម្បត្តិអ្នកវិនិយោគ ទើបនិយោជកតំណាងឲ្យថៅកែរោងចក្រកាត់ដេរទទួលបន្តពិភាក្សាតទៅទៀតបាន។
ទោះជាបែបណា មន្ត្រីក្រសួងការងារមានការសោកស្ដាយចំពោះភាគីសមាគមរោងចក្រកាត់ដេរ ដែលជាតំណាងឲ្យថៅកែរោងចក្រ មិនចូលរួមក្នុងតុចរចាដើម្បីបញ្ចប់ជម្លោះតវ៉ា។ មន្ត្រីក្រសួងការងារ បានស្នើទៅភាគីតំណាងថៅកែរោងចក្រ ត្រូវពិចារណា និងងាកមកតុចរចា ដើម្បីដោះស្រាយវិវាទទាមទារដំឡើងប្រាក់ខែគោលរបស់ក្រុមកម្មករឲ្យបានឆាប់។
យ៉ាងណាក៏ដោយ ក្រុមកម្មកររាប់ម៉ឺននាក់ នៅព្រឹកថ្ងៃច័ន្ទ ទី៣០ ខែធ្នូ បានអះអាងដូចៗគ្នាថា នឹងបន្តធ្វើកូដកម្ម ឬមិនចូលធ្វើការ ដើម្បីទាមទារដំឡើងប្រាក់ខែឲ្យបាន ១៦០ដុល្លារក្នុង១ខែ ទើបព្រមចូលធ្វើការវិញ។
ការប្រមូលផ្តុំគ្នារបស់ក្រុមកម្មករនៅមុខក្រសួងការងារ នៅព្រឹកថ្ងៃច័ន្ទ មានកម្មករមកពីរោងចក្រកាត់ដេរ និងផលិតស្បែកជើងរាប់រយក្រុមហ៊ុនផ្សេងៗគ្នា មានទីតាំងនៅក្នុងរាជធានីភ្នំពេញ និងខេត្តជិតខាង។ កម្មករខ្លះបានធ្វើដំណើរដោយថ្មើរជើង និងមានខ្លះទៀតដោយមធ្យោបាយម៉ូតូ រ៉ឺម៉ក ម៉ូតូកង់បី ឬរថយន្តទួរីសជាដើម បានធ្វើដំណើរតាមផ្លូវជាតិលេខ១ លេខ២ លេខ៣ លេខ៤ លេខ៥ និងផ្លូវលេខ ៦អា និងតាមផ្លូវមួយចំនួនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។