កម្មករ កម្មការិនីរោងចក្រ ជីន យី (Cin Yi) ប្រមាណជា ២ពាន់នាក់ នាំគ្នាបិទកំណាត់ផ្លូវជាតិលេខ៥ អស់រយៈពេលជាច្រើនម៉ោង នៅព្រឹកថ្ងៃទី១៨ ខែសីហា ត្រង់ចំណុចភូមិចម្ការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បន្ទាប់ពីធ្វើកូដកម្មនៅមុខរោងចក្ររយៈមួយសប្ដាហ៍គ្មានលទ្ធផល។
អគ្គលេខាធិការរងនៃសហព័ន្ធសហជីពស្មារតីកម្មករខ្មែរលោក សួស សុខា មានប្រសាសន៍ថា ក្រុមកម្មករ និងសន្តិសុខក្រុមហ៊ុនបានទាក់ពាក្យសម្ដីគ្នា ហើយឈានដល់ការប៉ះទង្គិចគ្នាមួយប្រាវបណ្ដាលឲ្យស្ត្រីម្នាក់សន្លប់ ខណៈដែលកម្មករស្រែកតវ៉ានៅខាងមុខរោងចក្រទាមទារដំណោះស្រាយចំនួន ១៧ចំណុចពីភាគីក្រុមហ៊ុន។
លោកថា ការទាមទារទាំង ១៧ចំណុច គឺមានតែ ៥ចំណុចប៉ុណ្ណោះដែលក្រុមកម្មករចង់បានមានដូចជា បញ្ហាបាត់ប្រាក់ខែ និងការកាត់លុយបំណាច់ឆ្នាំជាដើម ប៉ុន្តែរហូតមកដល់ពេលនេះពុំមានការឆ្លើយតបពីភាគីក្រុមហ៊ុនឡើយ។
ក្រុមកម្មករសម្រេចបើកផ្លូវជាតិ៥ ឲ្យធ្វើចរាចរណ៍ឡើងវិញនៅម៉ោងប្រហែល ១០ព្រឹក បន្ទាប់ពីមានអាជ្ញាធរខេត្ត និងតំណាងមន្ទីរការងារចេញមុខមកសម្របសម្រួល និងសន្យាថានឹងពិភាក្សារកដំណោះស្រាយនៅម៉ោងពីររសៀល ដោយមានការចូលរួមពីមន្ត្រីថ្នាក់ក្រសួង និងភាគីក្រុមហ៊ុន។
តំណាងសហជីព និងកម្មករប្រកាសថា ប្រសិនបើគ្មានដំណោះស្រាយទេ នៅថ្ងៃទី១៩ ខែសីហា ពួកគេនឹងធ្វើបាតុកម្មបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។